Pathian’ Zahngaihna Leh Hehpihna

 Pathian’ zahngaihna, migitna, a vaihawmna bukim dan chihte tunai in ka lungsim ah a gingging a, Eksodas a Aiguptate tung a gawtna sawmte ka simkhak apan ahi deuh hi. Huai gawtna sawmte bang le simkhak patna hikei, tamveipi simsim sa, Isrealte tung a a gamtat siat ziak ua Toupa’n Abraham kiang a a gensa, na suante migam ah mi’ nnasem in a om ding ua, huai apan ka pikhe ding a chih tangtunna a gawtna himai dan in kana ensuk kha sek hi.

Pathian in Mosi a taimangna gam apan Pharo kiang ah hoh ding, ami Isrealte pikhe din mohpuakna a pia a, Pharo kiang a a thugen dingte, gawtna a bawl dingdan leh Pharo lungtang khauh dingdan chihte a gensa vek ahi. Huaiziak mah in gawtnate Pharo lungtang khauh ziak a a thuak uh himai chi in ngaihtuahna kana pe sau ngei kholkei hi. Tunai a huailak ka sim nawn leh ka lungsim ah a lutdan tuam mahmah hong om hi.

Pathian in Aiguptate gawtna a aban ban in tungsak a, sisan a gawtna,Ukeng a gawtna, Thouhon a gawtna, Ganta sihna, Meimatum a gawtna, Gial a gawtna chihtan ka sim in ama a gawtnate a hihdek lai a Pathian in a gen hetlouh gen hon nei hi. Huai a gentuh Eksodas 9: 18 & 19 ah, “Ngai in, zingchiang tu hun in apian tung a kipan tutan a om ngei nai lou, Aigupta gam ah gialpi tam petmah ka zusak ding hi. Huaiziak in tu in mi sawl inla, lou a na neih tengteng leh na gantate kaikhawm in. Michih tung leh lou a kimu sa tung ah, inn lam a hong kihawlloute tung ah, gial ahong kesuk ding a, asi ding uh, achi chi in.” Hiai vauna ichi diam warning pen ama a gawtnate ah om hetlou ahi chih ka muh in, Pathian zahngaihna thupidan, a hehpihna kiningching dan leh a siamsa mihing a itdan hon phawksak thakthak hi.

Ami Isrealte hih gentheite, suak leh sal a zang a a namteel bawl gentheite hi ua, gawtsuk mengmeng leh le kuamah phunlou ding ahihlai in, gial a gawtna ma a gawtnate ah mihing hinna khoihkha ding gawtna a omlouh ziak a hiai warning omlou ahi in ken ka la mai a, mihing hinna hon sukkhak dek chiang in Pathian in mihing tengteng it ahi chih a dikna le ahimai dia, Aiguptate, a mihing kia hilou, a ganta tan un, gam a omlou ding in warning hoihtak in pia a, hiai Mosi tungtawn a Pathian vauhilhna lau a, ana zuiteng bit ua, a ngaihsakloute mangthang uh chih aban i simsuk leh kimuthei hi.

Ei mihingten, i gaal gen louh, i lawm, i innveng, leh i Khristian pih mahmah, Pathian hing i biakpih mahmah bang le ki it zoulou, kingaihsak zoulou hi a. Pathian vaihawm zaw fair hiveh aw maw le. Ei mihing etdan toh kibang kei maw, aziak aman mihing tengteng kha a piak a hinna nei ahih man un it vek a, Pathian ahihna, belhtak muantak ahihna langsak teitei Pathian, a kisik a Amah bel utte adi hun bawlsak teitei Pathian ana hi taktak hiveh aw hon chisak thakthak hi.

Hiai mah in bangziak a Missions nasepna chichi ihia chih bang le khaikhawmsak siam hile thupitak kawk a gentheih ding in gintak huai hi. Himahleh i gensiam kei a, i mankhawm siam kei, himahleh kha mangthang Pathian tak khatkia om ahi chih thei nailou leh zakha nailoute kiang a zaksak ding bel Pathian deihna hi mahmah ding hi. Ei hon sawi, amah nungzui hon mudah a hon hihgim sawmte leng it Pathian ahihman in, en leng tanchinhoih, Jesu kia vangam lampi tangtawn hinna ahihdan pen tua bang mi ikisaikhakpihte kiang ah a thu bang, gamtat omdan bang a i latsak a, i theihsak ding i mohpuak ahi hi. Denchiang in kuama’n hon hilh kei a chih theihlouhna ding ua gingloute lak khong ah paulam a neihtheihlouhna ding ua Pathian in hon koih ahi kei ding i chi ngam hetkei hi.

Hiai Pathian zahngaihna lian, a hehpihna lamdang leh a tatkhiakna manpha thu a gen, gamtat omdan a latsak leh a theinailoute kiang a muhsak mohpuakna Toupa’n hon pia a, hamphatna a la in, i gamtat-khohei, kampau leh sep leh bawl ah i langsak sam kei dia hia? 

JESU’N KEI/KEIMAH A CHIHNA 7-te

I Toupa Jesu in Kei/Keimah chih Tanchinhoih Johan ah ana zang zeuhzeuh hi. Mosi belamching a gamdai ah a omlai in Pathian in houpih in Isrealte saltanna apan pikhe ding in sawl a, Mosi in Isreal mipi ten kua thu in ahia, amah hon sawlpa min bang ahia honna chi ding uh ahi, ken bang gen ding ka hia achih lai in Pathian in “KA HIH KA HI”, KA HIH in hon sawl na va chi ding chi in Isrealte lak ah Pathian ana kipulak ngei ta hi. Thukhunthak hun ah a tapa Jesu tung tawn in hon kilang nawn in Kei/Keimah hiai ka hi, huai ka hi chi in Isreal mipite lak ah ana gen a, huaite ensuk le chi ihi.

Hinna Tanghou: Keimah hinna tanghou ka hi Johan 6:35. Tanghou/bread in hinna salam ah hon piak bang in, gilkial chiang a salam vahna dia an ahihmah bang in I khalam an ding uh Jesu ahi chih gen hi. Amah hinna tanghou apan ne in vah le hang hiai vahna leh taina pen tomkha kal ding hilou a, tangtawn daih ding khalam an ahihna gen ahi.

Khovel Vak: Kei khovel vak ka hi Johan 8:12. I tenna khovel siatlam manoh a mial hulhul, bangmah thutak omlou ahi, thutak ki chih chu a gentu ngaihdan a kinga himai ahi chihna, thilteng paizam gawpna khovel ah, Kei khovel vak ka hi, kei hon en in pai un, paikhial lou ding na hi uh chi a Amah ah teng a siangthou din hon gen hi.

Kongkhak: Kei belam kongkhak ka hi Johan 10:7. Nidang in belamchingten gamdai ah belamching uh a, sunchiang anekna ding omna mun ah pikhia in, nitak chiang in suang kikal, kawl kikal, mual kikal, a lutna di lampi tampi omlouhna mun ah a belamchingte hawllut in, a lutna huai suang kikal ichi hiam kawl kong ah amah a belamchingpa pen kongkhak ngak a pang in, a kongkhak ka hi, kei tawn lou a kuamah in ka belamte la theilou di chi a, vengtu hihna kammal ahi chi in Amplified Bible in gen hi. Kongkhak i chih chiang in bitna toh leng etkhawm theih ding hi. A belamte gamsa le ngiate lak apan a bitna di ua Belamchingpa a kongkhak a a kual bang in, Toupa Jesu in kei ah om un, kei bitna kongkhak ka hi chihna in leng lak theih ding hi.

Belamchingpa Hoih: Kei belamchingpa hoih ka hi Johan 10:11. Kei sum hiam bang hiam lawh a, huai ziak kia a belamching, banghiam lauhuai le haksa om chiang a, ka belamchingte nusia a ka hinna humbit dia taimai hilou ka hi, Ken ka hihleh ka belamte ka it a, amau adia ka hinna pe phal, piak lengpia Belamchingpa hoih ka hi.

Thohnawnna leh Hinna: Kei thohnawnna leh hinna ka hi Johan 11:25. Kuapeuh hon gingta si mahleh a hing gige ding. Amah Jesu hinna ahih dan, misi bang le a taksa mahmah hinna pethei pa leh Pathian tapa ahi chih gingta a, hondampa a pomte adia tawngtawn hinna petu ahihna gen ahi.

Lampi, Thutak leh Hinna: Keimah tuh huai lampi, huai thutak leh huai hinna ka hi Johan 14:6. Jesu tawnlou a Pa kiang tun theihna ding lampi dang om hetlou ahihdan, leh theihna kichitengteng a thutak bulpi ahihdan leh khalam a site adia amah tungtawn a kha damna om ahihdan gen uang thakthak ahi.

Grepgui Dik: Kei grepgui dik ka hi Johan 15:1. Thukhunlui hun apan in Isrealte akigen chiang in grep toh genkhawm in omsek ua, grep diklou chih bang gahsuah lou chih bang in gen in ana om zel uhi. A gahsuah louh ziak mah ua Toupa Jesu hong pai a, amah a om, amah bel tintente a ding in amah ah gahsuahna om, amah grepgui dik ahih ziak in, grepgui dik ah om peuhmah le hang gahsuang ding ihihdan gen hi.

Hiai a Toupa Jesu in Kei/Keimah chih kammal zang a thu a genna tengteng i et leh banghiam khat a paipi (common) khat om hivo maw. Bang ahia le? A common chu ama’ mimal hamphatna di bangmah kawk khalou hivo mo. Kei huai ka hi, huaiziak in kei ah om le uh chin chi a, amah muang leh bel, gingat mite adia hamphatna di ngen gen mawk ahi.

Ahihleh, en kei/keimah I chih chiang in bang hun in i zang ale chih ah i lungsim taisak le hang i gen ut a chiang sa khat om ta di maw le. Kei kua ka hia non thei hia khong i cih chiang a i kim leh kiang ate adia lungmuanna di, bitna di lam ahi kha hia? Hilou, hilou. Huai naksang a, hon lau in ling zozen phial le uh chi a chapou tak a kisial a awm tum zozen phial le kihisek di hivo. Htp. Damkhothang in mi kiphasak deuh a kua ka hi chih non thei hia chi a hon hih lanlan chiang ua, nang le kitheilou en bang i hon thei dia chihsuk nak ut huai lotel, lah va chi laizang le huailaitak bang a kithuak gawp thei di a chihdan sim a, en bel Kei/Keimah chih kammal khong i zat chiang a, iI innkuante, imi leh sate adia thukipah huai lamsang a, bangteng hon genkhe de aw, kuatoh hon kibuaisak de aw chi a dip hawmna tuntu khong kihithei hiveh aw.

Sawltak Paul in a ettonpa Jesu theichian petmah, a zuihna ah le chitak petmah ahi dia, Khrist entonpa ka hih bang in kei hon enton un ana chi ngam hiveh aw. En i tate, zite, innkuante kiang ah hon enton un ichi ngam diam? Huai sang a ei chu i siat di bangbang, ahi di dandan kihi khin inchin, nou hong huchi kei un aw chih khong gen maimah ihi hia le?

Tuni’n gingtu tengteng in etton dia khekhap hon nutsiat, Pathian tapa, mihing bang a hong piang, maban sawtlou a a hong pian lawm dia ikisak pen uh i thei chian uh hia, amah bang in kei thutak ka hi, kei ah om un ichi thei diam? Kei hinna ka hi, kei belamchingpa hoih ka hi i chi ngam diam? I Toupa Jesu in kei, keimah a chihna te ah lungsim pethak in, aman amah a kigen chiang in kuate hamphatna dia agen ahia chihte theisiam le hang, kipumkhatna, innkuan ah, khotang ah, gam-le-nam vai ah, saptuam ah om mai ding hiveh aw maw le.

Toupa’n Kei/Keimah achihte mah theisiam a, ei leng i kim leh paam adia kingakna tak, muantak, belhtak leh kipumkhatna tuntu hi din Toupan hon vualzawl chiat hen.

Ginlahna / Ginlelhna

Khristian hinkhua ah ginlahna / ginlelhna, kimuanmohna chih hunkhat ah kituak kha veu a, tuah khitsa chih om lou in banghiam hun teng in, ka pianthakna dik ana himah de aw, khamuang ka kichihlai in ka khamuanna a dikna hia? I gintak pen chiang mahmah, tun zaw buaina bangmah ka nein awn kei i chih nung a le a kallak a thak thei zel hiveh aw. Melma in ginna dengdeltak ihih thei a, tua I ginna mah hon khoih zel amai mah diam?

Hiai bangte ka ngaihtuahlai in, kei kia ka hi de aw hiai bang dinmun a dingzel? Midangle ana om sam mah dua aw? A ziak ahihleh hiai bang hun chiang in i dinmun taktak bang le kigen utlou a, hamhaihtak  a om hun om hi. Hiai bang ngaihtuahna toh ka omlai in Matthai 11 ah Baptispa Johan in a nungzuite Toupa Jesu kiang a asawlna ka simkha a, huai in, hon theihsiam sak dan khat a om mahmah hi.

Baptispa Johan ahihleh Toupa Jesu ma a tangkou dia sawl a om, a sep dia she a om thei mahmah, amah nung a hong pai di pen le thei, ava pai a le thei, thei kia hilou a, Baptisma tangzou a dinkhiak a Khasiangthou vakhu bang a hong leng a Toupa tung ah tuang leh van a pan Pathian in ka tapa ka lungkimna mahmah achih za pa ahi.

Theihkhelhna di hiam, ginlahna di om hetlou ahi chihsak theihluat ahi. Himahleh Isreal mipite mah bang a Johan in le Messiah kha ana gintakdan om ahi dia, tua tuh Messiah hong paita hiven, suakta ta di, Rome kumpi apan suakta ta di, Isrealte adia zalenna tungta di ana chi ahi ngei ding in ka gingta hi. Himahleh ama gintak bangta lou, suahtak nang sang a amah suangkulh ah khum a hong om chiang in, huai in ginglelsak, muangmohsak ahi dia, a nungjuite Toupa Jesu kiang ah sawl in, nang mah na hi hia (Messiah) ahihkaleh midang hungaih lai ding chih dongsak hi.

Baptispa Johan in suangkulh tang sese lou in, ama nna zalentak a semthei hileh Toupa Jesu ginglah hiam Amah mah hi ngeingei ahi chih a chianluatsa muangmoh thak lou mai thei hi. Ama’ gintak bang a Isrealte’ zalenna lah tunglou, amah Toupa gam nasem ngeingei bangle suangkul a khum a hong om chiang in, theikhial ka de aw, muangkhial ka de aw? Ahiloupen ana Baptist kha ka hi de aw chih dotna ten tuam hi ngei ding hi.

Huai mah bang in, i hinkhua lamzangtak leh itup leh ngimdan a thil a paichiang in Toupa kei/kou lam ah pang ahi, Toupa’n hon ompih ahi kichi a, i thumna khong le hon dawng ahi chi in, tua ten i ginna hatsak hi.  Himahleh, khatvei vei en le ei adia hoih lotel dia i gintak, huaimah ngen a i thumthum, i lohchin theih hetlouh hun khong om a, i innkuan adia hoih lotel di chi a, agah i muh hun chiang a di bang i lunggelte tangtun hetlouh hun om hi. Tua bang hun chiang in, bangchi dan ahi di ka thumna dawn a a omlouh? Hiai nahoihtak hi a, Pathian in a ittte adia thilhoih it ngeilou ahihleh bangziak a ka thumna lohching lou ade aw? Chih dotna awl awl a lian in, melma in le huaimah ana suamgeih in ginlahna naktak hon tun thei hi. Tua bang hun ah thumna toh i pan teitei kei leh dinzoh baihlam lou hial hi. Ka muanpa dik ahi. Hiai ze=etnate tung ah om ahi chi a kisuk hat zel ding ahi.

Toupa Jesu in Johan nungzuite Isai 35:5-6 tungtawn in ana dawng hi. Isrealten amau Messiah pai hun chiang a thil om dingte chi a Zawlnei Isai in a gen ana theih mahmah uh ahih man in, huai Bible tang a gen chiang in theisiam mahmah uh hi ding hi. En leng tunin Pathian thusiangthou, amah Pathian tapa, asi a nithum zoh a thounawnpa ahihna Laisiangthou nei ihihman in tua mah gingta in, tua ah dingkip tinten le hang ginlahnate ziak a khemzoh a  omlou ding ihi.

Joni Eareckson in gari accident ziak a paithei nawnlou a a omlai in, ama a dia mihing khat khe a paitheihpen hoih lo mahmah ahih chiang in, hiai ama dia thilhoih ngen in a kum a sim thum chih a gen ka zakha hi instagram reels ah. Aman a genna ah dam nak ut lotel mahmah, hihdamna kikhop teng bang delh, paithei nawn ngeingei dia kikoih, Pathian kiang ah ngen, Amite’ adia thilhoih it ngeilou in khe a pai kei adia thilhoihlua ahih chiang in hon phalsak ding chih ka gingta tinten chi hi, Himahleh ama gintak bang ana hikei a, ama adia hoih a chihpen Pathian adia hoih ana hilou ahi dia, paithei nawnlou hi. Himahleh Pathian in khe a paithei ziahziah tampi sang in nakpi in zang a, tuabang amah hatlouh a kisakna ah Pathian pang hi chih a theihsiam chiang in ama a ding in paitheihlouh pen vualzawlna thupitak suak hi chi hi.

I thumna dawn a omlou, en lah ei adia hoih di isakte khong dawnlouh a i om chiang in, i lungkia in i thanem kha hiam? Toupa’n huai sang a hoihzaw hon sehsak ana om hi ding ahi, i mu kei chih man ahi. Ginnna toh pang in i ngak hamham diam? En hoih dia i gintak bang Pathian’ mit in mu thei hile kon ngen kei Toupa ka deih kei i chihpah ding bang le hikha maithei hi.

Ginlahna, kimuanmohna, i ginpa ahi mah hiam chih buaina i tuah hun chiang in, kei kia in hiai tuak hilou ka hi, himahleh ka ginpa dik ahi, muanhuai ahi, ka theihchet zohlouh ziak hiam, ka sau muhlouh ziak a ginglel kha dekdek ka hi chi in, Toupa ah thathak la in theihchian semna ngen le, aman tua theihchianna ahunhun in hon pe ding hi.

Daniel Hinkhua Apan Zillai

Daniel thukhunlui zawlneite lak a khat ahi. Amah ahihleh vangsia chih di hia, Jerusalem puksiat nung a Babulon kumpi salmat a telkha ahi a, huchia sal atang na lam ah Kumpi nasem muanhuai leh Pathian’ thutunna zawlnei khat hong hi ahi. Tangval thahat di laitak a gampuk siat ziak a sal a pimang a omkhak tuh nuam lou ding a, gam vaihawmte tung ah khasiatna bang om mahmah ding in gintak huai hi. Saltanna mun ah mi suak leh sal di lel chi a kikoihdap a, ei om hihtheihna pen mutkuanglou a manthat theih ding ahihlai in, Daniel leh alawmte ahih ua leh deihtuam a telkhiak bang in va omkha thei uh chih Laisiangthou ah kimu hi. Daniel tanchin hi i theihtheih sa ahi a, tamveipi alaibu simsuak sa, tangthu theih a theihsa leng ahi. Tuni’n Daniel hinkhua apan ziltheih khat leh nih om hiam chih enkhawm le chi ihi.

Nek-le-Dawn a Kikepna: Saltanna gam dan leh dun, pilna siamna zil dia telkhiak a om, hampha mahmah ahih lai a, aban omlai. Kumpi sumbawm apan a lim penpen ne thei dia thupiak, a limpen pen dawn thei dia hamphatna tang ahihlai un, Daniel leh alawmte tua bang nek le dawn, nidanglai hun ah, milem mai a latsa ahih ziak khong adiam, huaite nelou din gamgi ana bawl ua, huai gamgi mah ana gum ngam mawk uh hi.

A dinmun di uh sungtuah sak zual le, amaute kempa nekbawl heutu adi bang a chu iplah huai thou ding dan uh ahi. Saltang a, kana uh sem dia om na hih lai ua, hamphatna tang chin ua, ka bawlbawl uh na nek mai di uh aka chihsuk mai tuak lotel ding uh. Amau mahmah leng hampha kisa a nek suk ziahziah baihlam lotel ding hi a, zu leh sa leh milim biakna dan a ngai uh ahi maithei, nelou ua, a neklouh uh siatpih tuanlou in, anete sang in hoihzaw uh chih kimu hi.

Ei din kikoihle, tu dinmun ah, solkal sumbawn a pan duhduh nekna di hamphatna tang in, i duhduh bawl di uh hileh, hiaite kei adia ka nek ka dawn hoihlou ahi i chih a om sam diam? Lawmte’n ne vek ua, mi vailou a va om le nuamlou aka i chi numnum dia, ei duhman in i kiim leh paam paulam in inei maimah diam? Daniel leh alawmten zaw Pathian thupiak zahtak in, Pathian deihlouh nelou, dawnlou ngam uhi.

Diktatna: Ezekiel 14:12 kipatna bul ah Noah, Daniel leh Job chih thupi ana om a, huai a thutun amite gamtatsiatna uang lo mahmah, huai a Toupa gawtna toh kisai ahi a, huai huntak a, a gitlouhna uh uang lotel petmah in chin Noah, Daniel leh Job om hial hile uh leng a diktatna un amau hnna kia humbit di chih dan ahi. Hiai a mi kigente, Noah lah a damtonpihte lak ah amah bangbang a migi omlou, khovel pumpi tuichim a gawt a a omlai a Noah diktatna ziak a amah leh a innkuante bit a mihing mangthanglou kihi.

Job ahihleh Pathian in setan a chou ngamna di khop a midik, ama’ khelhna om hetlou a Pathian leh setan kidouna a thuak kha, ama thumna ziak a alawmte hinna hawi a om.

Tua i gen Daniel ahihleh a diktatdan Daniel bung 6na ah kimu hiveh aw. Kumpi Darias in abial 120 a omsuak di bial heutu 120 mah koih inchin, huaite tung ah heutu 3 koih, huaite lak a khat Daniel ahi. Huaitan kia hilou, huai 3 dinmun kikim dan a omte tung ah Daniel koih a sawm leh aheutu dinmun kikimpih nihte’n haza hi di ua, amau nuai a omte thuzoh in Daniel hekna di kikum uh hiveh aw. A genkhawmkhawm chiang ua, Daniel saltangpa, Babulon a lut tung ua pan a bangchi hiam a kumpi nasem a kipeitou den, tua kumpi 3na bang hita di nuai ah sem, huai hun sungteng teng a hekna di uh, a mawhsakna di uh khatle muzou lou chih hitel dan ahi.

Tuni in i nekzonna ah, gingloumi toh ikisaina ah, ei a chituam a mu di uam? Hon hek a hon demdek hile uh, sahkho vai genlouh, i sepdan i bawldan, sep leh bawl dingdan a kigente i palsat gen di tampi a nei duam? Daniel bel gam vaihawmna toh kisai ah a demna leh ngohna di uh khat le muzoulou chih hitel dan uh ahi. Hon choukha hi in i/na thei hia Daniel hinkhua in?

Pathian a Muanna: A hek dia kisate’n gam vaihawmna dan ah ngawhna di a muhlouh tak ua, Pathian nei leh kihta ahih dan, Pathian a kinga ahihdan thei mahmah un chin, a Pathian adia muanhuai lotel ahih chiang a, a sahkhua hetkha di dan bawl leh, a huai ah chu ei dan bawl sang a Pathian adia a muanhuaina kembit lotel di ahih chiang a, huai ah awksak thei pan di ihi chih thei chiang kilkel a kumpipa kiang a, dan hoihtak hileh kilawm thukhun va bawlpih uh hiveh aw maw. Kumpipa adia anak ut huai didan, ni 30 sung amah kianglou, kuamah dang kiang ah a gamsung a mite a thumlouh di uh chih himai zen in, second thought ichihte omlou a, ana namkip pop-pop lehle theihsiam huai hi.

Hilele a hoih leh thupi mahmah chu maw, kumpipa’n a thusawm uh a pom chih a theih a Daniel kha a inn ah, a thumna dantan ah lut inchin, Jerusalem lam nga a, a hih ngeina bang a nikhat a thumvei thum kichi. Hiai kha tulai i gamsung dinmun toh enkhawm sin le, i tenna gam India ah sahkhua zalenna tawm hiai-hiai chih i thei, kumpi lamkhong ah hon pauhial di i deih leh poimoh isak hun atam. Ei mi tamlou chikte nawmvalh a om di i ut kei a, a chang in lamlian zuihna bang Khristian kipawlkhawm chihten i nei. Lungkimlouh langsak ihi a, asia hipah kei. Himahleh i taina a dik hiam chih et tuak mahmah chih Daniel hinkhua apan muh theih hi. Daniel toh Kumpipa Darias kikal hoih mahmah, kumpipa bang in promotion a piaksawm, huaiziak a dan bawl a om, humpinelkai kul a khiakna di tan thukhun. Huai dan sawm uh ahi chih Daniel in a theihphet in kumpipa kiang ah kei ahi a target uh va chi ngeingei leh kumpipan huai thusawm a lemsakpihna pe dia gingtalou ka hi. Aziak bel, Daniel in hiai thupiak zuilou a thum ahi chih ava gen ua kumpipa dah mahmah inchin, a suahtaksak didan ngaihtuah a nitum tan sem ahi kichi hiveh aw.

Daniel in ama tung a siatna zong a omlai a, ama lam a pang gige kumpipa va bel lou inchin, Pathian kiang ah thum. En i lungkham, i mangbat chiang in kua i delh a? Ahihkaleh Daniel bangbang a kumpi nasem dinmun hoihtaktak nei, mi influential pipi toh kimeltheihten, mi toh ikizopnate khong i muang in, i zangkhial kha hiam? Huaite i Pathan sang in i muangzaw kha hiam? Milian, milal theih siatna achi hilou ihi. Amaute leng aziak nei a koihiam a kipoimohtuah dia kimeltheihkha hitham mah ding ihi.  Kua kiang ah buaina leh haksatna i tun masa a chi ut ihi zaw. Banghiam a kigenleh thumna a Pathian buan masa lou in i phone khong i dokkhe pah hiam? Mihing a muanna ngak a omzia nei hileh Daniel sang a huai hun a chu kumpipa toh kizopna hoih neizaw omlou ding ahi, Himahleh Daniel in mihing ah muanna ngalou in Pathian ah a muanna anga hi. Amuanna ngaknapa a muanhuai ziak mah in humpinelkai kul a zankhat khumkhawm himahle uh, liamma om hetlou in a suakta hi.

Tunin gingtute, nek leh dawn, sep leh bawlna a diktatna leh Pathian adia muanhuaina chihte a Daniel hinkhua bukimloutak i gen apan kivelna di i nei hiam ki enthak in, kibawl na di omte ah kibawl in, Daniel bang a min a ngohna di uh leh demna ding a neihlouh zah khop un Toupa’n hon vualzawl leh ichi ahi.

L U N G K I A K N A

 Lungkiakna kichi mihing in i hinkhua a i tuah hunk hat om chiat din gintak huai hi. A khente a luangkiakna buan nawi ua pan thoukhia a, a hinkhua ua lohching mahmah a om lai un, a khente bel thoukhe zou nawnlou in, a taksa mahmah un leng amau le amau kihihgenthei in, a hinna uh beitan dong mah tua lungkiakna buannawi apan in thoukhe nawnlou uhi.

Khristian hinkhua zang di a ikisak lai in, Jesu nungzui hita, Pathian’ ta hita chihman a lungkiaknate om nawnlou hiam, beipah hiam ana hizenzen kei a, tua naksang mah in, melma in hun lemtang a muhteng a tua lampi, lungkiakna buannawi lak totsak hon sawm mah bang hi. Gingtu te a ding in hiai bang hun ah ginna let paisuak teitei a, melma kizohsaklouh ding poimoh mahmah hi. I Khristian hinkhua ah, Toupa toh ikipolhna, kinaichik a om gige hinapi, tua bang Pathian polhna i tan hun a i theih routine zui zoulou, awl-awl a poimoh ngaihlou dia ikisak chiang in, eheih, chi a thathak lak hun ahi. Huchih kei leh melma in hon zou paisuak dia, kei zaw, chi a kingaisia a lungkia a Toupa lampi zong nawnlou a i om khak ding lauhuai hi.

Laisiangthou ah Zawlnei Elijah bang le Toupa’ thupiak a baal siampute that hina a, a nung sawtlou in kumpinu lau in taimang a, lungkiakna guam ah kia in Toupa kiang ah a hinna la din ana ngen hi (1 Kumpipate 19). Zawlnei Jeremiah mah leng Pathian apan Isreal ten thutanna a muh ding uh tangkou a, gimthuakna tung dingte gen in kahpih zel a, zawlnei kahneh chih hial khop in Pathian thu ana gen mahleh, a thugen ziak a langbawl a a om ziak hia, ana lungkia a, Toupa tung ah ana phun in, a pianni bang ana hamsiat hial hi (jeremiah 20:718).

Toupa Jesu nungzui ngitnget, Jesu, Khris ahi chih akam ngeingei a puangkhia, vangam tahbi kepsak a om Peter ngeingei bang leng, aman khovel hondampa dia ana gintak dan toh i Toupa Jesu hong pai dan kituak lou sa lua adiam, a thillamdang hihtengteng mit a mu hisam chilou din ana lungkia a, ngabeng in ana kuan nawn a, Toupa Jesu mahmah in a tunding thak ana ngai hi.

Hiaite i gen ziak a lungkiak teitei di chi hilou ihi. Himahleh Jesu nungzui a i khualzinlai in, lungkiakna, ze-etnate i tuahhun chiang in, i ma ah tampi tuabang tuak a ana pal galkai om uh ahi chi in amaute en in, Toupa Jesu enkawm in thathak la zelzel ni maw.

Kikep Sianthouna

Diuteronomi 23:9-14 kikal ah Sepaih Giahphual Kep Sianthouna kichi ana kigelh a, melma dou dia giahphual ah a om chiang un, amau taksa mahmah kep sianthouna poimoh dan, a niin te giahphual pua tan pawt ding ahih dan, amau taksa apan hoihlou paihkhiak ngai zun leh ek tan in, leilak a phum ding, kikep siangthou ding chih ana gen hi. A ziak bel Toupa Pathian tua giahphual a amau humbit dia hohsuk ding, amau toh omkhawm ding ahihman in, a giahphual uh asianthou ding chih ahi, thilsianglou mu a Toupan a paisan a, dinmun laihuai a a omlouhna ding un.

Hiai mah tuni in gingtu te’n khalam gal dou a i omlai in, niteng a giahphual a om ihihlai in, i giahphual, i lungtang kidouna te adia Toupa’ teenkhum, Toupa’ ven leh suangluah ihih theihna ding in ei gingtute ikikepsianthouna ding om mahmah hilou hiam hon chisak hi. Eite Pathian’ temple hi ihihleh, i taksa pumpi kep sianthou ding pen i mohpuak hi mahmah chihna ahi.

Tuma in EBCC Delhi a naupang khenkhat toh General Secretary, EBC in kithuahkhawmna hun khat a nei ua, heutupa’n naupangte' dotna tuamtuamte dawng a, huai ah dotna khat zu toh kisai a om hi. Zu dawn leh zu kham kibang hia? Va kham sese kei le hang zu dawn khelhna ahi diam chih dotna heutupa’n a dawnna ah zu dawn ana hoihlua hileh i tate kiang bang ah bawite hong pai ua zu dawnni kichi di hi a chi a, mawlchik in a dawng a, a gen ut chiang mahmah kasa. Kuamah gentuam na hi hetlou in zukham gige pa mahmah in le ama’ ta ngeingei zu dawn a muh chiang in heh a, soisa ding tan in kisa in soisa thei hi.

Zu khong zaw khelhna hilou eive, Bible ah le gilpi hatna dia dawn zel di chi ahi chih khong gensek na hang a zaw maw, tate khong zu dawn hoihsa lua  dawnkhop pih a zu dawn dan zilsak kichi ki om khollou mai thei hi. Zu i gen ziak ahih leh a dangteng sang a hoihlou zaw chihna hipahlou in, a langtang a zu kham kilang khia hiam, innsung a tohbuai i muh mun pen ahih ziak a example a genkha ihi. Zu dawn kia hilou in Laisiangthou in hihlouh ding a chihte apan kikep siangthou taksa mahmah kep sianthounna pen ana poimoh lua ana hi ahi.

I nek leh dawnte salam vai ahi, ine a kithakhia a, khalam khoihkhalou ahi chih bang om zel. Huai bang le Khasiangthou sungten hilehang tua ngaihtuahna omlou ding hi. Lungtang a kidouna om a, huai a vualzou penpen deihdan kisemkhe zel himai hi. I lungtang leh ngaihtuahna Khrist thuzoh ngaihtuahna hisak chiat le, Toupan a mite veng dia alak ua atenna dia a zun leh ek tan uh lei a phum mang ding, a taksa tung mahmah uh kem siangthou dia a deih bang in, tuni’n, melma lian setan toh khalam galphual a niteng a kidou ihihlai in, Toupa’ kha’ tenchilh hihtheihna di’n i lungsim leh taksa ina kikep sianthou tinten kei leh Toupa i sung ah tengtheilou dia melma in i hinkhua thuneih khum dia, hoih thei kawmkawm a hoihlou semsem kha ding hi hang. Huai ziak in taksa kepsianthou ding pen gingtu chih mohpuak hi a, nek-le-dawn khong mahmah leng pilvan huailua hi chih hon theisak thakthak hi.

Muanhuai Pathian

 

May 1, 2024 ngeina bang in tate skul kai di kava kha ua, inn ah kik nawn in a tawp di hun ua pi di chi in ka om hiuhiau hi. Whatsapp ah lawmte khenkhat in nou kaina skul te buaikhalou hia chih hon kidawptuah ua, bangthu om a de aw chi in google ka et leh skul tuamtuam a bomb om chih email mu uh ahihdan ka va mu, ei lah khophawk lou hial a ana om hiuhiau. Skul huai dan vauna email mu a kigente ka et chiang a kou ate kaina omlou, skul lam in le bangmah patauh di omlou chih sms khong hon khak uh.

Banghiam patauhhuai a om di leh skul thuneite’n eisang a theizaw hiven chi in awlmoh lou in ka om thei vanglak a. Bangtan hiam nung in skul ten parents ten naute a pi ut ua leh pi theih, hilele patauh huai om hilou ahi chih sms hon paisak nawn ua, mi ana kipi di ua, thawmhau in ana omkha di uh chi in kava kuan a. Tate zaw ki awlmoh chiat ahi dia, kuanbaih thou ka kisak leh classroom ah tawm khakha ana om ta ua, tapa pa Sonmuan in you took forever honna chi hial a, honna ngaklah man sim, pa sun a kinawh te a hi a, theisiam. Haha.

Naomi ahih leh Miss Sylvia (Sanmawi) in hon va etkhiaksak a, bangziak a mi kipi baih chih khong ana kidong uh ahi dia, Miss Sylvia in bomb scare ziak ahi va chi mawk theilou ahih chang a election duty khong va genkha hinteh, Naomi in nang le duty di mo chih ana dong zomah. Haha.

Delhi khopi, India a dia khopi muanhuai a lubawk teng omna, security kidaih mahmahna, vaihawmna innpi omna, khopi muanhuai mahmah i chih khong le, kuahiam in koi hiam ah a khutmong khat a a ut teng gelh a sent chih a mek leh hichia dakkal tamlou a delhi sungkia lou, a kiim leh paam a teng toh buaikhawm kihi mai hi a. Bangchi tuk in thunei leh siam leh thil hihthei kisa le hang le koi a kua apan chih theihlouh khong in in thakhat a khopi sung khat tokbuai khong anak haksat louh dan maw.

Hiai te tengteng ka et chiang in Pathian muanhuaina, thupina hon musak deuhdeuh ka chi hi. Ei buaina te khong Pathian adia nak neu lozen di hi a. Zan khong a vaihawmte siamsinna lam te, home lamte bang phe sosouh di uh, a nuai ua te nawh mai di uh, hiai le a kipatna theihlouh. I Pathian huaite sukling vuallouh leh a theihlouh a thiltung omlou chih khong iva ngaihtuah khak chiang in a muanhuaina leh a thupidan i kiim leh paam a thilung te khong in langsak mahmah hiveh aw ka chi thakthak hi.

Pathian’ Aw Ngat Ngiingei

 Meikuang nung in aw ngat ngiingei ahong pawt hi. 1 Kumpipate 19:12 (b).

Zawlnei Elijah in Baal siampute a thah zoh in kumpinu Jezebel lau in a taimang a, Kokhuk khat ah va bu hi. Huai a bukna mun ah Toupan amah houpih in va pawt khia inla tang ah Toupa mai ah va ding in chi in a sawl hi. Huchia ava din leh Toupa hong pai ahi a chi a i Laisiangthou in, huihpi hat a hat nung in chin, huai ah Toupa omlou. Huihpi zoh in zinling, meikuang chihte hong om ua huaite ah leng Toupa a om nai kei a, huaite nung in aw ngat ngiingei ahong pawt a, huai bel Toupa aw ahi chih Elijah in theipah ahi dia, a puan in a mai a khuh chih 1 Kumpipate 19 sung ah a thu kimu thei hi.

Hiai ah Zawlnei Elijah Toupa sawl a kokhuk apan pawt a tang a va ding ahi a, huai a thiltuam tuam thawmnei leh muhtheih himaithei hong kilang masa a chihte apan tulai ei hinkhua a i apply theih om de aw chi ut ihi. Toupa nungzuihna ah, hiai zaw Toupa hon chih hi ngeingei ding eita ve chi a theih khelh theih ding thawmging, thiltung kituak kha vek ding hi. Khenkhat bel haihvual louh a Toupa’ khut hi mahmah eive hiai i chihtheih a om lailai in, khenkhat ei gintak ut ziak a A aw ngat ngiingei pen ngak manlou a i om hun ana om kha de aw hon chisak hi.

Huihpi hat mahmah, tangte Toupa mai ah mutkhang, suangpite kitam zoukhop himah leh huai ah Toupa aw zak ding omlou. Zinling, kim leh pam phe zuaizuai, huai ah leng aw ngat om tuanlou. Meikuang chih bang Mosi le meikuang apan houpih a om hi a chihsuk pah theih di ahihlai a huai ah le Toupa om nailou, huai nung a A aw ngat hong om pan bang in, hinkhua ah thum a  Toupa i buan lai in, hiai zaw hi ngeingei e i chihtheihna dia i kim leh pam a thil tungte en in, ina gingta pah hia? En hilua heh i chih ziak a hiai zaw Toupa’ aw hi mahmah ina chi ut baihlua hia?

Elijah bang in huihpite, kim leh pam a mipi’ aw hong daih a, thiltung tuamtuamte hong daih nung in, eikia a Toupa thutung i lungngaih lai in A aw ngat ngiingei pen i ngak zou hia? Muhtheih a thil tung leh husa teng sang mah a Toupa’ houpihna zaw aw ngat ngiingei mah ana hi zaw di eive maw. Huai aw ngat ngiingei i zakleh bel thudonlou kei hial ni, Toupa houpihna i zak hunhun in hih dia hon zaksak, it tak leh neemtak a hon zaksak pen semsuah din mansa in om ni maw. Pathian’ Aw’ ngat ngiingei za thei chiat din Toupa’n hon vualzawl hen aw!

Missions Sunday 2024

Missions Sunday 2024 March 17 in EBCC Delhi in program kinei, Toupa’ vehna kitang mahmah in ka thei. Toupa’n lam chituam tuam a nasem in, Ama’ gam nasem heutute Htp. Lun Mangte-te inkuan, Htp. H Siampute nupa chihte leh EBCC Delhi mahmah apan a Toupa sapna za a, huai sapna dawng a kuankhia Htp. Pumsuanlal Tombingte inkuan hon pikhawm a, Missions Committee in hiai program ding a gelkholh lai ua ngaihsut batlouh gam ah Toupa’n honpi dan, lamdang!

March 16 ni in Missions Sunday 2024 a sharing leh thugenna hun zang dia chial Htp. Lal Tombing te inkuan vaidawnna leh, Delhi a damtheihna lam ki ensak dia Toupa’n hon pikhawm Htp. Lun Mangte-te inkuan, Htp. H Siampu leh Mission Committee in hun saulou kizang zual hi. 

Huai ah Htp. Lun Mangte in agen, ama damlouhna chithak in a phak hun chiang a a omdan a gen bang, zak mai in leng thuak ngap huailou lua hi. Thugen lai khong a chithak in a phak hun a a om didan ka ngaihtuahna ka paisau sak chiang in, concentration buaigawp khong a om theih di eive kana chi a, huai teng mah toh pang trantran a, hun lem a muh masakpen a kikhuat ek ahih hon gente khong ka ngaihtuah in, ngapsak huai kasa hetkei. Himahleh huai a agen ka lungsim hon zou mahmah ka gen ut taktak hiai ahi zaw, “Ka inkuante kiang ah Toupa’n chithak hon thuaksak ziak a kipahthu I gen ding uh ahi, a thak zaw I khuat a nuamlua ahi, hiai lou a na (pain) hon thuaksak leh nak gim lotel di ing a, nou hon enzoulou di na hi uh”, ka chi zel a chihte khong, nehnou in khasiat huai kasa hi. Pathian nei taktak ten zaw Sawltak Paul mah bang a, a tuah leh palkhak bangbang uh kipahthu genna di mu zel uh hiveh aw hon chisak.

Htp. H Siampu in a lawinu’ damlouhna toh kisai hon gen, huai teng tung a Pathian tung ah a kipahna, Toupa’n a lampi tot na ding ua panpihtu ding ana sehsak diudeu dan siamtak a hon gen bang, Missions Sunday biakna kikhop hun a ‘Kei Kuan Khia Ning’ chih la Toupa’ sapna a tung a khemna nasatak a tuahlai a Toupa apan la a muh lungsim tak a hon sakte khong, lungsim hon khoih in, Toupa sapna a chian dan uh testimony thupitak hon musak.

Htp. Lal Tombing’ inteknu (UZoui) in sharing a hon gen, Toupa sapna aw neem mahmah za a kipan ahihlai ua, a sapna aw neem leh ngat mahmah ahihlai in, a lampi neem ngi-ngei gige hetlou ahi dan, lampi phok leh kense lak tawn a pai, cancer natna khong a delhzui a a om dan, huai te tengteng tung a zohna Toupa a om ahihdan, Zohna Toupa a’ ahi chithei a a omdan bang uh, thupi lua!

Htp. Lal in Missions Lungput Nei Gingtu chih thupi pansan a missions nungzui bawlna, a thu sinsakna leh theihsakna poimohdan hon gente khong ngaikhe kha leh hamphatpih khathei dia om manpha lua.

Mi’n a nekzonna uh bubit tak taisan a sapna a zak uh dawng ua, natna guh taktak, thuak ua, milak a om didan le omlou khop a chithak khong natna nei ua, sapna sangtak za a hua sapna sangtak mah sangak a dawng a Agam nna a sep lai un, amaute khong chidam-ludamna khong buai ngai hetlou dia kizang hile uh manpha petmah ding ahihlai in, mihing lunggel ah. Toupa’n lampi tuamtuam tawnsak a, tua haksa a tuahte uh tungtawn a kipak gige theite lungkim dingdan ei a gal apan ana ente khong theihsiam vual ana hikei na mai e chih in om. Tunia ei, nektak zonna nuse dia sap hilou, inn leh lou nusia dia sap hilou ten, kei zaw ka pantheihna di om kei chi lai ding I diam? Niteng a tangthupha gen thumpih ding chi a I mobile khong a I muhte adin thumna hun tomkha be ina zang zel hia? Huai din hun I pesam kei di ua hia a thak in. Thilpiak a sapna mu ihih leh, piak theihna hamphatna ahi chi in I enthak thei kei ding ua hia? Min damlouhna, natna leh haksatna te khong hamphatna dan a a et theih lai un, en leng, Toupa’n ei khom a hihthei dia hon omsakna munmun a pan a sep hamphatna in I la thei ding ua’m? Tua bang a lathei te tengteng Missions Sunday 2024 gah, hamphatpihte hi ding hihang!

Noah: Bitna Long

Genesis bung 6na i sim chiang in Gitlouhna chih thupi nuai ah kipan mawk hi (BSI O.V. Re-edited). Hiai a gitlouhna kigen pen huaise mahmah ahi dia, Toupa hichi’n a gen hi, “TOUPA’N, leitung a kipan ka misiam ka hihmang mai ding. Mite, sate, ganhingte leh tung a leng vasate tan in; ka bawl ziak in ka kisik,” a chi hi (Genesis 6:7). Genesis kipatna lam va en thak le hang Pathian in a thilsiamte a en a hoih asa mahmah chih kigen suk-suk a, huchia  hoih leh kilawm asak, a pahtak mahmah a thilsiamte, mihing kia hilou, genhingte tung tan a Pathian thangpaihna i chih kha, maimai hetlou ding, bangchi phet a Toupa’ lungtang na hi ding hiam chih mihing ngaihsutna a suut vual hilou kha ding hi.

Pathian thangpaihna ziak a thilsiamte tengteng manthatna tung ding ahihlai in Genesis 6:8 ah, Noah in bel TOUPA mitmuh in deihsakna a tang hi chih kigelh pen mihingte ading a tanchin kipah huai mahmah, gospel ahi mai hi. Noah toh kisai aban a genna ah, Noah midik ahi, a damtonpihte lak ah gensiatbei ahi chih leh Pathian toh Noah a tonkhawm uhi chihte ana om hi.

Noah ana om kei henla hileh Pathian thangpaihna ziak a thilsiamteng adia manthatna a tun lai in, bang achi de aw, a ban bangchi’n a kisunzom de aw chih khong ngaihtuah khak mawkmawk chiang in, hichi di ahi chia gentheih omlou kawm in, ngaihtuahna lazou mahmah, lunglut huaipi abang hi. Himahleh, huai bel bangmah adia phatuam hilou, iva ngaihtuah ziak a kikhek di le om nawnlou, uang tak a i gen ut zawk tuh mi khat (Noah) ziak a mihing khang paisawn, Pathian ngaihsak, limsak ana nak manphatna maizen e chih ahi hi.

Noah tanchin kigen apan chouna (challenge) om mahmah tuh, i kiim i paam a thilte kithununsak lou a, mitengteng a hoihlouh lai a le Pathian toh omkhawm theih veve, diktat theih veve ahi chih ahi. Noah hun a siatna bangchi bang a siatna, gitlouhna hiam i thei kei, i theih ombel siamtu Pathian’ lungtang ana a, mihing kia hilou, ganhing tung nasan a hihman tupna tun hial gitlouhna leh siatna ahi chih bel imu thei hi. Huai lak ah Noah bang ana kichi kep tuam hiam i thei kei, Toupa mitmuh a deihsakna tang, midik, a damtonpihte lak a gensiatbei ahi chih bel ithei hi.

Tulai in i gen sek uh mi’ hihdan, a system va zuih ngai a iva bual khak chiang in chihte Noah in ana zui ut hileh zuih theih tham ding in ka gingta hi. A system ah ana bual lou a, ana kikem a Toupa deihsakna tang dia hinkhua ana zang Noah ziak in Toupa min i phat ahi. Amah ziak a mihing tengteng leh ganhing tan a mang dinglai bitna long a pilut a om khang paisawn ahih man in, Noah thupi i sa.

Pathian toh Noah a tonkhawm uh chih thupi kasa nawn hi. Thugensiam khat in ginna a pai ichih minih tonkhawm ahi a chi a, ka pomtheih lamtak ahi. Ei kia kuamah donglou a pai gulgul in ginna a pai chih pen dikzoulou kha ding ahi. Noah in muhtheihlouh pen ginna a muchian ahihman in, a kiim leh paam a thiltungte ziak a kibuaisak lou in Toupa toh tonkhawm uh hi. Ei leng tua bang hinkhua zangthei ihi. Toupa aw za din hun i pia hia? A thu, A houpihna zaksawm in Laisiangthou i vel hia? I sim man hia? Toupa houpihna zaw lamdangtak a koi hiam apan hong pai ding ana hi se-se lou kha ding ahi. A thu eite lamlahna dia kigelh te tungtawn mah apan A aw zaksawm le, zakhial chih omlou penpen ding in ka gingta hi. Huai ah Toupa toh tonkhawm hinkhua i zang thei ding hi, A aw i ngaih a, i man nak leh.

Mimal chih a biik in innsung pate a din i zi leh tate adia a Noah uh ihi. Noah in long liantak ana bawl a, huai ah a innsung mite leh ganhing chikim in bitna a muh bang un, nang leh kei bitna long ihi hiam? I innsung mite adin a Noah uh ihi kha hiam? Ahihkaleh nisat mahmah lai a long bawl Noah haisa a chiamnuih nuihte, va engkou koute ihi kha hiam? Long i chih Noah ziak a om, ava belh mai uh ahi a, a long bawl pen a thupi mahmah kawm in, huai long om theihna Noah a bulpi hizaw ahi, a bitna uh zaw huai long hilou in Noah ana hizaw ahi. Nang leh kei Toupa’n Noah, bitna long, hi din hon deih ahi chih i lunggel thak kei dia hia?

Sodom leh Gomorrah te tanchin i theihchiat mahmah ahi a, va bulsut lou in hichi’n gen le. Lot te innkuan Sodom leh Gomorrah a kangtumlou a pikhiak a a om uh bang, amau ana hoihtuam ziak uh hiam isak leh Genesis 19:29 tawplam ah hichia ana kigelh hiveh aw, “Pathian in Abraham a thei gige a, manthatna lak apan Lot a sawlkhia hi,” ana kichi. Hiai a i gen ut bel, Toupa ma ah dik tat in, Amah toh tonkhawm peuhmah le, en iva thei kha sese kei ding, himah leh midang i kiim leh paam ate adia damna tanpha ana kihi thei, Lot adia Abraham kha a Noah (bitna long) ana hih maimah bang in, nang le kei le kuahiam adia a Noah uh hihkhak theih ana hi ding ahi.

Mikhat Diktat, Mikhat Phatuamngaih in Omzia a Nei Hia?

Leitung nuntakna ah khatvei vei lungkiakna, thanemna chihten a banglam banglam ah hon nawk hun om hi. Toupa Jesu nung zuihna ah le tua bang hun ana om a, lungkia a pukgawp hun ana om a, nungzui te lak a heutu deuh Peter ngei leng ana lungkia in ana bahngei ahi chih i gen ngei ta [Link]. Huan, theihtawp a nekzonna, sum-le-pai zonna ah diktat tak a sem leh bawl di chih chiang in, i kiim i paam a te hihdan, mite’ hihdan chihte en in, bang ahia kei kia a ka na chihtak tei omzia? Bang kilamdanna lah tunzou tuanlou ing a, bang ahia kei le mihing mah, sa a hinglai hiveng, huchia kilamdanna tunzou dia thunei leh bawlzou hituanlou ka hihleh, a huihnung dandan mah kizapsak mai aw le chih baihlampi ana hi di hi a. Huai bang hun chiang in, tua bang dinmun a omkha a ikitheih chiang in, mikhat phatuamngaihna in gen lianpi ana nei ahi chih phawk thakthak le ut huai kasa a, tua bang dinmun a om kuahiam adia thathak lakna ahihkhak leh chi in, hiai a nuai a Bible pansan in en ni aw le.

Nambars 25 ah Peor Ah Isreal Mite chih bungkhat ana om hi. Huai a kigen tuh Isreal te gamchiam luah dia kisa hong pai lai un Peor kichi mun a hong tung ua, huai ah, ban thahat a amau pitu, milem na be ding uh ahikei, kei mah lou ngal ka ma ah Pathian dang na nei kei ding uh, namdang numei zi in na la kei ding uh chih thupiak teng hon palsat mawk uh hiveh aw. Pasal ten Moab numeite luppih uh, moab te pathiante ma khong ah kithoihna te ne leh bia ava kuun uh. Huchia Pathian’ lungtang hon natsak chiang ua Toupa’n Mosi kiang ah TOUPA hehna lauhuai apan a bitna ding un mipite heutute kihemkhia unla, Peor Baal biakna a tel peuhmah that vek un chih thu pia.

Huchia Toupa’ thangpaihna ziak a mite kap leh mau a a omlaitak ua Isreal mi pasal khat in midian numei khat hon pi, huai a muh a Phinehas (Siampu Eleazar’ tapa) kidekzoulou inchin, huai mite a puaninn uah delhlut in, apasal toh numei toh teipi ah va dawtlum, va sun pailet. Huchia Toupa hehna dai in, hiipi le khawl, hilele mi singnih leh sangli si man chi. Hiai Phinehas phatuamngaihna toh kisai a Toupa’n Mosi kiang ah hichia gen hiveh aw, “Siampu Aron Tapa Eleazar tapa Phinehas in a lak ua kei adia phatuam a ngaih ziak in Isreal suante apan ka hehna a heimang a, huchi in ka thikthusiat ziak in Isreal suante ka hihmangthang kei hi”.

Phinehas in phatuam ana ngailou himaizen leh Isreal suante bangzah a sih behlap di uh chih i ngaihtuahna paisau sak le, Toupa’ min khong a i pang guigui na ziak a ei theih sese louh a Toupa’n kuate hiam hinna ana humbit le hithei chih i gingta hia? Gintak huai ahi, a ziak bel Phinehas ama adia a phatuam ngaihziak a kipak Pathian mah i Pathian ahih man in.

Banghiam i hinkhua thugin leh paidan kisinsakna apan i lampial ut sim chiang in kiim leh paam, a dinmun leh ngawhdi ana kizong sek, kei kia a mawk kuhkal leh phatuamngaih zaw omzia omzou kei khong kichi kha thei zel, hilele a tung Phinehas tanchin in hon sinsak chu Pathian adia phatuam i ngaih a, a thusinsak apan lampial hetlou in i sep i bawlna ah chitak peuhmah le, muh theih in hiam, muhtheihlouh in hiam kua hiam hinkhua kisek kha dia, kua hiam hinna humbit kha kihi dia, huai tengteng tung ah Pathian kipahna kihi ding ahi chih ahih man in, gingtute adin Phinehas tanchin in tha hon guan mahmah hilou hiam? I kiim le paam leh i kiang a mite enlou in, et ding khat, huai bel Toupa Jesu kia en in i pang ek uh aw le.