Sian Aw Zolei Ah

I gam ah chihtakna, diktatna leh muhkholhna nei taktak a mipite pitu ding kisam kasa. Pathian a thu kia a lau hilou a, a tak mah a lau ahinpih thei poimoh hang. Thutak leh thudik sihpih ngam ding sangmah in a hinpih ngam ding poimoh kasa. Mipite aw Pathian’ aw ahi chithei ding I poimoh.

La hoih pipi I nei a, I gam ngaih late bang ngaih diak in zaknuam kasa. A phuaktu te’n denchiang a I gam dinmun ding muhkholhna lianpi nei a ana phuah late uh, a la chauh mah toh bei saksak lai ding I diam? I gam hong paal ding ichi chi a koilak ahia I gam? A bangchih chiang a paal ding chia ngakngak I hia? I paalsak ding, I zuun ding gam pen I thei chiang taktak na uh hiam? Gamnuam, gam thoveng, leh gam galmuang I chihte bangchi bang ahia chih I thei uh hia?

Hiai a tung a dotna teng I dawn theih leh huai I dawnnate toh tulel a I tenna mun a I omdante a kibang hia? Kibang lou hial di eive. Gam galmuangte omdan in I omkei ua, lauhthawngna, kimuanlouhna, diktatna leh chihtakna sang a Sesum a let zawkna gam ahi. Hau in nei peuhleng thutak hiam thudik hiam ka ut dandan a ka peitheihna di gam ahi. Huchi kawmkawm in genlai le, ka genkha sek, I gam Christian gam chia I kisaktheih pih mahmah na mun uh hinawn ngal. A makthei tel. Heutupa V. Siampu in, “Sesum aw Sesum, Sesum aw na lian, Sesum in simlei a zou hi” ana chihkha ana muchiang hina mahmah e maw ka chi.

Tuma in Pu LT Ngaihte mah in ana gelh khata. “Juda Te Mah” chih. Huai a a tawp kuan lam ah a gen Zogam I chih koi mun ahia? I theina hiam? Theichiang loupi a vanlam en a ngakngak I hi hiam? I theih chiang a tua I tenna mun mah I gam, ka gam I chih ngal leh ba huchih puahlouh tel? Ba huchi zuun louh tel? ana chihkha dik petmah ahi. Hiaisang a a uangzaw a gen didan thei nawn tuanlou ka hi. A sung a teng eimah I hi a, ei nuam hen I chihleh nuam ding hizenpi a, a kua ngakngak a kineih I ding ua’m aw. Mahni innsung ngei a thil hoih pianna dia midang khut I ngaklouh lam I thei chiat. Huai ahihnung I gam a thilhoih leh nuam piangsaktu ding a sung a teng eite mah ihi.

I Christianna toh gam it thu bang kituaklou peuh isa kha maimai di ua’m ah? Kituaklou hetlou eive. Pathian inle gam ana poimoh ngaihtak ahi ding, A namteel Isrealte ngei leng a tenna ding uh gam nidang pek a pat ana pia hi. Amah a lauh ua A thupiakte a zuih sungteng uh a gam uah nuamsatak in a khosa sak. Mahleh A thupiakte a pat a pial uh chian a gam uh galte khut ah a lut zel. Tuhun a Isrealte tenna gam lel bang leng dikloupi a a neih gawp uh hileh kilawm hial khop in A namteelte’ gam ding a pe teitei. Eileng I omdan. I nasep dan bangkim Pathian deihdan toh kituak photphot leh tua I omna lel mun lianlou chik sung ah niang-leh-tai in I om kei ding kua a chi ngam?

Diklou taktak khong in na I sai ua, hih khelhna khat bang hiam a om chiang in gam dan diktak a vai hawm sang mah in Christian I hi chi’n kingaihdam tuah ding ahihdan I ki gen khum ekek ua, pai dan di himhim in I paikha kei ua, Pathian’ thu bangleng mahni hamphatna di dandan a kai maimah I bang hial uh hi. Huaiziak tak eive Pu Pauzagin Tonsing in “Pathianthu chiil bawl deuh le” ana chih hial.

I gam a thudik gum a puang di’n “Kua hiam ding ding. Kua hiam kua’n ding” I chi ua, la in I sa ua, a kipan dek khat a om chiang in bang chichi hiam in I bengdai geih zel ua, bang tak ahia I lam et lai uh? Thudik puangzak a a gumte kipahpih a nungthuap ding hi awmtak a lehlam ua’h I ding sosouh ua, huchi kawmkawm in I gam nuam ding chih I gengen lai ua, ken zaw nalaiset ka chi mai. I gam a nasem a hun tamlou chik hong zang zual kol-leh-vaite kha tomkha sung in a hau hulhul mai uh hilou hia? Golhguk, singpi dawn man ding piak cheuh chihte siamthei lua I hih chia maw.

Office khat a lai poimoh lak na dia bang ziak a singpi dawn man di piak ngai ahia? I ngaihtuah ngei uh hia? Ei diklou I mo leh? I thil ngaihtuahdek dan toh kituakloupi hia leh? Huchi lah hisilou ei lah dik, I thil ngaihtuah dek lah dik ahih leh Singpi man di piak ngailou, a nget teitei ualeh amau diklou. Dan bangtak a complaint theihna thuneihna kinei hilai. Amau ei piak ngai hetlou, a hih ding bangbang uh ahih di man uh lawh sang. Huchi bang chindan eigam kia ah uang ahi. Mundang ah leng omkha na ve, eikiang bang in a uang kei a hiven. Khut mong khat a tat nakleh sum, sum, sum. Thil neuchik I chihte mah a poimoh pente hong hithei. “A journey of a thousand miles begins with a single step” chih thei thak ni.

Genta vanglak gensuak lai aw. Eilawi Pathianthu awi dan le et thak di omzek din ka gingta. Nidang a Christian ana hi masate’ chiindan kha hoih kasa mahmah. Piangthak chih amau a kitheih chiangna om ma a min uh gelh lut lou bikbek uh. A zi Christian, a pasal hilou, a pasal Christian, a zi hilou chihte khong ilak ua’h ana om lotham. Huai dan a a hihna chiat uh ana gup ngam ziak un a awi vanglakle maimai lou, chitak petmah uh ahi. Tulai in I hihleh pianken Christian I hi a, I pian a I pian khit nung I pautheih ma nangawn in I min saptuam in a gelh luta ta. Pianken a Christian hih theih chihna toh kibang kasa mai. Kachihna bel huai a I min gelhlut pen a hinkhua bangchi bangteng in zangmah leh Saptuam in a min phiatkhe lou hi’n ka thei. Ka thei khial diam ah?

I gam a zalen, a diak in Biakna toh kisai thilhihna khat peuhpeuh daltu a om kei hial. Huai I zalenna mahmah leng zang khial I di ua’m aw ka chi. Christianloute bang hat sim uh henla, banghiam hih dek chiang bang in kinawkna thupi khat om masa leh I thilhih pen uh a lohching zaw I gen a nei zo diam ka chi sek. Manpha a hihlam I phawk kha zo di ua’m? Kikhopna khawng bangle zalen lua, kikhawm dia kuan kikhawm manghilh khawng ki omthei lai.

Bangteng hileh I Zolei nuam hen I chihleh ei khut a om ahihlam thei thak ni. Sian aw Zolei ah Nangthu a it ding, thutak/thudik gum ahinpih ngam ding, muhkholhna lianpi nei kawm a a mite a huai ding leh pi ding poimoh ung chile a hoih diam maw. Neih-le-lam a thuneihna sang mah in sakmin hoih manpha zo chih theithak ni.

©zominization.blogspot.com