Toupa i Diktatna

Kum 2018 bei dek in, Toupa, na ompihna khut kei (kou) toh a ton kei ding leh, hiai ka omna mun ua pan hon suantou ken chi in Exodus 33:15 pansan in, innkuan kum thak (2019) thupi ding in zang ni ka kichi uh hi. Toupa’n kumthak 2019 hon musak a, Ama ompihna ei toh tonkhawm ahi chi in ka lung uh a nuam hi.

Lungsim kipahna tak toh kumthak paltou dia kisa in, innteknu sepna lam bang ah leng kaisanna January 24, 2019 in hon mu a, mi’ading in gentham hikei mah leh, Technical Assistant apan Technical Officer chih min bang hon neih chiang in, ka innkuan un ka lung uh a kim mahmah a, ka kipahna uh a lian mahmah hi.

Promotion ziak a kipahna le kam in genkhin man nailou chih ding in innteknu’nau Debora Muansang, bangtan hiam apan damlou, hong gimse mahmah a, doctor te a pan thuzak bang le ngaklah mahmah kawm a lin mahmah chidan in a gal ah aki om liai-luai a, Toupa’kiang ah a damna ding ka ngen uhi. Debora dinmun in hoihlam nawt theilou ahihman in January 31, 2019 in Guwahati manoh in ka innkuan un kava zin uh hi.

Guwahati tung, huai tan ka tun theihna ding ua pan hon laksak ka U te’inn ah va lut zual in singpi va dawn, huchi in hospital zuan in ka taikhe nawn ngal ua, Hospital kava tung un nitaklam dak 5:30 a gingta hi. Innteknu Debora mu ding in ava lut masa a, amah hong pawt in ken kava mu hi. Huai kava muh ua kava houpih uh, ka houpih tawpna uh ahi ding chih kua a thei??

Kiiknawn le, ka innteknu’promotion ding hi ka ngaklah mahmah uh, innkuan thumna bang a leng ka lat gige uh ahi a, Toupa’n a ompihna hon tangsak in, promotion hon pia a, a ngetna lam a tam toh teh a kipahthu gen ding zah a leng genkha zoulou hi in ka kithei ua, ban ah, a kipah huai ding zahzah a leng kou leng kipak kha lou, huai lam sang a thudang lungsim hon kamzaw toh hong kizuih leh, tua te tengteng ah Pathian ngaihdamna ka ngen a, Ama’pina ziak ahi chi in Thupina. Pahtawina tengteng Pathian ka pia thakthak hi.

Debora Muansang, hospital a lum kava mu a, khatvei nak ding lel leng a nakpan a ngaihdan, bangzahtak a gim ding ahia chihte kava mu a, nak ka hia naklou chih theilou ding khop a bangmah a veilou a ana naknak ihih khong manphatdan hon muchiansaktu ahi mahmah hi. Toupa kiang ah Debora damna ding tamveitak kou kia hilou, mituam tuam, a tanchin zapha teng in hon ngetpih lai un, damna ei mihing ngaihtuahna bang hilou, na nawn hetlou ding a damna Toupa’n hon piaksak ta hi. A dam te a ding in damna hiai pen i nget ahi hetkei a, taksa mah a omlai a nuikhawm, kapkhawm thei lai ding damna aki lunggulh mahmah a, huaimah leng a kingen a. Angmasial pi aki hi a, ei a ding kia ngaihtuah a kihi mai a, amah Debora in khatvei nak lel ding a sual dan te, minute 5, dakkal kimkhat, dakkal khat, nikhat nak ding a sual dan khong ngaihtuahna ah leng langkha lou khop in, dah kisa in, vui kisa in khasiat bang a kisawm kha a, bang achia nikhat bek hon ompihlai lou chih bang lungsim  ah a lian mahmah hi. Himahleh, Amah zaw, khatvei nak ding bang leng a hatna, thaneih tengteng toh kisa a, hu-la a, hi kuai-kuai nawn lou in, a taksa tengteng thasang a pang nawn lou in, Angelte toh nat leh sat thuak nawn hetlou ding in, kipaktak in, leng diai-diai kawm in Toupa phat a lasa ta ding uh chih gintakna in, damna kipah huai ahihdan hon musak mahmah hi.

Ei a damlai te’n den chiang a van a i om ding dan a lim a i chin te uh, aman a tak a phat a laam ta ding ka chih chiang in, Amah Khristmas zang manpha pen ding hitah e hon chisak a, Merry Kristmas to you nu Muan chi in ka innkuan un Kristmas chibai kon buk uh hi aw nu Muan.

A chihleh Toupa’ompihna i tankum ahi, Na ompihna kou toh ton hen i chi a, a tonkhawm in i thei hia chih ka genkhop chiang un, chi thei tham e. Laphuaktu khat in Na ompihna, na tonpihna khatveivei mel in hon musak in a chi a, kou bel, khatvei vei hilou in, hunteng in A tonpihna khut mu in ka kithei ua, muhtheihlouh khut le hilou in, Toupa khut in, bantha hat in muhtheih in hon pi ahi ka chi ua, Toupa’n thumna hon dawn dan, hon tonpihdan, hichilawm lawm a na ngaihsak dia Toupa kei kua, ka innkuante kuate ka hi ua hon chisak Pathian in thupina, pahtawina, phatna tengteng tang ta hen aw!

Tu in kum 2020 galmuh thei phial in a ki om ta, kumthak ah bangchi bang a kalsuan ding ahi de aw Pathian hehpihna a kumthak mel muh ngei lam-en kihi a chia a ka lungngaihlai in, Toupa’n hiai hon chi hi in ka thei a, “TOUPA i diktatna uh ahi”. Jeremiah 23:6 (b). Mihing muanhuailoupi, dengdelpi, ginna ah hi in salam ah hileh, huihmut na lamlam a awn gige thei ana kihih lai in, Toupa ei lam ah pan a, amah ah i belh tinten keileh bangmah kihi mahmah lou ahi chih hon muchiansak a, diktatna, itna, hoihna i chihte Amah a pan mah ahi. Huchi hilou a, mihing kilimbawl lel kidiktatsakna, hoihsakna te zaw mitsiip huai dingpi ana hi e chih theihchianna hiai Bible tang apan houpihna ka mu hi.

Huai ziak in Toupa’n dam a kumthak 2020 hon muhsak chiang in, bangkim a ka bangkim Toupa na hi chi dia hon deih eive ka chi hi. Mihing diktatna hilou in, mihing hoihsakna hilou in, mihing pil kisakna hilou in, abulpi Amah ahi chia kihasuan thak a, kibulphuhna kichian toh kalsang zaw suan ding in, TOUPA ka (i) Diktatna (uh) ahi chi a, Khrist hoihna, diktatna a kithuam a kalsang zaw ka (i) suan kum (uh) hi din, TOUPA hon panpih in!

Puanmalngat siampu puanak

Himahleh Samuel in bel naupang mahleh, puanmalngat siampu puanak silh in TOUPA ma ah na a sem hi. (I Samuel 2:18) Hiai ah I keyword dia ka deih ahihleh puanmalngat siampu puanak chih ahi.

Samuel, Pathian zawlnei thupitak hong hi, Isrealte kumpi masapen ding thaunilhpa tanchin, a neulai thu ahi. A tanchin i theih sasa ahi a, i genvek man kei ding. Samuel ahih leh Anu Hanna ahi a, apa Elkanah ahi. Hannah in ta deih mahmah a Pathian kiang a a nget, a ngetna dawnna Samuel ahi. Nawi a ngawl apan a Siampu Eli kiang a Pathian’ nasem dia om ahi.

Siampu inn a khanglian, Pathian’ nasem dia chiil a om ahi a, a sep ding mah ahi va chihkhak baih a baihlam ahi maw Samuel tanchin i et chiang a. Himahleh innsungkhat a a khanlet khoppih siampu Eli’ tate toh a tanchin uh kilehbulh chetchet mawk hiveh aw naupang Samuel kha. Toupa’ na a sep theihna dia, Pathian’ pomtaak ahihna dia a hih d thei ahi Samuel in. Siampu dia chiil a om ahih chiang a puanmalngat siampu puanak silh pah.

Sawltak Paul in I Korinthte 6:19 ah, “Ahihleh na sapum uh, na sung ua om Pathian kiang apan a na muh uh, Khasiangthou tempul ahi chih na thei kei ua hia? Nou mau a leng na hi kei uhi”, ana chi. Huchih ahihleh eite taksa pumpi Khasiangthou’ tenna temple ahih leh i taksa tung ah siampu nna poimoh tak sep ding nei ihi. Ei adin i puanmalngat siampu puanak bang ahi dia le i siampu na sepna ah? Eite a ding a i puanmalngat siampu puanak ahihleh Laisiangthou bu sim sim ahi chi ihi.

I Laisiangthou, i puanmalngat i silh khaklouh ziak ua Siampu Eli tate ana kibang kha pahpah hiveh aw mawle. Khristian innkuan a khangkhia, Sunday skul hoihtak a kai, Samuel bang a Pathian pomtak hi ding, Ama ah nasem dia lamet ihihlai a, ana kilampial kha zel. Siampu Eli tate bang a ana omkha, i puanmalngat siampu puanak i silhkhak louh ziak ana hi mahmah ding hiveh aw.

Ka tuailaipihte, i puanmalngat siampu puanak i silh tinten kei ua leh i khovel uah paikhelh na ding tam a tam hiveh aw maw. Zanlam deuh a Facebook group khat a ka muh khat kon share mawkmawk deh. Mikhat in hichia gen hiveh aw. Eimite le zu dawnlou lah kihilou, zu zuak di khong kikham hang a, a ngawl lah hilou, meiteite’ zu ngen va dawn. Meiteite hausa sak hulhul hang a. Huai sang in ei mah in zuak in, ei amah dawn in kileisak le kipanpih tuah hi ding, hauhsakna lampi hi ding chi hiveh aw. Ngaihdan hoihpi leh kideihsakna mahmah bang ahi maw iva et zual leh. Himahleh, hiai bang a hausa dia kilamtouhna i Laisianghtou in hon sinsak hauhsakna ahi hia? Thilhoih kideihsakna mahmah a bat lai a, i hoihsak te i Laisiangthou toh a kituakna hia? Sam gelhtu in, “Nang loungal thilhoih himhim ka nei kei”, (Sam 16:2 (b) ana chi hiveh aw. I laisiangthou pua a kipahna, a kilawm, a hoih, i zon khak ding le kiven huai mahmah.

Sam gelhtu mah in A kipahna uh Toupa dan ahizaw a, a danthu sun leh zan in a ngaihtuah ngitnget hi chi. I kipahna bang ahia? Bangthu ten hon kipaksak a, bangthu in hon thathousak a? Toupa danthu te sun leh zan in I ngaihtuah hia?

A hoih, hoihlou, kipahna, hon thathousak chihte Toupa’ dan ahi na hia? Siampu Eli’ tate bang a temple a omom hizenpi a, i innkuan a dia hamsia tuntu hihkhak theihna khovel ah, i puanmalngat siampu puanak (Laisiangthou) sim a i kikep kei leh Khasiangthou temple i sapum ihihsiat ban ah, i khang om sawn ding te tan adia hamsia hihkhak theih ahi. Ka tuailaipihte, Samuel bang a Toupa ma ah ana i seplai in, i puanmalngat siampu puanak isilh manngilh hetkei ding uh aw.

(September 15, 2019 Bible Sunday a EBCC Delhi a sharing hun piak a ka om a, ka share ahi. Thugen ngeilou chihmah, ka gentup zah pekhezou ka kisaklouh ziak a, a chian zawk khak leh chia gelhthak ahi.)

https://www.youtube.com/watch?v=VpzAsbKJmVc&t=150s

Papa, Na Phone Ka Enthei Diam?

Ka tanu summer suty kipan ta ahih leh a suty sung father-daughter time chidan kizatpih leh, a hinkhua a pichinna lampi a ziltheih dan omkha de aw chi’n ka kaina lam apan suty ka ngen hi. Tup deuh chu, naupang kum 5 ching pan, bangpi kikum theinailou ding chih a hih kawmkawm a, bangchi hiam a a lunglutna deuh theihtheih dan om hiam? Ban ah kei mahmah in le ka tanu thei ka kisak zah ka thei hiam chih ki-enkhe ut deuh leh banghiam tomkha a attention lak khak sung piching tak a houlimpih sawm ding chih ahi.

Gentak bang in naupang ahihlai ziak mah hia, houlim chih lampang ah bel tup bang a houlim khak om khol kei. Papa, na phone ka enthei mai diam? Chih kidot leh nget chu ka kihouna tampen uh ahi mai. Phone a game download dan thei ven chin, a kimawl peihlua hilou, a dawnlou ut top mai. Game bangzah ka neita chia huai sim dendon mai. Numbers 1,2,3....khong va simpih dek hial le sawt ut lou ahih toh, a game a count thithe bang le hoih kisa suk zel. Youtube ah Peppa Pig, Ben & Holly, Barbie Life in a Dreamhouse chihte tampi ka theihbeh lawh tuak mahmah uh.

Phone en-en lai, banghiam a lunglut zawk, a ut zawk a muh chiang in a phone koihkhe buk hiam, a hih keileh a letna taal khia in kesak zelzel hi.Hehsan sim kawm a, “Bawi, nang pilvang zoulou, na phone koihbuk zel hiam kesak zel, tampi man hi a, se leh kilei zou nawn pahlou di eivoi, tuban i en nawn dah diam?” ka chi zel hi. Sawt a daih kei. Amah sang a pangzou lou zaw ka hi gige mai. Naupang leh hausa thusel theihlouh chih a gen sek uh ana dik mahmah ve.

“Papa, na phone ka en nawn mai diam?”, “En nai dah aw Bawi, i houlim phot kei dia”. Minute 2/3 zoh a, “Papa, na phone ka en thei mai diam? Pliz, ka kesak nawn kei na di”, kidek haksa hi ta, “en lua aw Bawi, ka nau in ka neih, ka piakpah theih phone en ut, i enkhawm d aw Bawi”, chia piak khiak hizel mai. Ka tanu in ka phone kesak nawnlou dia ka gintak ziak a pe nawn ka hi hia? Pilvang ta ding, dawm theih deuh ta dia gingta ka hi hia? Hilou. Naupang chik ahih chiang a, denchiang a taal khesak nawn thei, a lunglut zawk, a pahtak zawk banghiam mu leh tuangtung khong ah koihbuk a taikhiaksan ding ahih le ka thei. Ahihleh ba ka piak zel oi? Ka itluat ziak hipen mailou di hia maw, itluat ziak a, hihkhial nawn thei chih thei kawm a phallou ngamlou a, pe zel, ensak zel ka hi mai.

Huchia ka tanu a dia thil phallua ka kisak lai in, hiai mah hi ding eive i thumna te khong dawntak hetlou, mi nitna a dim, sianglou, khelhna a dim ihihlai a le, thumna dawn a ki om i chih theih chih ka lungsim ah hong suak hi.Ken ka tanu ka it mahmah ziak a ka phone kesak leh sethei ding bang le pe ngam, ensak ngam, phone chu a siat leh leithak theih, sum i neih nak leh. Huchihlai a Pathian in hon itna A latsakna dia i nget te hon piching zel a, hichia Ama kiang i zotna ding lampi honna bawlsak zel mah hilou ding amo? A ziak, hotdamna neilou in si le, i pumpi chauh hilou a, i kha mangthang ding, huaimah a itluat ziak a A Tapa Jesu Khrist isik a si dia hon sawl a, tua Pathian in a Tapa’ tungtawn a i nget hon pia ana hi. A itna, zahngaihna lian leh lamdang ana himahmah lou hia chih hon phawksak hi. Mikhial hi, khial zel thei ihih thei Pathian (khialh i tum ding chihna hilou), huchia le itna, zahngaihna thupi ziak a thumna dawntak lou himahleh hon dawng zel ana hi. Ka tanu ompih ding, amah adia hun pe ding ka chihlai a, kei zil ding om a hiai bang lungput honna pia hizaw ding eive ka chi hi. Ka tanu sang a ken poimoh ana neizaw ka hi chih ka phawk thakthak hi.

Johan 14:14 Nou ka min a bangpeuh n’on nget uleh, ka hihzel ding hi” a chi hi.

Johan 16:24 Tu tan in ka min in bangmah na ngen nai kei uh. Ngen un, huchi in na mu ding uh, na kipah uh a kimna ding in. 

Mihing’ Lungput

“Thil tasam bang in mihing khut a nasepsak in leng omkei, amah mah bangkim kiang a hinna, hatna leh thil tengteng pepa ahizaw hi”. Nasepte 17:25

Mihingte kha lian a kiliansak, thu a kithupisak ana kihi hiveh aw, a ngeina dan a. Pathian in thupitak a hon bawl, leitung a ganhing tengteng, sing leh loute tung a thunei dia honbawl ana kihih ziak le hinteh, kiletsakna, kichapousakna chihte i mihinna khat ana hi mawk hi. I mihinpihte tung bang ah theihlouh kal a ana kiliansak lua, ana kithupisak lua in, i phawk mama a kuahiam khasiatna ana kihiman khasek hiveh aw.

I mihinpihte tung a banghiam kisemsak, hihthei kisakluat chihtan zaw a ziazia om le hilai, a hoih ahih hetlouh kawmkawm in. Khatveivei chiang a Pathian nasan banghiam sepsak hile kilawm bang a kingaihtuah khak theih mawkmawk hiveh aw. Kikhawm in, Pathian a dia banghiam sem kisa, Pathian bang kipak tuntun dia koih mawk! Pathian thil bangkim hihthei, i hinna, i hatna, i damna leh thil tengteng Amah a pan ahi, amah kia biaktak Pathian, phattak Pathian ahi, Ama ziak kia a nahoih i chihte semthei lel kihi, Ama’ vanzat khat lel, hoihlouhna, chitlouhna tampi mah toh, A hehpihna ziak a hamphatna mu lel ihi chih bang kimangngilh khak a om thei mawkmawk hiveh aw maw.

Pathian lawmbawl ding, pa bawl ding ahih lailai a, khatveivei pilsiamtak a kichalak beihsawm kha zel hiveh aw. Ki bargain sawm mawk! I lungput ana diklou man sek hiveh aw. Banghiam i deih leh poimoh a om chiang a, ei lam pan a hoih a i theihkhat sem a huchia Pathian lungkim sak khong ana kisawm hileh kilawm, kinaupang bawl kha hileh kilawm thei hiveh aw maw le, nou na huchi du’am ah?

Himahleh Aman i tangteel ah mihing khut a nasepsak in ka omkei, bangkim kiang a hinna, hatna leh thil tengteng pepa ahih dan chiangtak a gen hiveh aw. Pathian lungtang tengteng thei a enpa’ mai ah i mihing’ lungput uh bangchi tuk a kih huai ana hi dia? Hehpihna leh Itna Pathian hilou hileh amai a saantak, pomtak zaw om hetkei mahni maw? Toupa, ka lungput uh kih huai, nang adia luaksuah huai ahihlai a le, na itna hehpihna mit toh hon en a, mit nauta bang a non kep kipak lua ung!

Kua na chiing a?

Bangkim ka hih peuhmah na chiin ding ua ka hih ahi. Nasepte 20:35 (a)

Sawltak Paul in hiai thu Ephesa khua a gingtute kiang a a gen ahi. Ka thilhih khenkhat, a kimkhat hiam, a kallak lak in hon enton uh, chi het lou in, ka hihpeuhmah/bangkim ah na chiin ding ua ka hih ahi chi hi. Thupina maizen e Sawltak Paul!

Ei gingtu nungzuiten tunia i taksap mahmah uh innkuan kikepna ah, saptuam kikepna leh khotang kikepna ah, ka hih peuhmah noute etton ding, chiin ding a ka hih ahi i chih ngamlouh ana hi mahmah ding eive. Pathian chih louh a hon theichiang penpen ding tuh i innkuante hi ding hi. I zi leh tate, innkuante kiang ah ka hihpeuhmah na chiin ding ua ka hih ahi kichi ngam hetlou hi. Huai naksang in, i omdan hon theikha ding uh chia banghiam selnei mah bang, i khut a i tawi vanzat mobile phone leltak bang le eikia et theih dia tahbi kalh chih bang hinkhua kizang mawk hi. Mobile tahbi kalh pen a sia hipah veklou hi. I bitna ding ngimna, bangchi hiam in koi hiam ah ana tolhmang henla, ahihkaleh kuahiam in ana sawkkhe kha leh i lehkha tuamtuam poimoh taktak kikem ta, huai bitna dia i kalh pen bel ahi ding mah ahi. Himahleh huai in bel i innkuante khong a huam khaklouh ding hipah zel ding hi. I zi leh tate khong in a muh dia i deihlouh thu leh la leh mit taisak thei ding banghiam khong i kep ziak a tahbi kalh gige ihih leh bel, banghiam a diklou om himaithei hi.

Hiai ah mobile pen etsakna dan a i gen ahi a, thil tuamtuam, i nektak zonna ah, i kalsuanna bangkim, i sep i bawl, a lian a neu, i niteng hunzatna chihte izi leh tate lak ah gen a, kalsuan pen Kristian innkuan kikepna ah pichin huai mahmah ding in ka gingta hi.

Sawltak Paul in Ephesa saptuamte kiang kia hilou a, gingtu tengteng kiang ah “Bangkim ka hih peuhmah na chiin ding ua ka hih ahi”, a chih bang in, tua bang hangsanna nei in eite’n leng Sawltak Paul pen i Role Model a zang in innkuan kikem in, khotang ki-en kai in, saptuam kikem le, leitung a vangam malep hinkhua zangkhate hiding ihi chih ka gingta hi. Kua i ching a? Kua i enton a?

TOUPA, LUNGTANG EN PA

07.04.2019 kikhawm ding a kuan, ka tung baih ziak un devotion hun kilap chi in kava dianglut hi. Ahitak a gen in, nidang khong a le lap zelzel ding ana hidan ka hi, va lut a vatel na dia lungput ana neikha ngeilou ka hi zaw sim maimah hi (chih kipuang malam le 😊) 

Devotion na ah pitu Upa T. Thianzakham in Pathian in lungtang en ahi chih hon gen leh ka lungsim ah hampha kisakna point 2 lut geih a om a, huai te gen zual le.

Khatna ah, lungtang enlou a, kamsiam, ngetsiam ziak khong a maipha muh ding hileh akinak muh ngei kei mah ding, i maitai lou, om bebu, kamsiam lou nalai, a kichaivawt chu kihi sim mahmah mai. Himah leh Pathian, tua bang kamsiam leh maitai leh ngetsiam ziak chih a en mailou a lungtang enpa Pathian neih khak hamphat huai ana hi mahmah hi.

Nihna ah, kilim bawl siam ziak, a kilang a hilua dan a kilat theih ziak bang Pathian’ maipha muh ding hilehle kitang kha baan dek lou lai ding, mi limchiin a nek zong tampi omna khovel ah. Ei koi hiam a kawng sawi zekna ding om chia le pawt mahmah lou, hikhe gengan maimah te adia chu, mang a le kiman ngam lou ding dan ahi.

A polam a kilatdan hilou a lungtang en pa neih hamphat huai sak lailai in, lungput dik neih chih le thil haksapi ahih dan Pa Kham mah in a gen a, ka pom mahmah hi. Laisiangthou sim ding chia tu, i kam in simsim hina zen a, i lungsim a thildang daih ana om man chih bang ka tuah mun mahmah te lak a khat ahi. Thakhat a, eheih, ka lungsim ana dik nawn sam a chia thumna bang neithak, kipat thak chiang a le sawt daih mahmah lou, chitaklua kisak sung mah a lungsim ah thutuampi ana vak man zel. Hilehle, tomkha chik petmah, mitphiat kal petmah khawng i lungput a dik sunsun hun kia lel a le i Pathian in hon itluat ziak a, tapa Jesu tawn a, i hih dik sunsun te Amah maipha i muh theihna dia honna heisak mengmeng ado ka chi hial hi. Pathian, hehpihna leh itna a dim leh lungtang en pa i neih mahmah hamphat huai ana hi mahma e chih devotion telna apan ka thumuh ahi.

MAIPHA

Ka pil man hong tonpih hi lecin
Kei sang a pil zaw mi tampi om ee
Ka siam man hong tonpih hi lecin
Kei sang asiam zaw mi tampi om ee

Ka hoih man hong tonpih hi lecin
Kei sang ahoih zaw mi tampi om ee
Ka hauh-man hong tonpih hi lecin
Kei sang a hau zaw mi tampi om ee

Mite muhna ah zat-tak cinglo
Kei lel Topa nong zangh
Ka lu sathau nilh ka hai nong dimlet sak

Nong hehpihna guntui luang
A khum penpen tua guntui
Kei leh ka innkuan ihte nong dawnsak a

Na laptohte kuaman neng niam zo kei
Na panpih te kuaman langpan zolo
Nong it na tate na maipha nong ngah sak

I Samuel 16:7

Himahleh Toupa’n Samuel kiang ah, “A mel in hiam, a sandan in hiam en ken. Ken amah ka deihkei hi. Toupa’n mihing et bang in a enkei. Mihing in pawlam a kilat dan a en a, Toupa’n bel lungtang a enzaw hi” a chi hi.

Pa, hon khah ken aw

Ka omna inn uh first floor a om ka hi ua, zing leh nitak walking dia pawt khiak chiang bang, dawr ah van poimoh lei dia ka kuan chiang in ka tanu in hon zui zel hi. Step a ka kum chiang un ka khut hon len chinten a, “Pa, hon khah ken aw”, hon chi khial khol kei hi. A chang a fone en kawm, amah ngaihsak lolou kawm a len ka hih a thei mahmah a, huai chiang bang in, “Papa, hoihtak hon len in aw”, a chi zel hi.

Ka tanu in hon muang mahmah ahi chih a kammal te, a paukhiak thumal te a pan ka thei a, ka kipak a, ka lung a kim tuntun hi. Himahleh a khonung a kei kia khong a kingaihtuah thei dia hunlem ka muh chiang in tua kammalte mah ka bilkha ah ging zel a. Ahitak in, muanhuai hetlou ka hihdan kei kitheih sang a theizaw om lou ding hi. Pilna siamna ah chi leng, ka muanhuai louh dan ka thei a, neih le lam ah chi leng, a deih, a lunggulh uh suktuah sak zou hetlou ka hihlam ka thei mahmah a, thahatna chi le hang, hat hetlou, deldeppi khat ka hi sawnsawn hi. Himah le, bangchi tuk in kei muanhuailou ka hihlam kithei mah leng, ka tanu adia ‘apa’ ka hih mai chiang in, aman hon muang mahmah, thilteng hihthei dia hon gingta ahi chih ka phawk hi.

Hiai thute ngaihtuah a ka omlai in, ken Pathian, leitung leh a sung a om tengteng bawlpa, ka Pathian ka muang na hia? Ka tanu in kei apa hon muan bang in ken Pathian ka muangzou na hia chih dotna liantak ka lungsim ah hong lut a, muangzou lou, Amah a kinga ka chih chiang a le kinga zou lou, ka muan ding bang a muanglou ka na hih dan tampi hong lang zel hi. Hon len gige in le chi man lou, kei kia a hithei kisa, kei vaihawm theihna a hithei kisak hun ana tam mahmah a, tua bang hunte ah Toupa’ lungsim tamveipi hihna kha ding ka hihdan ka phawk hi.

Pathian i muan ding bang a muanglou, i kingakna ding zah a kinga lou ihih lai in, ei it ziak hilou in Aman honna it masa a, Aman hon na kem a, Toupa, hon len gige in i chihma nangawn a, aman k’on len gige ding ana chi ahih man in, Toupa min ka phat hi. Isai 41:10 ah, “Lau kei un, kei lah na kiang uah ka om ngal a; mangbang kei un,kei lah na Pathian uh ka hi ngal a: k’on hatsak ding a; ahi, k’on panpih ding; ahi, ka diktatna khut taklam in ka honlen gige ding hi”.

Heutupa Pumkhothang’ la hoih kasak mahmah kon koihsawn di, anak lungmuan huai khiak dan:

Kon Ompih Ding

Zaitha hatna bangmah ka neilou a,
Theihna leh kichinna bangmah nei keng;
Selung pilna masuan ding neilou pi,
Na nasem ding in bang ka hi hiam Toupa.

Kon ompih ding banzal ka hon len ding,
Lunglau lou aw nang din Toupa ka hi;
Nangmah hatna hilou kei hatna in,
Hon nusia kei ning nang toh ka omkhawm ding.

Sianmang sung ah a piang theilou omlou,
Zaitha hatna neilou te’n hatna nei;
Khattang muanding omlou ahih lai in,
Tung Sianmang zaitha ka hatna hong hita.

Keimah hatna suang a ka pai in zaw,
Lunglauna ding lungngaihna ding atam;
Tunglam en a Sianmang ka mit suan chiang,
Tung muvanlai bang zaitha hatna ka nei.

Source: http://pumkhothang.com/kon-ompih-ding/