Tawmkha Hap Ve

I kholak pau a thang mahmah khat “hap” ahi. Dawr ah vanlei a I hoh chiang un “kapu/kapi, tamlou hap lai ve” I chi sek uh hi. Hunta chih neilou mihingte ihihna tak uh ahi. Tehna ser a kizang, mahleh thil hong teh chiang un a buuk deuh ding I deih teitei. Hap zek teitei I ut. Hapchi hia chilouh chihleng omlou a hap gaihsiang ut te ihi. Neulai a manggan(chana tang) I lei chiang in khaini bawm dim khat makhai(50paise) ahi.Huchia khaini bawm dimkhat toh tamlou kha hong koih sak chiang un kipah huai kisa tuam se hi. Sumbuuk neu khenkhat in tunsa in a zuak ua, ana hapsa uh le ahi maithei. Huai dan a tunsa a koih a hong pegaihte’ kiang a manggan lei sang in iva lei toh kituah a hong tun tawm ua, hong hap zek un kipahna hon tun zo in ka thei a, nuam leng kasa zo.

Huchi mah bang in nna khat peuhpeuh I sep I bawlna ah a zaal zoutu mipite a di’n tamlou khakha hap zek thei le I gam nuam in tenna taak mahmah di’n ka gingta. Lampi bawl te’n le amau a di chauh ngaihtuah lou in nengkha chik hong hap uh henla hileh I lampite a maam in a nuamtuam mahmah ding hi. Huchi hileh I pucca roadte tung ua antang buaksak ding a lauh huai kei dia, aak in I lampi a thaisiat ding a lau huai kei ding hi.

I Pathian thu awina ua’h le hithou, ei mimal hamphat pih ding dan a Pathian thu khong kaih zialzial sang mah in midangte’ a dia phatuam ding I hinkhua ah banghiam hap zek leng I biak innte a awng kei dia, kikhawm ding mi sapsap, zotzot ngailou in I tu dim phitphet ta ding hi.

I gam I chi a tenna taaklou gam I suah uh hi.  Gamnuam leh thoveng tak a hin hun ana om tham hi. Khohun nuam tak, neek limtak omna, zodawn tuisiang luang vot chenchen, dangtak laitak a I dawn leh thildang bangmah lunggulh hetlou a omtheihna khop a tuisiang dawn ding neite ihi. Huihdam vot hiauhiau in hong sem a, gim leh tawlte a dia tawldam zohna di khop a zo huihkhi siang neite ihi.

Tuni’n zodawn tuisiang, zo huihkhi siang I chihte om nawn kei. I gam I it louh ziak uh hiam ka chi? Gam maang chih ding a vang mahmah ta. Singkuang lian pipi chih muh ding a vangta khop mai I gam ah. Bangchik kum a diam ah ka thei nawn chet kei. Haiciin(Myanmar) khua ah kava zin a, lampi dung louzau a aneih kum uh ahi. Lou singphuk khit na nung ahi na a, etton taak uh kasak mahmah khat bel khualzin, gamvakte a khual mahmah uh chih a nasep ua pan a lang thei hi. Lampi dung ah khualzin, gamvakte a dia nuam ding chi in lamdung a singte a hawi sese uh hi. Huai ahi ken ki ittuah, ki khongaihtuah ka chih. Kei lou hiven chia singkung gamphuk mai lou in amau a di leh midang a dia nisa thuak nopnang in singliim belh ding lamdung teng ah a hawi suak uh hi. Chiindan hoih leh kilawm kasa.

Ka gam ka lei ka it I chihleh midang khut ngak lou in nuam hen I chihleh ei thu himai chih manghilh keini. I lampite eimah in I bawl a, I damdawi innte eimah bawl ahi a, a thunei pente eimah ihi. Huchia paina taaklou leh belh taaklou a I bawl teitei leh I pauthei lou namdang khat va ngawh nawn sese keini. Nidang in a hihleh huchi bang a zat di zen ina tamlouh man himaithei in I gam a nasep khat peuhpeuh eimi lou deuh te’n a sem sek uh hi. Tuchiang in kidaih lo mahmahta hang. Nna a lianpen a pan a neupen tan ah ei’ area sung zet ah chu ei ngen in vai I hawmta. Tua I lungtunna dan bangtak a nasem thei dia I omtak a I gam se deuhdeuh, chihmawk! Ngaihtuah tham ching kasa.

Diktat di khong zo ka gen ngam zozen kei. I Laisiangthou in leng diktat lozen ken chi ahi chih ka za sese kha dia. Dikta lo zen lou in tawmkha chik chik I mipite leh I gam I itna ziak in I sep I bawl ah hap zek le hang zo I gam nuamtuam mahmah dia gingta ka hi.