Christmas Hun A Hong Tun Chia’n

Hunte nite ana pai zel in, I theihlouh kal in kumbei ding kuan ah I ding nawn ta. Kum khat sung I chih ana sawt kei na e. Buai kisa, kum beima ngeingei a kitun dingsuah I sawmsawm kal a, ana bei nawn man der aka! Kum thak ah chih phan-phan zel di hinteh! Kumthak in bangtak hon puak dia I thei kei. Ahitak in a kum in banghiam hon puak hia? Ei bawl? Hiai kikal bangle ka buai mahmah khat ahi nawn zel ve. Kumhoih, kumsia chih khong ina nei ua, a kum hoih taktak mah hia? A kum sia mah hia? Hiai te ken gen haksa sa mahmah hiveng aw.

Neulai khong in kumbul skul kai apat Christmas suty ding I ngak chenchen a, haksa hive aw. Sawt hive aw. January, February te khong I sim theih tung bang a khut mal kuai zenzen a kisim sim mai, December bang gamla lotel keikoi sak a om phet. Ngaklah petmah a I ngak-ngak December hong tun chiang bang a zaw, nuam lotel sam eive. Bangtak ahia nuam kasak? Bang in December hon ngaklah sak ahia? Hiaite dawnna di ka thei zou nawn kei mawk! Skul suty ding ngaklah a, suty hun hong tun chia lehkhasim ngailou kipahpih ka hi hia? Christmas sapok kuih khong nuamsa ka hi hia? Gamlak a sihzou khiak a kuan nuamsa ka hi hia? Lenkhop nuamsa chih dia lah, huai hun bang a Christmas la saksuak theih khatle kinei nailou hi a.. A khuahun in a puak khiat ahi diam?

A khuahun puak khiat dia lah, I pianma a pat Christmas kilawm, tunitan kilawm paisuak lai. Chrismas sapok lah kikui thou lai. Lenkhop lah om thou lai. A chihleh bang dia nuamsa hetlou ka mawk di? Bang dia huai kilawpna om hetlou ahi di? A tom a gen in, ka thei kei. Ka naupan lai ziak, ngaihtuahna chiimtak ka neih nailouh ziak leh lungkham, haksa chihte ka theihphak nailouh ziak a nuamsa hilim di’n ka kikoih mai. A dik diam?

Neulai ka gen chiang in Christmas hun chauh nuamsa ka hi kei. Hun dang tele nuam ve aw. Lawmte toh khavak nuai khong a “Ka gaal a singsat kua na hia?” chihte khong kimawl a kidelh zaizai bang, L-O-N-D-O-N chihte khong gen a kikou ekek lai khong mah nuam! Kei muhdan maimai hia ka theikei, nidang lai te’n khavak chih khong le tulai a te sang in gen neisak zaw uh kasa. Ana thupi diak, romantic diak bang in ka mu. Eimi tangthu gelh om sunsun te’n nungak-le-tangval tangthu a gelhchiang bang un Full Moon chih om lou a tangthu kimthei lou mah a bang. Le nuamdiak se toh kibang kasa.

Tuchiang in I tenna khovel kikhek lamdang gawp ta. A khovel kikhek hia? A mite kikhek? A khovel zaw a kibang mah hi di hive aw maw. A mite’n I lungsim put uh I khek ua, I vanzat te a lamdang ta a, huai hilim ve aw maw. Tuching in a hihleh khopi zaw deuh ngial a khavak leh vaklouh nangawn I thei bun nawn kei. Sun leh zan kibang phial in mei a vak zihziah ta. Hiaite hamphat na ahi. Nidang dan in kipawt supsup nawn kei hang. Khantouhna ahi. Tua khang hong thak tou dingte ngial, kua a ka inveng? Kua a eimi? Chihte ngaina hetlou a hong om ua leh a hi di mah bang kasa deksim ta mai. Mahni inn ah I duh, I deih, I neikim phialta ua. Sep leh bawl in I buai chiat ta u , mitoh kimuh zaizai hun di I nei tawm ta. I mu nawn khol kei.

Lehlam tak ah, taksa a muhnai hetlouh, lawm hoih pipi neihtheihna hun I tung ta. Kei bang ngial in Social Networking Site tungtawn in lawm thak bangzah hiam ka nei mawk! Kimu ngei ka hi kei uh, ka kingaina thei mawk ua, kihou hou theih mawk! Hiai in ka kiim ka paam a muhtheih a omte toh ka hun zat di tampi hon lakmang sak a, kipah di hia? Dah di? Ka thei kei. Hun hong pai tou zel dia, hindan, tawndan, khosakdan te hong kikhek khek ding hita e chih hon ngaihtuahsak mahmah a, kei bang lel, neulai chi dia le ki zahpih sim lai in kei mitmuh a thil kikhek hiai zah ka muhman leh, I nu leh pate khong in kikhek sana un chia! Ki adjust siam mahmah uh e. ngaihsan huai mahmah uh hita e chihlamlam hong ngaihtuah sak hi.

I hun zatdan te kikhek in, I lawmpolh dante kikhek tou zel mahleh, neulai hunte mitkha a mangthei lou, a luai-luai hun khat na himawk hi. Neulai hun ngai khong a va kithanem sak ding chihna hihet lou in, hun nuam leh manpha, ahi chih ka ngaihtuah khe thakthak hi. Hai huai sim pipi a I gamtatna te diakdiak bang, hun nuamsak tu, tuchiang a I neulai lawm khat le nih toh I kimuh ni a I genkhop chia, I kipahna pen hithei mawk hi. Hundang ah, ka neulai hun ka ngaihtuah tawm mahmah. Himahleh Christmas hun a hong tun chia’n ka neulai hinkhua te ut thu hihet lou in ka lungsim ah hong ki flash back nase thei mahmah mai. Ngaihtuah louh hamham bang kana sawm sek. Himahleh a hun in pokhia a hi dia, Christmas hun hong tun rual rual in, seenlai ngaihna, seenlai hun nuam te a thou zel. Huai kawm mah in lunglen hun a om a, khasiat hun a om a, huan, kipak a nuih velvul hun leng a om.

Neulai Christmas hun in Sial khong bang I goh zoh phei in chu, khozang a kilawp a kihi mai. Zing thou phet ka muman kei kha di chi hi awmtak in Sial kikhihna lam kidelh pah vengveng mai. Zankhua bang a ki ihmu lou phial kha hi in maw. Sial kai lou a gamsa khong a kizat kum in chu, sahou gu, sahou a hai na mun te uh chik a pawt ngeina hikei mahleh, sahou vang in I va hoh hamham a, nitak khat nek khiat di chu kigu khe man mahmah mai. Khonawl ah tangsam te hong pak a, Christmas paak te’n khokiim khong hong zem ua, a spirit kha om mai in ka thei. A nuam a hitop mai. Khut leh khe gep bimbem in lawmte toh ei phur phur in I phur a, bangmah lah set tak I hi nai kei a, huai hunte khong mah hun nuam ana hita e.

Midang te Christmas in bangchi’n a nawk kha diam ka thei kei. Kei a di’n bel, neulai hun ngaihna, innkuan kim a Christmas hun zat khawm ngaihna leh ka lawm leh vual te a damlai toh om nawnlou te phawkna hun a hipipen mai. Huai hunte ngai in thumthum in kapkap mah leng, a phatuam nawn kei. Kum teng a hun hong pai zel toh Christmas hun teng a hiai spirit toh hun zangkhawm tou tadih ding chu ka hi phot mai ve. Christmas zang dia omna mun kawlgam, vaigam a pat tenna vangkhua leh innkuanpih te kiang zuan tengteng leh a zuan theilou tengteng Christmas Zatnuam leh Kumthak kipah huai tak kon wish ngal hi.

Pipi Leh Pupu

Ka leitung Pathian chi leng le gen khial lawmlawm di'n ka kigingta kei. Amaute ka pahtawina di'n kammawl in huntawp chih a neithei ngei di'n leng ka gingta kei. Leitung a nu-leh-pate itna zahzah a hon it a om diam? Nu-leh-pate' hon itna a dau ka chihna hihet lou in, om di'n na gingta hia? Ken chu om ahi chih ka mu a, ka feel a, ka thei chian ta. Leitung a ka pi leh pu hon itna thupi hina e! Aw itna, itna lamdang hina tel e! Amau neek tang neek di'n hon pe phal ua, a tute uh ziak a gensiat leh soiselna tam thuak hina un chia! Huaite a hun in kana theihpih kha hetkei. Theihle kana sawm kei. Huai dan om di'n le kana gingta kei. Hampha ka hihlam kana thei ngei kei. Ka tandia kilawm tang kana kisa a, a hih bangbang uh a hih di uh a hih ziak kana sa nilouh a, haisawt na tel ing e!

Ka Pu Chinzalian Thangsing ahi. Amah pianken a mi feltak ahi ding. Tangnuam ah ana khosa hi. Aman ta Pasal 3 toh Numei 5 a nei hi. A tate lak a a 3na ka Nu Chingngaihvung ahi. Ka pu hi nasep a taima a, singtang lou nasep a nekzong ahi. Suangdai a pat a Tangnuam a peemlut ahi ua, a singtang lou nasep mah ana sunzom charchar hi. Kei khotheih tan inleng ka pu in lou a bawl lai a, skul suty ni chiang in lou hon kuanpih sek a, nasep dan hon zilsak sek hi. Ka pu hi mi damthei tak ahi ngei dia, ka khotheih apat a hon omlouhsan ni 15 November, 1997 tan in damlou a lupna a ngak lam himhim ka thei kei. Naupangchik ka hih apat in ka pi-leh-pu' angah kana khangkhia hi. Ka pi-leh-pute' itna ziak lou hileh, tuni'n singtang ah nasem a, loukhou a, vuahzu-nisa thuak di'n ka kigingta.

Ka Pu' kammal ka mangngilh theihlouh leh tua ka theihsiam dek patpat khat hiai ahi. Ka Puneu te a neupen kha nautum chih mahtak a hi phengpheng deuh sek hi. Ka pu in a tai chiang in, "kiphasak het kei dih vo, hiai inn apat paikhe lechin kaal khat na ekthak na di le muzou lou di na hi", achisek hi. Huai lai in bang a genna a ka theisiam kei, bangziak a kaal khat ekthak na di mulou di? A haksat louhlouh maizen di toh kana chisek a, himahleh tu'n a thugen ka theisiam ta. Dik hina tel e. Mahni inn taisan a kaal khat genlouh, ni 1/2 hunzatna di lel le muh hak hina e chih ka hon theisiam panpan ta.

Ka Pu nasep a taihmak luat ziak a ka heh hun a tam. Naupang chik ka hi a, skul suty ni chang in lawmte hunzat bang a hun zat tei ka ut. Lawmte lak ah kimawl ve tei ka ut. Himahleh aman alou bawlna lam hon zotpih a, kei toh kituak ding na hon pia a, nasep hon kizilsak gige hi. Tuhun a ka et thak chiang in ka kisiik hetkei, A huntak in bel ka heh velvul gige. Ka pu in lou nasep a nekzon haksat dan hon na hilh lou, zilsak lou hileh tunia ka theih tampi ana theilou di hing a aw hampha hina ing e! Ka hamphatna te gentheihna di'n lah na om nawn kei a mo Pu... Hon ngai nang e mo Pu...

Ka Pu thupi kasak nawn na mahmah ahihleh amah summuhna kichian neile hisamlou, ka nu-leh-pate bang a lou nasem hi a, ka nu-leh-pate kiang ah pat skul kai dia honna lak khiat te ka ngaihtuah chiang in, a itna tu'n ka thei dek panpan. Ka nu-leh-pate'n bel lou a piang malta leh haichi dang sumsuah theihte in kumbul a admission hon siksak zou hamham sek ua,huailou skul fee, books, exercise books leh uniform teng bel ka Pu, Ka nuneute leh Ka Puneute khut a om suak hi. Ka pu a piching luat ziak mah a diam, kou ziak a ka Nuneute, ka Puneute a phun chih zak ding ka neu apat Cl-XII ka passed tan ka omsung in bangmah phunna ka za ngei kei. Huai naksang in hon it ua, hon deihsak ua, amau neek tang, silh tangtang hon pia uh hi. Ka hai a, ka kiphasak a, ka heh chiang in ka Nuneute kiang ah skul le ka kai nawn kei di, ka nute kiang ah ka pai di ka chi zel a, amau a dia skul kai peuh kana kisa a, ka hailua mo Pu, Pi leh Puneu leh Nuneute? Khatvei le huchia na chihleh pai leltak ve hon chi hetkei ua, lai na simsim dia, nang a di mah ahi chi'n hon theihsiam sak sawm sek ua, huai theisiam dia ka kum in zirlou hia? Ka theikei. Ka theisiam thei kei.

Kei kia ka Pute' inn a khangkhia ka hikei. Ka unauteng uh mi 5 ka hi ua, ka vek un ka pi leh pu ang a khangkhe lou ka om kei uh. Ka U in hong graduate a, St. Paul's ah teacher kumkhat khong hong sep khit in eive inntuam a ka ompat uh. Kou khe a ding thei dia hon muanma teng uh Ka pu omlouh nung in le ka Puneu te'n hon paikhe phal mahmah kei lai tel uh! Aw! Itna! Khovel a hiai bang itna ana om ahi mo? Thupi kasa, lamdang kasa, ka genchim thei kei. Ka ngaihtuah tawp thei kei.

1997 in Cl-VIII ka sim chet a, Half Yearly Exam zou in Suangdai ah ka Nu-leh-Pate kiang ah suty hun tamlou sung nasep panpih di chi in ka pai a ka naute toh. Ka U ahihleh Cl X a sim kum ahi a, class a neih charchar ziak un a omsuak hi. Huchia gaal muangtak a nasem a omlai, Unau melhaih hun in hong pha a, huai suty zang dia ka paikhiatni zing a ka Pu meel ka muh a tawp na di ahihlam himhim ka thei kei. A tawpna di a hihlam thei hileng va pom tonton a, ka itluat thu kamkhat beek gen di'n ka kiging ta. Huchia gal hong buai in bangchi chi hiam in Mizoram tawn in Shillong ah ka Nu Neu kiang kava tung kha hi. Huai ah Ka pi ngei leng a hong pai in ka Pi toh ka Nuneu toh ka om ua, galbuai a veng dekta de aw, chikchiah Lamka kipai thei di chia ka lung geel lai un, zaal mang hiam aw chih ding in November 15,1997 in Tangnuam khua luh in ana om maimah ah, huai a Ka Pu in a hinna ana peta. Ka Pu' meel mu nawnlou ding ka kitheih in ka kha a sia a, ka khovel tawpna bang hial in ka ngaihtuah a, ka Pu omlou a kou unau teng bang suak ding, ka phaktan ua lungkim mai na hiam Pu aw, chi'n ka Nuneu leh Ka Pi ngongkawi in kong kap keuhkeuh mai zaw, mitkha ah a mangthei kei. Tunitan in ka mitkha ah chiangtak a ka Nuneu, Ka Pi leh Kei huai ARC Quarter sung a ka omdan uh a chiang kilkel lai a, ka ngaihtuah khak teng in ka chimul a thou a, ka dah a, ka khase lailai. A biiktak in Ka Pi ka hehpih a, a pasal ittak suun a a luang bul a tut ut mahmah ding, tua lah a lungkimna tan a hehnem thei leng omlou maimah! Hehpih huai hang e maw Pi, Nu Kim, eiteng li-liai.

Pu aw, lung na awi lua sang, khana pham dan. Ka pi beek ngaihtuah lou na hiam Pu aw? Kou teng li-liai na lungsim ah khana kiak kuan un ka om kha uh hiam Pu aw? Pu aw, hong ngai nang e maw... Kha na kiakni tuang hong tung nawn dia, zaitha patbang nem e Pu aw. Pu aw, kha na kiatni a na kiang a ka om khaklou ziak mah hiam, tuni tan in khana kiakni tuang hong tun chiang in leng innkuan te toh omkhawm kha kei lai ung. Ka heina kol-le-vai lak ah sial zatam toh luankhi nuul zel ing Pu aw...

Ka Pi Thangman ahi. Ka pi ahihleh mi nunnem, kisuanlah hat, dohzou tak ahi. A phun ngei kei a, a hehlam leng ka thei ngei kei. Fel tak ahi. Ka pi kisuanlah hatdan lawmlawm bel, ama' ann kuang a neek dia ann kithuk, mi a kham dek chia, a vahlouh di uh lau a, ka deih nawn kei chia a tuu leh tate lak tan a hawm zou den khat ahi. A mizia huai ahih leh a omlouh a ka omlouh hang in, khek di'n ka gingta tuan kei. Ann hawm pi chi in ka Nuneute toh Ka Puneute'n taitai sek ua, ann hawm dia hong kisak chiang in a kiang a tukha teng in a annkuang uh ana domkhe sauhsauh ua, ka nuih laihlaih zel uh hi.

Nasep thilbawl ah ka Pu nung a thuap zou mahmah a, ngap a kisaklouh ni in leng ka Pu lou a kuan naknak leh na Pu a nasepna ah tuipe ding leng omlou di chih ngaingam lou in a zui teitei zel hi. Huai in Nu ahihna ah Apasal nung a thuap zoh dan gen kha mahmah kasa. Thupi kasa a, ka ngaisang telhtelh. Kei ka hihleh Ka Pu min phuah ka hi a, khel leng ka khel a, ka pi'n Na Pu tute mawngmawng na lungtang uh pha, khel uh teh hon chi thei zel hi. Ka pu sep leh bawl ah suun zou lou in, phazou kei mahleng, ka Pu theikha te'n hon muh uh chia'n, "Na Pu' tuu taktak neive" hon chih chiang un nuam kasa a, hampha ka kisa hi. Ka damlouh chiang in ka Pi a buai thei mahmah a, damdawi hon leisak in ne di'n hon sawl zel hi. Ka khel a, damdawi neek ka ut kei. Damdoi ka duh kei. Ka pi in hon thei mahmah a, damdawi toh tui ka kiang a a koih kha ane kineih in kana seel sek hi. Huai ka seelna munte le ava mu kherkher sek a, hon engu na hi ka chih chiang inlah a ut hetkei zel a. Aw Pipi, hon thei chiang hina tel chia maw...

Inntuam a ka om nung uh inn ah ka om vang mahmah hi. Innlam ka pai sunsun chiang in ka Pi in hon na ngaina mahmah a, ka tupapa a om sung chi'n hong giak zel hi. Ka hamphat lam ka thei kei a, ka ngaih poimoh zawk om ziak a hi ngei dia, ka pawt sansan sek a, hon phunsan ngei kei. Hon tai ngei kei. Pawt hat honsa lotel chu ahi dia, hichi'n hon chi, " Lam, na pawtpawt na mahmah leng gimta niteh, nang leh nang kitha dawn le na hi dia, hon tonpih ta maive", hon chisek. Ka nuih san ekek zel a, ka pawt dek chiah kava chiam nuih zel a, "Pi, tuzan ka lupna ah lukham khat ana koihbeh un aw", ka chih chiang ana gintak hun a om sek. Ka ngaihtuah thak a, ka Pi in hon chiamnuih te a gen taktak a de aw? A tupapa zi mu ut hi di hi a, a tusawn mel bangle muhman bang lam en hi di hi a, thutak dan in kana ngaikhe kha ngei kei a chia ka kisiik hun a tam. Ka pi innlam ka paichiah hon ngaina a hong giak dia om gige ding kana saklai in, gintak hetlouh in June 12,2011 nitak in hon omlouhsan chih kaza a, aw, maizen!! Innlam ka pai dia, kua'n hon na vai dawn ding? Na hong dam mo chia khut vuai sim nipniap ta ka let ding omnawnlou maimah chih ka ngaihtuah chia'n haksa kasa lua. Pi aw, inn kong pai dia, i om khawm dia, ka zin hong hun dia, kua'n thuumna hon neihsak ta ding? Pi, kei a dia na thuumna te ngai lai nang e. Nang zaw ka Pu toh Nuamsa tak in heikhawm tave ni uh chin, simlei mubang ngai nawn kei ni uh teh mo Pi? Ken zaw, kon ngai a, ka lung a leng lotel. Ka kha a muang theikei Pupu leh Pipi.

Pipi leh Pupu, na omna ua pan na tute uh leh na tate uh a ding hon na thuumsak lai un aw. Pi, na omlouh nung a inn kava pai in thawnhau hi nang e. Ka kiik nawn hun a hong tung a, Tangnuam ah Pute inn kava pha di ka chi a, ka va dianglut a, Nenem toh Thangbawi in lai na sim ua, kava mu a, kava pom a, ka mittui a pawt zoihzoih a, ka khaam zou kei. Ka khasia, Naute kava houpih a, ka awm a bing a, ka paikhe mai. Thuumna hon neihsak in chia ka khuk dinna di mun ka en a, a awng maimah. Na lotel eive Pi. Ka Pu Neu (Pu Siing) kiang ka lut phei a, nautum chih mahtak kei sang in ana nehnou zaw a, honna mu a, a kap ngal mai. Ka thuak siam kei Pipi, thuaksiamna di haatna leng ke neikei bok!

Pipi leh Pupu, na suulnung ua'h a damlai te ka genthei tel mai uh. Lunglen, khasiatna in hom tuam a, noute mangngilh mai di'n kon phal thei si kei a, kon ngaihtuah teng in ka thawnhau lua! Pi ei, sunkhat ka ihmut leh ka mang in non pai a, non houpih a, nuam hina e. Ka khanglou a, ka mang ana hi maimah zaw, Pi, hon ngai lotel keive. Ka gente na zakha nawn kei di uh chih ka thei. NA damlai un Pipi kiang ah bel kon ngailua chih tan ka genkha man a, Pupu, khase ken aw, nang omlouh lai in ka ngaihtuahna a pichin nailouh luat ziak in kon itna thu kamkhat lel leng kon genkha man kei tel a! Hon ngaidam in aw Pu aw! Hiai a ka gente noute kon itluatna, kon phawkluatna, kon zahtakna ka latsakna hi aw Pipi leh Pupu. Kon ngai lotel.

Simlei migen chiaugaal ah dawnbang kituak nawn ni uh aw Pipi leh Pupu. Huai hun mateng mangpha! Mangpha!

TECHNOLOGY LEH EILAWI

Khovel pilna siamna khangtou hulhul ah I teng a, niteng a banghiam thak muh theihna hun ah i omta. Hiai khovel pilna siamna khang hulhul delhphak sawm in siamsinna kong chiteng ah I sin ua, ei gam a sin theih tan I zoh chiang in ana hun nai kei a, mundang gam dang ah I kuan in pilna siamna I zong hi. Leitung pilna siamna I zon a, I delh ding mah ahi. A ziak bel hiai siamna toh kituak a iki update keileh den ching in ki vaal lawh mawk thei ding bang hi.

Hiai dan a khovel pilna, siamna khang hulhul te lak a I niteng hinkhua a poimoh gige, I zat gige uh technology a khan na ahi. Technology I chih chiang in mipil misiam ten ana sui a, ana muh khiat te uh en a tatak (practical) a zatna pen genna hi deuh hi. Nidang in Radio ahi a, Tape recorder in hong zom in a nung ah TV stage I lut tou pah hi. TV nung ah VCR hong lut in, huai nung ah CD player te hun hong lut hi. Tuhun chiang in Computer leh Mobile Phone a khantouhna thupi tak hong tung in, khovel I khut a tawi mah bang in om theih ta hi.

Hiai I khandan stage uh ahi. Technology bangtan in I hamphat pih uh hiam? Chih pen a zangtute khut a kinga liuliau ahi. Nidang a Radio leh Tape recorder hun in a lim (picture) bangmah I mukei, a aw petmah uh I ngai a, a lasa tu om dingdan hiam thugen tu om dingdan hiam I lungsim ah I sungtuah thei lel hi. Huai nung ah TV stage ah I lut tou a, tun bel a aw chauh hinawn lou in I mit mahmah in a gamtat, khohei uh I mu thei ta. TV stage ah cable toh hong ton khawm in, khovel muntuam, gamtuam te chetdan I galmuh thei pan ta. Huai in I niteng khosakna nakpi tak in hon zou in, kikhekna khat hon tun mahmah a theih ahi.

TV leh Cable tan a mipil, misiam a thil suite ana khawl mawk kei ua, computer stage ah I lut tou nawn ta a, computer pen internet kichi huihkhua a kizopna toh hong paikhawm nawn hi. Hiai internet in khovel neusak tuam petmah hi. A ziak bel website tuam tuam te apat information I deih bangbang muh theih ta a, gamdang pai hetlou in a gam omdan, khohun, a khopi map mahmah zong et theih mawk hi. Huai kia hilou in tulai khangthak te hun tamzo zatna social networking site kichi Facebook, Orkut chihte hong om in. huai ten mi toh kithuzakna baihlam sak mahmah a, mun khat a om khawm loupi, kithei ngei hetlou pi bang le kitheih theih in, lawm bawlna leh meltheih neih behlap na dia phatuam mahmah khat hong suak nawn hi.

Computer toh kirual mah in Mobile Phone kichi in naktak in khovel hon pei nawn a, hiai mobile phone chiah ahih leh Lamka ah 2004/5 khong hiam in lut pan in ka thei. Mobile phone a hihleh I theih chiat sa bang in a a zatna dia tup masak penpen kihouna/ kithuzakna baihlam ding tupna ahi masa pen hi. Huchi’n awl a khanlam hong manoh tou in, tuchiang in kithuzakna chauh hinawn lou, internet connect theih, internet surf ziahziah theih, mail khak theih, la download theih, milem tuamtuam download theihna di tan in hong bawl ta uh hi. Hiai a tung a I gen khanna tengteng in I hinkhua bangchi hiam in hon su kha a, tuni chiang in I khopi ngei Lamka ah bang ngial Mobile phone neihlouh ding zumhuai bangthei ta mawk hi.

Technology a khanna kichi peuhmah ah a hoih leh hoih lou thildang te bang in ana om chiat hi. Computer ahih leh mikim in I nei zou nai kei ua, sau I gen kei ding. Mobile phone a hihleh a neu a lian in I theih, I deih leh I pahtak pen ahi a, huai lam saulou kikum ut ihi. Tulai a I mobile phone tawi te un bangteng sem thei a, bangteng kihih thei chih khong I chiang taktak mah uh hiam? Mobile phone I lei dek chiang in bang features neita I en ua? En bang a zat ding I chih ahia? Chihte lungsim a koih masak pen ding ahi. A ziak bel pauna ding leh message maimai gelh na ding in mobile tampi man poimoh lou pah hi. Muntuam gam tuam a omte toh kithuzakna, aw chauh himai lou a mail khong kikhak na ding I deih leh bang mobile in huai dan feature nei hiam chihte et ding ahi. Nu leh Paten I tate mobile ding I leisak di leh bang tan a azat phalsak I hia? Chihte lungsim a koih kawm a I lei ding poimoh kasa. A ziak bel, tulai a mobile man tampipi I tawi ten nateng hih thei phial hive aw. Video hoih lou pipi khong internet ah zon a, download theih mawk hive aw. Huchia khat in a neih kipiaksawn haksa hetlou, bluetooth kichi khat on gaih di ua, send mek di ua, a thilneih uh kipe sawn khin hi maimah uh ahi. A mantam, features hoih neih ding a sia ka chi het kei, a hi a, I neihte bang chi’n I hamphat pih dia? Bang chi’n I zang manpha dia chihte ahih leh ei mohpuak liuliau ahi.

Technology in gam a nawk vanglak nak nawk petmah, ling sak zou mai ahi. Hun sawt lou in Mizoram a naipen ah a nawk ek a, a gam uh ling mahmah. Tuni chiang in eilawi tenna Lamka khopi nawk mahmah a muh theih in om hi. Huaite tengteng kipatna I technology ziak kia I chi het kei. Himahleh a ziak lianpi te lak a khat ahih lam bel I theih di un ka deih. Bang ziak a I gam a siatna, chiamnuih thang huai, milem thang huai te hichi tuk a thang mawk ahia? Bang ziak a numei pasal kal a thang tatna hichi tuk a I gam ah uang mawk ahia? I mobile te khong ah milem tangthei leh tangthei lou thang huai taktak kem hang a. en en hang a, huai ten I lungsim hon zou gawp, I muhmuh, I et et te chiin utna lungsim hon pia, hon piak chauh hilou, chiing zomah hang a, I chiin tan a hunsak lou hang a. I phone te khong camera bangkim om, record zomah hang a, huaite leak sak hang a. minsiatna I damsung a I thuak ding kibawl maimah suak hi hang.

Technology pen I dou zou kei ding a, dou ding a leng kisak louh mai ding ahi. A hi a nu-leh-pate moh puakna bel I taten a phone khong ua’h bang hih uh hiam? Bangla ngai uh hiam? Bangchi bang milem kem uh hiam chih tan bek I theih ding I mohpuak ahi. Huai hilou a, en zaw amau phone bialbualte thei siam lou hang a, khong I chih chih lai ding leh bel, I gam tua I muhtak leh I theihtak te sang a uang zo in hon zial ek lai ding ahi. I theih kei leh leng theih sawm ding. I tate I it a, a deih uh nei lou sasa in I leisak lai in, amau minsiatna, ei minsiatna di khop a zilna uh ahih lel ding phal ding I hiam? Technology khat peuhpeuh zang manpha leng, na I theih louh tampi, I muhlouh tampi muhna, theihna bang in zat theih lo thamtham ahi chih I theih ding ahi. Minsiatna, na hoihlou zilna lel ding in pam maih lua hi. Na hoihlou tampi I et sung mah in a phatuam ding tampi mah et theih ahi chih phawk thak ni.

HAKSAT HUN A KIPAH CHIH OM THEI DIAM?

Laphuaktu khat in “Bangteng ka thuak zong, hiai thei di’n Hon sinsak; A hoih hi, A hoih hi ka kha’ di’n” ana chi hi. Laphuaktu dang khat in, “… ka kung tung a tung khempeuhte, Sian in a phal hang a tung hi e”, ana chi nawn hi. Hiai dan la tampi I nei, a diak a I biakna sahkhua ziak leng a hi ding. Lungkham, mangbat hun a ei kia in thuak hilou a, panpih tu hoihtak, lawm muanhuai Jesu nei I hihdan leng I thei chiat hi. Mihing haksakna thuak lou I om kei dia, nuamsa I chih te’n le amau puak khop haksatna a nei ngeingei ding uh. Ahi a, haksatna I lakdan bel a tuam chiat mai thei. Laisiangthou sung mah ah Job gimthuakna I mu. Amah ngei leng hiai a tung a I lagen te dan a hinkhua zang khat ahi. A neihsa tengteng a man nung a le lungke lou a Pathian phat hilai zomah hi.

Ahi a, haksatna kipaktak a maituah a, A hoih hi, a hoih hi ka kha’ di’n chih theih taktak ding mah ai diam? Siangtak a gen a kenchu chi theilou ka himai ve. Haksatna mimal, innkuan leh a tuamtuam te ka tuah chiang in dotna in ka dim. Bangziak a hiai ka tung ah tung sese a de aw? Bang ziak a hiai dan thuak sese? Why? Why? Hun hong paitou zel dia, ka khonung et kiik chiang in bel kei a dia hoih zaw ana hi eivele ka chih theih hun om din ka ging ta. Himahleh ka tuah laitak in bel Sian’ lemgeel chi a lungkim tak a om ding haksa ka sa. Kei leh kei ka kimohsak louh tawp in leng mohsak ding ka pum zon mai.

Ahitak a gen a, a tung a la nih I gente phuak te’n le a haksat hun laitak ua huai la te phuak mah uh a hi diam? Haksat tawpkhawk a tuah lai ua, Sian’ lemgeel, ka kha’ di’n a hoih hi ana chi thei pah uh a diam? Huchi bang a ana chipah thei a hih mawk ua leh chu lamdang mahmah ding, Kei sungtuah dan in, amau leng a hun tak in zaw haksa sa, lungkham, mangbang leh kingaisia in hun a zang tham ding uh. Hun hong pai zel a, a khonung a a etkiik uh chia huai hon chi thei uh ahi diam chi ing.

Haksatna kipaktak a maituah chih om thei mah ding ahi diam? Ka buai. Haksat hun in kipak mawk leng chu haksa salou chihna himai lou ding a hi diam? Mihing tengteng in hun haksa, hun nuam I tuak chiat. Ahi a huai hun haksa I palsuah dan a kibang kei mai thei. Khenkhat bel a haksatna uh leng seel siam, lungnuam tak a kilang a om thei pawl a om. Khenkhat geet lah khovel bei mah bangsak, maban bangmah him him omlou khop a ngai thei pawl om zeel. Khenkhat taget chu lametna nivaak himhim mupha banlou, mahni hinna tan a latop pawl om zel. Kei ngaihdan mawltak in chu haksatna tuak, lungkham-mangbang a om kipah seisui cihchu a om kei dia, ahi a lah, thuak siam, puaksiam chih bel om in teh. Mi tengteng in huaidan a posiam uh a diam? Posiam kim veklou I chi ta. Huchi a hihleh I society in bang poimoh a hia? Bang chibang in panla le mimal lungkhamna, haksatna ziak in I lak ah mahni kithat (suicide)I vengthei dia? I kiamsak thei dia? Hiai issue kha address hun I sata uh hiam?

Tulai khovel kinohtak, everyman for his own chihna khovel ah I om ta. Kua lungkham, haksat kingaihsak man I om nawn mang kei. I om kei sem lai ding hun hon paitou zel ah. Mahni nna chiat ah I buai a, mi haksat gen louh inn luahpih te nangawn toh kihou man ngellou a om hun a tam. Kei bang ka roommate pa toh ka shift timing uh kibang lou, weekends chauh in ka kihou kha man uh. Innsung khat a tengkhawm te leng huai dinmun a ding ki hita, huchi a hihleh chu, midang toh kihou man ding chihte kha genna ngaihna omlou suak phot hi. Huchi kawmkal ah I omna khovel ah thilpiang tampi niteng a zakding, muhding om. Newspaper I sim a, mahni kithat chihte I mu mun ta. Huai I muhmun I zakmun ziak mah in en leng huai dan ngam theih, hih theih ahi chihna lungsim om thei mawk hi.

Huai dan a mahni kithat chih bangte hong om chiang in lah mi dawilok, haksatna pua zoulou. Paa lou I chipah muatmuat nalai uh hi. A dikna chiang le om in teh. Tulai khovel kidemna sangtak, khosakna kikhou khiat tak ah kingaise lam a paite a ding in lam-etna himhim neilou a hin theih taktak ding in ka ging ta. Hiai dan I gen chiang in ginna hatlou chihkha zak masak a hiveu. Dik khamah in teh. Ginna hat ziak chauh a khosuah ding ana hilou a, niteng nektawm zonna ah ginna chauh toh kalsuan chih leng hithei gige samlou kasak hun a om. Pathian a muanna ngalou chih khong a hi iki mohsakna tangpi uh. A diklou ka chi kei.

Tua I paidan et in a tangpi a metropolitan city tan chiang bek ah system khek ngai om zek lou ding a diam? Innlam paidan a saptuam khat pastor khat in etkol chih pen deihkhop huai salai mah I diam? Pastor ten le ana zathadah kei uh henla, ngaihdan gen ihi. A milip toh et a, metro city ah pastor khat in a saptuam teng theihsuah a kipolh pih zoh ding chu next to impossible bang phial in ka koih. A fel zohvek kei ua leh leng ka mohsa hetkei. Ahi a, poimoh kasak bel I tuailaite’ sepna, nekzonna tuamtuam toh kituak a a hun a tuam vilvel a tuailaite a dia zangthei ding youth worker chihdan te poimoh hita lou hiam? Tuailai mah, tuailaite haksatna theisiam thei dingmah, leitung laisiamna a le niamlou, salam, khalam a I poimoh bang hon kum thei ding, poimoh hita lou hiam chi ing. Sepna, zek zonna tuamtuam te ziak a kalkhat a khatvei kipolhkhawmna, biak khawmna, mitoh kimuhna di om sunsun biakinn bangle kai theilou tam a tamte lak a nasepna, amaute huap kha thei ding hunseh, amaute toh hun zangthei ding worker khat I neih pah kei ua leh, I tuailaite haksatna dawn zang tu ding, kupna ding neilou kisa, lungkham, kingaisia leh mangbang a ana kithat maimah chihte om-om lai ding, om semsem thei ding in mu ing. Na chi sam uh hia? Haksat hun a kipah chih hial a hihlouh tawp a puakdan siam zodeuh a omdan sinsak tu ding poimohsakna lianpi nei ing.

I Nek Muhna Mah Pibawl in Zahtak Ni

Mihing i tuam dung zui in i sep ut i bawl ut leng ana tuam a, i nekzonna leng a tuam chiat hi. Mel leh puam kibang lou ngen i hih ziak mah in Siamtu in leng ei sep theih ding, nek muhna ding lampi tuam chiat hon na bawlsak hi. Ei mohpuakna bel i nek muh theihna dia i sep khak penpen kuhkal, gin-om leh zahtak tak a i sep ding himai hi.

Nekmuhna mah pibawl a zahtak ding pen mikang ten le ana pi ngaihsut mahmah ua, “Work is Worship”, ana chi hial uh hi. I sepna lian hia neu, private hia government, kiloh tawm i hi hia chihte a poimoh pen kasa zozen kei a, en i sep khak penpen zahtak a, sep trantran mai pen poimoh kasa zaw hi. Ei lam ah sepna I chihte kha government nasem te kha sepna nei kichi deuh mai hi in ka thei. Private a sem leh mimal kiloh tawm te lawi kha sepna nei, nasem dan a kisim lou phial toh ki bang kasa. Government nasep na hoih mah ei, detdou pen, sem gina in gina kei leng sepna muang chih ngaihdan a tamzo in kinei hileh kilawm kasa. Huai dan ana hivek tatak mah ai diam?

Kei theihna tan ah govt. a na sem te le Manipur a ten nuamsa pen uh hin ka thei. Sepna mun a omlou toh, a om sunsun te le singpi peuh dawn dawn khemkhem, file phen di bang hak sak a sa mai, Manipur a file te gik diak hiam chi ing. File khat phen a process nang a singpi man di tah cheuh ngai hitel. Office kai dia kuan a, suai va kai cheuh a kik nawn vengveng theihna kha Manipur mah ana hita get zel ei. Correspondence a teacher sep theihna le Manipur mah. Sem hetlou a loh lak ek-ek theihna le Manipur mah hazel. Manipur a sem tengteng huchi ka chihna hipah lou ahi. Gin-om tak a sem kenken, chitak mahmah khenkhat bel om mah tham. Mahleh a tangpi a et in bel dudak tak a sem tam hetlou ding hi chi leng kikhial lawmlawm lou maithei hi.

A tung a i gen, govt. na sepna ah huchih theih ahi chih kha i khankhiak pih, i mit a i muh, i na chiin touh det ana himawk hi. Hundang in bel i gam ah laisiam i tamkei, sepna om sunsun te leng talpak te khong in ofis teng hon luah ua, i gam utlou uh hiam? Hon awlmoh lou uh hiam himai thei hi. Tuhun in bel ofis te ah leng ei singtang mite mah kitu ta, a sap lian leng eimah hita, i sep ding pen sem utlou lai tel ding i dua’m? Ei’na kuhkal tak, gin omtak leh i nek muhna zahtak tak a i sep ziak a ei chauh hampha hilou a, midang tampi panpih kha, a nna uh sepsak kha ka hi chih lam i ngaihtuah ngei di ua aw? Sum-le-pai, tha-le-zung a kipanpih chauh kipanpihna ana hi lou hial ahi. Sepna neite’n i sepna a i sep ding pen a hi bangbang a i va sepkhiak chia mitampi nna a pai di bang a paithei pan phet ana hi ahi chih kha i mangngilh louh ding uh ahi.

Government nasem te I gentak ah, mundang a govt nasem ten nak sep petmah uh hi ve aw. Lawmte khat bang a suty ni uh chia le a ofis te un sam in chin, va kai thouthou sek ahi. Lawm dangte Parliament a sem ka theihte bang nitak dak 8 a ofis a a om lai hun uh om mawk ahi. Nna haulua chi kiginni nangawn khawl manlou a sempawl bangle om tham uh. Eigam a govt nasem i chihte toh kikhai mo? Enle nidang a govt nasem tengteng ei gam a i muhmuh te dan di ana kisa a khanglang ve. Maimah in.

Mi’n I nasep ah hon zahtak hen I chihleh en leng I nna pen I zahtak masak poimoh ahi. Sepna mun ah le om lou, I sep peuh kizumpih chih dan te kha, kuamah zahtak kai ngeilou ding hi. Nasepna, nek muhna pen a lian a neu om kei, nek muhna dia I sep a hih peuhleh chihtakna, gin-omna leh zahtakna lianpi toh I sep ding uh poimoh sa ing. Niteng kilawh tawm bang le thupi lua, neu muh nang omlou hi. Niteng a kilawh tawmte ziak a a sum nei deuh ten amau nasep di semkha lou a, thalak gaihgaih ding mu. Huaimah bang a sum neite ziak a niteng kilawh na di om chia kizahtak tuah ding a thupi hi. Samtan khong, khedap bawl khong, puansawp khong, a neu omlou hi. Huaite khong sem chia mi neu muh te eikha a huai dan a nasem te poimoh pen te kha!

Eilam a poi mahmah khat bel mi’ nasep peuh zumpih, ei mahmah in I nasep zumpih, sep utlouh, zumhuai I sak khong om chihdan lungsim kinei lai mawk hi. Hiai ngaihtuahna lungsim I khek uh hun mahmah ta hi. Nidang in ka Pu te’n tuilou a nei ua, ann heksak ngai hi.Huai ann hek di cycle a kava tawl chiang in kenbel poi sa keng, mi khenkhat in hon na zumpih mawk, lampi bang ah le hon houpih utlou chih dan om mawk hi. Hiai tak a hi a poi kha! Nidang in cycle khong in ka pawt sek a, khenkhat in zum huai ana sa mahmah nawn taget uh! Ken bel cycle nangawn le neizou hetlou om di hi a chi’n poi kasa het kei taget hi. A cycle lou enle neizou le I deih tawk aka. I dinmun, I tunzohna chiangchiang ah ei-le-ei bek kizumpih louh ding ahi.

Mi’ nasep zahtak sak ding, enle I nasep zahtak ding, I zahtak louh a, zumhuai I sak peuh sep mawkmawk louh ding chih ka ngaihdan ahi. I sep utlouh di pi bang le sum tampi a lei mawk louh ding, I va lei hial a lehlah sep sam ding, huai kha nasep zahtakna ahi. I nekmuhna dia sepna khat neih ngai, I gam a chiin dan hoih louh ziak a lei ek ngai. A leizou ten leimah ni, a lampi dang omlou meuh chu! Ahi a, kon chi teitei di, nekmuhna di chia sum tampi a kaam I lei ngam ngal leh sem ngam ni. I gentak mah bang in ei’ na en gin-om tak a i sepziak a mi bangzah hiam panpih kha I hi chih thei thak ni. Midang awlmoh thu khong gen gen, mahni tak ngial in le I nasep sem utlou, I sepna mun a om lou bilbel chih dan khong I hih lai zaw kuamah awlmoh lou hi di hi hang. I gam ah I nasep leh I nek muhna chiat pibawl in zahtak hile hang tua I dinmun nilnial ah I om kei dia, hiai sang in bang lam hiam khat ah i khangtou zaw peuhmah ding chih kha ka gingta tinten ve.

Ka Diary Zong ka Shillong-II

Part I ah thu tak leh Shillong ka tun tung a college admission zon dan te ka gelh khin tham ta. Kum 5 bang pai liamsa nung ah hunlui ngaihna leh Shillong mun mahmah ngaihna in hon paisan thei mahmah kei. Lungsim mitkha in sing hing dipdip te leh hawktui siang kelkel luang khe a pal ek-ek lai khong a mu gige. Kongte Zadoh mahmah leng lungsim a mang theilou khat ahi. Bahte allu-muri huai le fire brigade ground kiang a leh PB a Lady Keane lutna bul lak a lim sese kisa a, huai khong mahle tutan i mangngilh theihlouh khat hi den lai mawk hi. Part II ah bel thuchin-thutang hel khak khak hel mai sawm ka hi.

1st year ka sim kum in khatvei Tangnuam teng in ann nek khop ding sawm ung. Nek khopnang, a mun leh a sum, a gan bangkim fel sak ding in ka Zawlpa Lambawi (Zangkholam) sawl ung. Ka zawlpa a hihleh a vanglai taktak a ball pek kha ten a diak a Bungmual lak te’n “My Is” chi a a theih mai uh ahi. Fel mahmah mai, sum a na zong, ui khat ana lei, K-line a sepaih quarter khat ah ann huan di mi ana sawl in ana buai zen uh hi. Kou bel nitaklam a nek hun dek in a mun ka zuan zou pan uh hi. Ann ne di kisa, man sim ta chih leh ka Zawlpa’ lawmpa khat ki inntek sak tak a hong dianglut. Hong phe vengvung, ka zawlpa’n ana iplah a hi peuhmah dia, a lawmpa kiah “nang Tangnuamte ann nekkhopna ah na bang hon zong?” ana chihleh khatpa pawt vengveng. Ka lungsim nuamlou, inn kong ah kava et leh lawmpa taxi sung ah ana kap niainuai mai. Ka va houpih leh ka nek khopna di uh sum ka zawlpa’n ama a ana lakzual, kou kimuhkhawm chia kithoh khawm a dit di chia ana kiba uh ana hi. Huai ziak tak a amah leng ki innteksak tak a hon dianglut, ka zawlpa’n ana chih guap leh khatsia ana himaimah. Kava kikhem nilouh ua, a tawp in lungkim tak in a zu mehdi uisa bangzah hiam toh ka kha khe thou khongkhong uh hi. Kou ann nekhin ka pai zoh un lawmte, amau bel Tangnuamte hilou in ka sulnung uh valap ahi di ua, sa kou gaihlouh teng ne in, Tere Naam film than lai hiven, huai la play in zankhovak in huai inn ah va lam uh chih thu khonung zak ing.

Rayburn ah cl-xii simlai khong a kipau tawm lua chu a hipeuhmah dia, khatvei lawmte Maman te’n ah kava pawt leh classmate te Lulun (Chingngaihlun) ana om. Keile chiamnuih peuh gen a chiak a kava chiak leh Lulun in ka paidek kuan a hon sam keuh. “Lam” hon chi, ken le, “Bang a Lun” ka chih leh aman, “nidang a le hichi himhim mah na hi hia”? hon chi keuh. Pautam chu honna sa lua dan ana hi.

Lawmpa Lialian(Tualkhanlian) toh Lalneu(Ginthianlal) lah tawlkhat Arunachal te khat toh inn hon luah khawm laizang uh. A lawmpa un zingkar khat ann a huan leh kangsak gawp, kang petmah, vom gawp himaithei. Ann a nek tak ua Lialian in lungkham huai salua, a lawmpa uh ki’ah, “Aisa khana khayega to zindagi kharab ho jayaga” chi keuh. Lialian te inn kiangpa bah te khat lah a min ‘Mayborn’ higeet. Lamdangsa sim. Bangchi dan a na min Mayborn hi eita I chihleh aman le “I was born in the month of May, so my parents named me Mayborn chi keuh zel.

Khatvei exam zou inn pai. Inn le tungman lou ka inn khangpa Joseph Naulak in hon na sam. Ka va daklut zual leh lawmpa’n a innsung ah zohmeng khat va lut, ana man in, ana khailum geih. A vun hawksa a kuang sung ah ana koih beibai. Inn ah va kikheng zual in mengsa huan a buai a buai chu hizel mai. Nitak khat lah Joseph heu a ui mat di zong in sai-ip toh Iron bar toh kholak dung teng ah va kizui ung. Vangsiat huai, a ui te a dia vangphat huai chih ding in huai zan ui tuak kha kei ung.

Ui goh gen tak law-law leh lawmpa Kolson te lawi in Ui bangzah a goukhe man di ua aw ka chi mahmah ve. A inn neipa uh Bahte khat thu a thuzoh un, a neknek uh nekpih uh. Thuzoh tak uh a hi dia kumkhat bang a inn neipa uh Lamka ah Chrismas zang dia hon tohpih zou hial uh. Lawmte khat lah U Kam (Kamlian) in a thei dia, Mawpat a ui gou dia kuan. BSF te camp kiang hiven, ui khat hon pai, aman le ngim vengveng a a khet ek leh khenfuh lou, a ui ham vengveng a taikhia. A sak a sepaih duty pa’n, “kyun kuta mara hai?” a cihleh lawmpa’n, “mara hai” chih toh a siik chiang liangpuak in paikhiat san thuah, sepaih pan le gen di theituanlou a paikhe maimah.

Lawmpa Ui khenpa mah leh a innkong ua’h tui kaisek hiven, khatvei tuikai ma a a bel va koih hive aw. A nung sawt lou a ava etleh tui ana kai, ama nung a beel koih mizo te khat in tui ana dawh. Amah le va pai vengveng in huai Mizo nu kiah mizo pau chihdan deuh a, “Ze ti lai ah ka beel ka dah masak a lawm” va chi zeih.

Lawmpa Jeremya Tunglut aka Obamaladen BYF kikhop a necktie ok zetzat kawm a a hang phan-phan dan toh khutdoh te sumdawhna kuang ava palbuak chitchiat zaw gelh sese dahni. Huai dan mah in lawmpa Zoson toh a vengpa khat ki chiamnuih khial a a kisukpuak buk uh le gelh sese ka sawm kei mai .

Kumkhat innlam pai di Happy Valley ah ticket va lakhin ka kiik lam in Maman te inn ah ka bangsuk malam hi. Amahbel anau Suanching toh om hiven, kenle innlam pai dek nailou di? Ticket va book ta leng la chi’n ka va chiamnuih hi. Amaule paipih di ana zon laitak uh ahi, keilah ticket lakhin. Chikchiah va book di hon chi uh, kenle ka paizohni zingchiang Lamka ka tunni di a va book di dan a gen. Hon muang petmah uh hi di hiven, midang in ana zot chiang ua kou tonpih di neita ana chihsan lalat uh. Kei pai hiau. Lamka tungta, Maman in hon phone, bangchi tuni ticket book di non kuan kei maimah a hon chi. Kenle tuni manlouhna phut nei ing a zingchiah kon kuan di chisuk nawn. A zingchia kuanlouh tak a nitak a hon phone nawn. Va khemkhem ngaihna lah om nawn lou, kei Lamka tungta. Zan a tung ka hi chihleh zaw a kipak kei hial uh aka.

IInd Year ka sim kum in ka innluah pihpa khat in hon graduate san hi. A result uh a suah nung nitak teng in hon thuhilh a, sum tampipi seng a hiai a lehkha sim na hi uh chih thei gige unla, SIMPLE khong a pass nemnum hon ching het kei un. Kei bang in 1st Class in non zou ding uh. Ei inn luahkhawm teng lak a Graduate masapen ka hi a, ken ama 1st Class in kapan a, ka nung hon zui un hon chi deuh gige hi. A khonung a a lawmte khat kia ka kan leh lawmpa SIMPLE PASS ana hi maimah! A hang sanna, hon chou ngamna thupi kasa. Lawmpa Zoson in ka migen pa tunitan in 1st Division pa a chiden lai hi’n ka thei 

Final year sim kum, ki senior sak sim toh Hons. class loute ka bang pahpah hi. Hihdi poimoh om lah hituan lou. Khonung ngaihtuah chia hai huai lotel ana hi. Huchia honours class lou peuhmah ka bang na lam in a note le bangmah ka nei kei hi. Neilou ka hihlam theipah leng a dan om di, theipah lou. Exam hong hun, Sociology Monday a exam di, kiginni nitak a sim di ka chihleh sim di neilou ana ki hi reng mai. A lungkham huai thou ei. Ngaihtuah vengveng leh lawmnu Momoi (Vunglianmawi Samte) kha Sociology(Hons)a hihlam thei khia. Amah Lady Keane Hostel a om. Phone pah tet-tet mai. Note neilouh bang kigen pah ngam lou. Aman bangbang gingta deuh, bangbang ki prepare deuh hiam chihte dawp kual vel. A gen khit tak a tua na gen, na gin tak tengteng a note kha zingchiang ann nekma in hon petou ou ka chihleh a heh ei. Amah Hostel a om, Monday exam nei chu Sunday pass mulou di hon chi ta. Na lawmte Chiching(Mangkhanching) toh gouching hon sawl in. Ann nekma ngeingei a non piaksak kei leh Lady keane tengteng hon dawmlou di ka hi ka chih phokphok leh, Sunday zing thohma a Chiching toh Gouching hon tungtou pah chenchen uh. Sunday ahih chia dawr kihong lou, xerox nang omlou. Pen toh paper pia, amau note hon petou tegel le ki copy pihsak, gelh chenchen, dak 11 lak a zou. Huai teng sim a ki pass himaimah. Lawmte thuakzohna, thumanna te kha thupi kasa law mahmah lai tutan in. Hon ngaihsak hetkei le uh le ka heh theihmawk louh hi a chih khong ngaihtuah chia lawm hoih neih mahmah manpha sak tuntun in a om.

Shillong pawtsan dek peetmah hita. Lawmpa Davis toh sawtpi theih di zingchiang in Shilloung lu-leh-taw phak zohna chiang chiang khe in i pawt dia, i golh zen lehleng poilou hial. Nidang chia i ngaih mahmah di’n nikhat hun i zang di kichi zen sam. Huchia a tawpna d ahih leh Camera hoih deuh deih huai di chi, kon ki kup uh chia Lawmnu Momoi tungmah tuzel. Phone nawn, zingchia pawt dek ka hi uh, na camera kon manoh suk di ua, PB ah kimu ni chi. A zingchiang a lawmnu i phone chia ki phone khe zou ta lou, kou le pawt thouthou. Polo lam peuh. Golf Course, Wards Lake chihte khe a pai ngatngat a suun nitum hun zang. Nitak a Momoi phone nawn. Chihleh amah baih deuh a camera pe dia hon kuan tou, kinlua a phone tawi khalou ana hi. Huai lampi a kipelh kha chidan ana hi. Heh petmah a hehsan nawn. Hon petou in ka chi kei, kon tawnsuk di ka chi. Na bang kifelsakna na hiam? Peuh ka chih khum zialzial a set voi.

Lawmte’n le khel chu honsa petmah uh ahi dia tunitan ka kimuh uh chiang un ka khel dan, ka heh hat dan leh ka lungtom dan a gen mang moh hial uh hi. Nikum a lawmnu Gouching Delhi a sawtlou hong om inle ka kimu zual ua, huai a hon gen, “Lam tunitan a ka lauh penpen nang kon hehsak khak di ahi”, hon chi lai tel. Kenle Gou, kikhek lotel ta ka hi. Nidang dan a hai sim lai leng le ngaihtuah thei zodeuh ta ka hi ka chih leh a nui ek-ek aka.

Hiai article a khen a din simtaak lou, personal lua ahimai thei. Mihing in i damsung a hunlui mah kingai tou nilouh ding, a nopdan a hun a i theihlouh te le kithei tou panpan ding hita e chih hon phawksak mahmah ziak leh, mihing i sih chiang chauh a kikhen hilou a, i damlai a pat leng kikhen tou pah charchar mai, khualzinna gam taktak ana hi lotel chih te ka phawksuah thakthak ziak a kon luikhiat ahi. Hunlui te kimuh khak ni a gen a ‘Those were the Days’ chih touh nilouh pen i maban hon hizo mawk ana hi lotel chih le ka musuah thakthak hi.

A tawpna pen ah kuahiam selphou utna ziak a min khong ka quote a hikei chih a min ka gelh khak lawmte’n hon theihsak le uh chih ka ngetna ahi.

Khublei Shibun!!

Singnou Suan Kipan Thakni

Gam nuam leh gam etlawm, huihkhisiang hiauhiau leh dawn ding tuisik siang vot kelkel luanna gam a ngailou om diam chi ing. Ahi, gam etlawmte tul din kisa ta, huihkhisiang te leng nidang bang nawn kei, tuisik siang kelkel luang muh ding vang mahmah ta. Hun khat lai a laphuak tute’n Zo tuisiang a na chih uh kang di’n a kisa ta. Mi’n gamnuam loupi gamnuam a suah ua, mun kilawm loupi ah khopi kilawm tak a bawl lai un, i gam, i pianna leh i tenna vangkhua te bel tul lam nawt hiaihiai mawk hi.

Khopi khong a om ten a thei tham di uh, i gam leh mi’ gam kibat louhna. Mundang ah zing na thoh chiang in taksa gik miaimuai in na thou khia a. bangchi bang in tawldam le chin leng na taksa a gik. Aziakbel, a huihkhua himhim siang lou lua, I huih diik le gik ahih ziak hideuh din ka ging ta. I gam, Lamka tan chiang ah zing i thoh chiang in kizang mahmah ve aw. I gam khong ah om a, taksa gik miaimuai khong a i om leh bel damlouhna khat kinei hi din gingta ing. Zan ihmu sawt in tom ta le, zing thoh a nuam a, a huih a zang a, kihalhpah mai hi’n ka thei. Himahleh huai hamphatna nei gige ding i hihiam? A gam a teng mite’ khut ah kinga lian mahmah hi’n ka thei.

Sing leh loute i kep a, i khopi te ah singnou suan chihte i pibawl nawn zok keileh mi’ gam i gen huih gik, huihkhua siang lou chihte leng ei maban hipah ta ding hi. I khangtou a. i khang zel lai ding. Neih leh lam ah i khan kawmkawm in i kiim i paam kepna lam ah leng i khantouh ding uh poimoh ding hi. I gam ah singnou suan nakpi tak a pat thak tuak sa ing. Tenna veng chiat ah innkuan khat in mahni inn kiang chiat ah Singnou khat chiat suan hita le hang, tuban kum bangzah hiam chiang in a phat tuamna kithei ding hi.

Tulai in Job Card i chi a vengteng in na i sem sauhsauh hi. Veng khenkhat ah bel sep ding tam mahmah lai maithei. Himahleh veng khenkhat ah bel sep ding om nawn mahmah lou, nasem a kuan chih theihna peuh dia dakkal 1 khong lamnawl va thai maimai a kikhen diamdiam pawl leng om tham hi. Huchibang a sep ding om nawn khollou veng te’n Singnou suan lam pibawl thei leng bang a chi dia? A function diam? Vengsung makai te’n a singnou di ngaihtuah lam ah pan hon la uh henla, i jobcard sum te mah in singnou lei a poimoh leh lei mai le, singnou leina sese lou dia le cut tuamtuam omsak gige thou hive hang poi lawmlawm ding hiam chi ing. Tuhun in a phattuamna ding theipah lou i hi maithei. Denchiang in hihkhial hetlou ihi chih i theih hun om ding in ka gingta

Sing leh lou ten khohun bangtan a thupo kha hiam chih lam a hihleh gen tam ngai hetlou a i theih chiat uh gingta ing. Lamka khopi kim chiatchiat ah leng nipi hun in a vot tuamna, a huih vot diakna mun om sese ve aw. Huai dan a huih vot tuam, a khohun uh nuam tuam i chihte bang dang ziak hilou in, sing leh loute ziak mah ana hizel veh. Mun kilawm, mun nuam, huihsiang diik ding tamna i lunggulh hiam? Ei a gam a teng mite’ khut ah kinga mahmah hi. Gamnuam lai gamnuam hetlou a suah thei a, huchimah bang in, gam nuamloupi le gamnuam a suah theih hi. A sung a teng mi te’n i gam it a i kep nakleh ei gam bang diakdiak chu a nuamsa hi a, va sep luat ding leng tamlou ding hi.

Kum bangzah hiam paita in Lamka ngei ah bang department nuai chet a kisem hiam ka thei kei, singnou a kisuan lotham. Singnou suan mai hilou in, singnoute umna hoihtak leng teklei in a bawl uh hi. Huai singnoute hoihtak a khang hileh Tedim Road tou lampi i pai chiang in singlim nuai ngen ah kipai ding in ging ta ing. Himahleh a mipite leng khel deuh i di ua’m ka chi. Singnou kisuan, a umna hoihtak kibawl, ei a dia dong kha leng hilou, suse chitchiat sese hi hang. A umna teklei te enlah i hi hia? A khel himhim i hi hia? Ka thei zou kei.

Lamka mite ihihleh zudawn/zukham siam lou diakte i hi zomah a, i zudawn/zukham siamlouh i singnou suan te un thuak kha le himai thei hi. Mi’ gam ah le zu om, om chih tham phetlouh in, Lamka khong toh kibang lou, dawr ah kizuak zihziah mai. A utut in lei himai. Ut zahzah dawn theih. Lamka ah bel Zuzuakna chia a langtang a signboard kitaak omlam ka thei kei. Banghiam zuak kawm chu hivek tangpi mai. Zu zuak omlouhna mah bang. A duhte a dia bel koimun peuh ah om zel. I guuk zuak a, i guuk dawn ziak mah le hiam ah, i kham uh leng huaisia deuh sese mai hileh kilawm hi. Zukham taphot in lampi ah suih ding, pek ding, vuak ding kizong mah bang. A huchi loute leng inn sung khong ah phunphun, innkuante phinphin se hihang. Huchia zukham a lampi i paikawm a suih ding, peek ding i zonna lam a i singnou kum bangzah hiam paita a kisuante muih mang gai, a umna teng chim gai a hi diam? Bangtan hiam a dik ding in ka ging ta.

Lehlam tak ah i gam a nna hoih kisem lou hilou, kisem mahmah, bang a chia kuitung zou mahmah lou ei de aw chihlam bangleng ngaihtuah huaipi suak hi. Huchia i sepna lamte a kuitun /tangtun louhna hidia ka gintak khat chu awareness i kineihsak masak louh ziak le hi di’n ka gingta. Nna khat peuhpeuh i sep sawm chiang in mipi’ kithuahpihna lou a sem thei hetlou, lohching hetlou ding ihi chih pen theih di’n hoih kha ding hi. Bang department hitaleh i khopi a dia nna hoih sem dia kisa in, a nna tak a sepma ua, huai kisem hileh bangchi ding? Bangtan a maban a dia hoih ding chihte campaign ek phot ngai hi’n ka thei. Mipite lak a a poimoh dan i tangkou a, a poimoh dan thei chiat kawm a i sep chiang in, singnou suan in bang sem hita leng i tupna i tun keileh leng i naih mahmah dia. I lohsap leh leng eichauh in poi salou in mipi’n leng poi honsak pih ding uh hi.

Mipi theihsiam sak chih pen eilak a i chiin hetlouh uh a poimoh mahmah khat ahi. Incident khat gen zual le. Nidang in ka omna veng ua’h lampi suklet ding chih V/A ten sawm uh hi. Lampi lian nei ding, tuban kum tampi khit chia le zat theih ding chih pen a se hetlou leh a dah huai hetlou ahi. A implement dan lampang siamlouh ziak hiam tamtak in kiza thadah hi. Kei mahmah in leng zathadah in kana kiseel pih gawp hi a ziakbel mi’gam keek uh himawk ven. A khonung a a thu omdan kiseel chia hon gen ua leh lah phal huai thamtham thu ana hi zel hi. Ka gen ut tak bel huchia development nna khat peuh i sep sawm chiang in leng a poimoh dan kizasak masa hi le’ng buaina tampi tuaklou a paithei ding ka chihna ahi. Huchi hilou, hoih ahi, thunei ka hi chih man a mi’ dai bawlsa khong va vatsiat sak pen hoih deihna hi zenpi, ki simmohna a batna chiang om thei mawk hi. Hiai in kitheihsiam masak sak a poimoh dan taklang kha mahmah hi’n ka thei.

I thupi Singnou suang ding gen nawn le. Poimoh ahi chih man a a poimoh dan, maban a a phattuam ding dan kitheisak/ kihilh hetlou a, ei sep sep a i sep ding leh bel, denlam a i gen tak kum bangzah hiam paita a leng kisuan a. kuitung lou mah i bang thouthou ding. Huai ziak a mipite lak ah tangkou a, a poimoh dan i theihsak chiang in bel sing leh loute it in i kem dia, gamnuam leh gam etlawm, sing leh lou hin dipdipna, huihkhisiang tak leh tuisiang vot kelkel te toh i gam kilawi lou ding hi.

ZODAWN SIAMSINNA

I kipatna Zodawn ahi. Tua Lamka leh a kimvel a teng, ki khopi tengsak sim phanphante leng i kipatna Zodawn mah ahi. Ei Lamka ah piang hita mawk lengle ipu-ipate Zodawn mah a pan hon peem ahi ua, Zodawn suak mah I hi thouthou.

A neizou deuh te’n a khopi deuh chi’n Lamka i ki delh huan a, himahleh lunggulh mahmah a Lamka zuan zou nailou i mi i sate bangzah hiam Zodawn ah khosa lai uh hi. Amau ten Lamka zaang lunggulh lou a hi kei ua, utlou ahi kei uh. Himahleh khosakna, nektak zonna ziak bang a peem zoulou, peem di hita mawk le uh leng belh ding kichian neilou himai thei lai uh hi. Amaute’n Zodawn a om nuam sa gige uh a diam? Lamka lak, a khopi zo deuh munte lunggulh ding un I gingta hia? A tate uh siamsinna hoihtak neihsak a, nektak zonna fel zodeuh got sam ut ding un I gingta hia? Ken bel ka ging ta.

Hun bangtan hiam a pat in Zodawn Siamsinna vei zou taktak lou, awlmoh zou taktak lou i ding ua aw chihna lianpi ka nei. Nidang in bel skulpu te leng a khua mahmah ah om in, nasem taktak uh hi. Hun masa lai a Mission skul a ana khangkhe te bang zo, khangthak ten Sikha laimal(Manipuri) ah I pha kei chiang mahmah uh. Huai kia hilou in, arithmetics chih khong bang le ana nehsoh mahmah ua, ka pu bang in pun(multiply) a gen chiang in “ani ani mari” chi’n a gen zangzang sek hi. Kei bang in huaite gen ngaihna chang ka thei kei. A omzia ka mat louh a tam. Huchi bang a kuhkal tak a ana zil te a khonung a Lamka leh a khopi munzo deuh hon naih chiang un nakpi in a hamphat pih ua, talpak pau bang a thei ua, inntek tak a om theipah hi ding un ka ging ta.

Tuchiang in bel i Zodawn siamsinna te a minpu maimai a bang ta. Mission a te a dan om deuh lai chi ni, government a te lawi chu a posting na mun uh koilak chih le a thei mah ding ua’m mo chih phet in a om. Ngaihtuah dia hoih khatbel, tunia nang-le-kei hiaitan i tunna i siamsinna ziak ahi chih theih thak ut huai kasa. I mi-le-sa te leng hindan nuamzo deuh, khangtou zodeuh in om uh hen i chihleh siamsinna mah ah kibulphuh ngai hi. Ken ka nekmuhna di khop thei tang chia midang awlmoh hetlou i hihle bel thutuam ahi. Sem ut a sum tam pipi khong a primary teacher khong i lei ngam ngal leh, sem taktak ni. I zodawn siamsinna tung ding nawn ni!

I mi masate a tamzo Mission skul khong a pat ana khangkhia chi leng ki khial lawmlawm lou ding hi. Mission school ten le pan nakpi tak a lakthak ngai kasa hi. Khoteng ah gina ngel lou a mission skul I grand sang mah in a khobang zah hiam kikop di un khua laizang deuh a skul kichian tak bang hong leng tua i pai lel dan sang un i lohching zo diam? Khoteng ah skul koih, teacher lah a kilawm zah tak ngial le koih zou lou, skulpu khat in class om liai siah hilh khawm vek mai chih bang zo Quality Education taktak piak haksa lotel di’n ka ging ta. Siamsinna i chih nasep toh kibang ahi a, gim huai mahmah chih kei ngaihdan ahi. Zil taktak ding, siam taktak ding I chih leh pan taktak a pan ngai, hih maimai theih chi hilou in ka thei. Mission skul hun masa ah a lohching mahmah, officer tampi a sek khia/bawl khia. Tuhun in i mission skul te a lohching i sa hiam? Kum teng a sum tampipi mission skul toh kisai a bang saptuam, bang saptuam in kiseng thou. Huaite manpha zodeuh a zatdan om lai dia gingta tinten ka hi.

Zodawn siamsinna i ngai poimoh ua, ‘Teach Zodawn’, ‘Project Nehemiah’ leh ‘Aid Zomi Japan’ te a pan in panlakna I gam ah bangzah hiam a tung ta. Amau ten sum leh pai a phal bangbang uh Zodawn siamsinna panpihna di’n a dongkhawm ua, siamsinna a phungvuh uh. Huachi bang a hih lai in teacher khat hitei, sepna mun a omlou, lawh lak hun a la gaihgaih, khopi a nuamsa tak a teng te ka dem mahmah. Amau te’n a mohpuakna, a nekmuhna bek uh ana zahtak uh hileh i gam a Zodawn Siamsinna hichi tel a niam lou ding hiven chih phet in a om. I zodawn ah khovak a tun hun lua, siamsinna kichingtak a neih uh hun lua, nidang sangmah a a pil a siam kitam zota, i dinmun hiai sang a sangzo dia a kilawm nung a le bangziak a khang taktak theilou i mah di ua aw? Hiai dawnna chu kei mimal ngaihdan a Siamsinna mah ahi. Siamsinna ziak in milak a sim khak i hi a, huchi lou hileh heiga, tuga toh gamnuai a khosa a nek zong ding ka hi maithei. Siamsinna in na lamdang pi hih thei ahi chih phawk thak in, i Zodawn Siamsinna tung ding thak nawn ni!