PUTE' ITNA

Itna ichih iva gen dek hial leh gintak sangmah a genhak ana himaimah hi. It a omte'n it a i omlai bang a kitheisiamlou, itna i chih kuate'n nei a kuate'n neilou adiam? chihbang ngaihtuah huaipi hong suak thei mawk. Itna hih a gen chiang a hak, ke'n itna
a ka ngaih thilte bang midangte'n huchia ana en hetlou maithei chihbang hi thepthup zel.

Nidanglaite'n Pute leh lamkhou/bang kineh zoulou ana chi uh. Itna hichi khop ana omthei mah ahi maw chih ka ngaihtuah zel a. aw....ka pute' hon itna zaw kei a di'n a sanglua a, ka ngaihtuahna inle a bankei.Naupang neuchik kei a dia asia leh pha nangawn ka theihma in ka pute itna zaal kana zou pan thamta chih bang tua ka khonung theih hipan lel ahi.Itna thupi, tehpih omlou itna, itna siang leh itna manpha ana hina maizen e ka pute' hon itna kei leh ka innkuan a ding un.

Tunia ka hihna bangbang ka pute' ziak ahi ka chi ngam tinten hi.Kou neihsa kou lamsa tawh hiai tan tung ding hile ung aw...kou adin zaw singtang dawn ah azu aham thuak a vailou kuan lel hi ding hi a ka tantawk uh.Tuni'n amau(pute) vang in nisa, vuahju te thuak kha hetlou a ka omdan te uh ka ngaihtuah a, itna thupi! Itna Lamdang ka chi lou thei kei ahi.

Singtang khua sapsap dia le a larlou peetmah kuamah theihlouh Suangdai ah ka pa'n ka pian khit nung a mission schoolpu nna a sepziak in ka innkuan un hon na peempih hi.Mahleh a sepna school mission pen a khua hausa in a deihlouh man in sawt sem theilou in school khak in hong om maimah a..zanggam lam kiik nawn dialah masuan ding omhetlou ana hih man in singtang a khangkhia a, khut nasep hat a neekzon ding chu maban hon hi maimah hi.

Huchih lai in bel ka pute(kanu' pate) ka pianna khua Tangnuam ah a khosa gige lai uh hi. Amau a tute uh singtang mun ah khangkhia ding honna ngaingam hetlou in neihman , hauhsak man hihetlou itna ziak kia in naupang neuchik ka hih ua pan(ka unauteng un) hon na enkol tou nilou uh hi. Ka hamphatnate tun ka theisiam panpan a, ahi a lah ka pu(ka nu'pa) in 1997 a i buai vingveng sung un honna omlouhsan maimah ta hi.Ka pu leh pite hon itna amau tan chauh a bei mai hetlou in ka Puneute leh ka Nuneute tanpha in amau sung a piang ta bang in honna enkawl tou ngitnget uh hi.

Huai hun lai in tua ka theihsiam dek patpat itna ana theisiam himai leng aw...ka nuneute, kapuneute leh kapi leh pute lung nak zon hina ning e aw...ka chi vungvung sek.Ka ngaihtuah zel a ka ngaihtuah mai inle ka laidip nem ana, kham vual louh in lakmai luankhi in hon tum zel.Aw Itna lamdang!! Itna Thupi ana hina mai e...

Mihing tuamtuam, hihna tuamtuam nei in i piang a, a nuamsa deuh bang, haksa deuh bang an ki om tham hi. Huchi kawm kal ah kou neihsa ziak hihet lou a tunia mi omna bangbang a om thei a,mi silh bang silh zou kei mahleng mi englou a omthei ding dinmuna ka om theihna hon it a hon kem ka pute ziak ahi ka chi gige ding.Itna om lou hileh tuni'n ka dinmun ding ka ngaihtuah zel a..vuahzu daikai nuai ah vailou kuan kan ka ngaihtuah thei kei. Nisa nuai ah gim leh tawl gen lou a nasem a ka om mailouh ngal ka dinmun ding ka ngaih tuah zou kei. Aw itna lian in sang hina tel e! Aw itna thuk in zai hina tel e! Itna Lamdang mipha lou ding lai vual englou a hon koih itna aw...ken chikchiah ka manghilh thei dia hiai itna.

Pu aw na vang mubang ngai ing. Na lenna thangvan pan gal hon don zel in aw pu..Na tute innvai louvai gen ding sak ding a om chiah lam hong lak lai in aw pu..Nang nua chiang ah nang non it bangbang a hon it ding a ka puneute ka nuneute bang na chi thuhilh hiam pu?? Keile tua itna thuguk hon hilh in aw..Ken leng nang itna bang itna ka neih theihna di'n Thupha hon pelai ve maw pu...

Tuni'n na taksa dam a omlai hileh na lungsim nuam a kipak tak in na omom ding ka gingta hi. Na tute na lamet na, na tupa khutsuak khat lel le chiam manlou a non omlouhsan maizaw laiah na sa lua ing...Pu hun beisa sapkiik theih louh ah mo? Na heina thangvan a lungmuang tak in ana om in aw. Ka pi Nang it bangbang in ka it un ka duat ua ka kituh nainai zel uh. Kou kiang ah a omding ahi chi in ka nuneute toh kituh in ka pi lungam sak zel ung.Pu ei Nang vang hi hichiang ka tun. Na vang mubang ngailua ing Pu..Pu..Pu...