Khrismas Lenkhawm

 Tukum Khristmas hunseh khong ka muh apan kilawpna mahmah kana nei a. Hiipi ziak a nikum a i hun zatdan khong uh lungsim ah lang dundun a, kikhawm bang group-group a kikhen, biakinn kiim a kidinhou lou ding, singpi dawn zou masa-sa paisuak mai ding chihte bang i puang ua, Delhi Pulis te khauhtak a etkaina nuai ah Biakinn chu i naihthei hamham ua, lasak khawm chih le omtheilou in. Hundang, hiipi ma a hun nuam i muhte uh toh et in i Khristmas zatdan kidanglua a, a thawmhau huai hial hi. Kumthak ah a kihong zodeuh in i om thei duam aw chih lai in, covid variant thak om chih ziak in, hun zang di te petmah paikhawm in TV tungtawn in kumthak i vaidawn ua, tukum lawmlawm i patdan uh chi in maban ding le’ng en ngamlou in, nikhat khit nikhat Pathian khut hat in hon pi a, huchi’n i khovel leng zalenna nawn zaw a om in Khristmas vaiguan bang i muhchiang in, lungsim a kilawpna leh ngaklahna lian mahmah toh ka kidim hi.

Nikum khong in ka lungleng thei lua a, inn ah kei kia bang, ka zi toh bang Pathian  Ngaih Labu a la khenkhat ka bansak zel ua, hun thoveng i muh nawn leh lenkhop theih nawn zuazua ding khong ka ngaklah mahmah hi. Lenkhop hi ken nuam kasakna mahmah ahih leh, a neu a lian mitengteng thukhat lakhat a kituak tak a omkhawm diamdiam na, lungsim put dang om hetlou a mitsi diaidai a laam leh tu dipdep a Pathian min phatkhawmna ahihziak in nuam kasa hi. Denchiang a i lei pumpi a bei chiang a kha pumpi a Pathian ma ah i om chiang a leng sun leh zan a chimlou a Pathian phat ding te ihihman in, huai toh teh ding in bel hiai lei a i phatna te khong gentham ahi kei ding chihbel ka thei hi. Sawltak Paul in tu in limlang a muh bang in i mu milmial a chi a, ken bel mu milmial zou le ka kisa kei a, kha pumpi a Pathian i phat hun chiang a a nop ding dan bel ka sungtuahna in le a ban zou kei hi. Ban ah, ei kia khong a la i sak chiang a kizahpih theih sim khop a lasiam a kihihleh mipi aw lak a kizep tel bang le nuam ana kisa zaw ado ka chisim hi. (hehehe).

Ngaklah bang ngei in December 24 nitak apan lasakkhawmna hunseh a kizangpan a, a nuam ngei mai. Khovot nuai chilou in mi tampi a kipaikhawm a, la khat le a kisakma apan kei ngaklah bangbang leh kei kilawp bangbang a kilawp, lungsim munkhatpu huaizah kipaikhawm chi in ka lung a kim petmah a, Toupa ka kipak, hiai hun thoveng ziak in ka chi hialhial hi. Lateel om bangbang khat khit khat a kisa tou in, nuam kasa a, ka lung a kim petmah a, Toupa hiipi lai a ka lunggulh leh thumna dawnna hiai hunpha non muhsak kia hilou a, a hun leh a mun mahmah a telthei a ka om ka kipaklua ka chi a, ka mittui ka biang ah a luang lum suk hithit a, ka nulkhe kei a, kipahna mittui ahi ka chi a, ka zum hetkei hi.

Khristmas Ni hong hi a, zing biakna hunseh te zoh in leenkhopna kipansuak a, mite biakinn sung a Pathian phat a tukhawm zihziah thawm ka zak in, ka lungsim a nuam a, ka kha a muang hi. Tuma deuh in Rev. Kumam Suresh Singh in seminar ah biakinn i etdan uh, lenkhawm di i chih chiang in Biakinn sung zaw nuam zou kei i chi sek uh, bangziak a dia leh? I hih tuamtuam, i nek i dawn ut tuam om, Biakinn sung a huaite nek kawm dawnkawm zalen ikisak louh ziak ahi chih a gen kazakha a, tutung in ahih leh basement le chi lou a Biakinn su ng a i lenkhawm zuahzuah mai uh hi, i zalen dan uh, hiai di ina ngaklah chiatdan uh kilangsak mahmah in ka thei.

Sawm leh gelsa hikei mahleh saptuam mipi’n poimohsa di uh ahi chi in inkuan lemlak a frame bawl hileh chih Khristmas ma nitak a sawmtawm zual, Khristmas Ni kikhawmtawp a huai sepsuahna a om ngal leh, biakinn sung lam lunglenna toh, huai a sawmtu penpen, bang sem thei kei lengle a sepkhiakna a akiang a omlouh kisiamtan lou in lungsim lenkhopna a om kawmkawm in inkuan lemlakna ah ka om a, a lengkhawm te mah bang in ka om mun ah nuam kana sa lua a, tun zaw, ka lung a kimlua Toupa kana chi chi mai hi. Huchi a dak 3 gindek a lemlakna zoh bawl ann va bakzual in lenkhopna ah ka tailut a, nuam leh kipak a lasa ziahziahte lak ah kava kihel chu aw, hiai sang a teel zawk ding huai hun a ka neihlouh dan maizen! Upate, nupi papi laam ziahziahte, tuailaite laamtual dim ziahziah a kizuite ka muh in, Toupa hoihna ka phawksuah dundun a, Toupa ei din hoihna e ka chi hi. Pathian phat a hichia omkhawm hi manpha hina maizen e, tunia Pathian mai a laam khawm ziahziah teng, i damdia, kum nawn Khristmas ah hiai dan in aw i chi ngam hetkei. Huai ziak in hiai bang a mipi Pathian phat a nuamsa a omkhawm ziahziahte lak a telkhak hamphat huai ahihdan i phawk thakthak uh hiam? Hampha ikisa uh hiam? I hinsan Pathian phat leh pahtawi hi a, hiai phatna leh pahtawina a piilpi a pekhawm ziahziah thei hampha hihang maw. Lenkhopna ding hunseh khat omlai, Pathian hehpihna a kumthak meel i muhleh kumthak ni in, huai ah Pathian phat khawm ziahziah nawn ni uh maw.