I gam chia i kisaktheihpih mahmah, amin nangawn bang a sap ding ahia chi a i buaizen LAMKA ahi. Akhen in Lamka i chi a, akhen in Churachandpur i chi a, akhen in mindang deuh in i sam nalai set ua, it huaitak leh deihthoh huaitak zaw hi di aka. I kituh vingveng ua, I kineisak chiat ua, kou’ a ahi chi ut in i dim a, kipahhuai lua.
Gam nuam leh kilawmtak Lamka, neeklim tak, huih siangtak leh tuisiang limtak luan(ngei) na Lamka ahi. Nidang in a thoveng in a galmuang a, nitak ut tantan pawt theih hunlai ana om. Ka naupan zawkdeuh lai in kumkhat World Cup kimawl ding kipat ngakna in nitak in Light House tan ka va walking lamtak ka theilai. Kuamah kisual, kidelh, kivua chihte omlou in, mahni nna chiat a i buailai uh a om. I pildeuhta ua, i changkangta ua, i pilkawm leh changkan kawm mah in angmasialna in i dimta. Hunkhat lai a Lamka a itna muh di’n a om nawn kei. Hunkhat lai a Lamka a galmuanna bet daih in a omta.
Nidang sang mah in gam it i tam zawta, gam puah ut a kipei i tam zawta. Gam it a puah dia kisa te’n a koilam puah kha i ding ua le? Mipi muh nailouh dia a guuk a puahphot i hi uh hia le? I gam a it a tam a, a puah ding a tam deuhdeuh leh tenna taklou, it taklou gam suah dek maimah hilou ihi uh hiam? I gam itna bangtan ahia le? Bangtan a kipan a, koitan tun sawm i hia? Mi’ khopite kumkhat inle bang hiam kikhek lamdang zek sam ve aw. Ei khopi ba kikhek theilou ahia? Kum 3 nung in innlam pai le, i lampi kibang lai, a na sezaw zomah. Innte ana luizaw, amite ana luisuak zaw..
I khopi ah inn bawldan na tan planning bangmah om kei zomah ve aw. Khan sawm hetlou, tua i om dandan a om nilouh dia kisa i hihle bel poikei lai. I khang zel dia, taithei hong kibehlap zel dia, i lampi in hon daih kei dia, gari a tai sunsunte lah banghiam laplouh di lau mah bang in a kikhoh vengvung di ua, i tawmnak kal un i kiphulum ekek di ua, pupa tawndan chi in i kihou lemlem di ua, huaiteng chu i maban hiphot peuhmah eive.
Bangziak a I gam chia I kisaktheihpih mahmah, i gengen, mundang a om te’n le i ngaih ngoihngoih gam, ei ngen puah, hichitel ahi di? Bangziak a i lampite rong nuh a nuh thoh mai sek i hi di ua? Mahni innte zaw hoihtak in puah ve hang aw. I huangsung lampite leng lamlian sang mah in hoihzaw ve aw.
I gam tenna taak gam, gamnuam suak hen i chihleh chu “Neitu taktak hihna mohpuakna” lak ngam ngai kasa. A neitu taktak, kei gam, kei lampi tot ding mah bawl, kei taina ding lei (bridge) mah bawl ka hi chih ngaihtuah vek hileng bang dia i lampi te paina taaklou lampi, i leite tot taklou lei suak ding? Ets: Mahni innsung a van kilawm lou deuh, khek ngai omte, i puahpha a, i bawlhoih zel. Adiklou om i sakte i sudik zel. Neitu hihna i lak ngam ziak ahi. I compound te bang nei law zozen in mi’n niin neng kha hon paihkhak leh phun pah nulnulte i hi zel hi.
Mahni innsung a vaihawmna diklou, paikhial om hi a i theihchiang in, koi a diklou a, bangchih leh dik nawn thei ding hiam chih sui a, a dikna di’n pan i la hi. I gam kivaihawmna ah Neitu taktak a kingaihsun a vaihawm I om kei a, kei paina ding lampi hikha kei, kei omna ding mun hikha kei chihna toh sem a i bawl ziak in i gam se deuhdeuh suak hi. A vaihawmtu toh a mipi toh i mohpuakna kibang chet chihlam himhim i ngaihtuah ban kei nalai hi. Hon bawlbawl phot le uh i chi sek a, huai di hilou in, ei zuihna di mun mah ahih in chu, a bawldan bangkim etkai a ngaihdan piak hun a piak kha mipi lam mohpuak ahi.
Vaihawmna, lam khat peuhpeuh a pai diklou bawldik ding leng mipi mah ihi. I gam i kineihsak a, i gam i it leh dikloutak a vaihawm a. dikloutak a gamtangte bang dia en mai et-et ding? Bangdia amau te’n khotang hi in, sahkhua hileh innteek na la thei ding? Huai dan a om dia i phal a poi i saklouh lai teng, a nasep dan uh hoih i sakpih a, i pakta chihna himai ahi. Kineisak i kisak mahmah lai in kineisak zoulou hikha maithei ihi. Neitu hihna taktak lungsim i put chiang in tua a tung a i gente i ngai poimohta dia, i mipi development fund ding teng zang theltangte chief guest peuh in i samsam nawn kholkei ding hi. En kithuahpih kei le’ng eilak lou ah tatuan lou di ua, a lampi dikloute uh hon bawl lem mahmah ding uh ahi.
Mahni inn tenna taklou i bawl peih a, i puahphat peihleh bang dia en i gam puah a bawlpha peihlou ding? Gam it tamna penpen gam hiphial din ka gingta. Aneu-alian in mahni chi-le-sa it in ngaina chiat hang. Hiai zah a gam it tamna gam puahlouh a om chih bangzaw zum huaipi eive mo?
I gam ah rehab centre a tam a, huai in i gam dinmun a gen chiang mahmah. Christian ngen tenna gam chichi mah le hang, i omdan te’n a taaklang thouthou. Huai bang a khamtheih hih zongsangte enkol dia kipe khia mimal/pawlpi/NGO-te i pakta a phat huai i sa. Huchi kawm mah in a theih ding ua hoih bel thagum in kuamah i bawlhoih theikei ding chih ahi. Thagum a bawl diktheih hileh centre ah lut a ngai sese kei ding. Thagum a kisoisa a kisoisa lum, a inn kuante’n a veh chia amah chauh toh kimuh sak phallouh chihte i chiindan uh ahi. Hiai chiindan kilawmloute gen in om veu. Mohpuakna, neitu taktak bang a i lakleh a innkuante a muh ding i laukei bok dia, i etkol dan a lungtunlouhna omte a innkuante kiang a pan i thei dia, munnuam leh kibawl thakna mun taktak i suahthei zomah lai ding hi.
Gam itna taktak toh nna i sep chiang in hinna manphatdan i thei chiang zosemta dia, mihing hinna thunei tang, sum nei tang chi’n i laksak nawn kei ding. Hinna tung a thuneipa chauh in hinna lak theihna thuneihna nei ahi chih i theihchiang un kivuaklup, kikaplup chihte’n i gam a nuseta dia, huan kikepna tuamtuamte a i kepte vuaklup chihte leng a bei bok ding. Mihing khat bangchi bang teng in khel in lian leh leng Nampi khat a dia lauhhuai (threat) hithei ding in i neih i lam un chin nai ka sa kei. Huaiziak a policy kibatlouh ziak chih khong a kithah kimatna pen i tawm nakkal ua poi kasa. Hinna it huai lua leh pammaih lua ahi chih leng mohpuakna taktak, kineihsakna taktak toh nna i sep chiang un i thei chiangpahta ding uh hi.
Huaiziak in i gam khangtou henla, mi’gam bang hen i chihleh a sung a teng ei a mipite mahmah khut ah kinga ahi chih thei in, gam itna taktak toh, kineihsakna diktak toh i gam a dia i SIN a, i SEP a, i ZUUN chiang in gamnuam leh kilawm leh tenna taak gam bawl ding ihi hi.
© H.Liankhanlam and Tongzam Magazine
