NA OMPIHNA KEI TOH TON HEN

2018 kipat dek in Marah apan Elim ah, Tui khatna apan tui khumna a lut kum hihen chi in ka blog ah kana gelh a http://lamhanghal.blogspot.com/2017/12/marah-apan-elim-ah-lehkhabukhat-apan.html, Toupa pina makaihna ngen in, a vangkim in hiai kumthak kipat dek a Toupa’n ka lungsim a hon piak thugelh kava sim zel a, thathak la zel in, Toupa pina makaihna toh 2018 dam leh kipaktak in a vualzawlna lam tuamtuam ah simsenglouh mu in Toupa’n hon zang zousak a, Amah kiang kia ah kipahthu gen in, Thupina, Pahtawinate Amah kia ka pia hi.

December kha lailak vel Exodus lehkhabu ka simlai in zingkar khat Exodus 33:15 ka simkhak in ka lungsim ah a tham den a, Mosi in Pathian kiang a a gen, “Na ompihna kei toh a tonkei ding leh, hiai apan hon pitou ken,” chih in hon khoihdan om mahmah in, ka simlai apan in Toupa’n 2019 maituah dia kisak lai a hon houpihna Bible tang eive hiai chih theihna mahmah khat ka nei hi.

Kum 2019 i lut toh kiton in Pathian kiang a i kikepsakna, i kilatna thumna i Bible tangtel Exodus 33:15 hi leh ka chi mahmah hi. Toupa, Na ompihna toh tonlou ding ka hih leh kumthak hon pikai ken chih hi, khauh mahmah a bang a, chih ngam huai lou dek phial ding, den chia mukei tatak le chia mihing lam i et leh thumna hangsan lua, thum ngam huailou ding a bang phial hi.

Himahleh, Pathian in lauken na kiang ah ka om chih bible ah 365vei kigen ahi chih thugen khenkhat leh laigelh khenkhat in a gelh uh ka simkha zel a, en i nget ma, ngetna chang le i theihlouh lai a leng Hon taisan lou, en i phawk louh lai a leng Honna phawk a, A ompihna hon chiam a, laulou dia hon hilh Pathian nei ihih chang a, thum ngam huailua, kipumpiak ngam huai lo mahmah ahi chi’n ka lungsim ah hong lang nawn hi.

Huai ziak in i zat touh ding kum 2019 ah, Toupa Na ompihna kei toh a tonkei ding leh, hiai apan hon pitou ken, chi in Ama ompihna mahmah lunggulh in kikemsak thakthak ni hang.

Kumthak chibai!!

ZANKHUA THUMNA HUNSEH KIHEL KHAK MASAKNA

I saptuam, EBCC Delhi in saptuam pumpi huap a thumna hunseh September 20 & 21 zan kawmtuah a nei ding chih biakinn a a puan lai ua pan hiai hunseh tel ding eive chihna khat kana nei pah hi. Huchi in nitak innkuan kikhopna ah dam a hiai hun i muh leh va tel utna ka nei a, thumna in hon phawkpih un chi in thumna in ka laan uh hi.

Zaankhua a thum ka utna ziak ahihleh khatna ah, mobile  game kimawl lunglut mahmah khat ka hi. Game houlua, naupan huailua chih omlou, khat peuh kimawl a zanhak thei zelzel khat ka na hi a, etsakna din, Playstore ah fruit cutting kichi game khat om hiven, huai download in, mobile screen ah theigah tuamtuam hong kivawktou a kiaknawn ma a tem a ana at phel ziahziah, sapthei khong bang i atphel kha bang chu, i screen dim a a tang khong kitheh zuah mai, a naklim mah di chia chilphul zen a ngaihtuah kawm a kimawl a zanhak mawkmawk sek ka hi a. Candy crush haichilh taktak lai bang a zan 2/3 a kizom a le zanhak zen a kimawl kha zel. Hiai bang a hamphatpih ding om hihet lou a le zankhua a hakzou, ka mit Pathian hon bawlsak it hetlou a zang ngam hing a, Pathian min sapna thumna, i saptuam leh kei mimal mahmah hinkhua adia Pathian sam a khatvei le zankhua a hun zangkha nailou chih ngaihtuahna in hon chou mahmah a, huai ka utna ziak khat ahi.

Nihna ah, mi kamtam, thil ka muh toh kituak a mi’ muhdan ding khong ngaihtuah man sese lou a kei muhdan, kei pomdan a hoih, hoihlou kasak genkha pahpah mi khat ka hihna ah, innkuan leh lawm leh vual te mahmah bang le tamveipi ka lungkimsak louh hun om a, hun dang ah a hihleh hiai ten hon sukha ngei khol kei a, tunai zek apan, banghiam kei lampang diklou mahmah om hi ding ahi, hiai toh kisai Pathian ka buan ngai ahi chihna ka lungsim ah hong lian mahmah a, saptuam in program bawl a, hiai hun ah hiai lamdeuh thum ding chih geel mahleh, a kal a kei mimal adi le thum man mahmah na ding ka hi chih utna leh tupna in hon zou nawn hi.

Himahleh a hun a naih deuhdeuh leh tawpkik mai utna ka lungsim ah a lian deuhdeuh a, genkhe hetlou a kuanlouh mai ding a diam aw chi in ka lungsim ah kei leh kei ka kisel sel hi. September 19 nitak kikhawm dek ka tanu Naomi kiang ah, “Nao, bang la i sa d’ua?” ka chih leh, “It le hang a mel a hoih”, chi in hon dawng hi. La tam thei nailou ahihna ah, ama theih teng khek kualkual chu ka himai ua, hiai la mah le tamveitak a tel tak, a tel teng a telsak ka hih chiang a ka sakpih zel uh ahi a, huai nitak a ala tel kasak lai un, a tang tawpna a vual nih,

            “Pasian na sep ding chiang in, kei teekta ing na chi a;

            Aituam na sep ding chiang in kuamah kihta keng na chi”, chih teng in hon buaisak nawn mahmah a, zankhua a thumna a tel dia ka sawm simsa, tua tawpkik ding kana guk sawm toh ka dinmun hong genkha sim, leh kei utna mobile game kimawl a zanhak poisa lou ing a, zankhat thumna hun zat ding chih in bangziak a hichituk a hon kingaihtuah sak ahia chih lungsim ah lian mahmah kawm in, a huntak a la tungtawn a Ama’ aw zakna hi ding eive chi in vatel ding in ka pomkip ta hi.

A ni leh hun in kava tel thei ngei a, Toupa’ ompihna toh nuam kasa mahmah. A mun ka va tun leh i saptuam makaite, taksa bang a le i pa te sang a upa zaw ding ngen tu dipdep bang ka muh in thupi sakluat in ompah a, huai lel in le hon thathou sak mahmah pah hi. Thumna hun kia hilou, a kal ah thu leh la tampi kigen a, kisa khia ahihna ah, ka gal ngaihtuah sang in a nuam kasa a, hiai dan hunseh khatvei telna ahih toh, thupi kasa.

Inn om chiang a nitak manbaih leh ihmu baih, man baih taktak ni ngial a chu lawm te khenkhat office kai inn a tun ma ua ei lum khin man khop a ihmut hai khat ka hihna ah, ka lungsim a patauhna penpen chu, haksuak zoulou in, zumhuai sim khat in kava om kha ding chih ahi a, himah leh tua bang ihmut suahna te kei apan hon lak khiaksak a, Amah toh kipawlna dia hunlem leh hatna hon pia Pathian min ka phat ahi. Amah a din a haksa omlou e chia laphuaktu in a gente khong a dikna muhna ahi a, manpha ka sa. Zanhak a thumzou chih lel leng lohching lua kisakna mimal tak in ka nei a, a ziak ahihleh Toupa ompihna tanglou hileng hakzou mahmah lou ding ka hihdan ka chiang mahmah ziak in. Huai lou kei mimal struggle Pathian ma a ka nget te leng, Amah adia a haksa omlou hiven, ka lohching ngei ding chi in lungnuamtak in ka om thei ta, Toupa min phat in om hen!

THILHOIH

Ei ut thu a kihoihsak theih mai, ei ut mawng a hoih a se thei mai, mihinpihte leh ta leh nau, nu leh pa, tanau-laina itna khong ahi ding him in i na koih a, itna khong mihing a piang tapeuh a di’n a hi ding sa, neih ding sa in i koih a, ana hi hetlou hiveh aw maw. Niteng thukizakna/tanchinbu khong i sim chiang a, pa in a tate that, sual, nu in a tate that, ta in a nu leh pa that chih te niteng a muh ding om thei mawk hi. Huai ziak a, hoihna, thilhoih i chihte Pathian a pan ahi chih kumpi David in ana mu chiang mahmah ahi dia, “Nang loungal thil hoih himhim ka neikei,” Sam 16:2(b) ah ana chi hi.

Ei thu a hoih bang i na sawm a, ei thu a siangthou hinkhua zat bang i na sawm a, ei thu a diktat hinkhua zat bang i na sawm a, bangtan hiam zo hithei mah ei, hithei lou bikbek kei. Himahleh Pathian tel lou a hoihna, siangthouna, diktat hinkhua zat sawmna bel, koi ah kua hiam a dia mitsiip huai pi le ana hithei, ei chauh dik kisakna, ei chauh siangthou kisakna, ei chauh hoih kisakna toh kizui ahihnak ziak in. Sam 51:5 ah, “Ngai in, thulimlouhna a suktuah in ka om a; ka nun khelhna in honpai hi,” ana chi nawn hi.

Thulimlouhna a suktuah a om, khelhna a pai a om, ei thu a hoih, siang leh dik tang thei ihihlouh lai a, a itna toh hong zongkhia a, Krist hoihna, A sianthouna, A diktatna chihte koppih thei dia hamphatna hon pia Toupa hoih hina lawmlawm e! Amah lou thilhoih dang himhim ana omlou nak hihna mai e, kalkhat suan a pukthei gige ihihlai a, A hoihna a hon tuam a, Ama vang a thilhoih tampi hon musak Pathian thupi hina e! Aw itna, itna lamdang ana hi na mahmah e, kei mikhial siam hon tangsak!

Tuni’n bang hoih i sa a? Bang in hon kipaksak a? Bang in hon lungkim sak a? Sam gelhtu mah in A kipahna uh TOUPA Dan ahi zaw a, a chih bang in, i kipahna Ama’ dan ahikha hiam? Ama’ thu i lungngai zel hiam? Amah hoih i sa pen hiam? Nang loungal thil hoih himhim ka nei kei i chi thei sam hiam?

Barabba

Barabba - na vangphat maizen toh, tanchin dang neilou na hi hiam chih Rev. Khaizakham in a gelh ka sim kha a, lungsim hon khoihkha  mahmah hi. Barabba, suamhat leh migilou, Rome kumpi in a sih ding thutanna a bawlsa, si dia thutanni tun ding ngak a om lai, zing khuavak leh a sih ni hita ding chia lungkham mangbang a om, ngaihdih, zankim lai in a suahtakna ding thu gen in a om maimah! Nak hamphat na tel e maw! Bangchi dan a si ding kimlai suakta, kua ziak? Ka tang a si pa’n bang hih, bang sem, a nungzui hiam atanchin theite ka zongkhe ding chi het lou, a tanchin kigen nawn lou, aw Barabba, tanchin dang neilou tel na hiam na vangphat maizen toh maw….

Ei te le Barabba dandan ngen ihi. Pathian in Eden huan ah Adam leh Evi a hamsiat apan Amah toh i kizopna bei, khelhna a pai a, khelhna toh piangkhia, ei hoihna, ei dikna ziak a Pathian toh kituak thei ngei nawnlou dingte Barabba bangbang a Toupa Jesu Krist ei adia a sih ziak in van khua leh tui hihtheihna hamphatna i nei hi. I khelhna te ziak a si a, tangtawn gimthuakna thuak ding kimlai, itna ziak in A tapa in a hon zongkhia a, hampha hina tel hang e! Tuni in tuabang itna a zonkhiak a om a, hunhoih, hehpihna hun bawlsak a i omlai in, tanchin dang i nei hiam? I tanchin bang ahia? Nidang in tanchin kipah huailou pipi, genkhiak ding a zumhuai sim pipi nei kha ihi maithei, tua bang i hihkhak leh leng Toupa’n i tanchin khekna ding hunlem hon bawlsak lai, hampha hina hang e! Ki en thak ni, tanchin hoih, tanchin lamdang i Toupa ziak a nei thei chiat di’n pan lathak ni maw.  

Sam 91: 1 - 16

Ka tanu Naomi Hoihsang Hanghal kum 4 a chinna hun a simkhiak dia Toupa' hon piak Ama' thu:

Sam 91: 1 - 16
Tungnungpen bukna mun a om mi Bangkim hihthei lim ah a om ding hi.

TOUPA tungthu ah, Amah ka kihumbitna leh ka kulhpi; ka Pathian, ka muan ahi, ka chi ding.

Aman thangkammi thang leh Hi hoihlou lak ah nang a hon hondam ding hi.

A kha in a honkhuh ding a, A kha nuai ah na muang ding hi; A thutak pho neu leh pho lian ahi.

Zan a thil mulkimhuai na lau kei ding a, Sun a thal leng zong na lau kei ding hi:

Mialnuai a hi leng na lau kei ding a, Sun a thil hihsia siatna na lau kei ding hi.

Na sik ah sang a puk ding ua, na taklam ah sing a puk ding uh; himahleh nang hon naih kei ding hi.

Na mit in na en ding a, migilou saloute siatna a muh in na mu lel ding hi.

TOUPA aw, nang ka kihumbitna na hi a! Tungnungpen na omna ahi;

Thil hoihlou in a hon tuak kei ding a, hi himhim in leng na puan in a honnaih sam kei ding hi.

Na lampi teng a hon humbit ding in, na tungthu ah zaw a angelte thu pe ding ahi ngal a.

A khut un hondom ding ua, huchilou in zaw na khe in suang na sui khakha ding hi.

Humpinelkai leh gul gial na sikden ding a; Humpinelkai hatlai leh dragon na sikden ding hi.

Ka tung a a itna a ngak ziak in amah ka humbit ding a: ka min a theih ziak in mun sang ah ka khatou ding hi.

Aman honsam ding a, ka dawng ding hi; mangbai lai in a kiang ah ka om ding hi: amah ka humbit in ka pahtawi ding hi.

Damsawtna in ka lungkim sak ding a, ka hotdamna leng ka musak ding hi.

No’n Hih Halh Nawn Kei Dia Hia?

I gam keu, a mite mahmah leng keu. Kichiziatna, kinamziatna te lian deuhdeuh, kikhekna i lunggulh a, a khovel kikhek dungzui a i kituahlouhna te, i keuna te le hong dik mai ding sa in ina en zel a, himah leh ana huchi tuankei. I khovel khangtou zel ah, van zat thak tuamtuam omte mah tua bang kituahlouhna ana omsa te a dia kituahlouhsemna tuntu vanzat manpha suak zel. I khalam bahna, keu kisakna te bang le tua bang khantouhna leh vanzatte mah in keu behlapsak, i theih ngeilouh thute, i muhngeilouh thilte i khutpi mong ah thai zazat a muhtheih, et theih leh ngaih theih in om ta.

I civil society tuamtuam te a pan khong kikhekna ina lamen kha zel a, bangtan hiam kikhekna, hoih deihna zaw om mah e. Himahleh a tawpna bel mihing kimakaih ihihna ua’h kua hiam mimal khat deihna ah kia hisim teitei mai, ahi di mah le hi. Halhthakna, kipahna thak, kipumkhekna chia i lunggulh pen zaw, leitung khantouhna te leh kua mimal hiam, pawl hiam apan hilou a, Toupa apan a halhthakna, i kipah nawn vek theihna ding halhthakna ahi. 

(Toupa aw) Nangmah a na mite a kipah theihna ding un no’n hih halh nawn kei dia hia? Sam 85;6

I PATHIAN I LAU UH HIAM?

Huchilou in zaw na nek ua, na tai ua, in hoih taktak  na lam ua, na luah chiang un; na ganhon uh, na belamhon uh a hongtam a, na dangka uh, na dangkaeng uh a hongtam hun chiang in na lungtang uh a kisathei kha dia, Aigupta gam a saltanna inn apan nou hon pikhepa TOUPA na Pathian uh na mangngilh mai kha ding uhi. Diuteronomi 8: 12-14

“Hiai I sum leh paite eimah hatna leh I khut hatna in a sepkhiak ahi” na lungtang un na chi kha ding uh, pilvang un. Tua na kip bang ua na pi leh pute uh kiang a kichiam a thu a khun a hih kipna di’n TOUPA na Pathian uh theigige un, sum leh pai muhkhiak theihna hon pepa lah amah ahingal a. Hichi ahi dia, TOUPA na Pathian uh na mangngilh ua, pathian dangte na zuih ua, a na uh nasep ua, na biak uleh, na mangthang ngeingei ding uh, chih tuni in k’on theisak ahi. Diuteronomi 8: 17-19

Hiai a tung a thu te Mosi in Isreal mipi te gamchiam gam a lut chiang ua, bawngnawi leh khuaizu luanna gam ah, a neih a lam te uh Toupa’n a vualzawl a, a pung a, nuamsa tak a  a om chiang un Pathian a mangngilh kha ding uh chih a vauhilhna ahi.

Rev. B Chinkhengoupau in BCD Cultural Day ni a EBCC Delhi a a thugen, Ei nam pilna neilou, siamna neilou, tawndan neilou, sahkhua neilou te ihi. I sahkhua khong va sui tatak ding chi le hang sumtawng khong be te ihi chi’n ana gen a. Tua bang a sing leh suang bia a, singnuai gammual ah sa leh gal a kinei a, sa-aih-gaal-aih a hun i zat uh sawt lotel lawmlawm lou ding hi. Niik leh puan silh dan ten dan i theihna uh sawt lotel lou kha ding hi.

Himahleh Pathian itna Tanchinhoih a zonkhiak in i om ua, nidang a sing leh suang bia a, sa leh gaal a kibawl a, kiman a kithat a, gaal-ai a hinkhua ana zangte tuni in dopsang in i om a, khopi tuamtuam ah sep leh bawl tuamtuam nei in, mi lak a theihphak a hon bawl tua Tanchinhoih ahi. Halleluiah!

Tua bang a Pathian’ itna tanchinhoih ziak a dopsang a i omlai in, sum leh pai ah kuamah eng ke’ng chithei ding khop a neih leh lam ah a vualzawlna tang khenkhat i om lai in, inn leh lou hoihtak tak i bawl a, i lam a, huai te a i ten lai in, i pi leh pute theih phaklouh khopi te ah vualzawlna ziak a khosa a i omlai in, i Pathian i thei gige na hiam? I Pathian thupiakte i zui gige na hiam? A lampi zuih ding a chih i zui gige na hiam?  

Theihphaklouhte i hihlai a theihphak a hon bawl lai in, pathian dangte ana neihsan kha ihi ta mai uh hiam? Tuni’n Ama’ thupiak leh lampi te iki theihmoh bawl a i pialsan leh zaw, “Hichi ahi dia, TOUPA na Pathian uh na mangngilh ua, pathian dangte na zuih ua, a na uh nasep ua, na biak uleh, na mangthang ngeingei ding uh, chih tuni in k’on theisak ahi”.