Hunthak, kumthak ah I lutnawn ta. Huai dungzui in kikhek ngai kasak khenkhat kikum le ka chi. Kikhekna I chih chiang in a hoih a kikhek leh a hoihlou a kikhek chih a om a, tunia I gen dek bel bangchi hiam in a hoih zaw diam chih gen ut ihi.
Hun hong kikhek zel dungzui in I ngaihdante bangle hong kikhek zel a, huai kawm mah in I omna bangleng I khek zel uh hi. Nidang in(chizen sam le) I gam ah piching a ki tam mahmah hi. Mile a kidaih a, nuam leng a nuam mahmah hi. Mundang ah laisim a paite bangleng a zawhchiang un I gam mah ah hong kiik nawn ua, huchi in a ki om helhul mai a, kitam mahmah nuam mahmah zaizai hi.
Himahleh hun bangtan hiam paita apan in huai chiin dan hon tawp sim abangta.Private sector ah nasepna lam I hon muhsuah ua pan hidiak in ka thei.Sum-le-pai mah I hinkhua a dia poimoh pen ahihna ah sum muh theihna lamlam lehkha zirkawm bang, ahihkaleh sepna zong kawm bang in khawpi zaw deuh ah I om seuhsouh ua nuam mahmah. Khosak bangle hon changkangsak tuam mahmah a theih in a om hi.
Huchia mundang ah a sem thei masasa in I gam I nuse ziahziah ta ua, vaigam bangle eigam saktheih phial ding khop a tamtham I omta ua, kipah huai.I gen ut pentak hiai hizaw lou in inn lam a I nutsiat te genle chi dan ka hi.
Tulel dinmun in I gam ngak a om tuailai I chihte atangpi a gen in Class XII tansim lel te leh a nuai lamte chileng kikhial lawmlawm lou maithei maw.Huchi hitaleh amaute lehkha sim a poimoh diak laitak uh ahi chi ut ka hi.Huchih lai in ngaihtuah mahdih a liang ua mawhpuakna kinga kha.A mawhpuakna uh lianlua bangchi hiam a I dawn zangkhai theih kei ua leh denchiang in I kisik na ding uh a hi kha diam ka chi.
Khotang vai ah enta le I gensek bang in eilawi chu kipawlhkhawmna haute I hi uh.Bang hiam hih ding omzekleh hihkhawm noinoi, kipak khawm, dahkhawm semkhawm te ihi uh.Si inn lenkhawm bang va gen zual le lenkhopna kha tuailaite a dan a kikoih. Huchia tuailaite I hon chih nawn chia den a I gente tuailai chih di hia naupang chih di te khong himaita.Zanhak ding chile amau mah hizel. Hankuan ding chile amau mah hizel.Hiaite'n bang hun in laisim unteh I chi a? A maute a pat in bang I lam en ua?
Sahkhua lam va en nawn le: Kikhopna khong bang hau a ki hau maimah. Lazil ding bang omdeuh zut.Khawmpi e mahle om. Huchi lou kal a Vengchih Biakinn chih phial in a tuailaite uh group bang khen, group thilhih ding, lazil ding lah om gige.Day tuamtuam bangle kinei zelzul. I thilhihna himhim uh I et vengveng leh tuailaite lou a I hih uh tawm mahmah.
Hiai a tung a I gen zualte kha hoihlou a chipah hilou ka hi. Kikhawm mah ni, la zir mah ni. Lengkhawm mah ni. Hiaite mah ahi midang toh I kibatlouhna uh, I tawndan uh midang a sang mah a a hoih biikna. Hiateng mah ahi muntuam gamtuam apat I lunggulh a I gengen. Hilele chih hong om veu a hiven.
I thilhih dan uh nengkhachik a kua akua a dia zangkhai zaw deuh di'n khekzek leng bang a chi dia? Etsakna in: Si in zanhak leh hankuan te nungak tangval khut ah koih ni. Huchi lou nitak a lengkhawm a kihehnepna hun te khong ah nu-le-pate'n mawhpuak na la theileng bang a chi dia? I tate dawn zangkhai lah kihi di maw? Dahte dahpih a lusuun pih lah hi ding.Innteekte adi mah bang ale lungnop huai khamuan huai zaw maithei maw.Nungak tangval dia kisa panpan, la bangleng sa ngam naikhollou khong toh om khawm teptup sang in.Lengkhawmna inn a a lut mahmah bangle zum a zum tuntun te tawh lengkhawp chih bangle thilhaksa ban ah hehthasuah velvul hun tamzaw eive maw.I tate lehkha simsak theilou phial khong a TV I et sang'n. Nu-le-pa chingkam taktak lengkhawm a hohte kha nungak pichin, tangval pichingte'n va kithuahpih le uh aman dandan un.
Sahkhua lam bangle hithou mo? Tua I zuihte khong uh kha dan a hichi ding chih koimah a kigelh khollou maithei maw.Tuailaite kikhop a la zirzir ding chih bangle dan a om hilou pi I bawltawm uh hilim eivoi maw. Huai kha hon chil masate hon na chil dan hi a, tua hun hong kikhek dungzui a eimahmah leng I tawndan, I paidan khek zekzek ngai om hilou maw. Kikhek ding chih chih chiang bang a lau a lauh bawk kenkon. Kristian louhna bang sa suk mawk. Kikhek ding lau mah kibang ka kisa. Hun nei kisa kikhop na bang nitakteng phial a om, kikhawm zoulou deuh te lah a kikhawm teng mah in gense zel. Mi gengen kei ni. Mi sia-le-pha theihna chi suk geihle bangkim veng ding hizenpi, a biakna hat I chihteng mah mi gensiat hat hileh kilawm hial zel maw. A hun nei a man kisa teng in paulou phun lou in sep ding bangbang sem ni in, a omloute min lawhlawh kei ni. Huai a hih kei vanglak leh lah bangchi hiam in kikhek dan ngaihtuah ni. I thilhih dante uh khek ni. Khotang a tuailai I poimohnate uh dawn zangkhai deuh ni.Tuailai biakna kikhop bangle Pathianni nitaaklam khong in neisuk leng bang a poi?? Tuailai kikhop weekdays a zan a hih ding chih bangle koi a kigelh eita??
Kikhek ding deih in mi a phiat in a phia ua, kikhekna tunzoulou ding makai bang a deih nawn kei ua. Eilawi in bel kikhek khak ding kia lauh a lau mai. I chiindan uh hilou chi pahpah. Chiindan I chihte nidang a kipan hita. A hoihte kepbit ding, khekngai omte khek ngam ding ahi.I theih dia hoih leh poimoh khat chu kikhekna i chih himhim hun a la dia, nuam pah lou ding ahi.Phunphun pah lou in ngakzek le huai kikhekna hun i pelh chiang in nuam i sa mah mah ding.Huai hun teng kha dawhzawh ngai mahmah ding ahi. Kikhekna chih man zen a mawk lauh ding hilou ahi. Bangteng hileh I gen ut takbel a hoihna ding ahihnak peuh leh kikhek lau keini chi ut ihi.
Hiai thugelh zogam.com a takkhiat ahi.Huai a thukupte:
1. Written by kamlian, on 05-01-2009 10:08 , IP: 122.163.249.226
A hoihlam a i kikhek ngam pah louhna uh...a zat theih loh PAITE khonung pilna ahi ka chi mai a. Na gelh hoih ei!
2. Written by Vangngaihk, on 05-01-2009 12:16 , IP: 164.100.1.9
Na hon gen lang ta lakloh a, ka ngaihdan ka hon kum tei ding:
Biakna lam kouzan zawk na ding in-Tuailai Pawl chih leh Dorca Pawl kichi beisak ding. Piching Pawl leh Naupang pawl lel omsak ding.Sande Skul a Senior tan zouta a, piching pawl a laklut ahin nung ua,Tuailai Pawl va chih touh zel thil kullou leh haihuai pi ahi.A hih peuh peuh uh Piching hih ahih tak ziakin.Huan,Pasal Pawl omtuam loupi a, Numei pawl chih bang leng, amau akipahpihna ua hiven,zakdah huai pi ahi.Sande Skul a numei Pawl a omtuam louh mah bang a, Piching Pawl a leng numei pawl/pasal pawl a om tuam louh ding ahi.Senior Pawl tan Bible thu zirsak hah bawl a bawl ding,huai apan Piching a a lut chiang ua, deidanna om ngai nawn lou hi.
Hiai a tung a kikhenna mah Khawtang ah leng kizang leh,sigal lenkhawm, hantoh kichi te a peih peih te ading, a phatuam ngai zouzou te ading ahi.Thilhoih hihna leh phatuamngaihna(tlawmngaihna) ahi a, hiai te ah pension chih khong a om thei kei.Nupi bang le hantou a akuan nopleh, bang a apawi ? Huchibang zelin, nungak tangval lenkhawm ut om leleng a poi hilou pi.Eisung a milip tamlua leng hilou, i kikhen tuamtuam chian, konfiuson hong piang hi, a diakin, singtang khawta neukha te bang, a tuailai di leh a piching di, anupi pawl tuam di chih om theihlouhna tamkuam omkha ding hi.
Hichidan khawng,thilhoihzaw deihna ziak a, lungsim tak tawh kikup ding mah hi.Kikum zel ni Guai.
3. Written by Hoihe, on 05-01-2009 17:56 , IP: 202.89.67.34
.......Na Gelh hoih zel mai....khua taang ah ki hel zoulou te lah mi phalou hi`nte chi suk mai zeel hang ua..."Conduct" lampang siam zou nai lou ih hi di uam.. Hoihe...Ki khek kaan om kei,, ...
4. Written by kuaude, on 05-01-2009 20:28 , IP: 203.100.57.100
Na gelhte dik thei mahmah zel e. A hoihlam a kikhekna (positive change) ki poimoh mahamh ta ahi tuchiang in. I chiindan/tawndan te uh va tawpsan ni chihna hilou in ah na gen mahbang in siamsin laite' adi'n hun pethei leng deihhuai mahmah. Tuchiang in lungluut tak a laisim a omnawn mangkei. Khenkhat in lazil, tuailai kikhop, si inn leenkhawm etc. te paulam remchang a la in nungak-tangval toh hunzatna di bang, khamtheih guihtheih hihna di bang a zang in i khotang ah siatna thupitak hon tun hi. SIamsinna mah pibawl in i siamsin naupangte' a laisim na uah a tam theilam hunpia in, tosawn leng himailou hia maw. Siamsinna lou inlah i khosuak ngalkei di ua.
5. Written by phui louh, on 06-01-2009 10:26 , IP: 122.163.224.127
dam maw, hibang thute hi mah ei, tulaia i gen gen, i gelh gelh dingte. Net access theite ciang bel ki lual dan khat om in. Vengsung kalteng bullettin, Lamka Post leh Manipur Express kia simkhate ading in hiai bang thute poimoh diak ding ahih ciangin, suah theihna na a suah dingin na ham ciam aw....
6. Written by lhauzel, on 06-01-2009 18:36 , IP: 220.227.122.205
Thupil khat in "The only constant is Change" a chih mah bang in Kikhekna in mailam hon nawt sak ahi ka chi nuam hi. Hilele, thil khat i theih dia kiphamoh mahmah (leh i manghilh khak veu uh) ahihleh, i society ua kikhekna di khempeuh, i innsung ua a kipat kul hi. Hiai thutak thei in zuih chiat sawm leng maw...a bul beek pan thei leng, sau i tun theih nai kei leh le a bul i pat sa pen hong nuam zodeuh himhim ding hi, i pat thak nawn chiang in.
Keep writing, Lamboi. Good Work!
7. Written by vaphualization, on 07-01-2009 23:11 , IP: 220.227.149.142
Nungak tangval dia kisa panpan, la bangleng sa ngam naikhollou khong toh om khawm teptup sang in.Lengkhawmna inn a a lut mahmah bangle zum a zum tuntun te tawh lengkhawp chih bangle thilhaksa ban ah hehthasuah velvul hun tamzaw eive maw.
dik a ta ve!
No comments:
Post a Comment