I gam simthu lung phawn huai pipi I za sek a, a diak in tunai a I zak ten lungsim hon kam lian in, ngaihtuahna a sau paisak mahmah mai hi. Nov. 7 in Naupang kum 2 lel mi sualluih in a om, tutan khutkhial mat chih om nai kei. Nov. 12 ni in Pa khat in a tate 2 gawl at in amah-le-amah kithat chih thu’n hong dengkha non a, aw ana I gam simthu! Chi a, Banghang hiam? Chih mai louh gen ding a vang khop mai. Awm a bing a, ngaihtuah mumal nei thei hetlou in ka om ek-uk. Ngaihtuah ka sawm lamlam a bing tultul mai. Itna, hehpihna chih te’n I gam nuse ta hiam? Bangziak a hiai zah a thangtatna leh mulkimna bei a gamtatna te’n I gam hon dengkha mawk ahia? Aw! Lungzin huai hina tel e! Mangbat huai hina tel e! Bang doh-ai hita ding hiam?
Diktat louhna, nekguk-takguk chauh a kibual iki sak lai in saupi ana tung hita hang e chih lamlam ngaihtuah in a om. Moral value kichi himhim in mun nei non lou a abang! Hiai bang thute a khen a din lamdang lou lua, I theih theih sa leng a himai thei. Himahleh a tangpi a et in eilak a om ngei dia le ina ging louh thil hong tung ahi a, lamdang sa bel a tamzaw I hi lai peuhmah ding. Bang ziak a Pa khat in ama sisan a piang ngeingei a tate 2 that mawk hiam? A dawnna ding a vang mahmah. A itlouh ziak a diam? Ka gingta kei. A it lo tel di.It luat ziak a tate that a om thei diam? Om thei din ka gingta. Khosakna khang tou hulhul lai ah, a nei lou vang lak a din kikhou khiatna hong lian hiaihiai dia, a ta upa pen bang skul kai ta, mi neih eng dan hon thei sam ta di. A lawmte omdan a muh bang a gen zel te’n a pa kingai sesak a diam? Kingai selua a, hun hong pai tou zel dingte ngaihtuah ngam lou, chih bel a ama a dia lem-et na nikhovak mupha lou himai thei chih bang le om thei di’n ka gingta. Huchi bang a, ama khanvual eng tan a bei lou a, a tate’n le ama nung zui tou zel di ngai ngam lou ei diam? I thei kei. Thil khat ka thei, huai naupangte geel in sihna di hih khelh bangmah a nei kei uh chih bel ka chiang.
Numei naupang kum 2 veel sualluih a om. Hiai thu gelh a hih tan in kua gamtatna a hia chih theih but ahi nai kei. Vengsung phatuam ngai pawl in kipuang dia hunchiam a piakni uh a peel ta. Kuamah kipuang lou hita leh hichia bei maimah di a diam? Khutkhial a hai gamtat pen theih khiatlouh a om nilouh ding a diam? Tuni tan hiai thu toh kisai Police ah FIR ki file chih kuaman a gen kha kei. Nu-le-pa mawl a, huai dan hihna chang theilou I om lotham ding uh. Kuamah simmoh leh engpauna hi hetlou in. Huaite lamhilh I om hiam? Hiai ah leng naupangnu khelhna ka mu kei lai. A sual tu bel gen ngai lou a khial ahi a, amah khelhna lam I gen sawm kai. A dang kua’n a mohpuakna a zohlouh ziak hi’n I thei a? chihte dotna poimoh taka hi.
Naupang etkolna kong ah khatvei vei ngaizam lodek dek I di ua aw chih in a om. Bangziak a naupang khat huchia lamnawl ah kimawl a nuse mawk ihi ua? Nidang in le huchia nuse sek, bangmah chi ngei kei I chi hia? Huaini ana huchi kha chitchiat a hi I chi hia? Nidangte a leng huai dan thil om thei, tung thei, ana tung kei maimai chih man thu ahi. Tu’n a tun tak in tuni ana hichi chitchiat a chi sese kei ni. Naupang khat nuse dek in a piching khat kiang ah huchi, khachi kava hoh zual ding, ana enkai zual in chi’n a nget theih lotham. Ei-le-ei ngen tengkhawm I hi ua, i ki pum muan ua, huai ding mah le ahi. Kimuang vek hileh le mohpuakna piakdeuh khat om hileh huai thil tung ken teh zaw ka chi chet ngam kei. Tung dek hita leh leng tungman lou a phawk kheman chih beek om theihna lampi om zaw din ka gingta. Sualluih sese lou, gari tai thei tuamtuam a pat leng veng ngai lai mahmah di’n ka gingta kum 2 milel chu. Huchia pawtsan gige bang I hihleh nu-le-pa a diak a lamka sung a omte a dia theih dia hoih chu, i tanu/tapa kha Risk sangtak toh nuse gige i hi chih I theih gige ding ahi.
Hohna di, sep di, hih di poimoh om a nuse zual chih om thei lotham. Huai a nutsiat pen ka mohsa kei, a poimoh kasak bel mi piching khat beek kiang ah theihsak/mohpuakna piak hikha leh ka chi. Huchi bang hileh bel a lawmte kimawl zaizai lak ah a omlouh phet a koi ah bangchi a de aw chia ana patau thei maithei chihna ah. Bangteng gen le a tungsa I khek thei kei. Maban ah pilvan na di chihman hi. Kuamah I mohsa kei. A thuak bangbang uh leng I thuakpih a, poi I sakpih a, naupang tung a huham tak leh thanghuai tak a gamta pen mat hileh chih leng I deih petmah hi.
Pa khat in a tate 2 that hilhel. A thu om vengvung. Amah zo a lungsim lam venglou phutphut thei chih khong gen a om nual. Huai dan ahih leh a veng a pam in le thei di. Huai toh kisai I worker tuam tuam te khotang/sahkhua in iva houpih ngei hiam? Huchi hilou a khosak hatsak ziak a hih tak leh le kithei mahmah sam di a haksat dan uh. Panpihna I chih van banghiam va piak chauh hilou ahi. Moral support chih bangle mihing hinkhua a poimoh mahmah ahi. Eilak bel I hai leh le ki hai deuhdeuh di. Zawng le zawng deuhdeuh di. Hau le hau deuhdeuh di.
Mi’n mihai/a venglou I chihte nangawn piltak in a kem ua, a lunglutna a houlim pih ua, zat theihpi a suah uh. Khosak haksa te nangawn leng ava houpih ua, lam-etna a om dan, thil hong kikhek ding dan khong a houlim pih ua, lungsim nuam tak in a koih uh. Eilawi in bel, mi haisim chia I theih te bang hai bawl deuhdeuh in haisak taktak. Khosak niam deuhte lah simmoh suk pah in, kingai se sak ngingei te ihi zel thethup uh hi. Zawnna I chih khong khovel omlai teng a bei di a hikei a, kuamah leng I mohsa mawk thei kei. Kuamah deihtel a zawng om kei. Kikhou khiatna chihte khong leng a om di mah ahi. I pom maimah uh ngai. Ut in ut keile om ahih maimah chia.
Ngaihtuahna a lian mahmah bel “As a Christian, is it that ‘we’ fail in our responsibility towards the poor and needy? Christian hihna failure ka chi kei a, Christian ihihna a en I mohpuak uh zoulou a lohsam(fail) ihi uh hiam? Ka chi. Ki et thak ding om ding hi. Saptuam makai te’n I saptuam mite I thei chiang zou hiam? Kuate khosak haksa a moral support poimoh? Kua lungsim buai a khamuanna poimoh chihte I thei hiam? Huai dan a poimoh om I sakte I vehpeih hiam? Ahihka leh Thohlawm tam thoh zouzou te kia pakta a, a inn ua vapawt leng singpi khong hon awm zou dite kia veh ut makai ihi hiam chihte ngaihtuah huaipi suak hi. A ziakbel hiai dan te khong mah a saptuam in a role a play keileh I biak khop khopte bang phatuam ding hiam chihna om mawk hi. Biakna mun chauh a munkhat a om, a polam a mahni a di a hingchiat chih I Christian hindan ding ana hi hetlou ding dan ahi. Khotang pawlte leng a kuamah peuh Christian I hihna ah a tuam a a role di uh khensak lou mai ihi.
No comments:
Post a Comment