TOUPA’ PHAL

“Nang lemgel a thil hong tungte, Na phal hang a ka tuahzelte; Banghang hihiam chi’n leel uh ka kung tung a tung khempeuhte, Sian in a phal hang a tung hi e”.

A tung a la, a la a sak suk mai a beisak, a tatak a Toupa, nang lemgel ahi, nang phal ahi chih ding haksa kana sak mahmah khat ana hi gige hi. Haksatna chia gentham hihet lou ding, mi’ tuahte bang le hilou a bawn, Toupa, nang phal ahi chia kilan thei hetlou khat kana hi sim gige hi. Bang chi bang a itna Pathian, hehpihna Pathian in hiai bang phal ahi ding chih kei mimal hinkhua leh lehkhabu khenkhat a mi’ tanchin ka simkhak te apan kana kidot theih zel dotna khat ahi.

I Laisiangthou a Job tanchin bang, Job in a diktatna, a migitna thuakpih. Job migitna, dikna pen Pathian in Setan touna (challenge) dia ana zang laizang hiveh aw Job laibu a I muh bang a. Setan leh Pathian kitouna kikal ah Job a thuaktu a pangkha, tulai pau leh fair hetlou ahi Job adia, himahleh i Laisiangthou mah in, “Hiai tengteng ah Job in a hihkhial kei a, haihuaitak in Pathian leng a mawhsa kei hi”, ana chi lai hi.

Thupina maizen e Job! Ei khong i niteng nekzonna a mi’ kikal khong a thuaktu kisa sim a i pankhak chiang a vuallel kisa lopah, i mihinpih mahte tung leh Pathian tung bang avuina ding zong simpah a ki-om thei zel. Hehpihna hun ah ginna ziak a Pathian’ ta chih a om, Job bang a omdan hoih, dik leh gensiatbei hihna ziak hi mahmah lou, hehpihna ziak kia a, hamphatna i ngah lai a, tua ginna ziak a sawina leh ze-etna neu chikchik vuipih ana kihi a, Toupa’ thu ana kingai lou, ana kitheilou lua, huai ziak ahi chih pomdan khat ka neithei ta hi.

Laisiangthou ah Jesu’n “Simon, Simon, ngai in, Setan in buhsep bang a honsep theihna ding in, noute hon ngen eive”, (Luke 22:31) ana chi hi. Ginna ziak a sawina leh bawlsiatna i thuakna dia Toupa’ theihpih ana hih dan, Setan, thilhihthei leh thupitak, i Toupa kiang ah ana thum ana hi, i tan bangbang, i pal bangbang, Toupa’ phal mah ana hi ahi. A lungmuan huai mahmah chu, “Himahleh na ginna a manlouhna ding in k’on thumsak hi; na kihei nawn chiangh in nang na unaute hihkip in, achi hi”, (Luke 22:32). Toupa’n ei thuak thuak a, ei phut-phut a phu dia hon nuse mai hilou in, i ginna a manlouhna dia hon na thumsak hi lailai ahi.

Gingtu hihna ah ginna in zungthuk i kha hiam? Sawina leh ze-etna te i palkhak chiang in i lungke mai hiam? Tua bang te i tuahkhak chiang in hiai phawkni. “Min keimah ziak a hontai ua, a honsawi ua, zuau a gilou chiteng a a honhek hun chiang un, na hampha uhi. Kipak unla, nakpitak in nuam un; van ah na kipahman uh a thupi ngal a: Tuamah bang in na ma ua zawlnei omte leng a na sawi zel uhi” (Matthai 5:11-12).  

-10112017-

KHANGTHAKTE KHUALNA/ITNA ZIAK A DIKTATNA A KILAMTHAKNA

“Kei TOUPA na Pathian uh Pathian mullithat, pate khelhna ziak a a tate gawtzel, hon mudahte suan thumna leh suan lina tan a gawtzel….” Diuteronomi 5:9 (b)

Rev. N. Pumsuanmung, Youth Coordinator in August 27, 2017 in EBCC Delhi a a hunzatna ah, ‘ei khang tan a khovel bei ding hileh zaw i om khak dandan, i hih khak dandan hisak sukni chia ngaihzam dan khat le om dia, himahleh ei khang tan a khovel bei ding chi thei lou ihih man in, ei hih diklouh gah i tate, tute’n thuak thei ahih phawk kawm in, nu-le pate’n khatvei khangthakte, khang omsawn dingte khualna in i khopi/lamka hon etpih lai un’ a chih toh a tung a bible tangteel a kituak mahmah di’n ka gingta hi.

Nu leh pa te’n tate i deihsak petmah a, nekzonna kichian, detdou a neih ding uh nu-le-pate tengteng in a lunggulh leh deih uh hi ding in gintak huai hi. Tua bang deih ziak mah in sum tampipi seng in siamsinna mah kichi hi ding hi. Deihsakna leh itluat ziak mah a sepna, nekzonna ding khong sum tampipi seng mah a kileisak ngam kihi zomah ding hi. Deihsakna leh itna dik bel ahikhol kei maithei. A ziak bel Laisiangthou mah ah i ki deihsak a kithuhilh ding hiai ana chi hi, “TOUPA na Pathian uh na lungtang tengteng un, na lungsim tengteng un, na hatna tengteng un na it ding uh ahi. Hiai thu tuni a ka honpiak na lungtang uah a tam gige ding a; na tate uh phatuamngai tak in na sinsak ding ua, na in ua na tutlai un, lampi a na pailai un, na luplai un leh na thoh chiang un na gen ding uh ahi” (Diut. 6:5-7).

Deihsak leh itluat ziak a, i tate’ adia i hih teng a hoih hivek lou maithei ahi cih ngaihsut huai leh ngaihsut tham ching mahmah ding in gintak huai hi. I gam ah sepna lei chih khong kithang mahmah hi. Nu le pate adia ngaihsut tham ching mahmah hi ding a ka gintak bel deihsak luat ziak a sepna, nekzonna ding i leisak i tate’n a i thil hoihlou hih gah nekha thei mawk uh ahi, amau khang kia hilou, khang thumna, khang lina tan ah chilai hi i laisiangthou in.

Himahleh a kipah huai mahmah bel, sum tampi a lei ngai lou, diktatna, Pathian deihdan kisinsak in, tua diktatna mah gou dang bangmah i tate i nutsiat zoh kei lehle, diktatna kia nutsiat le hang, mi diktatte limsak louh a om ngeilou, a suante uh tan a ann ngawl lou chi hiveh aw i Bible in. “Naupang ka na hita a, tuin tek ka hong hita a, himahleh mi diktat limsaklouh a a omlam ka mu ngeikei hi, a suante anngolh leng ka mu ngei sam kei hi”. (Sam 37:25). Khang hong om zel ding te, i tate, tute makhua ding khual a, deihsak taktak ihih leh, amau te leh khang omsawn dingte khualna in diktatna in kilamthak ni.