CAT

Zohmeng gen dek khong nong nasa kha de...Zohmeng gen dek hilou. Kum 2001-2003 kikal lak ah kou khanvualte kipawlkhawmna min eingal ve. CAT, Cricket Association of Tangnuam chihna ahi.Kou khanvual pasal ngen mi 15-20 tankhong te CAT kichi in kana kipawl ua, hoihtak a organised chih zong hikei ung. President, secretary chihte ka nei kei ua, Senior Manager Apu Mung(Zamkhanmung) leh Senior Adviser PTL(Pumthianlal)ka nei ua, a dangteng kou kichih dan tak in assistant member ka hi vek mai uh hi.

Cricket kimawl na ka neih zel ua pan CAT hong kipan khia ahi. Ka kipawlna min pen uh a hun leh a mun zil in ka khek koikoi uh hi. Football ka kimawl chiang un FAT ka kichi ua, Badminton ka kimawl chiang un BAT ka kichi zel uh hi. Office ding in Pi Chingsuante' inn ka zang ua, ka innteek thei peetmah uh hi. Nuam thei hita ven! Ka office te un amau limlak frame a ataak te uh ka lakkhiat sak ve ua, kou CATte' limlak te ka tak uh hi. Ka office te uh a zaidam ua, a piching mahmah uh chih kouzong a khonung in ka thei pan lel uh hi.

A tangpi in kiginni zan in ka kimukhawm ua, a ziak bel skul leh college kailai ngen a kihih man in. Kiginni zan a kimuh khawm khong, nak eng nop a, lasa toh chiam nui toh dur in ka dur thei uh hi.Pasal ngen 20 khong in nna kituak tak a saikhawm bel maban vang hita ven. A thuak kha bel a om gige a hiven. Thuak ka chih bel kou banghiam ka deih man ua kua hiam khat in a chaan ngai chihna ahi.

Music kong lung lut taktak bang uh zaw thupi kha ngal eive. Bawngvum khat ka drum di ua bawlsawm, khauhlua ki at zoulou. Diahmalh di chia tui a ka diahna lam ua diah muat kha zozen zel. A drum khuang di bangmah lah kinei lou, Pu Khuang @ Vumzalam in tinsia drum dia hoih di nei chih thei khia, kava nget mawk uh bel kibeihna sousang himai. Khuang toh lasak a nopdan, a khuang hoih in thu a puak dan chihte khong gen a va gen mai. Amah hong ki hong mahmah ta chihtak a khat in "Pu Na tinsia pen khuang in bawl le hoih di eive maw" a chihleh zaw, ama'n zong "ong bawl ve ua" leh chia ong pekhe pah geih mai kha hi'n maw...

Badminton kong buaipih ualah Pu Suan @ Sir Suan in thuak kha zel. A innsak nidang a badminton court a azat ngei lam thei kha ihih mawk chiang a. A huan ah haichi hoih a hoih, singtangmai bang gah dia kisa ta, tuachi lai pi badminton court dia kava nget mawk uh leh zaw, ka khonung ngaihtuah leh aman zong itsim ding in ka um phial hi. Amah Pu Suan bel i theihchiatsa banga khangnoute deihsak leh ngaihsak gige ana hihna ah ong itt hetlou in ong na phalsak pah hi. Kou zong a huan hai teng ban vaisiat pah. Badminton Court khat bel bawlkhe sam. Khanih hiam sung zaw ka kimawl peih ua tua nung ka sunzom zou non kei uh hi.Khanih sung in badminton tournament khatvei ka sai man ua, tua ah final U Mang(DS Mang) leh TS(Thangkhansiam) te a kibei ek uh hi. Umang in zou in Pu Ban (Pa Pau Khan Thang) in trophy piak khiatna ong neih sak a, nuam bel kisa mahmah veve hi.

Ka manghilh theih hetlouh khatpen CAT min a Independence Day parade a kava laam uh ahi. Capt. Gi Moun (Gin Lal Moun) leh Flag Holder JT(Jamthianmuan) te thunuai ah nitak khat leh zingkhat laam ka zil ek uh hi. Kava lamni bang uh chu mi chi a chitak, kou bel salute lai laitak a alehlam en toh a nui toh buai a va buai mai. Consolation sum bangzah hiam toh volleyball leh a net bel ong pesam uh hi.

CAT te'n annek khopna 3vei hiam ka nei ua, tuate ah programme nuam taktak leh thupi thei bang pen in kazang zel uh hi. Hihbang a annek khopna ka neih ding chiang un budget ka bawl gige ua, a nalh mahmah khatpen phulansan(onion) leh chanam man ding budget lak ah telkha ngeilouy, a hun chiang a lah zatseng louh ding kinei gige chidan ahi. Sa lei ding mi 10-15 tan khong kakizui zel ua, sa toh huan ding allu 2kg toh lei ding chih ahi. Allu ser 2 lei a mi 1 khong dawr ah i lut mawk leh bel a dawr kidim mahmah sawm. Lawmte allu teh a abuai sung ua a man teng in Phulun san leh chanam a tam thei lamlam kuah souhsouh mai. Hai om ekek pen a lawkna kiukiu ana om vanglak eive. Annek khop ni bang a U Biak (L) Langbiaklian in meh lim deuh a ong huan pen nuam a tave. Gil ki zut hiauhiau sam hiven.

Programme ka zat chiang un career guidance, Love Guidance chihte leh omna mun chiat report kape zaizai zel uh hi. I khosung leh thu tangpi Quiz ka neih taktak uh pen thu i theilouh tam, mahmah lel. Laamna hun ka nei zel ua zukham sakham om hetlou napi suntang lai in a lam in ka laam souhsouh mai uh hi. Hibang a nuamsa tak a ka kipolh na pen uh a khen in ong thgeikhial in zukham peuh ong na hisak ua, khonung theih chiang in heh huai velvul in ong koih zel uh hi. Ka deih gige uh khatpen hoih a sak kei ua leh midang ki omlou, hoihtak in ong hilh le uh. Tuachi lah hilou khenkhat bang in biakinn peuh ah ong na gen zomah ua, kideihsak man hia bang a, ka thei zou kei.

Pasal ngen 20 ding khong kithuah khawmna ahi a, numei a omkei. Ann ka kihuan ua, tui ka ki tawi ua, kuang zong kaki sawp ngal uh hi. Quiz ka neih chiang ua ka question te uh pen theihchiat di'n a deih huai thei mahmah. Nang na thei diam anuai ha bangzah hiam kon pia a, ana dawng sawm mah dih.
1.I khua a TV(Television) nei masa pen kua?
2.I khua u auto nei mmasapen kua?
3.Sikkang inn neimasapen kua Tangnuam ah?
4.Theithuk sungkhoh damdoi a hoih bang aleh?
5.Den a innkong a nungak khat pai chet kua ngaihzawng aleh?
A dawnna na theih kim keileh CAT Senior Manager-cum-Quiz Master Apu Mung kiang ah na kan lechin ong hilh theilai ding ahi.

CAT min zang a kithuah khawmna a tawpna pen 2003 in ka nei ua, tua ah tuban kum 10 zawh i.e. 2012 chiah kimuh khawm nawn ding ka chi uh hi. Tua ka hunzat khawm nung uh tunitan ah nna tampi kikhek a om hi. Lawmte sepna zonna lam ah lohching tampi mah a om ua, zi zon lawhching hunkhop a ki om man hi. Tua kawm mah in bangzah hiam in a tangtawn mun ding uh ong na zotsan man ta uh hi. Kimuh khawm nawn hun chiang in pen kipah na toh a omloute ngaihna lian mahmah ding in ka um hi.

2012 chiang a CAT in kimuh khawmna i neih chiang un U Biak (L) Langbiaklian, Pus (L)Pumsuanlian leh SK (L)Suan Khan Thang, noute ong kiphawk mahmah ding a, ong kingai mahmah ding hi. Noute in zong na omna un van pan in hih hun nong na lungdampih ding uh ka lamen hi.Noute toh kum tam nailou a i nuih khawm lai uh bang nonlou ding chih ngaihtuah khak chiang in khasiat lamlam suak in, tha neem ngeingui hi. Leitung kikhenna gam hiven maw..bang i gen ta dia??

Ka thukhitna ah U Biak, Pus and SK we are really gonna miss you guys when CAT meets again in 2012. We wish that you guys could be with us and share our joys and happiness. But now all we can do is just saying a silent prayer saying "May Your Soul(s) Rest In Peace" Godspeed. We miss you all and Love You.

(Note: Hih article pen ongna omlouhsan ta CAT lak a kibual kha lawmte U Biak, Pus Leh SK phawkna a piak khiat ahi. Tualou in a mun leh a hun chihte ka theikhelh khak a omleh lawmte'n ong ngaihsiam uh thuum ing.)