Christmas ichi suk mai ua, eipau dimah bang in i zang gagaih gige uh hi. Eipau tak a va gen ding hilehang "Mang'Pianni" chih daudau ngai leh kilawm maw. Huaikha ina zatngeilouh ziak in odd sim a bang mawk hi. A bang hileh ut dandan in gen le hang i gennop pen i theih di poimoh hilel maw.
Christian i suah zawh nung uh kum 100 chinna lawm di'n i kisakhawl lel chih i genta. Christian i suah toh kituah a Christmas bangle ana kilawm pah ding kana sakleh a huchi ana hih tuak het kei ve aw. Eimi in Christmas a lom(group) a i na lopna masapen uh 1916 in Phaitong khua ah ana hi eive. Huai zawh nung tuni chiang in kum 93 chet a phata chihna. Huai ahihleh kum 93 bang Christmas ina lopna uah bangtak a gah muh ding a om ale? Christmas thupuak "Lemna, Muanna, Ki-itna leh Nopna" chihte'n gen a nei taktak hia?
Christmas hi mimal chiat in a khiatdan tuamtuam i neisak thei hi. Nang a di'n Christmas in bang gen a nei a? Kei a di'n bang a amanphatna? chihte mimal chiat in i ngaihtuah ding uh ahi. Kum bangzah Christmas ina zangta ale? Huai i na zattak te ah tuni tan a huai kum a ka Christmas zat mahmah manpha pen chih i neita hia? Huaile om ngellou a a tungzel, a tungnawnzel di bang a zang maimah ihi uh hiale? Ngaihtuah di hunkhop om ding ahi.
Tutung in i chiindan ngeina lou lamdeuh kikum daih lehang chi ut ihi. I chiindan ngeina ka chih chiang in Biakinn ah paikhawm a kumkhat sung mahmah kimu khawm a hun zang khawm gige te'n huai chiindan khek theile bang a chi dia? chi ut ihi. I Christmas message lak a khat lemna leh muanna ahi. Kilemna hih ana poimoh petmah hi. Huai ziak in hichi'n hih leng bang a chi dia?
I gam kha i gen sek bang in Christian ngen ihi. I biak-inn kibang chitchiat keileh leng. Huchi a hih dungzui mah in i thilchiin te uh leng ana kibang tangpi hi. Huaiziak in hichi'n chi leng bang a chi dia? Biakinn a ann ne dia kuan a, mahni saptuam chiat kihui tuam teltul sang in vengchih in nekkhawmna sai theileng bang achi dia? Christmas ni zet inchu a message mahleng Lemna hiven. Innsak, innkhang, innkiim-innpam chikmah a ann kuang i sawk khop pih ngeilouh i vengpihte toh Christ' min in sawkkhawm leng Lemna ann hong hi in, a manpha deuh thei diam? A message khat takkhiatna hoihpen a hong hithei mai diam? Bangchi'n na ngaihtuah?
Huchi kawm mah in thudang daih genle i lak ua kumtampi i na zaksek, chiamnuih lah bang thutak lah bang khat lungsim ah a om veu. Christmas guui! chih himawk! Guui chih chiang in na a hoihlam genna hilou phot dan in ka thei hi. Huchi a hihleh bangdia i biakna toh kisai a nithupi i neih sunsun telak ua khat guui mawk? Bangdia kua hiam in siatpih mawk? Koi a kua hih khelh hita ding ahiale? A Christmas message mahmah enle hang ei siatpih ding message khatle tellou, huaisang mah a kipah ni ding, lungdamni ding hizenpi. Eilawi in a koilak zui a ana lawmkha chitcghiat i ding uam ah. Nungak-tangval tampi a dia siatna tuntu Christmas hi mawk!
Nna khat peuhpeuh a foundation a poimoh petmah. Nang, Ken Christmas bangchih na dan in ka thei a, na thei a? Huai in hiai a tung a i buaina tengteng hong dawng kha thei ding ahi. Hun paisa bangtan hiam lai khong in Pathian phat a lasak khong nuam ana salua ua, zan nih/zan thum khong ana zanhahpih ua, lengkhawm inn ah nungak tangval a kim duam ua, tuhun in khovel in khanlam a manoh ta i chi ua, i khangdik uh hia? Christmas ni in na peih liaileh Vengchih a lenkhawmna innte va en mah! Lamdang nasa ding. Nupi-papi hat nawnloute lunglut tak a mitsi diaudiau kawm a lasa in nava mu dia, nungak-tangval thahat laite bel 2/3 kan nava mukei di. Hiai in genkhin sim maw.
A damlou banghiam nasa maithei, teuhlou mai. Koi hiam ah lawmta party/ sangkang/ zudawn in eive i muh maimah ding. Aw! Hiaiziak a Christmas guui i phiangsan ve ua le maw. Lawmlawm!
Bangteng hileh 2009 a I Message di'n Lemna hong hihenla, kuapeuh a diak a keibang a nungak-tangval laite'n Christmas guih louh hamham sawm ni maw! 2009 Christmas zatnuam chiat! God Bless!!
No comments:
Post a Comment