Biakbuk Hihsiatna

 Tunai a thiltung i theihchiat ahi a, tamtakte thei mai hilou a khitui luang a i khasiat mahmahna, khitui luang chetloute le koilak hiam hon sunkha thiltung a om hi. Huai tuh Tribal Colony a Khristiante biakinn hihsiatna ahi. Aneu zaw in gensuk lai le EBCC Tribal Colony Biakinn hihsiatna in ei paite kampau lak nakpi in hon nawk kha a, huai biakinn a khanglian a, Pathian toh kimatna huai mun tungtawn a neite a ding diak in khasiat huai in, thangpaih huai mahmah a, khitui-naptui toh omtheihna mah ahi. Huchihlai in, huai biakinn a khanglian leh kisaikhakna nei hicetlou te a ding in leng Khristian khat hihna ah, i biakinn zankhat thu a vaivut suakmai, phelsiat a om mai hi a puaknat huai a, a vuallelh huai lua le abang a, anuam kei.

Biakinn mun leh mual neitu saptuam ana hilou, huchi hi a, khachi hi a chihlamte gen sawm ka hi kei a, huai lam zaw, a sai leh mohpua om chiat a solkal lam hi in saptuam lam hileh, amau sep ding chiat a sep nung ua tua dinmun a om ihi a, va gen gen a phatuam ding omlou hi in ka thei. Himahleh hiai biakbuk hihsiat a hihna apan lungsim a thamden thute genkhe ut ka hi zaw hi.

Mihing in tha leh zung leh sum leh pai kaikhawm a, Pathian biakna dia inn khat i bawl, huai building kihihsia na isa mahmah a, i pona a, a khenbang i ngui zou hial a, puaknat huai, ikibawl dan na deuh mah, kisimmoh huailua mah leng ahi. A bik in biakinn kemtu leh saptuam kemtu te bang, zankim-zankhang a ihmu lai phawng a om ua, a tenna inn uh leh a vanzat teng uh hihsiat sak a om mai hi, mangbat huailua mah ahi. Khut a lam inn hihsiat in a om ta, Pathian gingta anungzuite kimuhkhawmna inn, biakinn ahih ziak in ana diak, huchih ahihlai in, i taksa pumpi Khasiangthou tenna temple ahi a, solkal vaihawmtu kuahiam in ei utlouh a hon hihsiat sak hilou in, ei mahmah deihtel in Khasiangthou tenna dia kilawmloupi in bangzah vei ihih sia a, bangzah vei i taksa Khasiangthou ten theihlouhna din i bawlta? Noute man a leisa na hita uh chi a, a hinna eite tang a hon pe Pa’ adi’n a lungsim, a lungtang a na mah di mo? En i gimpih leh sepkhakpih louh bawn Khristian hihna a na i sak bat leh, ama lim leh melpu a hon bawl pan, i taksa pumpi, i lungsim luahzoulou a nawhkhiak a a om chiang in ei deihtelna ziak a, na asa sam diam? Hiai i zillai hileh i chithei diam?

I genta a, a khen adin naitak a ikisaikhakpih ahih ziak in na diak dia, a khen in bel poisa thou mahle huai mun a kikhawm a khangliante na sak bang iva thuakpih hiam theihpih ban kei a, i gal et thei mai hi. Solkal vaihawmna in khoihkhak bik a neihlai in, denchiang in mitengteng khoihkha vaihawmna maituah ding ihi chih i ngaihtuah kha ngei hia? Kei zaw telkhalou, kei pumpi in zaw huai theilou ahi chi a kigenkhiak zohlouh hun, mitengteng Pathianma a vaihawm khum a i om ding hun i maban ahi, huai din i kiman na hiam?

I Biakinn zingchiang a hihsiat a om ding ahi chih i thei a, ani ding i thei, a hun ding i theikei, huchih lai in, ivante khenkhat hem man lai mahmah na ni, zingsang chiang in mipi paikhawm in van hepna nei ding i chihlai in, zan i ihmut limlaitak in ana sia a, zing i thou a, ana ding nawn kei! Hiai hi a ni ding i theih ahi a, a hun i theikei a, i tangpang man kei. Toupa Jesu a misiangthoute khawm a hong pai nawn ding ahun, ani, adak bangmah theilou ihi a, guta bang a hong pai ding ahi chih ithei hi. Ani i theihbawn kiging manloute, a ni leh hun i theihlouh adin iki ging gige mah hia chih hiai i thiltuah ua pan zillai ila thei de aw?

Bangteng Toupa theihpihlouh a tung omlou ahihna ah, Biakinn hihsiat a om pen kap in maupih mah le hang, a phatuam om nawnlou ahihman in, hiai apan mimal in ngaihtuahna pia in, i khalam bawlhoihna in zangthei le hang, Toupa’n a itte adin bangkim a hoihna ding un asem chih atak a chiamkha te hiding hi hang.