Gen Zel Lai Le…..

Zanlam a New Lamka YPA Raising Day ni a misi neih tungtang in ka lungsim a luah den nilouh mawk a, tamlou gen himhim lai le. Misite leng sihni ding in zaw vengsung a huaibang programme omni a ut chitchiat het kei ding uh, amau thu hileh. Himahleh sihna in chik hunlai peuh in hon nawk thei vek ahi chih I theihsa ahi.

Misi annekma a koihkhiak hiau pen thoveng mahmah ding a bang a, maban a I chiin touh ding uh ahihmel I theikei. Huchibang kana theih khak ngeilouh ziak in lamdang kasa den chih man hi. Ban ah a innteekte toh makaite kal a kitheihsiamna om a huchi bang a hih uh ahi ngei ding chih leng I gingta lai hi. Nidang in Raising Day a misi ana om ngei ta diam chihbel ka thei kei.Ana om ngeita ahihleh tua I hih dan a na hih tou zel uh hiam chih leng ka theikei. Ana om ngeinailou a, tua a patna ahihleh hundang a hiai bang dinmun a ding hile hang tua I chiindan mah paipih suak in I nei diam? Chihkhong ngaihtuahna ah hong lut thei mawkmawk hi.

Ka genna bel sihna in innsung hong nawk chiang in I ki itna a lian diak a, hong hing nawn ding hikeimahleh a mel a tawpna ding in muh ut huai den mawk hi. Huchi kawmkal ah annekma thu a koihkhiak hiau pen nadeuh lou ding hiam ka chi. Huchi kawm mah a ngaihtuahna a hong lut bel tuma a “Phatuamngai” chih article a ina gen sihna ah hantohna pen mi sumguai in tousak ta leng bang a chi dia? Chih hong lut thak nawn hi. Lenkhopna , banghiam te bel YPA nungak-tangval mah inntekni. Himahleh hantohna a huchibang dinmun a ding hileng, kuamah subuai lou phial in a hintheih ding hi. Zanlam a misi tungtang bang en leng: A ut teng Raising Day lawm in hoh leng, huai a hoh lou nupi-papi bangzah hiam toh huan hantou a I goihte’n ana koihkhe hiau thei ding ua, ann nekma a koihkhiak zozen ngailou dia, akua akua a dia thoveng mahmah ding chihna ahi.

A tawpna ah YPA I chih khong hiaibang hun a poimoh sem ahihna manghilh keini. YPA purpose pen celebration himasa di’n ka gingta kei tinten hi. Phattuamngaihna toh chan ngaite chan ngam a Raising Day Programme cancel ngamna bangleng phattuamngaihna thupitak himai thei ahi ka chi.

Na Chi kei Maw?

Eilam a i thansak mahmah uh khat ahihleh pu-pa dan a kihoulem ahi. Sihna, manna, kithat, kimat, kisuam chihte pu-pa dan a kihoulem thei, lungpiching thei peetmahte ihi uh hi.

Kei ngaihdan maimai in huchia lungpiching tak a pupa dan a kihoulem pen hoih ksakpen ana hi het kei tageet hi.Kilemna, kitheihsiamna khat bawl mah ni, hilehle a khut khial lamte kha dan nuai a om i hi a, huai dan i va over ride pen uh dik kasa hetkei. India khua-le-tui hihna neite ihi ua, huai ahih dungzui in India danbupi in hon huam khavek ahi chih manghilh hilehang kilawm kasa. Accident(gari khong a) tungtang a kitheisiam a, lungpichingte zaw theihsiam huai. Huchi hilou kithat, kimat, kisukminsiat leh kipawngsual(rape) chihte a hiai i pi-pa dan i zat veu uh zangkhial i ta di uam ka chi.

Tua i paidan a i paizel ua leh bel mihausa, aneizou, sum-le-pai a kining chingte kiah License To Kill, License To Rapechihte piapia i ding ua'm ka chi. Na chi kei maw??

Hihna Theih

Hinkhua I zatna himhim ah I hihna(identity) thei peuhleng paikhelh chih om lawmlawm keileh kilawm kasa. Hihna kitheih chetlou in siatna lianpi hong tun theimawk hi. Hihna kithei chiante zaw koimun koimual a om in, bangsem in bang bawl le uh leng a muanhuai in a suanhuai uh hi. Hihna kithei chian ka chih in a tun khakte a hihleh:-
Kua ka hia?
Bang hih a om ka hia?
Bang ahia ka mohpuak chihte thei peuh leng I hinkhua chiat I zatna ah paikhelh chih omlou ding hi.

Muntuam gamtuam bang a I paikhiak chiang in a poimohna liandiak a bang. Midang, namdang khong toh I kipolh khak chiang in apoimoh diak. Khopi mun tuamtuam ah I om a, neekzonna chi tuamtuam in septheih lamlam I sem chiat hi. Nidang bang a eilak kia a om a, eimi ngen toh ki deal hong hinawn talou hi. Huchibang a hihna ah mi hausa leh zawng tampi toh kisaikhak in om hi. Huchibang a mi tuamtuam, tawndan kibanglou taktakte tawh ihong kisaikhak chiang in I hihna theihchet poimoh sem hi.

Khopi ah a diak in retail lam ah sem I tam mahmah ta uh hi. Restaurant a sem leng India khopi mun tamtak ah I ki thehdalh ta ua,khantouhna lianpi ahi. Huchibang a semte’ading in kingaihsiat leh mi-en a zual diak achi ua,gintaak huai kasa mahmah hi. Van tampipi man puan khat lelleng Rs.3000 man a tawmpen lam a hilai chihna mun khong ngak a om,ei lei di bang a I ngaihtuah chiang a kilei zoulou. Eizuak mah hilele kilei zoulou mawk hi. Huchi hizenpi a vaite khong shopping hong pai chiang ua,tomkha sung a singkhat-singnih man hong leikhe toihtoih mawk uh.

Lawmte khat showroom a sem a om a, a hong gen zel ka gintak mahmah ahihleh “dawr ina ngak a mituamtuam dawrkai a hong pai ua, huchibang niteng a dawrkai hong paite lak ah eilam mite kitheih baihna mahmah ahihleh a dang bangmah a etma un a vanman kigelhna(price tag) a en masa pen zel uh”, a chi hi. Huchi bang a dawrkai geigei te ihi lai uh hi.

Restaurant lam asemte leng hithou. Achangkang diakdeuh asemte bang a vante uh neek zawh tawm mahmah mawk ei! Khatvei ilut zenzen leh kha khat sum zatdan buaisia kihi simpah mawk! Mi’n lah nitaklam teng phiala nezou zeluh. Mihing apiang chiatchiat kikhiat in om e! chih vungvung hun a tam mahmah hi.

Amaute kia hikei. BPO(eilam theidan in call centre) asemte le hithou eive. BPo asep a nna le a haksa a, a lawh uh leng a tam hi. A lawh tamdeuhte bekin en neilou ding uh I sakleh ana huchi tuan kei. Vaite khong in mahni innmun pansan a sem ua, a lawh uh a mau pocket money di himai. Huchibang a semte aduhduh uh ne in adeihdeih uh a neizou uh hi. Huaite khong eng a hun zat hun ana nei veve mawk uh hi.

I gen ut takbel mi enna bei in hing ni chi ut akihi zenzen kei. Mihing I hi a, enna, huatna,deihna chihte I neih dingmah ahi. Huaite neilou hita le hang mibanglou ihi zel ding hi. Ahi a mi eng chiatchiat leng I hihna thei kawm a I en leh nuamzaw deuh eive. Vaite khawng apu khang apa khang a pat hausa uh hinchin, tunia sumzang ziahziah a a om uh a lamdang lua hilou hi. Eilak ah en hita le kua ahi tunia I lak ah a khang a khang(generation after generation) a ana hausa? I om khak zenzenleh leng khutmal a simtheih hilai di’n ka gingta hi. Eilak bel I hauhsak leh leng khang khat daih hamham chih ana hitou nilouh mawk hi. Hauhsak dan siam zoulou deuh I di ua’m? Ahihkaleh I thupi mah ahi I hihna theizou nailou I hi ding ua’m? I pu I pate hauhsakna kop tou in en bangmah muhsuah sawmlou, huai muhsuah di ahihlam ana kisinsak khalou I hi di ua’m?

Nek leh dawn aleng hithou. Mi’nek teng mi’dawn teng bang va duh mawkmawk theihluat hi. Huai hun chiang in leng kei kua? Kei Bang bang hih a om? Ka hihna bang ahia? Chihte I ngaihtuah man ua leh paikhelhna di om kasa kei lai hi. Christian I hi a, Christian hihna ah bang a I hih dia kilawm? Bangte hih louh ding chihte I omna peuh a I theih phot inchu a koimun koimual a omle hangleng I misuak ding a, I hihna I kembit zou ding ka chi hi.

Mi en hi a naa(pain) a, I ngaihtuah siam a, lakdan I siamkeileh ei-le-ei ki suksiatna in apangthei. Himahleh I mi enna a pat a hoihlam ina kipiak khakleh huai bel enman om kasak mahmah te lak a khat ahi. Huai ziak a I gen ut takbel bangsem in, bang bawl in, koi mun ah om ta le hang I hihna ding pen ei-le-ei I kitheih chet naak leh muan huai ding chih a himai hi. Ki thei chiangloupi a om theih mawkmawk ahih chia maw..