Bang A Chia?

December kha ah I lut nawnta. Banghiam khat I ut mawng hilou lungsim a hong lut pahgeih a om zel mai. Kumtawm zawk lai hileh chu puanthak ngen a kiphin hun hita. Pistol lem khat leh a kap puak phekphek man di zong a siksia bang kizuakta di dan eive. Lawmte toh buhpawl khong pua a, buuk bawl hun hong hinawnta. Phalbi zing khovot nuaiah tangsam paak chang a vasa bet hun hong tung zelta. Lungsim ngaihtuahna in khuang gin keuhkeuh a lenkhawmla kisa bang a zak hun hong hi a, aw! hun nuam I chihte’n lah sul heilou dia maw! Chih vangvang in a om phet hi.

Christmas hih I hun ngaklah mahmah leh hun nuam khat ana hitou ngitnget hi. Nidang in keibang ngial in kum ka sim theih taktak ma in kumsimna dan a ka zat ahi. Christmas hun hong tun chian kumkhat bei ka hisak mai hi. Huai ziak tak in Christmas hi ka ngaklah a, nuam leng kasa. A bultung in lenkhop chihte a kiheltheihma in leng kei khom in nuam kasakpih ding kana muthou. Lawmte toh meiphual peuh sep a, mei-awi a tut bangleng thil nuamlua ana hi. I hong lengkhop ut ta, aw bang mi a toh kituak chiahlou, aw lakloh laitak bang zaw, lenkhop ki ut tei, buai huaitak ahi. Mi’n nuamsa tak a mitsi diaudiau a la a sak lai un, ei a dia nuam chih om theilou. A sanluat keileh niamlua hizel, lasakteng, gimhuai tak a hi.

Bangchik kum tanchet Christmas nuamsa tak in ka lengkhom a, bangchik a pan a dau ngaihna ka lungsim a hong lut mawk a de aw? Ka theizou kei. Kei ngaihtuahna chauh hia? Miteng? Ka thei bun kei. Hun bangtan hiam a pat Christmas chihte’n gen neilou bang phial in kamu. Nikum Christmas zoh in Shopping Mall khat ah kava hoh a, kava thilmuh in naktak in ka ngaihtuahna a subuai. Huai Mall hi ana chei(decorate) thupi petmah uh hi. Hiai mall neite kha Christian a hi di ua aw? Chih ngaihtuana in ka lungsim hon zou mahmah hi. Kei ngaihtuahna ah Christian a hih uh ka gingta hetkei. A hihleh ba Christian loupi khat in sum hiaizahta bei a hiai mall chei ngap ahi ding? Bang lam-et nei a hi di? Christmas hun a ahun bangzel a huai ana cheina in Christian tamtak hip zou ding chih lam-en le a himai thei, a hih keileh bang?

Ka gen ut takbel mi kuahiam ei’ Pathian hing biak belou khat in ei’ sahkhua hon zahtaksak a, ei’ nipoimoh hon ngaihpoimoh pih a, sum-le-pai tampi a sen ngam lai in, ei a zang taktak, a ni kei a ahi chi ut te’n bangchi’n Christmas I lawm ua le? Eilawi in hiai Christmas bang a tungta a, a tunglel a, hong tungtou zel lai ding eivele, bang thupi om tuan a eita? Chi maimai hilehang kilawm kasa.

Vaite ka ensak a, lamdang uh kasa. A khosakna uh ei’ muhdan a niam mahmah. Lamnawl a inn hoih hetlou a tengte khong in a banghiam nite uh a ngaihpoimoh dan uh kha etton thamching kasa. Bomb a hal uh toh a innte uh a vak theithei vaksak setset a, inn hoihlouh chikchik a cheina uh kha thupi uh kasa. A neihman uh a hiseng kei ding. Kumkhat a khatvei tung ahi chih thei a, huaidia kisa khol taktak uh bang kasa. Eilawi theihdan leh innkal kitawi zen a pang uh ahihmel kua’n thei?

Hiai ka gen chiang in polam a kilang thilhihna pakta chih ka lawh veu. Mitampi inle hong chita uh. Hilele ka chi lai thouthou ding. A polam a kilang beek a I hatzohlouh chia zaw a buaise utlam kihisek eive. Bomb hal toh Christmas kituahlouhna dile ka thei kei, a kituahna le ka thei kei bok. Mimal ngaihdan ahilel ve hiaite khong. Mikuahiam in a birthday lopna a bomb hal leh a siatna omloupi a mo? Huai dan in I Honpa hong pianni I kipahpihlai in ei phur dandan a kipahpih souhsouh mai ding ahi. Hiai phallouh, huai hih phallouh I chihnak un nakpi a hong sukha hilou hiam chi ut lam ka hi. Eilawi I hih ualeh dan hau pawl I hi ua, dan bawlbawl maite ihi uh hi. Dan khauhtaktak kibawl khum ekek mai.

I ki gakgak sang un suahtakna ni ahi, ei Hon Tankhedia hong paipa pianni ahi. Na lungkimna bangbang in kipahpih in chi in, ut dan chiat, kilawm sak bang chiat in omleng a nuam zaw kei diam? Huchia kholak khong a thom ging om vengvungte mah hilou hia hong hihlimtu kachi. Koi kuam hiam ah lawmta hon bangzah hiam in kilawm a sak bang ua Christmas la khong hong sa mawk ua, kholak khong a hong kikou mawk chiang un, kenbel eh! Christmas tukum noptuak e, mi’n le phawkpha uh e, kachi mai.

Huchi kawm mah in ngaihtuah huai kasak khat ahihleh Christian kahi chi, Kei hong tan di’n Jesu hong piang, Amah ziak a tatkhiak kahi chitheite I Hondampa pianni I lopni a kipaklou, phurzoulou, limzoulou, chihmawk lamdang kasa. I behtang kithuah khawmna ding bang, vengsung kipolh limna ding bang a thilsai bang nuamsa, lungkim huaisa, bang dia Christmas lopna dia thilsai buai huai sa I di ua’m mo? I ginpa, I belhpa I thei zou tatak kei ua a diam mo?

Hiaithu ka gen chiang in miteng a di’n a sim hak chih ka thei. Chrismas lawmlou leng I lak ah I om tham. Huaiziak in amaute’n honna ngaisiam maile uh. A lawmte’ a di chih deuh a gelh ahihna ah.

Genlaile, a tung a I gentak vaite thilhih dan, a ni ngaihpoimohna uh kha lamdang kasa. Hon zou mahmah. Eilawi inleng I theihsa uh kumkhat a khatvei chauh I loptheih uh Christmas ahi. Tukum na zat khit a bei, kum nawn December 25 a lawm nawn thei pan di chih I theihsa, ba kisa manlou? Ba lawm zoulou? Ba buahuaisa? chihte ngaihtuah huai kasa. Lemna, muanna, ki-itna chihte I gengen lai in I ginna kibatpihte toh kumkhat a khatvei lel leng ann kuang sawk khawm zoulou, sawk khawm theilou (?) ihihleh bel khamangthang I veina uh koilam veikha I di ua’m mo kachi. Khamangthang vei dingte zaw a gindan kibangte mah ki-it tuah masa a, khutkhat, khekhat a dingkhawm masa zaw dia kilawmte eive.

Eh! Lawmpa hong hehchina phongphong e nachi sim hia? Ana sim suk lai mah dih. Nek khawm a thupipen ahi kei, huai sese leng a chi ka hituan kei. Christmas kana lop masak khakpen huchia a kilop ziak a, huai gen mah kahi. Huai sang a thupi zaw a lop didan leng ka lopna masa a hihziak hinteh ka ngaihtuahkhe bun keilai. Huai sang a thupizaw a lop didan genthei te’n leng gen zel le maw. Nekkhawm a thupipen a hikei ka chih ziak in thupi kasa. Biakinn bang chikmah a a dim ngeilouhna Christmas nibek in a dim teitei sim. Koi mun peuh ah. Huaitak ahi ken lohching kasak. Kei bangbang akumsim na dia kikhawm sekte adia Christmas nibeek kikhop a omsam hi’n maw. Kei bangbang a mizawngte a dia huaini chauhmah eive a hausate’ zal zou a, amau sum thoh khawmsa ne a nuamtak a ka omni. Chrismas chiang chauh a sane khate a dia ngaklah huai thou eingal!!

Duhgawl ziak eive na chi hia? A dik mahmah ve. Duhgawl ziak a ann ne di chauh a kuan hial dia lah kisuanlah dan kitheisam ahih chia, ann ngakna a kikhom a kava tel zel bangle la tampi ka theihloh a, thutak bangzah hiam ka theihloh bok a, phatuam kasa thou. Huai thutak tamlou Chrismas ni a kazakteng zang in hoih deuh ka sawmni in chu ka innkuante lungsim ka zou mahmah tave. Banah lenkhopna bang a namsim philphel kawm in khuangpu in le ka pang ngam top aka! Chrismas sa nekzawh hikeileh zaw panglou lai di hing a. Huai ziak eive Christmas nekkhawm om lou ding a chih chiang ua poi kana sak veu kha!

Kua peuh Christmas 2009 zatnuam!!!

Zelzel in

November 12, 2009 ni ahi. Ofis apan leave kanget Nov.13 apat himahleh tunin hong kipansak mawk ua, leave nget hak toh ngetnop hun kikhai e chihphet in a om hi. A dah huai chu hilou phot.

SSPP FCte’ kimawl khatveile enkha nailouh chi in tunia JMC ah ZOD toh a kimawl uh kava en hi. Nuam panpan chihleh SSPP FC in a zou kei maimahta ve ua. Zoule uh zaw kinase kha di hiven chihphet in a om. Nuam himai!

Kimawl enkhin tung. Tuzan a zin di ka hih ngalleh chi’n ka van ka bawl hi. Vanpuak dite bawlkhin chi lungnuam tak a om. Nitak ann bang nepah zozen. Ann nekhin phet zinpih di khat pen in hong call thithe, kilawp sim a diam ah(?), keile lawmte khat man nailou himahleh a mun lam ah kimu maini chi’n ka kuankheta hi.

New Delhi Station tungta. Ka lungsim ah banghiam a kimlou om ahi chih thei, mahleh bangchet ahia chih ngaihtuah khezoulou in ka om dedu nilouh hi. Ka train uh 11:45 a taikhe di, announcerte bang in a hun sehsa zui a tai ding chih khong puangpuangta. Keilah ka lungsim khat nuamlou, bang in nuamsak lou a chih ngaihtuah khethei zoklou lai. Ka puak gikagik keihkuih in ka om nilouh hi.

Dak 11PM hong gingta. Ka bil hong puaklek, ka bag hong vitvit, a sung a ka muanmawh na mun va zut thiamthiam, MAIZEN!!! Ana omlou peetmah! Buai huai hita. Huai omlou a bangchi zin di? Buai lolou di ka maw? Ka khuakbang sa vitvit mai. Inn ah roommatepa Suasuan om di chi phone pah chenchen ana pik up geih a:

“Hello”

“Suan, inn ah om mo?”

“Hi, bang a?”

“Puankhaina ah ka jean kikhai na mu hia?”

“Hi”

“Huan jean khekol va sawk mah dihle?”

“Ka enlel”

“Na mu hia?  A om hia”

“Om mah ei”.

“Maizen!! Manghilh khamawk, bangchi kipiak di, kua toh om e?”

“U Khen toh om. Na paikhe dekdek ta uh hia? Konpe man lai di ua’m?”

“Auto hong la unla, a beizahzah ken kon pe mai dia, hong delh maive ua maw” chi’n phone ka koih a, sana ka etleh 11:10 ana hita hi.

Sana enzel, phone zihzeh. Nidang a chu train delay di kilau peetmah, tunia chu delay leh chihkia ngaihtuahna a om himai. Buaise chu ka hi peuhmah dia, ka ding dedu a, lungsim ah thuumna kanei mai hi. Hihtheih dang omlou ahih chia maw.. Ka train uh hong kidawhta, vanguang zou, phone zel.

Platform ah ka diangkhe phei nawn a, ka daktouhleh U Khen ka mu bang zaw, nidang a ka muhmuh sa himahleh a hoihlaw tuamse abang! Mifeltak ahi chih ka theihsa ahi, a feldiak abang! Va delh chenchen a va kawi tonton a ut huai hial. Hong delhsuk vitvit a ka kipiak zawh un ka train uh awl in a kikhin pah nelnel hi.

God works miracles! Kachimai hi. Thuumnate ngaikhe gige chih nak dik hina maizen e!!

NB: ka kipiak tuah chenchen pen uh chu ka gen ngam hial  dah mai di aw …