I gam a nuam a, I gam gen lou ding I chih chiang inle genkhak veu in a om zel. A diak in Christmas hun bang hong naih chiang in, I gam ngaihna a lian diak. Mi’ gam ah leng Chrismas ki lawmlou ahikei a, hilehle banghiam khat a kimlou om abang!
Lungsim ngaituahna nengkhachik I pausak sak a, innlam hileh tua Tedim Road bang lun mahmah ta ding chihte ngaihtuah khak chiang in lunglen ana diak. A neu-alian, a hau-azong in ei hihtheih bang a Christmas vaidawn dia kisa a, phur tet tet a vak siausiau ding chihte mitkha ah a lang thei. Lamka zang ah mun khenkhat ah zing baihtak in Christmas la bang a khahkhe ziahziah ta ding ua, mun khenkhat ah nitak in carol paibang a omta dia, khopi hulum mahmah ta ding in ka ngaihtuah.
Lamka zangte kia hilou e, unau Zodawn lam a omte leng a kumkhat nasep gah uh, akhut suak ua piang ngei, a neih bangbang uh zuak in Lamka ah hong bazaar ta ding ua, Guite Road leh Tipaimukh Road a gari taite bang alunthei petmah ta ding. Nitaklam a khopi a hong tailut tung un bel kua ahia chia I theihngei zenpi le theihlouh di khop in leivui in hong buak dia, mahleh a hong kihahsiang ua, a hong pawtkhia uh zaw, a zanggam a omte sangmah in hong fel mel zaw pah uh hi.
I gen ut takbel unau Zodawn lamdeuh a om Lamka a bazaar dia hong kuante kikum leng chi ut ihi. A khutsuak ua piang a neih sunsun uh zuak dia hong puakte uh a kumkhiatna munmun ah van lasawn dia kuante’n I bohsak gawp dante uh, aneitu hizen ua paumanlou, a vanman ding bang uh leng amau hong kipat ua pat geelsa nei ding hi ua, huaile gensak manlou. A pau theithei in a vante rate ding gensak ziahziah, phal kei le uhleng laksak thouthou di. Amau lah a gari kham uh toh tangzou lou, huai kal ah en huai ana hamphatpih sawm. Lamka zanga teng bazaar nupite kha!
Ngaihtuah zek mah dih. Huai a van I na laksak te uh a piantheihna dia kho-ul leh tha bangzah a seng ding ua? Inn ah zi-le-ta, unau-sanggam bangzah hiam hong nuse sam ding hi ua, hiai kon puak di, huai kon puak di hong kichi ding hi ua. Ngaihtuahna lianpi toh hong kuan uh eive. En leng a dang thutuam, a kho-ul uh leh thagimna a sente bek uh I zahtak sak di uh kilawm mo? Zahtak kawmtak a a vante uh I na dawp ding uh kilawm I sa uh hia? Amaute leng ei bangbang a khosa I chipih, sapih poimoh nei a hong zin uh chih I ngaihtuah thei sam hia?
A vante uh kiman, kimanlou chih omlou a zuak khit un, bazaar hong kai ua, bang ina chi et nawn a le? Mundang ah zaw Christmas season chiang in discount tam bazaar kai nuam. Ei gam toh kilehbulh. Sum muh hun hita, vanman bang a tam diak. Maizen! A hong kuan tung ua zaw kilawplua eive ua, vanman bangleng a kilawm huntawk ana sa leng hoih di hive aw. Van khat hong lei uh, a sum uh bei dekpah. Tam ana satheilua, khem theih khem moh a khem sawm pawl ana ki om geet zel a maw. Ana khemte le eimi hikei leng zaw gen di omlou di hi a. lamka chiah ah zaw dawr 70% eimi a himawk a, vaite khem chih taktak haksa ve aw. Thalawp tak a hong kuan, a van deihzah leizoulou a inn tun ding lin ngoihngoih a innlam khegikpi toh a zot lai un, eilawi bel khongfuh kisa, khemzou kisa in i nui eu-au mai uh hi.
Bangteng hileh tukum Christmas in Zodawn a om I chipih sapihte leh Lamka zaang ah om te kal a kikhoukhiatna neusak deuh theileh, banah I zodawn a om I unaute zahtakna lianpi toh et theihna hon tunleh chih a uh huai tel!!!
No comments:
Post a Comment