Tulai tak in Lamka a na omleh na paina lamlam ah I gam a tanchinpha hong lutnung kum 100 chinna kipahpihna lim bangbang hiam kilteng phial ah na mu ding. Lamdung ah Centenary gate pawl tuamtuam in a bawl uh veng lutna teng phial ah muh theih in a om. A veng munpi lamdeuh ah nava pai dia Centenary Building na mu nawn dia, mun khenkhat ah Centenary Information Centre chih kigelh deidoi bang nava tuak dia, a mundang ngial ah Centenary Store chih bang nava tuak kha thethup ding.
Tanchinpha hong lut ziak a tua I dinmun tan tung ihi chih I haih kei a, lop tuaklua. Nakpitak a lop ding mah ahi. Mun khenkhat a Centenary lopna nung a hall phel khitna nung tuah khak in a om, pawl tuamtuam huai lop na nung buaipih a buai vengvung leh a khente Centenary lopna dia kisa khol lellel chihte’n I khopi a luah zou mahmah. Mahni saptuam bing a lawm dia kisa a lapawl zil a buai a buai veng khenkhat bang om lotham.
I gam a nop mahmah laitak hi di eive. Thudang ladang sangmah a Pathian’ min a kipawl khawm dia kisa a I omna chiat a I buai vengvung hun uh ahi. A thoveng a, lungsim a nuam! Khenkhat te di bang ngial in nidang a I gam dinmun lungsim mitkha ah a langsak a, a lung uh a leng mai. 1997 ma lak a I gam thoven dan mah bang in a thoveng hiuhiau mai. Nitak a kha(moon) hong vak nawn ngal bangzaw, huihdam vot hiauhiau in hong seem a, nop a chih in nuam kasa.
I gam nuam lo ding hizenpi a nuamsak hetlou a ka theih khat bel I gam keu mahmah ahi. I gam a keu a, huih a nung a, leivui a khu a, huai in a nopna lamang zek hi’n ka thei. Nitaklam khomial zul teng in I khodak leh koimun hiam ah gamkang muh ding a om gige mawk hi. Bangtak lam-en a gam halhal mawk I di ua’m ah? I gam a keu luat ziak hinteh tui hak petmah in ahak hi. Innkang chihte leng a om mun diak a bang. Ka omna venglui uh Tangnuam bang ngial ah zan dak 11 tantan tuitawi in handpump ah a tu depdup mai uh hi.
Nidang a bangchi bangteng in khua khal leh leng Lanva lui bang zaw kang kiuhkeuh zenlou a ka theih hi a, tui bang luang zek sam chidan ka sakleh, tun bel tui luanna lui a bang nawn kei. Tedim Road a lanva lei kibawl lel a ding a Lanva lui sung I etleh a sung ah tui luang lou. Gaw gipgiap mai, chik a tui luanna banglou, Lanva lui sung ah inn hoih simpipi kitung tiltel muh theih in a om mawk! Nuih lamlam bang za maimah e. Tui tam nawn phut hileh huai a inn neite a buaimah di uh chih lamlam bang ngaihtuahna a lut mawk! Huchia inn suse di zen tui luang ngei nawnlou di chih thei uh hinteh ka chi mai a. A himhim a huai lui sung khong a inn bawl geih te’n inn mun kuakiang a lei uh a diam mo chih peuh kava ngaihtuah maimai aka.
Tui a haksa a, huai in hindan pangngai a subuai pha hi’n ka thei. Veng khenkhat ngial bang puan sawp nang omlou, Khuga Dam(Mata dam) ah puan sawp dia gari hire zen a kuan mai chikhop ahi. Khuga Dam taget lah tutan bang a zat dia kibawl a chih theihzoh louh khop in a omlai. A dam bawlna kiim a khuate a suk buaibuai maizen toh a zaal bek zohphak di’n omleh zaw hoih di hi a. Tualah zou ding, hong ding chih hideuh reng, bangzah vei zohngai lai a diam ah. Huai a tuite bang tuhun in Lamka zaang supply kha geih thei hileh phatuam mahmah di zo hiven. Tui tam a tam en en a pai kiik zel chu tui haksat toh naa atave.
Leivui a khu, gari a tam, khe a paite a din a haksa. Gari taite lah kin a kin ngen, kikhoh vengvung, huchi kawmkal ah mipi lamlah pilvang zou chiahlou. I gari taidan tangpite uh leh a mipi lamlian zangte pilvan louh toh et in accident bang a vang mahmah lam kasa maimah ve.
Hiai a tung a I gen bilbial tengteng ei hih khelh ngen ahi. I gam ah singkung muh di a vang mahmah. A om sunsunte I phuk ua, huai tan a hunsa lou in a a sing zung I va kalh zomah ua, huai in I gam a keusak, tui a haksa sak, Lanva Lui tak ngial leng a kang kiuhkeuh sak hial hi. Tua Khuga Dam kiching demdom teng leng a zatna di a zat hivanglak leh tua bang zel a I pai un chu sawt a daih ka ging tuan kei. A tui a kang pah dia, I gen thei zo maimah di ua’m mo ka chi mai. I tenna gam eimah in it tak a kem a I zuun a I puahma uh zaw, bangchi thugen in sasa le hang leng I gam nuam thei taktaklou ding, gahsuang lou ding, nek-le-tak kiching chihte om nawnlou ding hive aw.
Nagaland a National highway zang a khual zin te’n I mu tham di ua, a singteh te uh zol(oily) kelkel zozen, singteh a pat daitui tak khia in a lampi te uh vuahzukna nung mah a bangsak zou mawk hi. Huai kha a gam uh ana kep ziak uh a it ziak uh ka chi mai hi. Tu’n eigam ah koi ah lamdung a sing muh ding a om a? Lamdung ate tata a puakna nai chia phuk pai mengmeng ihi lim kei uh mo?
Taksa, khalam leh khosak a khangtou I kisak mahmah lai in, I gam puahdan, itdan, zuundan chihte I theihkei nilouh mawk ua leh I gam nuam ding, paal ding I chihchihte zuau suak ding chihna bang kasa mai hi.
Tu’n ka gen veusek kon gen nawn ta ding. Centenary lawm di’n i kisa ua, I buai lunglung ua, ka genta. Loptak mah ahi, lawm mah ni. Huchi kawmkawm a I ngaihtuah ding ua deih huai kasak bel Pathian thei a it taktakte gam se deuhdeuh, keu deuhdeuh, nek piang lou deuhdeuh chihte a hi ding mah a diam? Gam itna vai toh Pathianthu kituaklou chichi lai ding I diam? Pathian ka it, kanei chi taktak te’n a minam a itmasa ua, a gam a it ua, a puah ua, a zuun uh. Eilawi la??
Tubang dinmun a I pai zel ual eh bel I gam a tanchinhoih hong lutna kum 200na bang I lop hun chiang un, I gam uh tentheih non louhna gam a suak maimah diam mo ka chi.
No comments:
Post a Comment