Laisiangthou

Nite hoihlou ahihman in, aman pia in hunlem lei zel unla, a hoih theipenin zang un. Ephesa 5:16

I Laisiangthou in na hoih sem, thilhoih sem ding leh nahoih sep chimtak lou ding in mun tuamtuam ah ana gen hi. Sam gelhtu in Nanglou ngal thilhoih dang himhim ka nei kei ana  chi hi. I tangtel ah tuabang na hoihsepna ding in nite hoih nawn lou ahihman in, aman pia in hunlem lei zel unla ana chi chiatchiat hi. Na hoih sepna ding hun omlou, nahoih i chih chiang a Toupa deihna, a aw ngaih khiakna hipah ahihlai in Toupa houpihna za manlou in hun tamzaw ana kizang zel hi. Toupa’n Mosi leh zawlneite tungtawn in tuhun ah thu agen chih i Laisiangthou ah chiangtak in Lazar leh Mihausapa tangthu ah gen hi. I Laisiangthou pen Mosi leh zawlneite tungtawn a piak ahihman in, huai sim a, a thute zil a hinpih ding chihna himai hi.

Himahleh i niteng nekzonna te ziak bang, lunglutna tuamtuam ziak in Laisiangthou simna ding hun neilou, sim man lou chi in ei leh ei bang kingaidam tawmtawm in ana ki omzel hi. Tua bang ahihlai in i tangteel in aman pia in hun lem leizel unla ama chi a, huai ngaihtuah tham ching kasa. Aman i piak ngai ana hi mahmah hi. I lunglut movie et hiam, ihmut hiam, ahihkaleh banghiam dang khat, huai te hun lepsak, aman piak a, huai kawmkal a Laisiangthou simna ding hun kibawl ngai ana hi mahmah ding hi.

Aman pia a hunlem kilei zen a na hoih sep ding chih ahihlai in, tulai in natna hipi leng ziak in, hunlem, hun awng i hau mahmah a, hiai hi, lehlam tak a vualzawlna ahimai de aw, i omna khovel chiangkuang lou tak ah, tuhun a hichia inn a kikhum dipdep a i om bang, Toupa’n na hoihsepna ding, a aw ngaihkhiakna ding, Ama’ hoihna, Amah lou thildang a hoih himhim omlou ahihdan i zilna dia hun hon bawlsak himahmah lou ding ade aw ka chi hial hi. Laisiangthou sim hi, ka simtam ka chi ngam zenzen kei a, himahleh ka theihkhat bel, i sim zoh dandan, a theology thuktak va theizou kei le hang le, ei hinna bawl di, ei ki-et chetna di banghiam zaw kimu teitei ahi chih bel ka chiang mahmah hi. A ziak bel Laisiangthou peuhmah Pathian hatkhuma piak ahi a, huai tuh thugin ding, taihilhna ding, bawlhoihna ding in leh diktatna kisinsakna ding in a phatuam hi (2 Timothy 3:16). 

Limlak https://www.pexels.com/ apan ahi.

Ka Kiang Uah Tam In

Kam in a khou ua: “Ka kiang uah tam in; nitaklam leng hi ding hita a, ni leng tumdekta ahi” chi in. Huchi in a kiang ua tam ding in a lutta hi. Luke 24:29

I tenna khovel buai khat thu in thu kibang in a buaikhawm a, hiai bang a buaina om ding chihte bang ana kimang mat kha ngeilou, milim tangthei leh pauthei te khong a ina muh lel, mi te’ sungtuahna maimai, a tak a hiai dan a buaikhat a buai theih mah ding ade aw? Khovel mipil misiam tamna ah, kiu khat ah zaw buaina ana om gige thou mahleh, thakhat a thu kibang a buai ton chihte om khol kenteh chi a, i niteng hinkhua zat ngeina dan a zang ding, nitak lum a, zing thou a, nek-le-tak zonna chiat kuan a, sep leh bawl leh mohpuakna sep khiak zel ding, kipaktak bang, kipak khollou bang; thanuam tak bang, thanuam khollou bang a hun zat zel ding, huai dan hinkhua pai dingdan ana sa kei bang te a ding in, tu hun hi, lungphawn huai, thawmhau huai leh patauh huai bang kasa hial hi.

I pal khak ngeilouh thilte pal tou ding a kisa, natna hi leng in hon ban diam? Hon peel diam? Bangtan thuak tou lai ding? Maban i nektak zonna bangtan a buaisak dia? Hiai apan i dingkhe thei nawn diam? Hiai zanmial thuak din i kisa lel a, bangtan a sawt ding ahia i genthei kei. I gam kumpi in om dingdan a gente zui in, nipi kaal 3 daih ding i chihte eilam ah kisak kholhna i neithei a, hoih lua. Kaal 3 zoh chiang a bang chih bel kuaman i gen thei kei hi.

Mihing lam a i kisak kholh theihna teng i kisakhol ta a, aban a poimoh omlai hia? Om tham e. Ei gingtu te a ding in a poimoh penpen, hiai zan hon thuak mualsuah pih ding in i Toupa Jesu i chial kha hia? I tangtel  Emmau lampi a khualzin nih te’n Toupa chial uh hi. A chial tan ua bei lou in, a kipah huai penpen bel a kiang ua tam ding in a lutta chi hiveh aw maw le. Tanchinhoih Johan ah Kana khua a kitenna om ah Jesu leh a nungzuite a chial thu uh leng i mu hi. Chial a om bang ngei in Jesu leh a nungzuite va hoh in tui uain suahsakna thu i mu hi.

Hiai apan i muhtheih ahih leh i Toupa Jesu, amah ngai a chialte kiang ah tam, va lut in, na lamdang te leh khamuanna te vatun hiveh aw. Hiai bang hun haksa zanmial paltou ding a ikisak lai in, ei mihinglam a i kisakkholh theihna te leh kiven theihdan a pil a siam te gente i en a, tawm lotel hiveh aw. Ei kisak kholhna te, ei kiven theihna te ziak a bit mahmah lou ding, dam mahmah lou ding i hihdan chiang mahmah. Himahleh huai chi a, hai hangsan a, thuneite thupiak ngeingaihlou ding chihna bel ahi hetkei hi. Kiven theihtan, kisak kholh theihtan kisa mahni, huaite ban ah, i Toupa Jesu chial ni. Hiai zanmial bangtan i thuak ngailai ding ahia i thei kei, Toupa hon tam in, hiai zanmial ah kou kia hon omsak ken, khovak hon ngakpih in chi in amah ngen le, a chialte kiang ah i Toupa Jesu va lut ahi. Emmau lampi a khualzin te amah toh a tonkhawm ua, nekhawm ua, a lungtangte uh vaksak a a om  uh leh Kana a thillamdang hih Jesu mah tunia ei Jesu, ei Toupa mah hi ahihman in, tuni’n Toupa ka inn uah hong tung in, koute toh hong nekhawm, dawnkhawm inla, kou te toh hong giakkhawm in. Hiai zanmial hon thuakpih inla, khovak hon ngakpih in chile, i Toupa ei toh houlim dia man gige, amah chialte, amah belte bangchik mah a nawlkhin ngeilou Toupa’n zing khovak hon ngakpih ding hi.

A aw leh a houpihna za ding in, Mosi leh zawlnei te tawn a Toupa houpihna, Laisiangthou te sim in, A houpihna za din hun bawl in kisa ni. Lam chituamtuam a amite houpih Toupa’n, A hatkhum a gelh Laisiangthou a thute tungtawn in khamuanna, lungmuanna leh lam-etna hon pe ding hi.

Limlak https://www.pexels.com/ apan ahi.

Hih Dam A Om Na Ut Hia?

Johan 5:6 – Jesun amah huai a lum amuh tak in, amah huai mun a sawtpi omkhin ahi chih a theih in, a kiang ah, “hih dam a om na ut hia?” achi hi.

Bethsaida dil kitok ngak, damlou, damna lunggulh mahmah pa kiang ah i Toupa Jesu’n hihdam a om na ut hia chi’n a dong a, damloupa, damna lunggulh a huai ah kum 38 omkhin, huai bang dotna a zak phet a, nak manlou phial a ka ut chipah dia gintak mahmah ahihlai in, huai le chi ngam zozen lou in, “Pu aw, tui a hong kitoh chiang in, a sung a hon koihlut ding kuamah ka nei kei hi. Ka kisak sung in, midang ana lutkhin manzel hi” achi hi. I Toupa Jesu in dam a ut mahmah chih a thei a, huchi’n damna a pia hi chih Johan 5: 1 – 15 kikal ah i mu hi.

Kum 38 damna lunggulh a dil kitoh ding ngak bang in, tuni’n damlou in, damna i lunggulh hia? Taksa damlouhna i nei hia? Khalam damlouhna i nei hia? Lungsim tawldam theilou, khamuang theilou in i om hia? I damlouhna te damna ding in lampi tuamtuam i na tawn a, lungnopna kipahna i na zong a, lampi iva paikhial kha zel hiam? I kiim i paam ah miten damna mu a, khalam dam a, khamuang a, Toupa phat a a dian lai un, ei kipak theilou, diang theilou, laam theilou, khamuang theilou in i om hia? Tua bang ihihkhak leh Bethsaida dil kitok ding kum 38 ngak a damlou kiang a “hih dam a om na ut hiam?’ chi i Toupa mah in tuni’n huai dotna hon dong lai a, hehpihna kong hon honsak lailai ahi. Toupa min i phat ahi.

Toupa’n dam na ut hia hon chih lai in, ka ut hi Toupa chi’n a ang ah i kitulut thei lai a, paulam tuamtuam bawlse lou in A damsakna i nei theilai hi. Johan 6:37 (b) “Huan, ka kiang a hongpai kuamah bangchi mah in ka hawlkik kei ding”. I hihna bangbang toh Toupa ka dam ut chi le hang, Toupa hon damsak ut hi, i damlouhna i hatlouhna, bangchik apan thuak, Toupa’n hon thei, hih dam na ut hia hon chi, ka kiang a hong pai kuamah ka hawlkik kei ding chi, tuni’n i zuan diam? I khamuanlouhna teng toh, i natna teng toh, i lunggimna teng toh, i haksatna tengteng toh i zuan ngam hiam? I zot ngam nak leh damsak ding in i Toupa kiman ahi. Zuan ni. Hih dam a om na ut hiam i Toupa’n hon chi lailai. I ut hia? Na ut hia?

limlak https://www.pexels.com/ apan ahi.