April 22 ni ahi a. mail ke check leh "Tangnuam khua kum 62 chinna in magazine bawl kisawm a, thu hong puak in" chihna kava mu hi.Ken zong banghiam beek gelh ning ka chi hi.Ka gelh dek taktak hial chiang in ka gen ut a tamlaw phing a, koi a pan a koi ah zou ding chih buai in ka buai pih leuleu hi.
Tangnuam ah inn-le-lou ka neih louh hang un, ka pianna leh khanletna khua ahih man in ka kineisak mahmah hi. Ka omna munmun pan in Tangnuam ah bang piang?? Bangthu thang?? chihte kana bildoh det khat ahi gige. Ka kineihsak mah bang in, ka omna mun mun ah I venglam a pan hong zin chih bang ka theih leh ka delh khial ngei kei hi.
Ka lungsim a om theizel thu tamlou kikum leng ut huai kasa hi. I khua pen "kho kithu tuak hi" ka chi utmasa. Khodang te'n Tangnuamte' kheldan/gitlouhdan achih teng un, ken bel a kithu tuah man uh hi ka chi lel hi.A dikmah ahi.Nidang a te muh toh muhlouh toh in ana kithu tuak mahmah ua, etton tham ching uh kasa. Ka manghilh theihlouh a kigen khat ahihleh khua kiim ah Football peekna a om a, final a ki lut ngeingei leh zou in zou keile Cup ei khote' a chih nalh kasa mahmah hi. Zawh leh bel ahisa, zou keile bang chi cup lak ding chih pen a nalh mahmah khat ahi. Kimawl na zou a Trophy piak khiat ma in programme saulou a neizel uh hi. Tua hun in memeorial trophy neitu suunna hun kunkawm in a nei uh hi. Tua chi a suunna hun neih a hih sung in pasal 2/3 toh numei bangzah hiam in trophy puan a va tuam in paimang pih hiau chih ahi. Sakat mahmah lel chi ou.
Ka gen ut takbel, cup va guuk a hoih ka chi kei a, a chiin chi zong kasa tuankei.A hih hang in tuazah ding khop a ana ki thutuah na pen uh atton tham ching kasa.Numei-pasal chih omlou in a hih theihna lamchiat ua'h ana pangkhawm siausiau uh hi. Tu hun in hih bang pankhopna i neilai hia? I pankhopsiamna , khodangte'n ong en mahmah pen uh i kembit zou lai hia?? chihte ngaihtuah tham ching kasa.
I khua pen "kho ki-itte" ihi. Ka gen ut takbel a sung a tengte ki itt mahmah uh chih ahi. Siatni-phatni a ki uapdan, khotang ki etkol dante tuhun sangmah in nidang in ana fel zaw uh bang kasak hun a om hi.
Kei naupan lai in(chi tei sam le)i khua ah C.W.A. (Citizens' Welfare Association) a hat mahmah hi. Khosung ah nitak teng in a duty ua, kilau thei hita ven!. Nitak bang a kholai a ong mule uh ong dawm vetlou ding ahih chiang ua maw..A mau a hih zel uh pen skul kai neite' innteng nitak teng a phasuak, lai a sim uh hiam chih enkhia hitazen uh hi. Thupi uh kasa. hunlai tak in bel ka theisiam kei a, gilou uh kasa. TV en a kipot theilou, lawmte toh nitak nung a kimawl theilou i hih chiang a maw.. Tu'n ka khonung ngaihtuah a tuabang hunlai a makaite fel uh kasa. Khua leh tui a itna uh phat huai kasa. Khopihte itna lou hileh kua'n a hun manphatak uh hichia pe peih ding?? A maute kho itna bang tul;ai a te'n nei non lou i ding ua'm?? Amau hahpan na ziak a tuailai tampi khamtheih thang a awklou ihih mel kua'n gen thei? Houchik nasa maithei. Hoihtak ngaihtuah lechin houlou hial, ana thupilua uh hita e na chih vungvung ka lam-en.
Tuhun khang ah hun paisa a makaite, vaihawmte kho-itna bang a khua it om nawnlou i ding ua'm?Tuhun in khosung ki etkolna poimoh zaw sem ding in ka gingta.Tulai naupangte nidang sang mah in a pilzaw ua, etkol a poimoh zaw uh hi. Nitak nung khong a naupang zalentak a khosung a vak hehu chih mawk, banghiam i hih ding uh om ding ahi. I khangthakte laisiam ding i deihleh eikhut a kinga ahihlam manghilh keini. Pan i la ut hia? Utlou? Eithu hilel. Siamsinna lou khosuah taktak nang omlou ahi chih phawk thak ni. A poimoh leh naupang dak bang nei phial leng bang a poina a om dia?
Tualou in poikana sak gige khat ahihleh kithu laklouh ahi. Kuahiam in poimoh sa a banghiam a genleh alang ah khat in TAZENSAM (i news uh hilou) chihsan gaih chih khong i chiindan tangpi uh ahi. Khat-le-khat kithupi sim ni. Thulaklouh chihte tamsak lawnon keini. Ei-le0ei mah i kithulak a, iki pibawl keileh kuaman ong thulak lou ding chih thei thak ni.Mi thugen khat i thulak utkeileh pautam se dahni.
I Khua in 80s leh 90s lai in khamtheih gaal ana dou nasa mahmah hi. Tua hun lai in tampi mah ana suakta ua, tampi mah ana suakta kei uh hi. Tulai in khangthak ten bang i buaipih uale? Poi kasak mahmah ahihleh zu thang a awk ki tamlua. Nitaaklam a hih chiang a lanva lam zuan a kizui dupdup chih mawk pen naa kasa mahmah. Bang ding a tuailai melhoih, thahat laitak a hibang ei siatna ding mah thang a awk kha i hi ua? Kuamah in hong hondam kei dia, nang-le-nang na kisuut thei hi na taanna thang a pat.I khua i tui i itt leh a minhoih nang eikhut a kinga ahi chih theini. Kuamah midang in minhoihna ong pemawk lou ding ahi. A sung a tengte kineisak ni. Neritu hihna lani, hileh a hoih nna tampi ong piang ding hi.
Nidang in i khua ah sing a tam a, a nuam mahmah. Tuchiang in ana kibang non kei a, sing kung tampi mah ana om non kei a, i khosung sau pipi a ki gaalmuh theita hi. Singtam na mah nuam, a khohun nuam, a huih vot chih phawk ni. Singnou suan pii bawl thak ni. Lets Make TAngnuam Green chini.
I kua kho kumlui tak ahi. Min i khua a theihdan uh gen ngailou in i theihchiatsa uh ahi. Tua mi ngaihdan dikloutak khek ding nang leh kei khut a om ahi. I khek ut hia?? I ut leh nang na mun ah kei ka mun ah mohpuakna nei ihi chih thei ni, i mohpuak chiat semkhe ni i khua a din.
No comments:
Post a Comment