Church Leaders' Seminar | Biblical Theology of the Temple and the Church's Mission Today

Church Leaders' Seminar | Biblical Theology of the Temple and the Church's Mission Today chih seminar November 12, 2022 a EBCC Delhi ah GFAM inntekna in om hi. Hiai seminar ding toh kisai zak tung in ut huai sakna ka neipah a, a hun hong naihsim, registration khong biakin a a kipuan chiang in Chruch Leaders hong kichih leh ka tumkiik nawn vangvang a, registration leng ka bawl kei hi.

Huchi'n nitak khat saptuam makaite khat inn ah ka innkuan un kava lengla ua, hiai seminar ding toh kisai bang houlim tangpi ah genkai kha in, ut huai leh tel ngeingei kana sawm dan uh leh saptuam makai te ading hong kichihleh ka tawpkiik dante khong uh kava genkai kha ua, amah kava pawtna inntek un huai kisuanlah huai mahmah lou, hong lotel un, ken konna gensak mahmah di honna chih chiang in, ina ut sim giugiau ahih toh thumu kisa in, ka inkuan un kava tel ua, ka kisiik hetkei.

Seminar kha hun thum adia seh ahi a, thu kisinsakna dia hungeel ahihmah bang in, a kaal ah ina zuihdan tangpi, la khat leh ni a phatkhawmna chihte omse lou in, a hun a hunzang di te, thumna nei di ten amau hih ding chiat hih geihgeih in thu kisinsakna kinei a, nitum a kinei, hun 3 dia geel a om bangbang, la khat le kisa lou, thu ngen kigen chia kuamah le phunlou, la kisalou chih le kuaman kigenlou, nuam kasa. Hun seh khat i bawl chiang a formality chi le a zakdah huai a bangna a, kilimsuah zoulou, ki en liakliak a, la sathei leh theilou omlou a sak teitei khong ina sawm sekte peel uah hichia i hihsawm hih geih a le paitheihlua ana hi chih bang le theihna thakthak ahi a, chiin tuakpi le ahi mai din ka gingta.

Hiai hun a hunpi 3 a khen in kisinsakna a kinei a, thukigen khe tengteng manpha kasa a. Hunpi 3na tawp kuan a Dotna & Dawnna hun bang, thupi leh navak huai kasa petmah hi. Toupa Jesu kiang a Kaisar kiang a siah piak thu a dotna, Toupa Jesu'n a dawnna bang, ka sim chiang a le a gen ut kana matsiam ngeilouh Heutupa'n hon gen chiang a, aman a genlai in a dawn zoh a mipi te Wow! chia kikhen ave vua achi a, huai adongtu te chauh hilou in, ken leng a dawnna ka zak in wow! kana chi mai hi.

Eheih!! Kua a sinsakna pia chihle genkha lou dek zozen! Hiai hun a sinsakna petu ahihleh Rev. Dr. Kumam Suresh Singh ahi. Amah ahih leh a Laisiangthou theihdan chituam, Pathian apan thilpiak thupitak a neih, huai a hawmkhiakna a zakha a pan bang hamphatna lianpi in ka la hi. Ei tawndan hon thei chiang mahmah, Laisiangthou hun a te tawndan, huai hunlai a a thilchiin uh leh a khosakdan uh thei chiang mahmah, thu kigen te, hiai hun ahuai ziak a hiai kigen kihih chia hon genkhiak chiang in, navak huai petmah a, a thilpiak hi enhuai tuntun sak in a om hi, eng ken chih zaw ahina a.

A tung a ka ka gen zual siahpiak thu toh kisai a, Toupa Jesu'n na dangka uh khat hon ensak un chi a, hiai dangka a kua lim leh meel ahia a chihna ah a dawnna om ana hihdan hon gen chiang in, maizen aw ka chi hial hi. Dotna haksa takmai, sum toh kisai gen ngeingei leh amah heekna di leh demna di mu ngeingei dia thaangkam ahi ua, siahpiak ding chi leh Juda Kumpipa (Messiah) kichi a, Rom kumpi toh pangkhawm ichi hiam co-conspirator chi a dem a om ding, siahpiaklouh ding chi leh huailam a Romte thunuai a om ahih chiang ua, Rom vaihawmna nial chi a kilhlup ding chi a, a dawn dandan a thang a awk di ngeingei sa a dotna a frame uh ahihlai a, Toupa Jesu in, na dangka ua'h kua lim leh mel om hiam chi in a leh dot a, Kaisai a chih chiang un, Kaisar sumte amah kiang ah pia un, a lim leh mel neipa kiang ah, himahleh nou (ei mihingte) Pathian lim leh mel sun a bawlte, i lim leh mel neipa Pathian kiang ah kiik nawn ta un (ni), hong kiik nawn ta un a chih chiang in, amau gintak louhlam a dawng ahih man in, a dong tute, wow chi a kihem sauhsauh uh ana hi a, kei mahmah in leng hiai verse a thuguk kisel ka theihpatna ahi a, thupi kasa mahmah hi.

A pumpi a gen in Genesis apan Kilakna tan Pathian thiltup, a huan bawl, a temple tun dingna ahi a, ei mihingte Pathian in Eden huan apan hon kithuahpih ut, khelhna a i na puksan, thukhunlui a Mosi, Solomonte tungtawn a temple a bawl leh nasem ding siampu a seh, Toupa Jesu Amahmah leitung a hong pai apan A lalgam a tak a i lak a om ta, ei pumpi, amah gingta te mahmah pumpi pen Pathian Temple hita a, eite tua temple a nasem siampute ihi chih hon gen a, Temple na hi uh, Temple a om bang in om un, Siampu na hi uh, Siampu om in om un chihlak hon gen hoihtak ana mankha fuh te ading in, maizen, hiai kan a mihing kitunding nawnna ding om ding hiam? Ka taksa, ka pumpi, ka nek leh dawn, te a pawt khe nawn pah ding ka thuthu i chih sekte zaw, ngaihtuahna piaktuak lua ana hi mahmah e. Kei a siamsa khat leltak sung a Pathian Khasiangthou teng a, a temple ka hih maizen leh zaw, pilvanna ding tam mah lou ding maw chi in, ka chinlouhna leh hoihlouhna tampi ka kimusuah a, hia ka taksa pumpi tung a ka mohpuakna ka theih ngeilouh tampi ka thei thak a, ka telkhak louh ding kalau a, tua kawmkawm in hiai a ka theihthak te zuihzohlouh ding ka lau a, Toupa hatna muang kawm in, ka taksa tung a Siampu na kei sep ding ahihna ka thei chian semsem a, tua ding a hatna Toupa mah apan muh ding ahihna a, Toupa hatna muang in awle ka chi thei ta hi.

(Hiai ni a seminar ngai ut te adin Hiai ah Click in a link na va et leh sau tuakna lawmlawm e na chi maithei. Huai ni a hun kizang teng link khat a ki sutzop ziak ahi, a kal a breakte teng toh.)

Ka Gari uh, aw Ka Gari!

 October 28, 2022 Ziltawpni ahi a, a zingchiang naute le suty hiven chi in innkuan lawmhoihte kiang kava pha ua, kipawt zoh mengmeng hilou ahihna ah, kiphak sunsun chu aam deuh ka hi mai di uh, ka pawtna ua pan ka paikhiak un zan dak 11:30 ana himan ta hi. Huai le naupangte bang kikhawl chim nailou, pai di le ut nailou hilai, a zingchiang zing baihtak a innkuan vai om ahihna ah, chi a paikhe teitei kihi zomah.

Photo 1: Gate, kou innlam apan toulak, pawt chiang a bel i muhna lampi a pan suk lut

Huchia zansawt sim ta ahih chiang a, lampi awng mahmah, inn tungpah di chu kihi, gate ana kikalh man ta. Gate bul ah khawl in horn mekmek, minute 4 lam bang ngak ta, chih leh security lamte le ana ihmu man hi di uh, gate apan gamla suk sim a amau station om ahih chiang a. Bangtan ngak ngai di theihlouh, kei kava tawmlut dia, kava phawng mai di chi in, gari leh mitsak, gear free, handbrake kaitou in, kei le kumkhia, gate (photo 1) tung ah kal in tawmlut theuh, St. Paul's Institute kailai a Martial Arts Mastha Kampu Buansing nuai a tening kha zek ihih chiang a, zat khakna omsun le himai inteh. Tawmlut, kipei velh leh security guardpa hong pawtkhe chet mu, kei le paisuk nawn tuanlou in amah ngak a gate bul ah ana ding.

Chihleh inteknu le gate hon phet chia kitholh lut heuh di chi hi di hiven, co-driver seat a tulai driver seat ah tuphei, tuphei pan i sak leh light hon hihvak, pheks sa, gate kikalh hon phuhong suk tamai. A kalhna chabi bang lengkhe veuh zozen. Security guardpa lah heh, hong kitung tou dek mahmah a hiai gate phutsiat bang phatuam hiam chi, ei lah ama hehna sang a huai siiktumpi phutsuk chih, i gari mai et taak nawn di amo chihlam kia lungsim ah om, kidawng thei zozen lou. Innteknu lah tomkha khawl in taisuak suk hiau. Security guardpa kiang a a hihkhelh ahi di chihteng gen in kin a kin a inn manoh suk.

En ngamlou sim sasa a gari mailam va et leh chu ....... 

Photo 2: Gate phut nung 

A mailam bangmah phunna di omlou a ana om mawk, gingta ut chiah lou, kipak kawmkawm a,, huai siiktumpi phu a hichia om chihmawk, ka muhlouh banghiam om ahi di chi in, velvel, gen di muhlouh tak a chu lungkim lotel kihi mai. Gate phusuk, a gate kihong vekpahlou ahihna ah, huai amah lah khawlzok nawntalou, taisuk zom ahih chiang a, a driver lam mirror in gate nawksuk ek hi di, huai mirror ana kikhai dengdong, a bul a mankiptu pen kibal ana hi. Huai lel chu va bawlsak leh ngaipah zozen lou, bangchi chi hiam a belhthoh a kalkhat bang kitai hizel.

Photo 3: Mirror bawlsakma

Tata Tiago safety rating hoihthou ahihdan bel a thu a i theih, mi gen le zamun thou, hilele a huchi hiam chia va tuahkhak seselouh kha duhthusam hi gige. Hilele huai zan apan chu, mi gen ka simkhak zelte dikna ahi, huai gate kha siiktumpi gik mahmah phusuk a melhem lou chu, a sung a tuang zi leh tate bang bit, naupangte bang in a phut lamlam le phawklou sim chih chiang a, muanhuaina ahi chih theisiam thakthak, a gari hi in, a sung a tuangte hi in, a mailam a ana dingpen hileng kuamah kisukha omlou, chih chiang a kipah huai zaak himai hi.

Photo 4: Mirror bawlsak nung

Tata siiktum lepkhop chu ana hoihthou mah hi chih chian thakthak ing. Nidang a gari a mi puak khak chiang a kongkhak kha nakpipi a hon khaksak sek un chin, huchilou a le kipzoulua eive ka lungsim a chisek. Tuma a ka U te kiang kava zin ua kha amau gari a tuang, kongkhak awl khakha a khak zel, kipzou ngeilou, a hehsim bang a hihphak deuh ngai ana hi chih bang va musuah, huai nung a chu mi puak khak zenzen ten hon hihbuk sim ua lehle aw, amau ana khoihkhoih pen di sa uh eive chia theisiam ta.

Gari toh kisai khenkhat in dot taak honsa thou a duam, na gari bangchi nasa hon chisek uh, kana gensek chu phunna khat ka nei. Tata ahihna kha a gin a kilang, gari dangte i kiang khong ah a gin kizalou sim a kitholh hiau uh, kei a chu a ging ngaihsa ka hi ka chih sek hi a, tua tuh, a gin ngaihpen chu tai mohna hilou hiven, hichia hihkhial, tangkhial i chih second khat a thiltung hun a bit leh muanhuai mah ana hoihzaw mahmah eive chih lam ah mit vak kuau thakthak ing, teel khial lou ka hi chi a ka gari hon phatvel ka hih chu!

Disclaimer: Hiai ka gelhziak a TATA te apan bangmah muh neilou ka hi, paid review hilou ahi...hahaha

THUMANNA

 Abraham leh Isak Moriah tang a kithoih dia a kuanna uh tangthu theih a theih thoh dan khat i nei chiat a, Isak thumang ahih chih khong bel i theihdan tangpi ahi. Isak thumang ahitham a, a thuman dan kigen uang zoulou, kingaihsak zoulou ade aw ka chi simsim hi. Tuni’n thumang i chi hiam, thumanna i chih pen a thuuk zaw in ngaihtuahna pe le chi ut ka hi. Bangte thumang hi a, bang i chih chiang a thumang ki hisak a, bang i hih chiang a thumanglou kihi hiam? Thumanna i chihsek pen thumang i na hi taktak mah hiam chih veel thak le chi ut dan ka hi.

Genesis 22na Isak lan ding a Pathian in Abraham thu a piakna ahi. Huai mun i sim suk chiang in sim paisuak suk a, Abraham in a tapa neihsun Pathian adia a latngamna bang thupilua hi, huaimah kihah gen kha in, Isak role pen a chang in Abraham thupiak a om lohchinna dia poimoh mahmah ahih dan, a poimohdan kigen uang khazoulou bang sek hi. Genesis 22:6 na ah Abraham in haltum thillatna ding sing a la a, a tapa Isak a pawsak hi. Aman mei leh temta a tawi a; a nih un a paikhawmta uhi, chih i mu hi.

Hiai ah en thakthak le chi a ka deih ahih leh Abraham in haltum thillatna ding sing a tapa Isak posak chih ahi. Sing bangzah hiam poimoh hipeuhmah dia, huai singte po zou dia taksa le lianthamta chihna suak hi. Aban i etsuk leh haltum thillat omzia theisiam mahmah ta, kiim leh paam a thil omte theisiamta chih kimu thei nawn hi. Apa’ kiang ah, mei leh sing a om a, a haltum thillat ding belamnou koi ah chi in dong thei hi.

Isak tangvalnou, thahat hunkuam tak hita ding a, apa Abraham ahihleh teek ta, hatzou nawn lawmlawmlou hi ding hi. A tapa sing posak a, aman mei leh tamta tawi lel mai ta ahihna ah, ban ah Isak pian a kum 100 a upa hita, tua Isak tangvalnouta ahih leh apa kum 120 naihta ding in a gintak huai hi. I gen ut bel Isak in apa’n halmang thillat dia amah latsawm ahi chih a theih hun khat om peuhmah ding chihna ahi a, huai a theih hun in suahtak sawm hileh suakta zou mahmah ding a, gamlak ah amau pata kidelh le uh apa’n phazou nawn khol lou mai thei hi. Himahleh i Laisiangthou in Isak utlou in a kitung, apa a taisan chih gen hetlou a, thumangtak a maitaam ah thillat dia apa’n a nungleh hen lai khong a kidawh mai, huchia thumangtak a om mai hi ding hi. Abraham bel Pathian toh hun tampi ana kihou ta, tapa a neih di bang, namte pa chih a om ding bang ana kichiamta ua, hun haksa tampi a amah toh tonkhawm Pathian muan baihlam zo deuh ahikha mai ding, himahleh valnou Isak a ding in, tua a pa’ muanna mah va koppih ngam ding, apa’ ginna va koppih ding thilbaih hilou hial ding a, Apa toh Pathian kihouna zah a houpihna leh Pathian polhna tam tuak kha leh chiamkha nailou hi dia, thumanna ziak petmah a om dinden hi kha ding hi.

Si ding, haltum thillat dia dawtlup a om ding chih kitheihnung a le, thumangtak a a omna pen thupi lotel hiveh aw maw. Ei thuman dan toh et-tuah ding om zek ding in gintak huai hi. Ei te’n thumang ikisak chiang in atangpi in i utlam sem dia sawl a i om chiang bang, i utlam sem dia mohpuakna i tankhak chiang bang hiveh aw maw le. I nu leh pa’n kua te inn hiam a hoh dia hon sawl chiang bang ua, amau inn ahih leh ka ut kei, huai mun ahihleh ka ut kei chih hun bang kinei. I lawmte inn khong a banghiam hih dia sawl a om khak bel ki ut mahmah zel maw le. Khotangvai leh Biakna vai khong ah le, ei lunglut lam chiat ah fel leh thumang kihi mai a, i ut louh lamte ah bel kiphun sek. Phun kawm a i va sep khiak leh adan om hilai, phun toh mohpuakna hiam, sawl a i omna ngaihsak hetlouh chih bang le om thei zomah.

Isak thumanna bel huai bang thumanna hilou in, haltum thil lat dia amah lat a om ding ahi chih theihnung a le thumanna hi a. Huai sang a thumanna thupi zaw khat omlai tuh i Toupa Jesu, vanmi hilai leimi a hong pianna ahi. Isak bel apa toh kithoih dia kuan, hun paisa a kithoihna ana mu ngei ta, naupang/valnou kilawpna khat toh a tawp ding thei hetlou a kuan hikha dia, I Toupa Jesu ahihleh a tawpna di tan thei, enghou, bawlsiat, muhsit leh sihna tan a gawt a aom ding dan tengteng theisa a, thumang hitel a! Hiai bang zah a thumang tak a tatna nasep i ngainep kha zel uh ahi de aw? En thumang i chih chiang a ei zuih, ei standard ana niamlua in, Isak thumanna, Toupa Jesu tatna nasem dia a thumanna khong le ei standard dan a ngaikha in, huai ziak a ngainep kha zel ihi de aw? Ngaihtuahna pe thak ni.

Si ding, kou leh engbawl, simmoh leh chilphih a om a, sihna tan a gawt a om dia Pathian Tapa hilhial thumanna zaw, ngaihnep vual hilou hiveh aw maw. Tuni’n nang leh kei thumanna te toh enkak thakthak ni, thumang i kichih chiang in, Isak thumanna, Toupa Jesu thumanna toh i buuk tuah sin uh aw. Ei adia hamphatna di, ei lunglutna a hih ziak a thumanna tan lel ina hikha hiam? Pathian thumanna i chih zaw ei ut leh lunglutna ban pai ngai ana om hiveh aw. I Laisiangthou mah ah kithoihna sang in thuman a hoih zaw ana chi a. I Khristian hinkhua i zat lai in, thumanna i poimoh ngaihzou hiam? Thumanna i thei chiang taktak mah hiam? Isak thumanna, i Toupa Jesu thumanna i nei taktak uh hiam ki enchian zelzel ni.

Bah leh Nungtolh in i om Hiam? Peter Apan Zilni

 Khristian khualzinna ah lam i pai lai in, bah leh chau kisak hun, nungtolh hun chihte i nei zel uh hia? Keu kisak mahmah hun, kimuanmoh hun? A tawp ah, hiai zaw hi mahmah kei chi a, i hinkhua masa, Toupa i tuahma hinkhua khong ah i lut kha zel uh hia? Kei adi’n kiheinawnna ding lampi om kei, ka hinkhua hiai dan a zang a, ka khualzin a bei chiang a, huai mah ka tawpna dia kei adia seh ahi khong i chi kha ngei hia? Tua bang i chih khak hun om tham ding in ka gingta hi. A ziak bel Khristian khualzinna a nuam ngen hilou a, lungkiakna buannawi pal hun le tamlua hi maw le.

Sawltaklian Peter hinkhua i enkhawm zual uh aw. Saupi i gen ma in, zilna bangmah neilou ka hi chih kipuang kawm in, Peter hinkhua mawlchik a kei theihsiam dan leh laibu khenkhat leh sermon zak khenkhat apan lungsim a om dan taklang ihi a, theihkhelh om kha tham di, huai bang a om leh, ana simkha te ngaihdam kon ngen masa hi.

Peter kha ngaman/ngabeng a omlai Toua Jesu in a nungzui dia a sap ahi a, a hinkhua himhim huai apan second thought omlou bang a gamta suk mai abang hi. Ngabeng lai, hon zui in chia sampa muang, dotna om selou a zui mai. A zuihpa Jesu adia ginom petmah. A nungzui 12 lak a le gamtat a amuanna lak khia leh akam a a zuihpa puangkhe omsun le ahi mai diam ka chi hi. Toupa Jesu tuitung a khe a pai a muh lai in, nungzuite lak ah tui a pai dia kalsuan ngam om sun ahi (Matt. 14:22-36). Toupa a et lai teng a pai a, a kiim a paam a et in a tum dek chih thu ahi. I et dingpa i et nak leh zaw i kiim leh paam a thiltung te tung ah kilaam deidei a leng di ana kihi di hiveh aw chih hon musak mahmah. Huai hilou a,  i kiim leh kiang i etkhak chiang in Sam 73 na a kigen bang in i khete kisuipai dekdek, i kalsuante talkhe dekdek in ki om nak hi. 

Toupa Jesu in kei kua ka hia chih a dot lai in, niteng a anungzui, amah toh kithuah a kinaichik a khosa 12te lak ah Peter kia in Krist ahih dan a kam in puangkhe ngam hi (Matt. 16:13-20). Toupa Jesu mah in le pakta ahi dia, aban i simsuk leh vangam tahbi Peter kiang ah kon pe ding a, na hen peuhmah van ah leng hen ahi dia, nang na phel peuhmah van ah leng phel ahi ding ana chi hi.

Hun hong paizel in, nitak ankuang umna ah Toupa Jesu in a sih ding a gen chiang in, Peter mah in asihna ah amah le si sam ding, sihtan a gum ding ahihdan gen a, Jesu’n bel thumvei a kitheihmoh bawl ding genkhum zaw hi. Peter hi a thugen ah gin-om mahmah mi ahi a, Toupa Jesu mat ahih lai a, nungzui dangten a taisan lai un, a namsau man a pang ngam om sun ahi. Jesu mat a aom nung a leng Siampulian huangsung tan a va zui ngam ahi a, huai ava zuih lai in, laibu gelhpa khat in, panpihtheihna a om leh, va hutkhiak sawm a va zui hi ding ahi a chi a, ka gingta thou mai. Huai ah va zui kei leh Toupa Jesu le zuausan kha lou hial ding ahi a, himahleh a kampau, sihtan a zuidia a gen te ziak a kisuanglah deuh le ahikhamahna, va zui guigui a, A Toupa va kitheihmohbawl kha laizang hiveh aw, panpih a sawm luatna lam a. Toupa Jesu in Judate Kumpipa, Khris na hi hia chih dotna a, ‘Ka hi mah’ a chih ziak a vuak leh zep a a omlai in, Peter in ‘ka hi kei’ chi in ana kihepkhiak san hi.

Amuan leh azuih, Khris Toupa na hi chia a puankhiak pen in Khros a sihna a tuah mai chiang in, nungzuite le ahivek thou di ua, Peter lungtang kha van a khai bang mai khop a na hi ding dan ahi a, a lam-etna pen si mai chu, ana kingaisia leh ana bah gawp hi ding dan ahi. Toupa Jesu thounawn chih numei hanhoh ten a gen lai un, Johan toh han delh a atailai ua, Johan in Peter makhelh kichi hiven, Shane Stanford in a laibu When God Disappears chih a gelhna ah, a lungsim ah banghiam khat om lou hileh Johan in Peter makhelh zoulou hial dinga ahi chi hi. Aman a genna ah, Peter lungsim ah patauhna leh kimohsakna lutkhawm in, huai in kingaihtuahsak, huai ziak a Johan in makhelh kha ahi. Peter in a ngaihtuah chu, Toupa ana thounawn in ana om hita leh, a sihna a sisam dia kichiampa hing a, chia kisuanglah, A damlai a agen bang a thounawn ana hihleh a kipah kawmkawm a kituah nawn ding huphurh mahmah hi ding ahi chi hi. Ka lawm leh ka Toupa’n hon ngaidam zou lai mah de aw chih dotna liantak gik mahmah pua hi ding ahi.

Toupa Jesu han ah ana om nawn kei ngut a, ana thounawn taktak a, A nungzuite kiang ngei ah leng va kilak a, himahleh Peter dotna pen dawn khak a om nailou ahi dia, Toupa Jesu sihna apan thou nawn ahi chih a theih nung in leng, ana lungkia leh ana nungtolh lai a, maban kalsuan dingdan theilou ahimai dia, a theihpen, huai tuh, ngaman din ana kuan nawn a, amah kia hilou, nungzui bangzah hiam toh (Johan 21:1-19). Zankhua a ngabeng a a omlai un, bangmah a man kei ua, zing a honghih in Jesu a kiang uah ava ding a, a len sehna di mun uh ahilh a, huchi’n Toupa ahihlam a thei uhi. Huai a akilakna a thohnawn nung a nungzuite kiang a a kilak thumveina ahi ta hi.

Jesu’n Peter a sap masakna luipiau a ngaman lai a sap ahi a, tun dingnawnna nasep leh a scene kibang mah ahih chiatchiat khong, va suisiam le gen tampi nei din a gintak huai hi. Thugentu khat in Peter in a zuausan lai a mei-awi (huai le meihol zang a kichih mei) ahi a, Toupa Jesu’n a tun ding nawn dek a nga emna dia mei kichih mah le meihol a kichih mah ahi a, Toupa a pau ma in Peter lungtang ah thu tampi lut khin ding ahi chi hi. A ziak bel, a kituahmasakna mun uh mah uh toh setting kibang, a zuausan lai a a mei-awi mah awi a nek di nga em ahihman un, kisungsiatna lianpi Peter lungtang ah om ding ahi chi hi.

Lungsim tawl leh ngaihtuahna tampi toh ann a nek zoh un, Peter tunding nawnna nasep kipan pan a, a ngaklah leh a lit mahmah Toupa’n mimal tak in houpih a, dotna kibang thumvei mahmah dong hi. A dotna bel Peter, hiaite sang in non it zaw hia? chih ahi. Thumvei a dong a, Peter in kon it chihna thei chi in dawng a, thumvei a dot chiang in amah mah le lungkham hial chi hi. Hiai ah Toupa’n a gen ut hi dia gintak huai bel, hiai ngaman hinkhua na kiik nawnna te ka theisiam a, lunglel leh lungkia leng na hi ding, na hon kitheihmoh bawl a, huai te tengteng ken ka theisiam. Hiai te tengteng tung kei non it lai hia chi hi din ka gingta a, Peter in kon it a chi a, huai apan Peter hinkhua tun ding in a om a, Siampulian huangsung a nasemte mai a Toupa gum ngamloupa tuh Jerusalem ah Pentecost zoh in Siampuliante leh sahkhua makaite mai ah Jesu min a thuhilh lou dia vau leh soisak a aomlai un, “Kouten thil ka muh ua ka zakte uh genlou thei ka hi kei uh”, chi in dawng ziah ngamta hi (Nasepte 4:13-22). Peter a sih in Toupa Jesu bang a Khros a kilhbelh dia thutankhum ahi a, himahleh aman a Khros bungbutun din a ngen a Toupa Jesu sihdan a Khros kitun dan kibang a si dia taak kisalou ahi chi in gen uhi. A sihtanpha in huai tun ding nawnna zuausan nawnlou hial hi.

Peter bang in ei leng khatvei vei i thumna te dawn a omlou, i buaina ten hon paisan lou, i thilchin zongsat sa ten hon luh mahmah, huaite apan hotkhiakna omlou chi in ina tawmlut nawn kha zel hiam? I hinkhua masa i paisan sa ah i kiik nawn khak zel hiam? Ei adia i khualzinna haksa i sak hun ah i thumna in bangpua kanlou i sak hun a om hiam? Lungkia in bah in i tawl gawp in, i zuihpa ina tawpsan kha hia? Toupa’n tuni Peter a dotna mah hon dong lai a, hiaite sang in non it zaw hia? hon chi lai hiveh aw maw. I it a, i lungsim tengteng a i it nak leh zaw i buaina te hong veng ngei ding, a ziak bel Toupa’n na zohlouh di uh khemna na thuak kei ding uh chi ahiman in, Toupa i it thak uh aw, ikituah masak lai a i itna masa pia in, tua hotdamna kipahna ah i kiknawn uh aw, i buai i haksakna te hon puakpih dia, tua a i pan ngamlouhna te ah panzohna hon pe ding ahi. Toupa’n a thei! 

Hon Awlmoh Hiam - Biakna Late-235

Lungkham mangbanga ka om laiin,
Jesu’n kei hon awlmawh hiam?
Puakgik-a ka lung a jin laitakin,
Ka lampi sau a tawlhuaiin?

Sakkik
Hon awlmawh, honkhawtuah ka thei,
Ka dahna honthuakpih hi;
Jan khawmial leh lam haksa ah,
Ka Hondampa’n kei honkhawtuah hi.

Ka lampi mial a ka lau laiin,
Jesu’n kei hon awlmawh hiam?
Sun khawvak bei a jan mial hongtunin,
Ka kiang nai di’n honngaihsak hiam?

Khemna ka dou a ka zawh louhin,
Jesu’n kei hon awlmawh hiam?
Ka daha jankhua a ka kah laiin,
Ka lungkham a bei theihlouh in?

Lei a itpente ka khen laiin,
Jesu’n kei hon awlmawh hiam?
Ka dahna, lungkhamna a nat luat in,
Honmu in khawk honsakpih diam?

Hon Awlmoh Hiam Video

Toupa’ Ompihna Khut

Nikhat zizi ofis kai hong tun in tuni uSian (ka U’ zi) toh ka kihou ua, Goa lam zin dia hon zawn eive, kum 3 bang om di uh hita, paikhe thei gige hita un chin, phak hun laitak hikha diing ahi chih hon gen a. Kare! Hiipi ziak a zin leh vak theilou a i om sung a amau bang kum 3 dek phial ana omta ahi uh mo, i thum uh aw le Toupa’n lem hon sakpih hiam ah ka kichi ua.

Huchi’n Pathian kiang ah zin ding bang dong kawm zel, thum kawm zel in ka om ua, Toupa’n pha hon sakpih ahi dia, ticket man di khong a hunhun a hong om in, sum-le-pai haksat toh Train a khualzin naupangte theihsakna le hi di’n train ticket kuan leh pai la ni kichi in train ticket chu ka la mai uh hi. Dakkal 25 kiimlak train a tuan ding ahihman in ticket lak apan lungsim khat chu patau simpah, naute train ah ning kitel mawk le uh, milak ah kibawl kha le uh chih khong in lungsim luahpan nawn pah zel.

Zin dia ticket ka lak dek un ka U ka houpih a va zin sawm ka hihdan uh ka gen a, kou va zin theih hun ding June 2nd Week lak khohun di khong ka dong a, aman kumdang a bat leh June a chu vuahzuk kipan ta di, Goa adia off season hi ding ahih dan, vuah a zuk chiang a zu petmah, hohna neih khong lemlou thei ahih dan leh naupangte lunggulh water park i chihte bang le a khak hun uh ahih dan khong hon gen a, huaite genkhawm kawm in, bangmah dang hih theih kei lehle kivehtuah, naute mahmah leh kimu mun hetlou ahihna uah amau adia kingaihnatna chituhna hi di’n manpha in chia, kong kisa ding uh ka chi hi.

Huai apan nitak innkuan kikhop chiang a ka thumna point ua ka gen mun pen uh chu Goa ni 10 khong va om ding, huai hun sung Toupa’n khohun nuam, khopha hon piak na ding leh train tung ah naupangte gen hak a a omlouhna di uh chihte ahi pah a, thum kawm zel in a vangkim in ka nau neupen uh kiang ah train ah sun leh zan a tuang di hih dan, nitak le ihmut ngai di, pai ut ta chihte genlouh di chihte a tamlua omlou in ka gengen mai uhi.

Ani ding hong tung petmah ta a, June 4, 2022 zing dak 6:10 a Nizamuddin station apan kipankhe ding chih ahih man in ahun tak a tung in, bangtan hiam ka tawldam nung un ka train di uh hong kidoh a, lut nainai in train tuang chu ka hi peuhmah ta uhi. Naute le thumna te Pathian in hon dawng a feltak in om thei uh a, a unau un a et ut uh bang a tam a, a khodak chim chiang un laigelhna di khong ka puak uh hiven, huaite lakhia in milem gelh chih khong in amau unau a kilim suah mahmah uhi. Ahi a, nitaklam bang hong hih chiang in muh ngeiteng mu, a didang omlou ahih mawk chiang a, a neupen ning kitel sim ta, kei nitak train ah ihmu lou di khong chi mawkmawk ta, lungsim khat chu bang a kichi de aw chih a om sim pah. Ahi a, nitak khua hong mial, Goa i tungta uh hia chih dotna tamvei dawn a ngai mahmah sim ta a, huchia awl a anu toh hong kizol ua leh lum di ut vanglak, kuamah buaisak louh di chi in amau nuta a tung ah kaltou in va lum ua, hoihtak in ihmu vangvang pah thei vanglak uhi. Bangtan hiam ka hungaih a, ihmu hoihna uh ahi chih ka theih in kei leng ka ihmu a, zingkhua vak toh kiton in Goa lut ka hi mai ua, innkuante phawng in, ka van khong uh lem fel in, kum din mansa in ka om diam uhi. 

Ka U te innkuan in hon na dawn ua, khut kilen in a inn uh ka manoh ua, Goa tung chu ka himai uhi. Amau hon gintak dan a gim sim di, naupang khong toh khualzin a kihih zawkmah toh honna chisim uh ahi dia, hilele kei chihlouh ka innkuante ka tun nung uh a lum a ihmu le omlou adua aw ka chi a, ka thoh in beach hoh di ana gen sauhsauh ua, huchi in kisa in Goa hoh i hih ngal leh hohna di masa mah eive chi in Beach hoh din ka kizuikhe pah nainai ua, ka U te innkuan amau nupa toh nau 3 mi 5 ahi ua, kou innkuan kou nupa toh naute nih mi 4, ka vek ua gawm 9 khong a gari ua kihen ta mai dan ka hi uh. Nuam mahmah zaizai!

Toupa’n thumna hon nak dawn dan Goa ni 10 ka om sung un chiang mahmah in muh theih in om mawk hi. Ka tung ua pan niteng a pawt khia, lunch zoh chiang a pawt, inn tung nawn chiang a google khong ah a zingchia hohna di zong sauhsauh, lunglutna kikum, huchia pawt zel. ni 3 khong a kizom a pawt chiang a naupangte le tawl ta, tuni inn ah i tawldam di uh ka chih ni chiang ua vuah zu geihgeih mawk dan ahi. Zinglam a vuahzu ngelhngelh, nitaklam lunch zoh in hiai lak iva pha uh aw ka kichih ni chiang ka chih hun uh tunma a khua pha, huchia pawt thei zel a ki om. Isreal te gamdai a khualzin lai ua, sun a meipi, zan a meikuang chih bang lungsim ah a lang mahmah a, Kumpi David in Toupa kei kua ka hi hia, ka innkuante le bang ahia hichitel a na ngaihsak a chih hi, kou innkuan adi’n hi mahmah na maizen e, aw Toupa hichitel a non ngaihsak chi in ka kipahna a dai thei kei hial hi tuni tan in.

Amau a gam miten thil ana chiamteh dan himhim ua le vuahzuk hun hita, tui a kimawlna boating, surfing chi uh hia bangbang te ana kikhak vek ta June khabul apan, amau  vuahzu dia kiging petmah uh, huchi ahih lai a kou ni 10 khong va om, pawt ka sawm chiang ua khua pha geihgeih, tawldam chiang a vuahzu, khohun nuamtak ngen ah va ki omkha, hiai Toupa’ Ompihna Khut ahih kei leh bang hita di ka chi mai hi. Toupa’n zaw i lungtang deihlamte thei leh hon phalsak hina maizen e aw, Amite adi’n thilhoih a it ngeilou chih, a tak a chiamte ka hih man un hampha ka kisa. 

Goa ah pandemic ma in nasem eilam mi tamkuam tak om ahi a chi ua, pandemic ziak a nek le tak zonna buai ziak in tamtak innlam ana kiikta ua, ka om sung ua nipini khat om hiven Goa Eimi Fellowship kha khat in khatvei kikhopna Pathian ni nihna pen ah ana kimukhawm zel uh ahi ua, huai ah bang kikhawm kha thei in kava om ua, innkuan tamlou chik ahi na ua, kinai chik, kichimat tak in aki fellowship ua, nuam kava sa mahmah uh. Tua ka va kikhopni uh Naupangte Ni ana hi sawnsawn a, a makaite un deihsakna ban hon zak ua, naupangte adia thumsakna hun hon pe mawk ua amun ah, kinial dan lah omlou, kisit mahmah leh hamphatna khat a ngai in, naupangte adin Pathian vualzawlna ka ngetsak a, kei a thumpa hilou in, ka ngetna Pa muanhuai lua ahihman in, tua thumna te dawnna naupangte tung ah Toupa’n pha asak bang in a tangtungsak ding chih ka muang hi. Naute bang in le lawmthak khong a nei man ua, a liante leh a neute, kou khom chiat a kipahna nei chiat, kipahna di muchiat in ka kithei ua, huai mahmah le manpha kasa. A liante kia in nuamsa in, aneute a na chim leh uh kipahna bukimlou hial ding hiven maw.

Tuipi lian petmah, i muhtawp ah le tuipi hilai, ni bang le tuipi ah tumkhesuk mai chih khong iva muh chiang in, Pathian thilsiam thupi dan lungsim ah ngaihtuahna tampi lut a, mahni kia a tuipi khong en nget-ngut a nehnou simtak bang a omtheih ana himawk hi. Hiai tuipi ziaizuai teng koi ah bangchi kikhol khop a, tui hiaizah a omlai a, a omlouhna di tan hong om chia mihingte khosak bang buaisak lou dia gamgi khung dindian Pathian thilbawl thupi hina e chih chih in om hi.

Huai lou Goa state sung i lut a hon inteksak mahmah ahih leh biakinn ahi. Lampi ah ka pailai un koilak tungta chih theihna din ka GPS ka en zeuhzeuh a, ka taina uh mun tampi ah temple chih hi ka mu suksuk a, zing khovak Goa lut, ka dak khia in lam nawl ah biakinn kimu siuhseuh a, huai in maingalna, ki inteksakna khat hon pe mahmah pah mawk hi. A khosung ah i pawt a, gari khong ah Immanuel, Praise the Lord chihte i mu siuhseuh a, lungsim nopdan khat omlua hi. Vaigam ah kum bangtan hiam om a ana kihi sam ta a, i omna khopi mahmah ah le Goa a ki innteksakna lungsim i put bang kipu theilou hial hi, vaite peuhpeuh hon simmoh dua koihna leh mullitna khat kinei den mawk a, himahleh Goa ah bel huai lungput kinei hetlou. Huai lamdang kasa! Ei ut thu hilou, lungtang tawng apan khamuanna khat om mawk. Biakinn omte bel ei a (Protestant) lamte a om kei, huchi hinapi in, Khristian ahi uh chihna lungnopna ahi mai ding e.

Ka U toh meh lei ding khong, van tuamtuam lei ding khong in ka taikhe mun mahmah ua, gari parkna mun ah a gari neu seat tung khong ah a helmet a koihmai chiang in manglou di mo chi in kana patau khanak hi. Ka van lei te khong uh dawr hohna a tawilut lou in gari neu ah ka nuse mai ua, ana bit zel mai a, nuam kasa. Lamdang le kasa. Khristian gam om dingdan mah hina e ka chi hi. Delhi khong ah gari neu neiten a helmet koihna di uh buaipih thou ua ka theihna chiang a om a, ken bel ka nei kei na a, a tawilunglung hun uh ka mu mun mahmah. Khenkhat in metro sung khong ah tawi uh, huai om dan bel a gari nutsiatna mun ua nutsiat lemlou himathei, aman khak di lau uh le himai thei. Lamka ei Khristian gam ah le i van lei khong genlouh gari ana kigu chih kimu mun sim, dawr hoh kal a ana kitawl khiaksak chih dan khong, Khristian omna tuak dia chu kilamdangpi om chihna suak maw le.

Hampha ka kisak nawn na mahmah tuh, ka U in ka va om sung ding uh ka gensa uh ahih chiang a suty ana la vek mai, ka om sungteng uh amau vai gen khak a omlou, kou hoh utna, hiai lak na ut di uh chi ua, anupa bang ua zingchiang hiai lak pha le chia kou muh di hon deihsakna uh kikum tiptip mai uh chih khong hampha ka kisak tungtuang na ahi a. Kei le ka omna ah chu innsungpa khat nek le dawn bawl theisam ka hi a, himahleh amau kiang ah huaite kava ngaihsak ngei hetkei. Khatvei bawngsa ka va lei ua leh a dawr ah beef chih bang ana kigelh, nuam salua, aam lua in, ka bawngsahou di i bawl di ka chipah a, a ziak bel en Delhi ah bangkolsa kha kibawngsa nek mai ahih chiang a. Bawngsa hou di kava lei ua, anupa un hon bawlsak ua, khatvei bang sawt koih uh sa sim in, ka bawngsa hou di bang na lawh sawm uh a, na koihkoih mawk ua ka chi kha zozen a, ka kikhonung suanlah sim hi. Anupa tung ua’h ka kipak petmah ua, Toupa’n innten-louten, khosakna, chidam-ludamna leh kong bangkim ah a vualzawlna tampi amau din sungbo leh chih ka deihsak uh leh ka thumsakna uh ahi gige hi.

Huchi’n ni 10 khong hun kava zat khawm nung un June 15 in Goa ka nusia ua, 16 June in Delhi damtak in ka tung nawn uhi. Ka paikhiakma zan un ka nautum uh Goa hong tung chet a, amah bel ka U’ tate nih skul kaita, amau panpih dia hong pai ahi a, zanhal deuh in ka houpih a, beach nava hohkha ta hia ka chih leh na painung uh vuahzu charchar, beach hohtheihna di khohun om nailou a chi maizen a! Amah zaw om sawt di ahi a, a hohna di hun a mu mahmah dia, himahleh, ka gentaksa bang in, Toupa’ khut kou a din hoihna e, Toupa hoihna chiam him dih ua chihte ka lungsim ah a thaksuak zel a, Toupa hoihna e maw kou ading in chi in ka kineisak mahmah hi.

Colva Beach, Goa

Kei leh Limlak

 Limlakna (camera) kana deih gige ahi a, tangvalnou ka hih apan ka deihlam ka thei gige hi. Nidang deuh hinkhua in bel camera genlouh nek ding table ah a kilui a, silh leh ten vuaktanglou a om lel leh kipah huailua a, camera chihte gen bat ahi kei. Deih mahmah kawm in ka deihlam ka gen ngei kei, kei neihzoh vual hilou chih ka khosa un hon gen chet luat ziak in.

Hun hong pai zel in, zi-leh-ta nei a khosa a om nung in leng camera ka deihna a bei thei kei a, ka zi mah in leng ka deih leh lunggulh hon phawkpih a, huchi’n camera deih a bangtan hiam thum a ka om nung un a hoih vekvuk hihet kei mahleh DSLR a entry level Canon EOS 1200D khat ka nei thei khong ua, ka kipak petmah a, ka khoih masakni in kipaklua in ka chi a ling hial lam ka thei gige. Kei hinkhua ka en a ka neulai lemlak chih di ka nei tam het kei a, ka khotheih nung a kei hinkhua ka theihtheihte genlouh in, hiai dan ana hi ka hi maw chih muh ding tam ka nei hetkei a, huai ziak tak in ta leh naute lim a tamthei lam lak a, amau adia ana kep sak ding chih ka ut leh tup ahi gige hi.

A bangziak a ka camera neihthu khong dotlouh a gen mawkmawk ka de aw? Camera chih a le a hoih pen le hilou, ba hichi thupi gen ka de aw? A camera leh ka neihdan sangmah a ka gen ut zawk chu, hiai van zat tungtawn a Pathian gam nasepna a ka kihelkhak dan leh, hiai apan kei hinkhua a hon zilsak khat leh nih ka gen ut ziak ahi zaw. I makai leh heutu ten vision hoihtak tak ana nei ua, amau te vision hoihtakte tungtawn in a siik khat ah pangkha thei dia platform piak in kana om a, cameraman chi in, ka hihtheihlouh leh lunglut louh hon kisawl hilou a, ka ut mah leh lunglutna mah sem dia zot a om ka hih man in lunglut tak leh kei hihtheih tawp suah in kana sem tou hi.

Kei lam a fel thei pen, a hoihtheipen ding tup leh ngim a nei a sem leh bawl ka hihlai in, hun tampi ah bel ka fel zou hetkei a, a hoihpen le ka pekhe zou gige kei chih bel kua gen louh in kei leh kei ka kithei mahmah hi. Biakinn a lemlak khong poimoh mah hia chih dotna bang le tampi vei ka tuak a, hiai toh kisai in bel khalam vai ah bangchi bang a mi panpih a phatuam hiam kava gensak thei het kei. Himahleh lim nonna la a chia hon hehsan om ngeilou, huai naksang a lak khak louhni chenchen a kou a kila khalou chih bang kamkhat kamnih zak ding om thei zel a, huai mah in a tung a dotna dawngkha kasa mai hi.

Ka gentaksa bang in ka camera hi tulai diakdiak in, a suakthakte toh a result a kikhai mahmah a, mi result bang pekhe zou nawnlou ahihlai in, huai neh thei pen, a hoih theipen di deihna in, lim ka lak peuhmah chiang in, khat kia hihen aw, a za a sim hileh zuutmaam zeklou in ka koihkhe ngeikei himhim hi. Limlak tengteng photoshop ah kailut in, a vaklua te mialsak, a mial lua te lah kai vak zek in, ana en te adia etnuam thei penpen ding deih in kana pang trantran a, photoshop khong le koimah a zilna nei kihilou, media a seppihte khenkhat dong zel, youtube khong ah tutorial en zen a pan hun bang om in, kua phawklouh in ana kipang tran-tran chu ahi a. Ban ah, i siamlouh ziak mah in limkhat lakna di ah ken a tangpi in 3vei/4vei bek kana mek man zel a, huai teng lak ah a hoihte telkhia in, a hoih tak khiak tuak kasakte ka tak khia a, tak khiak taklou kasakte ka delete zel hi.  

Hiai bang a ka hihzel te apan kei ngaihtuahna saupipi ana pai a, ken limla ing a, hoih kasakteng telkhia a ka tak khiak zelte a lim neite bang in kipahpih ua, kana lakfuhlouh deuhte bang tak khe leng kipak khol hetlou di uh ahih lai in, kei etchetna mit a fit kasak teng ka tak khiak zungzung lai in, kei etchetna sangmah a chiang leh seelguk om hetlou a honna en gige khat om a, ama et chetna ah bangmah selguk omlou di hi a, huai te tengteng, ka hinkhua, ka khotheihma apan tunitan et theih dia record a om hi a, en thei hita zenzen leng, ka etngamlouh, zahlak huai, zumhuai tak a ka om khak hun nak tam nan chia chihte hon kingaihtuah sak zel a, huai in ka hinkhua hon suk khak dan omlua hi. Still image mai hilou a, video khong bang a et theih dia et chian a om ka hih dan, ka nu sung a lamdangtak a phankhawm ka hihlai apan ka hinkhua hi Pathian etchetna mai ah seelguk himhim omlou a ana om hi a, pilvan huai lua hilou hiam hon chi sak. Mi lim honla in chi te kha atangpi in, hichia om nipniap hiam, om sim nilnel a hon chi om ngei manglou ahi a, hoihtak a kizuutmaam in, amau le fuh a kisaktheih tawp ua hong kichei nung ua lim la di kisa sek tangpi ahi ua, huai bang in, niteng, hunteng, minute, dakkal teng i Pathian mai ah et chet ahih leh bel kiging gige, pilvang gige  a om di ana himahmah na e aw hon chisak hi. A ziak bel Sam gelhtu in Sam 139 na ah mihingte Pathian ma ah koimah ah kisel theilou ihih dan chiangtak in honna hilh hi.

Ka limlakna hi thildang tampi dia le zat theih ana hih lailai in, ken Biakinn leh a sung a lemlakna ah a tamzaw zangkha thei a ka om ziak in hiai mahmah le manpha leh hampha ka kisakna ahi sawnsawn. Lim lakna khatvei a kimek chiang in shutter count 1 kichi a, ka camera shutter count kava en chitchiat kei na a, 50,000 tan bang mek khiak hita leh ka gintak dan in 40,000 tan chu biakna vai a kimek khia hi din ka koih a, adang 10,000 te bel kei mimal leh innkuan vai khong hi di ka chih chiang in, van zat Pathian minthupina dia zat khak a om, huai zatna dia kong hon honsak media incharge te tung bang ah ka kipahna a lian mahmah hi.

A tawpna ah, mohpuakna hi a ngai in, dam liai nakleh Pathianni limlak ding bang kipoimoh ngaih mahmah a, huai hi kei adin hun tampi ah lampi dik a hon kaitu ana hi gige chih ka khonung theih hi. Hiai mohpuakna ana neilou hileng, hun tampi ah tuni zaw hichi lua, ngap khang chia ka om mai hun tam mahmah din ka gingta a, Toupa’n hon thei chiang mahmah a, ka ut mah leh lunglutna mah zang a, ama gam nasepna ah pantheihna hamphatna hon pia a, huai mah zang a ka hinkhua hon seek ahi chih ka muh theih ziak in Toupa min ka phat hi.

Thum Hinkhua

Zingkhat Christ’s Commission Fellowship te youtube channel a Pastor Peter Tan-Chi thugen ngai kawm in Photoshop ah ka lemlakte kava khoih touhtouh hi. Huai zing a ka thugen ngaih ahihleh Develop The Habit Of Prayer chih ahi.

Amah Pastor Peter Tan-Chi in thumna poimoh dan Khristian hinkhua ah kitaitehna a tai mite toh genkhawm hi. Kimawl mi te hiam kitaitehna a tel khat peuhpeuh in khatna hiam apenpen ahihna dia pan alak dan uh, nikhat a dakkal 12 bang kizilna hun a zang om ahihdan khong uh gen a, tua bang a, amau a hihpen uh zongsat a neizen a ana pan ziak ua, amau zuihlam chiat ah penpen hiam khatna ana neihtheih dan uh gen hi.

Tua hinkhua mah i Toupa Jesu in khovel ah hong pai lai in chiindan in nei a, Tanchinhoihte i sim chiang in Toupa Jesu paituam a thumna nei, zingbaihtak a thum dia kuan chihte muh ding tampi mah om hi. Huai mah Sawltak Paul hinkhua pitu ana hi gige a. A laikhak tampi ah thum gige ding, tawplou a thum ding a saptuamte a hasotna kimu hi.

Bangziak a thumna poimoh ade aw? Thum in Pathian i nasemtu dia ngaihtuah a i deih i lunggulh leh poimoh isakte genkhum zualna mai ahi diam? Hilou e, thumna i chih kizopna laktu hoih mahmah khat ana hi. I Toupa Jesu, Amah Pathian ngeingei in leng Apa toh kizopna poimohdan thei in, kei leng Pathian khat ka hi chi mailou in, Apa toh kithuahna ding hun zong a, huai kizopna a kepbit tinten pen ei a nungzuite hih dan ding hon lamlahna ana hi mahmah hi.

I khovel khosakna ah leng i poimoh i taksap ni in kizopna i neihpih hetlouh khat kiang ah va kitai in va kithum mawk lou hial hi. I lawm hiam, i dinmun hon theichiang mahmah dia i gintak, hon zahlaksak lou ding a i gintak leh lam-et penpen kiang ah i tai a, i haksatna i gen a panpihna i ngen naknak hi. Huai in a gen tuh kizopna mah ana hizel hi. Kizopna hoihtak i neihpih mah kinaih chihna ahi.

Huchi ahihleh thumna a hausa mi ichih om sek a, tua te Pathian toh kizopna hoihtak nei chihna suak hi. Pathian toh kizopna hoihtak neite mah in Amah toh kikholh nuamsa ua, Pathian mai ah a kipahna, a kalsuan dingdan leh amaban bangkim Pathian pina ngen a, Pathian toh houlim a hun zangzang ana hi ua, kizopna enhuai mahmah nei ana hi uh hi.

Pathian toh A Tonkhawm Nu

Dorcas Day leh Nute Ni EBCC Delhi ah May 14 & 15, 2022 in kizang hi. May 15 zing in ka inteknu lapi ding ahih ziak in ka kuanpah ua dak 10 ma in Biakinn ka tung uh hi. Tung baih zohni om sun chi in basement ah devotion hun pailel ah kava lut suk a, a pat uh ka lap kei, ka lutsuk in Sharing ana kipanta a, tua sharing kei hinkhua sukha mahmah sharing ahihman in, ka lut a, tu in, thumna neiman lou hial in a thugen ka ngai dedu a, bangtan hiam zoh in kei leng mitsi in thumna ka nei pan hi.

Sharing ana nei ahih leh kum bangzah hiam paita a pan ka innkuan lawm uh chia ka kineihsak mahmah uh Lawmpa Rualmuanthang’ zi, Nu Thianpiak ahi. Amau innkuan toh ahihleh kitheisa ka hi kei ua, Delhi a kithei tawm, ka kitheih ua pan kinaichik a tonkhawm, poimoh taksap kidawp a, thumna bang a le ahithei tan a tonkhawm a khosa ka hi ua, huchihlai in, Piak ahihleh a khalam hinkhua piching mahmah, Pathian toh tonkhawm, kimat tak a tonkhawm ahi chih hun paisa a a tanchin ka zak leh theih khenkhat bel om tham hi.

Aman sharing a gen, a bul lam ka za kei a, kava zak thupi kasak mahmah ahih leh, Biakinn a Praise and Worship Team a dia a kipakna, huai a kipesaktu, a kipiakna dia Toupa toh a houlimna, Toupa’ aw a zakdan a gen ahi. Innkuan khosak, ta etkol ding nei chih ziak a, innkuan etkolna a masa a koih a ana om dan gen hi. Tua bang a a om lai a Toupa’ aw a zak a Laisiangthou tungtawn a houpihna ‘Agam leh A diktatna zong masa in’ chih in a lungsim a luahdim dan, huai aw za den ahih dan gen a, huchia Pathian kiang ah ngaihdamna a nget dan, Toupa, Nang amasa di konna masak sak khaklouh na ngaihdamna kon ngen chi a huchia sapna a zak adia a kipiak dan leh, lapi a din masakni a nuam asak dan, suahta a kisak dan gen hi. Dorcas Day leh Nute Ni Masa a le om nuamlou kawm a lapi a ding teitei a, a khomuhna natan chianglou a, huchipi a ding a, a lungsim a Pathian buankawm a apan dan leh huai nung a a om nuamlou teng a beivek dan, damdawi ngai hetlou a dam mai ahih dan khong gen a, thupi lua hi.

A gen nawn khat tuh, covid ziak a i buai vingveng lai ua Pathian in Amah toh kikhawl a houlim dia a chihna ahi. Toupa’n ann ngawl a Amah toh houlimna hun zang dia sam ahi chih thei in, ni 20 ann ngawl a Toupa toh kithuah a hun zang ahihdan hon share a, thupi kasa lua a, hiai bang a hinkhua zat theihna dia Pathian toh kichimat tak a a khosak didan te uh ka ngaihtuah in en huai, hazat huai bang kasa hial hi. Toupa toh kichimat tak a tonkhawm lou adia ni khat gen louh zingkhat lel leng sawt lua hi. Kei mimal tak in Covid First Wave lai in khatvei zingkhat ann ngawl a Laisiangthou sim a Pathian toh houlimna hun ka zang a, ka kisik chihna di ka thei kei. Himahleh nikhat ban ka sunzom zoukei. Huai in kei khalam pichinlouhna hon genkha mahmah a, Nu Piak ahih leh khalam a thilpiak, thumna thilpiak a tan thupi leh piching mahmah, huai a thilpiak theisiam a Pathian toh hun tampi houlim ka chih chiang in thupi kasa lua a, ka eng tun tun hial hi. Kha thilpiak ahi a, tua bang khalam pichinna ken leng ka delh zel ding chi in kei leh kei huai devotion thumkhawmna hun ah leng kava kilaan thakthak hi.

Hiai a tung a teng kia hikei, Pathian sapna a dawn ziak a Agam leh a diktatna a zon masak ziak a a lungtang deihlam Toupa’n a piak le om ei, huai le sharing ah a gen a, huai zaw kon gelhkhe hial dah ding. Sam gelhtu in “Aw, Toupa hoihna chiam unla, mu him dih ua, Amah muangmi tuh mi hampha ahi”, chih a tak a zui hinkhua, huai migen leh gelh mai hilou a, atak a huai hinkhua zangtu ana hi mahmah e ka chi thakthak hial hi.

Hiai bang in Pathian toh houlim nuamsa in, laphuaktu in 

“Lungkhamna dahna zingchiang in thuakkha mah ning

Ka khitui tampi luangkha ding,

Tua haksatna hong tun ma’n, Kon nget nop tuam om kei Toupa aw

Nang toh a houlim nuam bek hing”, 

ana chi a, hiai hinkhua nei thei chiat le hang nuam hi na in chia. Hiai hinkhua zang tamlou ka theih te lak a Nu Piak le khat ahi chih mimal tak a ka muhdan ahi. Tua bang hinkhua ah, Toupa aw, kei le ka innkuante leng hon pi in.

[Hiai thugelh nana simkhak zenzen leh ka tup leh deih ahih leh kuahiam pahtawi a phatna hilou in, Pathian in Ama hinkhua tungtawn a thumna hinkhua hon muhsak Pathian thupina ka taklat utna a a mizat toh genkhawm ka hi zaw chi in honna theihsiam pih in aw]

Nang Toh A Houlim