Gari thak akhu

SESE MAI

Bang a chia banghiam phatuam ding I sepsawm chia banglam hiam ah vangtahna in hong zui sese ade aw? I gam a dia hoih nasep sawm bangzah hiamte Dt. 11-01-2010 in lamlian bawl di’n Guite Road lam gari bangzah hiam in kidelh huan tou uh hi. Lamka khengtou pan chih ding in Mata khua ah accident mawk uh hi. Lei bawldia Guite Road zuan dek lai Hospital hong leh tun pawl bang om hi.

Ka gen ut takbel banghiam sepna/bawlna khat peuhpeuh I sawm chiang un gelkholhna kisam deuh I ding ua’m? Pilvang zoulou deuh I ding ua’m? I tamchiang ua khoni ngai lou a, mahni chiak ut dan chiat a chiak a, kithulak mel omlou a, mahni thu tum chiat a I omziak uh a’i diam? Nahoih sem utlua hizenpi a semkhalou a om theih ana himawk mah e. Pilvang tak in I mizat dingte, a tangpi in a khut ua tampi hinna tampi kingakna I driver zat dingte bang I houpih masa na hiam? Amaute I deihdan I theisak na hiam? Chih lamlam bang ngaihtuahna ah hong suakkhe thei mawk hi.

Sese mai maw…..

Saupi I Tungta

Saupi tungta ihi I chih chiang in koimun hiam a kipan bangtan hiam paita, pai zel lai ding chihna ahi. Koi a bang pentak gen ut a de aw na chisim hia? Ana en suk himhim mah in aw. Leitung hi ana kipei pei a I theihlouh kal in na tampi mah ana kikheng man hi. Nidang a thil I ngaihtuahna ah I sungtuahnate tulai in I niteng hunzatdan leh van zat a hong suak maimah ta hi. I kipat na mun a pat in saupi zaw ana paita mah ve hang aw chih in a om hi.

1980’s lakvel in Lamka ah TV inn chih in nei chih genlouh vengkhat a khat khong ana om lel hi. Huaile vengkhat ah a om hetlouhna bang leng ana omlai tham hi. Hiai hih 90’s bullam tan in leng a dik tou lai hi. Huai hunlai in cycle neite bang aki eng mahmah hi. Cycle nangawn miteng neihzoh ana hi hetkei lai hi. Cycle neih bang gari engine a taithei sangmah a deihzawk phial hun ana om mawk hi. 90’ World Cup laivel in TV neite bang ana lun mahmah ua, a innteekte om na di omlou phial in TV en inn dim phitphet vengteng ah a om hi. Veng khenkhat ngial amau veng a TV nei a om louh ziak in Ball peek en ut in a veng naipen ua’h TV en di’n a kuan uh hi. Huai hunlai in bel TV neite bang MLA bang hial in a lun uh hi.

Tu’n huai hunte I et kiik chiang in, huai bang hun Lamka ah ana om ngei sam hi a chih va ngaihtuah khak pen zuaupi leh haihuaipi hileh kilawm phial hi. Lamka chauh hilou in a kim-apam a khua/veng omte leh I zodawnte tan in kipum khek hi. Tu’n Lamka ah TV I chih innteng phial in I neita. Lamka chauh hilou I zodawnte ah leng TV neita uh ei. Electric a tung kei na a, Ni (sun) thahatna zang in ei et bangbang en theita uh. Nuam! Cycle hinawn lou in Bike/Activa leh Car tan in I khopi a tuam hithet ta hi. 80’s lak khong a hong na omlouhsante hong thoukiik thei uh hileh tu hun a Lamka pen haih phial ding un ka gingta hi. I theihlouh kal in ana kikheng lua a, khanlam I manawh zel a, saupi I tungta hi.

Mobile eigam khong ah a om ma, film et te khong a I muh tunglai in, eikhong in kizangkha zozen di’n I gingta kei phial a, mahleh tu’n pauthei tungte nangawn in mobile pen I pakta mahmah theita mawk hi. I khang hat mahmah a, a khen chiang in hat lozozen in banghiam kankhak nei I ding ua’m aw chih ut huai zozen hi. Nidang in poimohluat ziak in mobile I nei a, tuchiang in bel noptalna a bang mawk hi. Our necessity becomes a luxury a chih theih phial mawk hi.

Computer taget, computer bangchi bang melpu a, bang teng kihih thei a chih nangawn I theihma bang ki gen uang himai. Computer neileng lai bang sim ngai nawnlou di khong kisa, I computer in hong hilh ziahziah di khong chia kingaihsun. Theihlouh luat man mah ana hi. Computer bangleng eilam hong tung dia kigingta lou, tualah I thil hihna khat peuh computer siamna zang a hih hita mai. Tuma deuh kum bangzah hiam lai a zaw a computer va neih thutuam hizozen leh a mukhate bang kingaisang petmah hi’n maw. Lawmte khat in apa ofis kai phai ah va zui, hong tun a ka pate’ ofis ah computer kava mukha chi kingaisang himai. Dot theihteng kiban dotsuk zial. Huchi khop a niam a pat kum tomkha sung a tua dinmun tun pen Lamdang leh hat kasa mahmah hi. Computer kichi bangchi bang melpu ahia chih I theihma toh tua I dinmun I et chiang in saupi ana kitung hita e a chih theih hi.

TV ah kiik nawn lai le nidang in tua I et dan a et di tam kei. Cable chihte omma ahi. Doordarshan Channel khat kiakia om huaile vaite a ngen hou chikchik hina inchin, ki-en peih mawk hive aw. Chitrahar, Chandrakanta, Mahabharat chihte bang chu tulai pauleh hit himai. Chandrakanta leh Mahabharat suah hun bang kikhop hun toh kituak chitchiat heh huai himai. TV va et nate bang a kikhop ut zawkmah ualeh chu kiheh vilvel hive aw. Pathianni chiang a dak 1 film om inchin huai bang ki en ut thei petmah. Cable om tunglai bang Star TV kichi mawk a channel Star Movies, Star Sports, Star World chihte ziak a diam ah. Huai hunlai khong a inn dim zenzen a TV en om a, phunlou paulou a om innteekte thupi uh hina e chih khonung in om phing. Tuhun in ahihleh et di a tam a, mahni inn chiat phial ah I enta a, TV en di lengla khat-le-nih I neih hun in I ning thei mawk hi.

VDO khong kichi suk. I theih thakleh Video ana hi maimah. Huai lai a tua I CD playerte omnailou. VDO Cassette te bang tua tape ate mah bang zozen lian a lian maimah. Kuahiam Cassette tawi a TV neite inn a lut I muhle chu kidelh pah mai. Huailai a te a buai huai dan chu et dek teng a abul a zial ngai. A zialna le hat a hatlou. Ngak chenchen ngai hizomah lai. Tulai in huaite khong a nei a omlai diam ah. VDO etlai a a lin sim leh a head niin kichi banglouteng toh a khoih theite’n hong khoih uh, kingak zeizai mai hive aw.

Kikhek ding I gengen a, I theihlouh kal a kikhekna om gige ahi. Kikhekna I chih I theih bang I theihlouh bang in ana tung gige a, bangmah kikhekna omlou I sak kal in saupi ina tungmanta hi. Khovel puak khiat leng ahita a, a huihnung ahih ziak in kikhek ding mah ihi. Kikhek theilou hileng thankiikpi (dinosaur) bang a I mang (extinct) khak ding uh a lauh huai lam ahi.

Cycle apat Pulsar/Activa ah I lut a, Doordarshan a pat Cable ah, Computer Age ban ah Mobile Culture I tungta hi. Saupi paita ihi a, I pai zel lai ding. I damsung teng kikheng tou nilouh ding ihi. Mobile omtung in a pau theih maimai khong I nei sasauh ua, tu’n chu MP3 leh Bluetooth omlou zaw I chita. Computer mah leng a lian betbut mun lianpi uap ding I deih nawn kei a, a neu fel litlet ding mah a hinawn zel hi. Tuhun a I kikhekna chiangchiang ah neihsa zang a kikhekna I chithei a, denchiang in credit card culture bang tung hial le bang I chi ding ua’m aw chih bang a ngaihsut huai mahmah hi.

Hiaibang a I khantouh zel lai un theih dia hoih bel Electronic van peuhmah a zangsiamte a di’n khutzat tangzang tak ahi thei a, a zangsete’ a di’n bel siatpih loh hithet theih ahizel hi. Huai ziak in I khantouh kawmkawm mah in a dik in I paina hiam chihte et zelzel ding ahi. Saupi I tungta a, I pai zel dia, a sauzaw sem I tung ding. Huchia I paikawmkawm in I khandan in man (value) a nei taktak hiam chih bel a khang mimal chiat ah kinga ding hi.

La, Aphuaktu leh Asatute

I pau-upa khat in “Thu I chih La, La I chih Thu” ana chi hi. La in mihing hinkhua ah mun poimohpi a luah a, nna lianpi leng a sem thei hi. Bangdia thu I chih la, la I chih thu ana chi uh a de aw chih lamlam bang ngaihtuahna a hong lut mawk hi. Thu I chih chia gen thoh hi a, la I chihchia sak thoh hizel. Gintak dan maimai ah, nidang lai in I pi-le-pute’n thu khat peuhpeuh a gen chiang un la kaih bang hial khat in ana kigen sek uh chih kaza kha ngei hi. Zu nekhawm bangle a la in a kihou thoh ngaingai sek uh hi. Nungak leh tangval kihel bangleng la kisak khum hial a, a la lam a kibei uh ana hihtuak hi. Huai ziak a “Thu I chih La, La I chih Thu” ana chi uh ai diam? Chi ut phial ihi.

A bangteng hileh hiai pau-upa kikup sawm bel I hi hetkei hi. La in mihing hinkhua a mun poimoh a luahdan, huai a munpoimoh luah zou di khop a laphuaktu leh La, ahihna bang a I ngaihtuahna paisak thei ding zen a satute genleng chi ihi.

Lungkhamna hiam banghiam puakgik na nei ngei hia? Na kiang a om kua hiam in hon khamuan a, a hih theih bangbang khamuanna thu hong genpih a, na lungsim ah a lut het kei. Na bil in na za a, himahleh na ngaihtuahna zaw suang bangmai in a tak lai a, kua’n bangteng gen mahleh a lut zou mahmah kei hi. Huchia lungkham mangbang a na om lai in kua va khah a na theihlouh in la khat na innsung ah hong ging hiauhiau a, na na ngaikhia a, na chimul bang a thou sungsung hial hi. Eh! Hiai eivele ka poimoh. Ka dinmun toh kituak geih e na chithei ta a, huai la kia bang na sungte a dia luaksuah huai di khop in na lumlet peih tel hi. Hiai eive La’ thilhihtheihna I chih. La khat ziak in na puakgik a mangthei a, la khat ziak mah in nang dinmun toh kituak salua in na kapkap thei hi.

Kipahna lam a leng hithou. Kipak ka hi chih gengen lou in a thawmging lel a leng mi’ theihtheih di’n a om theihmawk hi. Huai bangchi’n I thei dia? La tungtawn mah in a theihtheih zel hi. Mihing a dia hunseh teng a zat theih dia I neih chu La ahimai hi. Hunteng ah biakna khotang leh thil hihna khat peuhpeuh a La tellou a banghiam hih vang mahmahte ihi a, huai in La’n I society ah mun poimoh a luahdan genkha khin mai abang hi.

Huchia banghiam I hihna toh kituak ding la I neih gaihgaih khong a hi di mah in na koih kha ngei hia? Koih khak baihlam takleng ahi. China thupil khat in “Tui na dawn chiang in a tui hong kipatna naak ngaihtuah zel in” ana chi hi. Huai bang in enleng La khat peuhpeuh nalhsa chi mawk bangmah ngaihtuah saulou ina hilim uh hiale? Ngaihtuah zek hileng, ngaihtuah ding tamkha ding ahi. Nang nalh nasak lai a na dinmun chet ah na la nalhsak phuaktu leng ana om ngei chihna ahi.A kipah huai lam ahihleh hoihlua. Huai hilou a kingaisia a, na lungkham lai a hong hehnemtu leh tha hong petu bang a hihleh a phuaktupa thuak/tuah maimai kei nan chia chihtanpha hong ngaihtuah khesak thei mawk hi. La khat peuhpeuh Pathianla hihen aw, Zawlla hitaleh a phuaktu in lungsim tampi seng a ana phuahte zaw hoih lua eive maw. I hinkhua bang hong peizou di khop a la hoih leh thupi ana phuakte zahtakna lianpi ipia hi. Lapau thuuk taktak, kam a gen mai a genkhak batlouh di khop a lapau ana kizang I la luite manpha ahihlam theithakni. Kemni. Bitsakni. Lailam khan na dia la in mohpuak lianpi nei chih theini. I lapaute kepbitna omsun I laluite kepbit ahi chihleng thei thakthak ni. Huai bang a lapau diktak leh thuktak zang a la kiphuak kizaza nawnlou maithei ahi.

Tua I gentaksa teng banah La ahihna bangbang, a phuaktu phuahna san toh kituak di khop a hong sakhe theite leng a thupilua uh. I zahtak a pahtawina leng I pia hi. A aw bang uh a la thu toh kituak in hong bawl ua, a nem dia kilawmna mun ah nemsak geih, khauhsak zel a thu toh kituak a, huaitak in ahi I lungsim a zoh geih zel kha! A ut dandan un a thu ngaihtuah lou in hong kikou mawkle uh nalh hetlou di mawle.

Lasa chiatchiat le lunglut tak a sa toh lunglut khollou a sa kha a ngeikhe tute’n kithei mahmah zel hive aw. Hiai mipa/minu zaw la asak chiang in a tha-it a, a lunglut a, a lasakte ngaih a nuam chih pawl bang kinei thei hi. Huai I chih theihna di’n bel a satu khut liauliau ah a kinga hi. Huchi bang a lasa tengteng lak ah ngaihsang huai kasakte ahihleh lapawl sate ahi thethup hi.Mimal a album bawl hiam ahihkeileh a dangdangte’n bel banghiam bek a mu kiik pahpah uh hi. A CD/DVD a zuak di ua, producer toh a kihouna zahzah un sum a lawh mai ua, amau lawi bel lawh nei a lasa I hisak phot ding.

Huai hilou a Pathian Phatna lapawlsa a I chihte bel phattuamngaihna liuliau ahi thethup a, huaina taka hi kana ngaihsanna. Lapawl siamtak a sak khiat theihna din hun tam a lut a, mahni nna poimoh tampi nutsiat a ngai hi. Mimal khat kia siam ah kingalou ahihna ah hun tam a lutdiak hi. Album a bawl chiang un BYF Project banghiam tangtunna ding bang ahi nuam mahmah. Amau a choir memberte’n mimal a hamphatpih di nei hetlou mawk uh hi. Van ah lawman a tan di uh a om na ve I chi gaihgaih sek na ua, lei a omlai ihi a., mihing hilai saam ihi. Banghiam lam-et neilou uh hilehleng piaktuak uh ahi. Gensiat sang a pahtawina in amaute tha pezaw ding ahi chih I manghilh louh ding ahi.

La in kei mimal hinkhua a nna asep dan ka genlang cheuh ut. Pawl X ka exam kum ahi a, Science paper II ka exam kha a fuhkei petmah hi. Ka marks ka simsim chiale a didan omlou. Exam nonlou a drop dia kisa, ka lungsim manta. Ka U’kiah ka gen a, bangpi hon kum kei. Exam sawm nawnlou chi’n laisim ka kholsanta. La ngai maimai di ka chi’n Liani Parte lasak “Damna Gospel” chih album ka ngai hi. Huai album a la khat ;

“Lunglel ken ka ta aw, Nang bek a om hikei teh
Na siang ah vabang hong leng zel ning e;
Thahatlou thahat sak, lungkhamte nopna pia,
Ka laukha vabang hong leng zel ning e.”

Hiai la kava ngaikha a, thanem a lungke tak a omlai banghiam in hong phu tetet mah bang hial in ka langaihlai nusia in ka lehkha ka sim nawn thei mawk hi. Lamdang! Hiaila va ngaikha lou hileng ka exam lah pe nawnlou di, a kumnawn in ka exam tatak na diam? Exam hita mawng lengle bang ka chiphet diam ka ngaihtuah bun kei. La khat in ka hinkhua a bawl ka chi hial hi.

Tumlam gamte leh vaite khong in la a hihna tak ana theikhe masa ua, la in hinkhua a nna lianpi leh poimohpi sem ahi chih ana manlua ua, a lasiamte uh, ala phuakte uh leh a la mahmah bangle ana pahtawi khin thamta uh hi. Ei naihpen ah tuma sawtlou chik apan Unau Mizote’n a hong theikhe nawn ua a lasiamte uh pahtawina thupi taktak a nei zel uh hi. Eilawi inleng huai huih I dik dek panpan a, 2007 in SIMAS minvuah in bangzah hiamte ina pahtawi ta ua, mit in a mun ngei ah ka mu kha a, nehnou huai hial hi. I lasiamte’n chikmah a hiaibang mudia ki lam-en lou a hong mu uh zaw amau lah kipaklua khasia uh kipah huailua hizenpi eibangle ana kikhase dek mawk hi.

Tu’n huai nung hichidan a lasiamte pahtawina hun kizatlam ka thei nawn kei hi. Khatvei a la uh I ngaih a I hunsak louh mah bang un khatvei pahtawi kia hunlou ahi chih thei thak ni. Huchi bang a kipahtawina in I lasiamte kal ah ki demna sangsak dia, la nalh leh changkang tampi I neih lohna hong hi ding ahi.

Eimite late local channel ah I ensek a I zahpih a, ngaihtak kei ichi veu ua, a ngaihtak a, I zumpih louhna di’n bangchi bang in pan I la a le? Tu kumthak 2010 I lut toh kiton in I lasiamte pahtawi dan siam ni. Hundang a I hih ngeilouh ahi a, I siampah kei ding. Kikhekna I gengen lai in La lam ah hiai bang a kikhekna in I society a dia contribution lianpi nei ding ahi chih theini. La I khantouh chiang in I lailam(literature) leng khanna lianpi hong tun ding ahi. Tukum thak ah la lam ah bangtan hiam bek kikhekna I nei zou diam? I lasiamte I etdan ah? Kilamdanna na tun thei!