Pathian’ Aw Ngat Ngiingei

 Meikuang nung in aw ngat ngiingei ahong pawt hi. 1 Kumpipate 19:12 (b).

Zawlnei Elijah in Baal siampute a thah zoh in kumpinu Jezebel lau in a taimang a, Kokhuk khat ah va bu hi. Huai a bukna mun ah Toupan amah houpih in va pawt khia inla tang ah Toupa mai ah va ding in chi in a sawl hi. Huchia ava din leh Toupa hong pai ahi a chi a i Laisiangthou in, huihpi hat a hat nung in chin, huai ah Toupa omlou. Huihpi zoh in zinling, meikuang chihte hong om ua huaite ah leng Toupa a om nai kei a, huaite nung in aw ngat ngiingei ahong pawt a, huai bel Toupa aw ahi chih Elijah in theipah ahi dia, a puan in a mai a khuh chih 1 Kumpipate 19 sung ah a thu kimu thei hi.

Hiai ah Zawlnei Elijah Toupa sawl a kokhuk apan pawt a tang a va ding ahi a, huai a thiltuam tuam thawmnei leh muhtheih himaithei hong kilang masa a chihte apan tulai ei hinkhua a i apply theih om de aw chi ut ihi. Toupa nungzuihna ah, hiai zaw Toupa hon chih hi ngeingei ding eita ve chi a theih khelh theih ding thawmging, thiltung kituak kha vek ding hi. Khenkhat bel haihvual louh a Toupa’ khut hi mahmah eive hiai i chihtheih a om lailai in, khenkhat ei gintak ut ziak a A aw ngat ngiingei pen ngak manlou a i om hun ana om kha de aw hon chisak hi.

Huihpi hat mahmah, tangte Toupa mai ah mutkhang, suangpite kitam zoukhop himah leh huai ah Toupa aw zak ding omlou. Zinling, kim leh pam phe zuaizuai, huai ah leng aw ngat om tuanlou. Meikuang chih bang Mosi le meikuang apan houpih a om hi a chihsuk pah theih di ahihlai a huai ah le Toupa om nailou, huai nung a A aw ngat hong om pan bang in, hinkhua ah thum a  Toupa i buan lai in, hiai zaw hi ngeingei e i chihtheihna dia i kim leh pam a thil tungte en in, ina gingta pah hia? En hilua heh i chih ziak a hiai zaw Toupa’ aw hi mahmah ina chi ut baihlua hia?

Elijah bang in huihpite, kim leh pam a mipi’ aw hong daih a, thiltung tuamtuamte hong daih nung in, eikia a Toupa thutung i lungngaih lai in A aw ngat ngiingei pen i ngak zou hia? Muhtheih a thil tung leh husa teng sang mah a Toupa’ houpihna zaw aw ngat ngiingei mah ana hi zaw di eive maw. Huai aw ngat ngiingei i zakleh bel thudonlou kei hial ni, Toupa houpihna i zak hunhun in hih dia hon zaksak, it tak leh neemtak a hon zaksak pen semsuah din mansa in om ni maw. Pathian’ Aw’ ngat ngiingei za thei chiat din Toupa’n hon vualzawl hen aw!

Missions Sunday 2024

Missions Sunday 2024 March 17 in EBCC Delhi in program kinei, Toupa’ vehna kitang mahmah in ka thei. Toupa’n lam chituam tuam a nasem in, Ama’ gam nasem heutute Htp. Lun Mangte-te inkuan, Htp. H Siampute nupa chihte leh EBCC Delhi mahmah apan a Toupa sapna za a, huai sapna dawng a kuankhia Htp. Pumsuanlal Tombingte inkuan hon pikhawm a, Missions Committee in hiai program ding a gelkholh lai ua ngaihsut batlouh gam ah Toupa’n honpi dan, lamdang!

March 16 ni in Missions Sunday 2024 a sharing leh thugenna hun zang dia chial Htp. Lal Tombing te inkuan vaidawnna leh, Delhi a damtheihna lam ki ensak dia Toupa’n hon pikhawm Htp. Lun Mangte-te inkuan, Htp. H Siampu leh Mission Committee in hun saulou kizang zual hi. 

Huai ah Htp. Lun Mangte in agen, ama damlouhna chithak in a phak hun chiang a a omdan a gen bang, zak mai in leng thuak ngap huailou lua hi. Thugen lai khong a chithak in a phak hun a a om didan ka ngaihtuahna ka paisau sak chiang in, concentration buaigawp khong a om theih di eive kana chi a, huai teng mah toh pang trantran a, hun lem a muh masakpen a kikhuat ek ahih hon gente khong ka ngaihtuah in, ngapsak huai kasa hetkei. Himahleh huai a agen ka lungsim hon zou mahmah ka gen ut taktak hiai ahi zaw, “Ka inkuante kiang ah Toupa’n chithak hon thuaksak ziak a kipahthu I gen ding uh ahi, a thak zaw I khuat a nuamlua ahi, hiai lou a na (pain) hon thuaksak leh nak gim lotel di ing a, nou hon enzoulou di na hi uh”, ka chi zel a chihte khong, nehnou in khasiat huai kasa hi. Pathian nei taktak ten zaw Sawltak Paul mah bang a, a tuah leh palkhak bangbang uh kipahthu genna di mu zel uh hiveh aw hon chisak.

Htp. H Siampu in a lawinu’ damlouhna toh kisai hon gen, huai teng tung a Pathian tung ah a kipahna, Toupa’n a lampi tot na ding ua panpihtu ding ana sehsak diudeu dan siamtak a hon gen bang, Missions Sunday biakna kikhop hun a ‘Kei Kuan Khia Ning’ chih la Toupa’ sapna a tung a khemna nasatak a tuahlai a Toupa apan la a muh lungsim tak a hon sakte khong, lungsim hon khoih in, Toupa sapna a chian dan uh testimony thupitak hon musak.

Htp. Lal Tombing’ inteknu (UZoui) in sharing a hon gen, Toupa sapna aw neem mahmah za a kipan ahihlai ua, a sapna aw neem leh ngat mahmah ahihlai in, a lampi neem ngi-ngei gige hetlou ahi dan, lampi phok leh kense lak tawn a pai, cancer natna khong a delhzui a a om dan, huai te tengteng tung a zohna Toupa a om ahihdan, Zohna Toupa a’ ahi chithei a a omdan bang uh, thupi lua!

Htp. Lal in Missions Lungput Nei Gingtu chih thupi pansan a missions nungzui bawlna, a thu sinsakna leh theihsakna poimohdan hon gente khong ngaikhe kha leh hamphatpih khathei dia om manpha lua.

Mi’n a nekzonna uh bubit tak taisan a sapna a zak uh dawng ua, natna guh taktak, thuak ua, milak a om didan le omlou khop a chithak khong natna nei ua, sapna sangtak za a hua sapna sangtak mah sangak a dawng a Agam nna a sep lai un, amaute khong chidam-ludamna khong buai ngai hetlou dia kizang hile uh manpha petmah ding ahihlai in, mihing lunggel ah. Toupa’n lampi tuamtuam tawnsak a, tua haksa a tuahte uh tungtawn a kipak gige theite lungkim dingdan ei a gal apan ana ente khong theihsiam vual ana hikei na mai e chih in om. Tunia ei, nektak zonna nuse dia sap hilou, inn leh lou nusia dia sap hilou ten, kei zaw ka pantheihna di om kei chi lai ding I diam? Niteng a tangthupha gen thumpih ding chi a I mobile khong a I muhte adin thumna hun tomkha be ina zang zel hia? Huai din hun I pesam kei di ua hia a thak in. Thilpiak a sapna mu ihih leh, piak theihna hamphatna ahi chi in I enthak thei kei ding ua hia? Min damlouhna, natna leh haksatna te khong hamphatna dan a a et theih lai un, en leng, Toupa’n ei khom a hihthei dia hon omsakna munmun a pan a sep hamphatna in I la thei ding ua’m? Tua bang a lathei te tengteng Missions Sunday 2024 gah, hamphatpihte hi ding hihang!

Noah: Bitna Long

Genesis bung 6na i sim chiang in Gitlouhna chih thupi nuai ah kipan mawk hi (BSI O.V. Re-edited). Hiai a gitlouhna kigen pen huaise mahmah ahi dia, Toupa hichi’n a gen hi, “TOUPA’N, leitung a kipan ka misiam ka hihmang mai ding. Mite, sate, ganhingte leh tung a leng vasate tan in; ka bawl ziak in ka kisik,” a chi hi (Genesis 6:7). Genesis kipatna lam va en thak le hang Pathian in a thilsiamte a en a hoih asa mahmah chih kigen suk-suk a, huchia  hoih leh kilawm asak, a pahtak mahmah a thilsiamte, mihing kia hilou, genhingte tung tan a Pathian thangpaihna i chih kha, maimai hetlou ding, bangchi phet a Toupa’ lungtang na hi ding hiam chih mihing ngaihsutna a suut vual hilou kha ding hi.

Pathian thangpaihna ziak a thilsiamte tengteng manthatna tung ding ahihlai in Genesis 6:8 ah, Noah in bel TOUPA mitmuh in deihsakna a tang hi chih kigelh pen mihingte ading a tanchin kipah huai mahmah, gospel ahi mai hi. Noah toh kisai aban a genna ah, Noah midik ahi, a damtonpihte lak ah gensiatbei ahi chih leh Pathian toh Noah a tonkhawm uhi chihte ana om hi.

Noah ana om kei henla hileh Pathian thangpaihna ziak a thilsiamteng adia manthatna a tun lai in, bang achi de aw, a ban bangchi’n a kisunzom de aw chih khong ngaihtuah khak mawkmawk chiang in, hichi di ahi chia gentheih omlou kawm in, ngaihtuahna lazou mahmah, lunglut huaipi abang hi. Himahleh, huai bel bangmah adia phatuam hilou, iva ngaihtuah ziak a kikhek di le om nawnlou, uang tak a i gen ut zawk tuh mi khat (Noah) ziak a mihing khang paisawn, Pathian ngaihsak, limsak ana nak manphatna maizen e chih ahi hi.

Noah tanchin kigen apan chouna (challenge) om mahmah tuh, i kiim i paam a thilte kithununsak lou a, mitengteng a hoihlouh lai a le Pathian toh omkhawm theih veve, diktat theih veve ahi chih ahi. Noah hun a siatna bangchi bang a siatna, gitlouhna hiam i thei kei, i theih ombel siamtu Pathian’ lungtang ana a, mihing kia hilou, ganhing tung nasan a hihman tupna tun hial gitlouhna leh siatna ahi chih bel imu thei hi. Huai lak ah Noah bang ana kichi kep tuam hiam i thei kei, Toupa mitmuh a deihsakna tang, midik, a damtonpihte lak a gensiatbei ahi chih bel ithei hi.

Tulai in i gen sek uh mi’ hihdan, a system va zuih ngai a iva bual khak chiang in chihte Noah in ana zui ut hileh zuih theih tham ding in ka gingta hi. A system ah ana bual lou a, ana kikem a Toupa deihsakna tang dia hinkhua ana zang Noah ziak in Toupa min i phat ahi. Amah ziak a mihing tengteng leh ganhing tan a mang dinglai bitna long a pilut a om khang paisawn ahih man in, Noah thupi i sa.

Pathian toh Noah a tonkhawm uh chih thupi kasa nawn hi. Thugensiam khat in ginna a pai ichih minih tonkhawm ahi a chi a, ka pomtheih lamtak ahi. Ei kia kuamah donglou a pai gulgul in ginna a pai chih pen dikzoulou kha ding ahi. Noah in muhtheihlouh pen ginna a muchian ahihman in, a kiim leh paam a thiltungte ziak a kibuaisak lou in Toupa toh tonkhawm uh hi. Ei leng tua bang hinkhua zangthei ihi. Toupa aw za din hun i pia hia? A thu, A houpihna zaksawm in Laisiangthou i vel hia? I sim man hia? Toupa houpihna zaw lamdangtak a koi hiam apan hong pai ding ana hi se-se lou kha ding ahi. A thu eite lamlahna dia kigelh te tungtawn mah apan A aw zaksawm le, zakhial chih omlou penpen ding in ka gingta hi. Huai ah Toupa toh tonkhawm hinkhua i zang thei ding hi, A aw i ngaih a, i man nak leh.

Mimal chih a biik in innsung pate a din i zi leh tate adia a Noah uh ihi. Noah in long liantak ana bawl a, huai ah a innsung mite leh ganhing chikim in bitna a muh bang un, nang leh kei bitna long ihi hiam? I innsung mite adin a Noah uh ihi kha hiam? Ahihkaleh nisat mahmah lai a long bawl Noah haisa a chiamnuih nuihte, va engkou koute ihi kha hiam? Long i chih Noah ziak a om, ava belh mai uh ahi a, a long bawl pen a thupi mahmah kawm in, huai long om theihna Noah a bulpi hizaw ahi, a bitna uh zaw huai long hilou in Noah ana hizaw ahi. Nang leh kei Toupa’n Noah, bitna long, hi din hon deih ahi chih i lunggel thak kei dia hia?

Sodom leh Gomorrah te tanchin i theihchiat mahmah ahi a, va bulsut lou in hichi’n gen le. Lot te innkuan Sodom leh Gomorrah a kangtumlou a pikhiak a a om uh bang, amau ana hoihtuam ziak uh hiam isak leh Genesis 19:29 tawplam ah hichia ana kigelh hiveh aw, “Pathian in Abraham a thei gige a, manthatna lak apan Lot a sawlkhia hi,” ana kichi. Hiai a i gen ut bel, Toupa ma ah dik tat in, Amah toh tonkhawm peuhmah le, en iva thei kha sese kei ding, himah leh midang i kiim leh paam ate adia damna tanpha ana kihi thei, Lot adia Abraham kha a Noah (bitna long) ana hih maimah bang in, nang le kei le kuahiam adia a Noah uh hihkhak theih ana hi ding ahi.

Mikhat Diktat, Mikhat Phatuamngaih in Omzia a Nei Hia?

Leitung nuntakna ah khatvei vei lungkiakna, thanemna chihten a banglam banglam ah hon nawk hun om hi. Toupa Jesu nung zuihna ah le tua bang hun ana om a, lungkia a pukgawp hun ana om a, nungzui te lak a heutu deuh Peter ngei leng ana lungkia in ana bahngei ahi chih i gen ngei ta [Link]. Huan, theihtawp a nekzonna, sum-le-pai zonna ah diktat tak a sem leh bawl di chih chiang in, i kiim i paam a te hihdan, mite’ hihdan chihte en in, bang ahia kei kia a ka na chihtak tei omzia? Bang kilamdanna lah tunzou tuanlou ing a, bang ahia kei le mihing mah, sa a hinglai hiveng, huchia kilamdanna tunzou dia thunei leh bawlzou hituanlou ka hihleh, a huihnung dandan mah kizapsak mai aw le chih baihlampi ana hi di hi a. Huai bang hun chiang in, tua bang dinmun a omkha a ikitheih chiang in, mikhat phatuamngaihna in gen lianpi ana nei ahi chih phawk thakthak le ut huai kasa a, tua bang dinmun a om kuahiam adia thathak lakna ahihkhak leh chi in, hiai a nuai a Bible pansan in en ni aw le.

Nambars 25 ah Peor Ah Isreal Mite chih bungkhat ana om hi. Huai a kigen tuh Isreal te gamchiam luah dia kisa hong pai lai un Peor kichi mun a hong tung ua, huai ah, ban thahat a amau pitu, milem na be ding uh ahikei, kei mah lou ngal ka ma ah Pathian dang na nei kei ding uh, namdang numei zi in na la kei ding uh chih thupiak teng hon palsat mawk uh hiveh aw. Pasal ten Moab numeite luppih uh, moab te pathiante ma khong ah kithoihna te ne leh bia ava kuun uh. Huchia Pathian’ lungtang hon natsak chiang ua Toupa’n Mosi kiang ah TOUPA hehna lauhuai apan a bitna ding un mipite heutute kihemkhia unla, Peor Baal biakna a tel peuhmah that vek un chih thu pia.

Huchia Toupa’ thangpaihna ziak a mite kap leh mau a a omlaitak ua Isreal mi pasal khat in midian numei khat hon pi, huai a muh a Phinehas (Siampu Eleazar’ tapa) kidekzoulou inchin, huai mite a puaninn uah delhlut in, apasal toh numei toh teipi ah va dawtlum, va sun pailet. Huchia Toupa hehna dai in, hiipi le khawl, hilele mi singnih leh sangli si man chi. Hiai Phinehas phatuamngaihna toh kisai a Toupa’n Mosi kiang ah hichia gen hiveh aw, “Siampu Aron Tapa Eleazar tapa Phinehas in a lak ua kei adia phatuam a ngaih ziak in Isreal suante apan ka hehna a heimang a, huchi in ka thikthusiat ziak in Isreal suante ka hihmangthang kei hi”.

Phinehas in phatuam ana ngailou himaizen leh Isreal suante bangzah a sih behlap di uh chih i ngaihtuahna paisau sak le, Toupa’ min khong a i pang guigui na ziak a ei theih sese louh a Toupa’n kuate hiam hinna ana humbit le hithei chih i gingta hia? Gintak huai ahi, a ziak bel Phinehas ama adia a phatuam ngaihziak a kipak Pathian mah i Pathian ahih man in.

Banghiam i hinkhua thugin leh paidan kisinsakna apan i lampial ut sim chiang in kiim leh paam, a dinmun leh ngawhdi ana kizong sek, kei kia a mawk kuhkal leh phatuamngaih zaw omzia omzou kei khong kichi kha thei zel, hilele a tung Phinehas tanchin in hon sinsak chu Pathian adia phatuam i ngaih a, a thusinsak apan lampial hetlou in i sep i bawlna ah chitak peuhmah le, muh theih in hiam, muhtheihlouh in hiam kua hiam hinkhua kisek kha dia, kua hiam hinna humbit kha kihi dia, huai tengteng tung ah Pathian kipahna kihi ding ahi chih ahih man in, gingtute adin Phinehas tanchin in tha hon guan mahmah hilou hiam? I kiim le paam leh i kiang a mite enlou in, et ding khat, huai bel Toupa Jesu kia en in i pang ek uh aw le.

A Kilamdanna Thei Un

 2 Kronikil 12:8 Himahleh a sikhate ahi ding ua, ka nasep leh gamdangmi nasepdan a theihna ding un, a chi hi. BSI (O.V.) Re-edited '23

Ahihhang in, ama nuai ah a toukai ding uh a, kei nuai a sep leh gamdang kumpipate nuai a sep kibatlouhna a thei ding uhi, achi hi. (BI)

But they will become his subjects, so they will know the difference between serving me and serving earthly rulers. (New Living Translation)

 

Tuzing 2 Kronikil bung 12 kiimlak sim hiveng aw, amasa a eipau tua latest, a tung a ka quote masak pen a, eipau a huai lak ka sim suk chiang a agen ut dan hon khoihkha geihlou, a chituam om a le theilou in, sim paisuak suk. Zou in koihkhia, English a New Living Translation a ka sim suk nawn leh huai mun mah ka tun a ka lungsim a hon khoihkha vuat om a thei, huai zoh eipau version dang BI ka va et nawn leh huai pen sappau a agen toh kinaih, a gen ut mat theih dan chiang zaw om kasa. Bible zaw simtuah zou le ana hoih mahmah ngut di hon chi sak. Sappau sese lou, eipau version I neihtuamtuam te bang le simtuah zelzel di eive hon chisak thak mahmah.

2 Kronikil 12 na pumpi chu Aigupta kumpi Shishak in Juda gam Rehoboam etkol lai a a douna chih ahi a, Rehoboam apa Solomon nung a kumpi hong hi, a dinmun kip leh hat tak, kimuang hun tawk hong hih tak a Toupa a nungngat san ziak a Aigupta Kumpipa Jerusalem dou dia hong kuanna ahi chi in a tom in a gen theih ding. Huai ah lungsim a tua tangtelna apan ei dinmun toh kibulh dan hong om khat om hivo.

Kumpi David kha Judah kumpi masa, a nung ah atapa Solomon, huai nung a tua a tung a thiltung i gen hun a kumpi Solomon tapa Rehoboam hong hi. Kumpi amau khang a khang 3na chih ding hipan ah Pathian hon nungngatsan leh Pathian in David kiang a a thuchiam, Jerusalem ka tenna ahi ding, ka thupiakte zui dia na muanhuainak uh leh a chih nungngatsan a Amah bel tinten loute kiang ah kei hon nungngatsan na hih ua leh kumpi dang nasep toh kei nna sep bang a chi hiam en un aw le chi a phalsak hipen abang hi.

Ei Manipur singtangmite tanchin toh kinaih kasak dan a om a, i pom vek kei lehle kei mimal muhdan ahi lel mai dia. Manipur singtangmi te, singbul, suangbul bia a, dawi leh kau bia a kithoihte Toupa'n tanchinhoih tungtawn in hon zongkhia a, silhdan tendan le theilou a nam niamchik hilai tunin khovel mun tuamtuam a hon koih a, dinmun hoihtak tak hon pia hi. Huai te Khristian khang masate diktatna, Pathian ana lauh ua a thupiakte ana zuihna gah uh ahi ding. Huai nung Khristian khang dang i om nawn a, leitung pilna siamna nakpi a hamphatpih diakte ihi a, huchih lai in, awl awl in nekzonna di hoihtak hon pepa i nungngatsan a, a thupiak toh kituak lou a om i om panpan a. Mahleh a hoih, adik Pathian lau tampi mah le i om hi. Huchin tukhang ah i om a, pilgawp, siam gawp i kisa a, tangtawn a pan tangtawn tan ompa thugen te bang logical lou, hiai bang chi om theih di chi in a thu i sim sunsun chiang bang in dotna i hau a, Toupa ken ka thei kei, nang na thei chi a kiphah niam mai sang in mihing pilna in a theih batlouh te bang question in, doubt i om pan ta. Leitung siamna pilna i zonzon te vualzawlna ahi hia, hamsiat chih theih ding khop in i pai kha dekdek. Toupa na danthu te, na thute kei mihing mai in ka theisiam zou kei, ka theih dia kilawmte hon theisiam sak in chi a kiphahniam mailouh ngal Tangtawn Toupa i theikim zou tel dia hia ei mihing leltak in?

Kei mah lou ngal ka ma ah Pathian dang na nei ding uh ahi kei chih thupiak paisan in Pathian dang i hau petmah a, sum le pai sal in i lut a, zu leh sa sal in i lut a, noptaalna sal i kisuah a,  i gam i nam kivaihawmna ah hitaleh, Toupa’n mipi te sang a sangzaw leh madawk din hon domsang lai in, theih phaklouhte nam khat leh theihphak khat a hon koih Pathian laukawm a namte makaih naksang in kumpi dang iki bawl a, i mai et a, amai uah kiphahniam theih zahzah in ikiphah niam ua, i tanchin khong uh mimal hamphatna di om di ahi de aw chih theih ding khop in i heilamdang ua, i pi leh pu ten Van leh lei siamtu Pathian a gintak ua pan a tawpsan uh kithoihna te bang tukum mahmah in ei singtangmi nopbawlna ah pholhthak in a om nawn a, phuisam in leitung kumpi/vaihawmtu peuh ina vualzawl ua, Toupa'n kei nasep sang a, kei biak sang, kei sang a ka ma ah a lianzaw koih ut tak na hih ua leh, a kilamdanna thei un aw chi a hiai dinmun ah hon omsak ahi kei di i chi ngam diam? Isrealte, namteel, midang ten zillai i lakna di ua a tuah bangbang uh, a nuam a haksa, a hoih, hoihlou ana om detdet te apan zillai la lou, huai te huai pek a thil hita ahi chi a beisak mai thei ding i di uam? Mipite, heutu leh makaite, iki et thak di uh banglam hiam bek ah a om diam? Toupan amah lau a ama deihdan a om toh tua amah laulou a mihing mah i biak ua, a lung i zon zon ua, hon bawl geih dan uh kilamdan dan hon musak ta in i thei uh hia?

A kipah huai mahmah bel, amel i zon a, amah i zon nak leh eilam nga dia mansa a I Pathian om gige hitel veh aw, amah i lianpen sak nawn kei di ua hia, mimal ah, innkuan ah, khotang ah, i gam ah?

CHARACTER STUDY : Kumpi David

 Tulai hihtheih khamkham in Kumpi David character study ka nei a, kumpi hoihpen hi hetlou, thumang pen le hilou, bangziak a Pathian in ka lungtang bang pu a chih a de aw chih lak in hon buaisak hiveh aw.

Thuman lam ah gen le, Toupa Jesu simlouh a Bible a mi tanchin kigen lak a a negative khat le omlou chu Joseph ahi. Diklou tak a ngawh a a om a suangkulh a om a le phunlou, suangkulh a tankhawm pih, mang a lehsak in a mangngilh bang, amah huai thuk thei di dinmun a hong hih a le a thuk, a bawlsia chih kigen tuanlou. Apa’ innsung a pa’ duat nuamsa tak a om di lai, zuakmang a om, gamdang a sikha leh suangkulh peuh a lut, huai apan gam vaihawmtu hong hi, a sanggamte tung ah semkhial tuanlou, hiai mipa Pathian lungtang bangpu kichi lou. Thuman i chihlah kithoihna sang a hoihzaw chih hinawn zel, mah leh Pathian lungtang bang pu chi a gen dia qualify lou Joseph ahi.

David i chih nawn chiang a a bul panhoih, a tawpna lam fuhlou, Bathsheba, mi’ zi bang va luppih thethup, commentary khat in Bathsheba a luppih ziak a David in khatvei thu a thupiak 10 lak ah 5 bohsia ahi, eng ken, gu ken, angkawm ken, tualthat ken leh theihpihtu taklou in pang ken chihte huai khelhna ahih ziak a palsat tou vek chi.

Ban ah, a hun nanung lam ah, setan in khem in chin, kiliansak, mi bangzah mawng-mawng tung a kumpi ka hi a chih kithei ut in chin a mite simsak, huai kiletsakna Pathian in zadah in chin hiipi a gawtna bang tuak. Hiai teng nung a le Pathian lungtang bangpu chih himawk!

Samuel in thau a nilh dek lai apan Pathian in ken mihing et bang in ka en kei a, mihing in zaw polam kilatdan a en a ken sunglam ahi ka et chi, a chih leh bang pen ado huai a chihna chihte kon velvel chiang a, hiai ziak hi di ahi ka chih khat hong om hiveh aw.

Huai bel, David galmuang a om ta, a melma te apan Toupa'n khawlna pe ta, huai tak a kei sing inn nuamtak a teng ing a, Pathian bawm huai puanbuk a om chih mawk, chi in, Jawlnei Nathan kiang ah a gen leh Nathan in na lungsim a om bang semkhia in Toupa na kiang ah om ahi chi.

Himahleh huai zan a Toupa'n Jawlnei Nathan va houpih in David in ama biakbuk a lamlouh ding thu va gen, David apan suak a ta in huai biakbuk bawl ding ahih dan va gen dia  sawl. Jawlnei Nathan in huai ava gen leh David heh hetlou in chin 2 Samuel 7:18-29 kikal Pathian kiang a kipahthugenna hon samkhe mawk!

Hiai tak hi di eive Toupa'n lungtang en a chih chih ngaihdan khat nei thei ing. Hiai a David reaction kha thupi mahmah eive, ngaihtuahna pe le. I ki relate pih theihdan om chiat din ka gingta. Saptuam leh biakna vai ah phatuam ngai mahmah, a hoih leh manpha dia i gel vengveng, ei thuneihna in a bat chetlouh, hon genkhawm ua a puklouh chiang in i reaction om zel ve le maw le? Mimal hamphatna di hiam en le kihilou, Pathian gam nasepna ah hiai khong kichihsan chi a i thadah hun,  i nuaksim hun om vele maw? Kumpi David din kibulh le hang, Pathian biakinn ah di banghiam hihzou chih lel hilou, a biakinn pumpi bawl dia kisa, huai dia kumpi khat eivoi maw le, hilele Jawlnei Nathan thugen in hehsak hetlou, kipahthu gen mawk eive le, thupi mahmah chi ua!

Kumpi khat mai hilou, kim leh paam in a lauh mahmah khat hisam ing a, hiai thugen dia nang kua e chi a Jawlnei Nathan bang ana hehsan a suangkulh a khum thei eivoi. Khum lou. Kiphasak tak a nang thugen in om zia nei kei, ka hihsawm chu hihsawm ahi, kumpi ka hi chi thei eivoi, chilou. Saptuam a dia phatuam ngai kisa  a pan i laklai a hon lemsakpih lou Upa-te khong mudah, nuaksan, Pastor te khong a thugen uh ngai ut nawnlou chi bang a om khak theih mawkmawk eivoi maw le, a ziakbel mihing i lungtang Kumpi David bangzou hetlou ihih chiang a. Hiai hi di eive zillai hiai Kumpi David hinkhua apan zil di leh Pathian lungtang bang pu ahihna! Hiai lungtang mah tunia poimoh kei ve, hiai mah hi di eive Toupa’n ana et, lungsim tengteng a Pathian pina peuh kipah theihna, khial thei, khial tham, huchih hun a le kisik a lungtang teng a Pathian buan a, a sep sawm phallouh a a om hun a le vuilou a kipahthugen thei. Hiai mah hi di eive zillai chi in David character study hial bawl thei ing.

Pathian, A Mite Humbitpa (Sam 124: 1-8)

Kumpi David in hiai Sam bang hun a, kua apan a bitlai a gelh hiam chihte ka thei sau kei. Himahleh Bible ah kuahiam hiai Sam gelh di a om leh Kumpi David sang a kilawm zaw om dia hia? Kumpi David sang a hiai chithei di om dia hia ka chi hi.

Tang 1  – Eilam a pang TOUPA hilou hileh, Isreal te’n chi uh hen;

2 Mite’n hon sual lai un eilam a pang TOUPA hilou hileh:

Hiai ah Kumpi David in Amah mimal adi kia a le kei lam a pang TOUPA hilou hileh chih mai hun sa nawnlou in, Isreal mipi te kiang ah, Jakobte. Isrealte aw, en mahmah ve ua, eilam a pang TOUPA hikei maizen leh bang i suak phet ding ua? Huai ziak in tuni in eilam a pang, i bitna TOUPA ahi chi ni, hong pai dih uh, TOUPA i phat khawm ding uh chi in Isrealte a chial a, bangziak in eita i chih leh,

3 Huailai mah in amau eite a hon hingvalhta ding ua, i tung ua a thangpaih lai un.

4 Huailai mah in tuite’n a hon tummangta ding a, lui in i hinna a vuktumta ding hi.

5 Huailai mah in tui kisatheite’n i hinna a vuktumta ding hi.

TOUPA iki humbitna hilou himai zen leh en ve ua, i melma in hon hingvalh khinta dia, amau te lah ei sang a tamzaw, hatzaw hingal ua, hingvalh/nawmvalh a om di hang a, si bei di hang a, nek tak zonna leh gam leh nam vai kia hilou, i hinna mahmah in le thuak gawp di ana hi eivoi, huai ziak in TOUPA ei lam ah panglou hileh Isreal ten hiai teng i thuak mahmah kei ding ua hia chi hi ding ahi.

6 Sa mat bang a mat ding a a ha ua hon pelou TOUPA phat in om hen.

7 Thangkamte thang apan suakta bang in i hinna a suakta hi, thang a seta a, eite i suakta uhi.

8 Hon panpihna ding TOUPA lei leh van bawlpa min ah a om chi in.

Sa mat bang a gal ten mat hon sawm lai ua, humpinelkai in a ann ding a bohnen bang a bohnen gawp hon tup lai ua, eite awk na ding thang hoihtak akam lai ua, TOUPA, lei leh van bawlpa, i bitna uh ahih ziak in, huaite hon peelsak a melma bohzan in i om kei a, eite bitna zaw TOUPA lei leh van bawlpa’ min ah om ahi, hong un Isrealte aw TOUPA ei lam a panglou hileh Isreal te’n hiai i chi kei dia hia a chih ngeungeu mai khong, Kumpi David in zaw a bitna, a kulhpi, TOUPA, A mite humbitpa ahih ana chiang mahmah veh aw maw.

 

Tunia Manipur a teng ei singtangmite dinmun toh a tung a text bulhtuah sawm sin le, bangzah hiam zaw kituak veh aw maw le. Aban le kituak lai din a deih huai ngei mai. David in Toupa eilam a panglou hileh a chih mah bang in tunitan i thiltuak te khong en thak himhim le, Toupa eilam a panglou himaizen leh zaw, i melmal in adiak in Lamka zaang a akisak khol bang ua pai in semkhe thei himaizen le uh zaw, i text a huailai in amau eite a hon hingvalh ding ua a chih bang in, zankhat thu a tam ikisakna, i gam i chih vaivut suak mai hilou a, hinna tampi taan maithei ding hi hang a, huai te khong tu in i en thak zelzel ding ua aw?

David in zaw i bitna TOUPA lei leh van bawlpa min ah ah a om ana chi a, en huai i chi lai sam uh hia? Ahihkaleh tulai May khabul a i buai zilzel lai ua, a madawk di om khol lou a, amhai tak a Pathian i belh khiukheu lai uh sang a dinmun galmuang zaw deuh, melma in hon dou lou deuh a i om leh min buai a buai ihi maimah hia? Bangmin bangmin in hon suakta saklou ding a, Toupa lei leh van bawlpa min ah suaktakna om a, a nuai ah mihingte leh ikipawl khawmna te Toupa vanzat hithei lel ihi chih i phawk khiak kei ua leh zaw, vasa thang a awk suakta kisa  baihlua suaktaloupi, a khang a khang i thang awkna di khat a omkha lai houh i maimah de aw?

Sam 124 apan in i dinmun en le, Toupa eilam a panglou hileh nawmvalh a, bohnen a om gawp khinta di le kihi maithei, huchih lai a Toupa A Mite humbitpa’n hon hum ziak a tunitan bit ihih lam thei in Toupa bel thakthak in, i bitna, hiai tan tunia i om theihna min dang neih sawm kei hamham le hang houh Toupa kipahna i khoihkha thei lai mai kei di mo? I chi thei di uam? Ki veelna di om isa uh hia?