Nang na mun ah Kei ka mun ah

I gamsung thu uh I gen vengvung zel ua,I gam nuamkei,chidam kei,galmuangkei I chi veu uh.I genteng un eimimal khatchiat ah gamsung nopnang kinga ahi chih manghilh hile hang kilawm kasa. I gam nuam hen,angei bang kiik hen I chih leh mimal khat chiat in I om nachiat ah mohpuakna nei ihi chih manghilh keini.

I gamsungthu I gen chiang un a kua-akua mohsaktuam biik i nei uh a bang! Ahi ding him mah ahi. I muan mahmah heutu bangzah hiam I telkhiat, I sik-le-tang a hon pausak ding bang I teel uh a om tham a, amaute’n mohpuakna lianpi nei uh ahi chih leng I haihkei. Amaute’n leng a mohpuakna uh haihphial a’i di ua’m chihtheih phialphial a om kha uh a diam? Chih bangle ngaihtuah huaipi ahi. I minamsik-le-tang a dia dingngam meuh inchu thudang lading sangmah in I nampi lunglutna, ahihkaleh I nampi adia khantouhna ding thupi bawl masa leng I mipite kipahna kia hilou in I gam a di’n achidam huaizaw mai diam a chih huai hi. Huchi bang bok in I saptuam hin khotang a makai te hita leng imipite amasapen a koih a, vai I hawm chiang un I gam uh hong nuam in,chidam in, a ngei a hong bang kiik nawn mai ding chihleng a gintak huai hi.

Huchia heutu khotang, sahkhua leh politics lam a ma hongkaihte chauh khuta akingavek le hikei zomah.Amipite khut ah heutute mohpuakna zahzah mah kinga ahi chih manghilh kei ni. Mipite leng tuchiang in mimal hamphatna di I buaipih peetmah ta ua, huai buaipihna chang theiloupapa chu a hai hisak maite ihita uh hi. Nna khat peuh banghiam sep di bawl di kigenleh huai tungtawn a mimal hamphat sawm hamham te kihi zomah lai maw…

Huaikia hikei khantouhna atuntheih nang hunlem(chance) pelou himhimte hihang. I gam talpak leh ngalsaute’n hon netum I chichi ua, amau hon neek tum hia ei kineek tumsak? I gam maw Christian gam eive. Pathian hing gingtute lak ah singpi noukhat man tam kasa. Nna poimoh I neihchia a dan zui lou a singpi man ding iva piak veu uh kha eimah in chiindan a neipah mawk! Ahi dimah sapah zel eimah in le chiingsukpah zel ihih chia maw…

Zanlam deuh in eimite 1989 movie “Chiam Peellou”ka en a, ana changkang mahmah kasa. A bawltute pahtak huai kasa. Huai movie a hoih kasak mahmah kon gen mawk deh. A nungaknu’pa kha a bill toh kisai a asappa kiah va hoh.Asappa uhle eimi mah ana hi. A bill tungtang ava kanleh a sappan ana zounailou. Huai kha kon kan himhim a hi chi’n a paisan dek a Cigarette bawmkhat nuse geih se hive aw. Hiai kha 1989 a I society uh ahi. Huai hunlai a cigarette bawmkhat a mai-et theihlai uh himaithei. Hilele tuachu huaisangmah a sangzaw ta maw.. Hiaikon gen na san ahihleh hiai dinmun ah sawt omlota hilou I hi uh hia? I paidan et kiik zelzelngai hilou hiam? A hoihloute nutsiat hunta hilou hiam? Bangziak a ei-le-ei kinene a,ki netumphialding ihi ua? Bangtan kineektuah sawmlai ding?

I gam a nuam a, I ngaichiat.Muntuam, mualtuam a omte’n le a ngaichiat uh. Hun omlou sasa in hongpha tenten zel ua,hilele a gintak uh a bangkei sek. Kuamah midang mohsak ding omkei, I gam a hi a,asung a teeng eimah ihi. Nuam heh I chihleh eikhut a om himai.Bangziak a I gam lungmuang theilou? Bangziak a inn kelkong a kaan nakleh I lauhthawng uh?

I gam nusia a pilna siamna zong tampi mah I om ua, sepna bawlna ziak a I gam a omkha theilou le tampi I om uh. A maute’n I gamngai mahmah in hon mitsuan gige ua, I gam leh nam adi’n a hih theih bang uh sem in a omchiat uh hi.Sepna bawlna neite bang in damtak a ka sepna a pat ka khawl(pension) chiang in I gam ah hiai kasem ding, huai ka hih ding chia a lungngaih lai un, I gam tenna taaklou,ngaih huailou ana suak sak mawk di I hi di ua’m? Teeknung vuainung na ngawn a zaw kuaman kol-le-vai lak ah hinkhua zang ut hetlou di eive ua maw.. I gam ah I chi-le-sate lak mah ah I duh I deih kibatna mun mah lunggulh huailomah ding eive maw…

Tuni’n I gamchidam hen, nuam hen, gaalmuang hen I chihleh I mimalmal chiat in mohpuakna I nei chih theithak ni. Nang na mun ah kei ka mun ah mohpuakna nei hang. I sep I bawl a lianlua, aneulua omkei. I sepna I bawlna ah diktakna leh kingaihniamna tawh ichipih sapihte a dia hamphat huai din ah sem in bawl phot leng I gam a ngeina hong bang nawn ding.. Nang na Mun ah Kei Ka Mun ah chithak ni awle…

PHATUAMNGAI

I gam pen phatuamngai gam hi. Phatuamngai kipolh khawmna hau mahmah pawl kihi di’n ka gingta hi. I tup leh ngiim bang un phatuamngai chiat hileng, I gam uh nuam mahmah in teh kachi mai. Phattuamngaihna mah hi I gam a nopna. Hiaimah hi minamdang-sadangte toh I kibatlouhna. Hiai phattuamngaihna mah hi tunia zahlak lou leh nuamtak a hon khosa sak.

Huchia phatuamngai tak a I omlai un I phattuamngaihna mah uh ngaihsut huailua sak in omzel hi. Phattuamngaihna I chih bangchi bang in I teh(measure) ua? Bangtan a phatuamngaihna te phatuamngai I chi ua? Chihte ngaihsut thamching leh kikup huai mahmah kasa.

Etsakna khat gen zual le: Khatvei lampi a ka pailai in Rickshaw tuipua khat ka tuakkha hi.Rickshaw hektu lah numei hingal. Alampi touzomah. A kiang ah paikha chet ka hih chia, phatuam ngai in ka sawnpih tou hi. Huchia huai ka sawnpih kha meltheih bangzah hiam in hon na mu ua, a khonung in milak milak lou chilou in hon chisek uh hi. Zumhuai sa hikei mahleng ahidan ka gen a, ka meltheihle hikei. Ka kiang ah hon taikhak man ahi ka chih chiang inle hon gingta kei ua, nungakte tui di Rickshaw a hawl chi’n hon gen ua
Nuam lou pipi in hon koih thei mawk uh hi. Ka gen ut takbel phattuam ngaihna ichih gamgi omsak I hi uh hia? Ken ka meltheihlouh khat kava panpih ziak a vuallel dek mawk! Ka gen chiang a le gingta utlou mawk uh! Kangaihtuah na a honglut khatbel I meltheih kuate hiam tung chauh a I phattuam ngaih ziak ua, huai kei thilhih kha hon gingta theilou uh eidiam? Huchi bang I hihmawk leh bel phatuam ngaih chih in omzia nei hetlou ding toh kibang kasa.

Tua a tung a I gen bang deuh un meltheih hau kuate hiam in thilhihna khat pepeuh a neih ualeh phatuam ngai di tam mawk! Hiai thu ka gen ngeita. Hilele ka lungsim honkam gige a ka genlai thouthou. Programme chialtuam biik neite zaw genkha khang. Himahleh huchi bang hilou phattuamngaihna ziak liauliau a kihel a ngaihna te a hi ka gen. Phatuamngai chisi a phunphun chihte leh phatuamngai pawl in dan khauh tatak bawl chihte ka ngaihdan ahise kei.

A lian a lal, a haudeuh kha ki om inchin. Amaute kha milak a kihel man khollou le himaithei. Hilele a nei ta nana chu banghiam thil hihna a neih chiang ua, a mi di tam. A phatuamngai di tam. A tungtang uh gen di tam. Society it penpen te leh phatuamngai penpente mah bang gige uh.Huchibang a na khosa teithei nailou leng I om ua, I om den ding uh. Huchibang mite’ banghiam hihna ah bel kuamah innteek kei. Kuamah leng kilawp tak in tel kei uh. Thadah sasa mah in a lou theilou chidan a tel hileng kilawm kasa. Dai kilkal mite tung a I phattuam ngaihna khong thupi zaw lou ding hiam ka chi.

Ka awlmoh mahmah khat bel hankuan ahi. Hantou a kuante kha a tangpi a I etleh niteng kilawhtawmte ngen hiphial. A huchiloute bel innteekte muh khak mahmah dia a innlam mah tel ut teitei chih khong hizel. I gam kha hong khopi lota. A mi le kitam deuhdeuh. Huaiziak a vengkhenkhat ngial in a ni kizom a misi nei deuh simta. Huchi bang hun a hankuan telah kibang ngen. A mau han kuankuan kal a kuaman neek ding pemawk lou ahih chia, a innsung bang uh buai gawp. Tel keile uh lah I dan khauh taktakte un kaan kha zel a hih chia. Buai huai mahmah.

Tua a hoih diam ka chih khatbel den a I gen huai niteng kilawh hautou a kuante kha nitha nei in hantousak ta hileng bang a chi dia? A ziakbel a tangpi a haan tou a kuante kha I et vengveng leh a kibang ngen kuan gige sim uh ahi.Huchia niteng neekzong ngenlah hingal ua, a nitha tang uh fixed sak in peleng bang a chi dia? Hiai khah thilthak hong hidia I utdek kei ding uh chihleng a gintak huai. Hilele a fel zaw mai diam chihna leng a om thou. A ziakbel phattuamngaihna bangleng phutluih a omsang in leh phunphun sangmahin a fel zaw diam? Munkhenkhat ngial ah hantou ding omlou phial chia zahlak dekdek om hi. Hantou ding tha la geih hileng kithalawp tak ahon sem ding ua a felzaw mai diam? Chihna lungsim ka nei hi.

Kikhoukhiatna I chihte eilak chauh a om hikei. Koimun peuh a omvek hi. Eilak bel nidang in a omlou bang in ina khosa thei ua hiven. Tuchiang in hong kilang pianpianta a bang a chihna hilel. A om dingmah hi. Hilele hiai I kikhou khiatna un I society a I phattuamngaihdan te hong sukkhak chiang in a poipha ban kasa. Phatthuamngaihna in gamgi(boundary) neikei. Kuamah peuh a dia phattuamngaihna ahi phatuamngaih I chih chih thei ni. Meltheih leh theihlouh a kinga hikei, neih-le-lam a kinga hikei. Phatuam ngai pawl I hihleh a poimohna munmun a phattuamngaih ding I mohpuak hi. Dan khauh taktak kibawl khum lou in, phunphun lou a sep ding sepna pen phattuamngaihna ka chimai.

Hinkhua

Hinkhua i chih maw genchiang hak kasa. Genchiang le ka sawm tuan bok kei. Hinkhua i chih va genchet sawm nilouh sang in a hong pai bangbang phu dia kisak kholh a, huai mah a hoih theipen a phut khak sawm na hi hinkhua manphatak a zatna hidi'n ka gingta.

Mihing kuapeuh maban ding banghiam ngaihtuah khol lou om di'n ka gingta kei. Huai i ngaihtuah bang a hinding bel i ut leh duhthusam ahi. Himahleh huai ei lunggel dan chet a hinkhak ding bel i khut a om chet kei. Nna tengteng tung a vaihawmpa Pathian i nei a, Amah vaihawm dandan in hong pai mai hi. Himahleh hiai kikal a buaina lianpi a omkha sek. Khenkhat te'n thu hong gen chiang un mihing hinkhua di sehkholhsa(pre-destined) ahi chi thei bang om zel. Huchia ka hinkhua ding bang sehkholhsa a om ahileh tua ka sep lel ahihkaleh bawl dia ka kisak kholh lel bang kei a dia seh ana hilou hikhataleh chihna lungsim bang neihkhak in a om thei zel hi. Huai ziak tak ahi hinkhua bang ahia? Bangchi bang a hong kihei ding chih a genchet haknatak kha.


Ka lungsim a ka ngaihtuah leh kana buai gige khat maimai in: Jesu'n Khovel a hongpai lai in a nungzui ding mi 12 ana samkhe tuam chih i theihchiat sa uh ahi.Huai 12te'n a hinkhua ua a zuihpa uh leh a muanpa uh a di'n hunteng a zang ua, gim-le-tawl le gen lou in ginom tak in Jesu nung a zui tou den uh hi. Huchia gin-om tak a om chiatchiat Jesu' hun nanung ah Juda Iskariot in Jesu a muanpa a zuihpa hon zuak maimah ta hi. Hiai tak a ka gen ut bel Juda in a muanpa a zuihpa zuak ut taktak a diam? A na kingeihlouh himhim uh eidiam? A hihkaleh Jesu'n A nungzui ding a saplai a huai di theikholsa a a sap mah eidiam? Huchia a theihsa a ana sap a hihleh Juda a'din khasiat huai na tel in chiaq maw.. Mihing a sang a sim omlai ah thuchiam tangtunsak na di lel a gin omtak a Jesu nung ana zuihna dakkal tamlou sung lel a a thawn suak mawk! Kingaihsiat huai lomah di eive maw.. Na chi hia? A nasep teng mu, a thilamdang hihte theihpihtu ana hi ngitnget, dakkal nanung a Pathian' kha in pawtsan, Setan in a lungsim luahgeih, huchia khelha thanghuaitak hihkha hong suak mawk chu.. lamdang mahmah kasa.

Tomkha a ka gen ut zual chu huchia hiai Juda bang a hinkhua ana zang a, i hatlai nite Toupa a dia na zang tou ngitnget, teknung vuainung phial a khelhna a na puuk khate kha hiai dan deuh a Pathian'thilsehsa tangtunna dia seh a hi de aw?