Driver Loupi Brake Khaam

Ka ngaihdan hihet lou bilbel khat chu, mi kuahiam in a ngaihdan hon gen di. Huai i ngaihdan a hihlouh ziak khong a hiaite khawng gengen louh di kichih mawk pen kha ka ngai thei hetkei bilbel.

Etsakna dia: SSPP Net bang mituamtuam ten thu khat peuhpeuh in a ngaihdan uh hon sungkhia un chin, huai kikum khawm laihlaih, a lunglut teng. Huchi bang a khat in tha tampi leh huntampi mah seng a, kup huai a sakthu khat hon vawk khiak kha khat in huaite gengen louh di khong ana chihsan pah phelphal thei mawk kha ki om zekzek inchin. Zakthadah huai kasa petmah. Huchi bang mite kha Driver lah hilou a Brake khaam ka chi mai.

I lunglut keileh kuplouh di, kup di theih kei leh leng daih mai di. Thunei pen ka hi, kei mi'n hon thulak, kuaman hon seel ngam kei chi hi awmtak a mi bang kham gaihgaih chihte kha.. GET LOST! chi ut phial ka hi. Tulai khovel ah bangmah kuamah theihlouh dia iim zoh om nawnlou. Iim-iim lengle a thei ut taktak ten thei khe thouthou di uh. Kuplouh ding, kupngamlouh chihte i hauh luat ziak ua, i nam himhim le hichia i kiim i paam a te nuai a ki om hita lou hiam ka chi.

Policy bangmah i bawl kei ua, i gen khawm kei ua, poi hilou hiam. I pai dan ding i geel tengteng va gengen ni chi khang. Mahleh i hihna peuh mipi support lou in bangchi bang heutu hilele lohching lou ding ahi chih i theihsa ahi. Huai ahihnung mipi lak a i paidan, i tup, bangtan tungta? Bangchi panlak touh lai ding chihte gen zelzel hoih kasa.

Thu kha kigen ta, ngaihdan ki kum ta, gen zel lai d, kum zel lai ding ihi a, huchi bang a thukupkhat a om teng a, kilung piching sak a, mi' ngaihdan di chauh ngaihtuah a,mi' thangpaihna hikha inteh chia brake khaam sawm gige te denchiang in kuamah toh kituaklou in, dinosaur bang in a mang kiuhkeuh(extinct) mai di ua'm ka chi. Nang na chi hia??

Vial Mahmah

I lamet leh i deihluat MDC election zou in Chairman ding kitelna na tan i zouta a, kipah huailua. I kipahna sawnsawn bel Chairman bang midang hihetlou, eilak mi mah, ei lak thouthou a leng SSPP Gen Hq a President dinmun ana len ngeita. PTC bang a leng President hizomah. Chih chiang in bangchi lam ah mipite lunglut uh a, bangchi lam a pii ding hiam chihte thei mahmah di'n ka gingta a kilawp huai kasa.

Kichiamna khong ei Lamka District DC mai ah kichiam ding in Phai(Imphal) va zot doidoi chitchiat bel a hi ding mah ai diam chi ing. Kei ngaihtuah dan maimai in bel talpakte mai etna khat hipah hiam ka chi. Ei Singtang mi ngen in kichiam dek, a kichiamsak ding ei' DC hi sawnsawn, bang dia phai va delh sese i hi ua lem? A dawnna theilou hing.

A omdan takbel Maoist te khong hat na state te ah, a assembly uh khong buaikha, MLA chingthakte a Governor uh toh Delhi ah kichiamna nei dia kuan ding chih hileh kilawm kasa. Mi a gam uh bangchi tuk in buai leh leng ut lou ding uh eive. Mi chihlouh ei MLA te mahmah leng Delhi a Manipur Governor toh kichiam din a zin ut ding un ka gingta het kei. Hihfuh kipatna ai diam? Hihkhelhna masa ahi diam chih buai huai kasa.

Manipur Govt. in tua NAGA lamte'n MDC/ADC kiteelna deihlou lua ua, huchi kawm mah a Hill District dangten kipah pih mahmah uh ei chih a show na ding ua hon zang lel uh ei diam khong ka chi mai ka chi. A dik diam ah? Kei mimal ngaihtuahna lel zo hisam e. Nou bang ngaihdan na nei di ua'm ah?

Hichia a bul patna a kichiam di lel a le mi' khemzoh a ompah i hihleh i maban a hih ding i sawmte uh bangchi bang lel in hong hitou diam chih bang le ka ngaihtuahna khat hinawn geet. A gal a pat ngaihdan gen lel mah hi mo a tawpna a i hih theih guai...

Nase mahmah

Zan 20th June 2010 a kholum lawmlawm chu aw.. a gen d danle ka thei kei top. Lumlua chi i va kisil a, kisil khin kinul sung a kho-ul kai zoihzoih mai tel. Haksapi in suunkhua i zangbei a, zaan a hon vot deuh di chi'n i ngaklah mahmah nawn a, katamai! Uang deuhdeuh a bang! Sa deuhdeuh.. Zaan a lum, lupna puan salua chi tuangtung a ka khe zankhe phei a, aw maizen! Puantung sang in a sa zo lai.

June 21st Zingdak 4:37 chet in ka thou a, kava kisil a, office kai dia kon kisa chu aw maizen! Kisil khin phet chilou in kho-ul in buak petmah in hon buak nawn.. Sih a teel huai zo phial.. A haksa lua.. Kholum mahmah haksa ka sa.

The Unsung Heroes

I gam ah mithupi, lian leh zahtak huai tampi ana piangta, I om lel, I omtou zel lai ding. Huchibang a mithupi, lian leh zahtak huai chia I theihte a tangpi in amau hihna toh kituak dinmun I pia, I zahtak, I liansak. Amaute ziak in I chi-le-sate mi’ theihbat leh phawkbat in I om. I vangpha a, a kipah huai.

Tua a tung a I gen dan hilou, mahni mimal tak a contribution lianpi ana nei, kuama’n lah I phawk khak hetlou uh tampi om ding hive aw. Huchi bang a mimal tak a siamsinte ana awlmoh, a biiktak a I zodawn siamsinna ngai khawk, I zodawn awlmohna taktak toh ana awlmoh, pan taktak a ana pang a, I khangthu a omngei nailou omsaktu, I zodawn Sinzawl a pat pawl X candidate 9 omlak a 9(mi 4 in I Div., mi 5 te’n II Div) in pass! Thupi I chi lou thei kei. Hiai tan tunna dia pan ana la Siamkhankhual Dousel @Sir Khual ahi. Nikum June kha lak vel in hiai naupang 9te a tenna inn Zoar Veng, Bungmual ah samsuk in zindou, nek-le-tak teng aman si vek in, lehkha ana hilh hi. Huchi bang a a kipiak zohna thupi leh etton tham ching kasa.

Huaitan mai ah hun sak lou in tukum a exam ma kha bangzah hiam SSPP Complex a naupangte kikulh na mun ah @Sir Khual leh @Sir BC Nangpu in nase tak in ana kibeih huan uh hi. Sinsaktu lak a le naupang awlmohna nei taktak a theihtheih mai hi. Lohtam pi sang a sempeihlou te toh etkak in zo kikhai sak in a om aka mo. Khenkhat te’n bel loh piak a a omna mun uh a zuan peih kei ua, huai ziak tak mah in I zodawn siamsinna in masawn lou in, a tualniam ngei in a niamlai hi. I govt. skulpu neihte’n lah puahlou ahihman in I zodawn siamsinna ngaikhawk saptuamte’n mission skul khong bang pibawl ngai zo mawk hi. I saptuamte semi-govt. bang phial a om ngai mawk hi. Nna bangmah a pai di bang a a pailouh man ahi.

A khen a di’n lehkha sim ut bang Lamka a skul hoih tam, lamka hong zuan mai le uh eive le I chi kha maithei. Mahleh Lamka I chih gaih bangle a om te a dia omzoh lotelna in chin I zodawn a neektawm zongte’ a dia thil namailou hi zel eive. Naupang khat Lamka a Skul hong kai theihna dia ompihtu muan huai poimoh. Huchi hilou a, amau thu a a om mawk chiang un Siatna sang, huai ah kibual khak baihlam. Piching nung nangawn a siat di kikhel lou chih I theihsa ahi. Lamka khopi ah enkoltu bei in bangchi’n naupang khat mah-le-amah in a khosuak mahmah dia?

Tutung Pawl X result a pan a muhtheih bel, I zodawn a omte khuak in Lamka a omte khuak a phalah kei chih a chiang kilkel hi. A kum tawn a hilh le hisam lou, kha bangzah hiam lel @Sir Khual in ana beih zek leh pass vek mai uh chih himai. A poimoh uh ahihleh deihsakna tak leh ittna taktak leh awlmohna lianpi toh amaute laihilh ding a poimoh lel uh. Tua @Sir Khual leh @ Sir BC Nangte’ thilhih kha I gam a lailam a khanlohna tuntu hong hileh I chi peetmah. Gam bawlni I chihleh lehkhasiam ding bawl le gam bawlna himai ahi.

Tua Convention Skul, Sinzawl a pat Pawl X exam dite a kisak kholh lai un, I unau Japan a omte (Aid Zomi Japan) in sumtampi mah pia in ana kithuah pih zomah uh hi. I gam a siamsinna I ngai khawk ua kipah huai lua. Tunia I result muh pen mi bangzah hiamte ana pankhopna gah uh ahi chih I thei. Pankhop huailua, tha tampi I lak na uh hileh a chih huai peetmah.

A tawpna ah Sir Khual, Sir BC Nangpu leh AID ZOMI JAPAN te zahtakna sangpen ka pia hi. I gam a dia na nasep uh a thupi lua. Naupang khat hinkhua bawlsak mai hilou a, naupang 9te hinkhua a dia chabi honsaktu na hi ua, na thupi ua, phat tham na ching ngoigngoih uh. Noute na hih uh “The Unsung Heroes” ka chihte. Kudos to you Guys!



[Tua pawl X passte lemlak na et uh leh hiai http://www.aidzomi.org/ click ziang in. Sir Khual interviu na na sim ut leh http://zogam.com/index.php?option=com_content&task=view&id=6532&Itemid=32 click ziang in].

Tawmkha Hap Ve

I kholak pau a thang mahmah khat “hap” ahi. Dawr ah vanlei a I hoh chiang un “kapu/kapi, tamlou hap lai ve” I chi sek uh hi. Hunta chih neilou mihingte ihihna tak uh ahi. Tehna ser a kizang, mahleh thil hong teh chiang un a buuk deuh ding I deih teitei. Hap zek teitei I ut. Hapchi hia chilouh chihleng omlou a hap gaihsiang ut te ihi. Neulai a manggan(chana tang) I lei chiang in khaini bawm dim khat makhai(50paise) ahi.Huchia khaini bawm dimkhat toh tamlou kha hong koih sak chiang un kipah huai kisa tuam se hi. Sumbuuk neu khenkhat in tunsa in a zuak ua, ana hapsa uh le ahi maithei. Huai dan a tunsa a koih a hong pegaihte’ kiang a manggan lei sang in iva lei toh kituah a hong tun tawm ua, hong hap zek un kipahna hon tun zo in ka thei a, nuam leng kasa zo.

Huchi mah bang in nna khat peuhpeuh I sep I bawlna ah a zaal zoutu mipite a di’n tamlou khakha hap zek thei le I gam nuam in tenna taak mahmah di’n ka gingta. Lampi bawl te’n le amau a di chauh ngaihtuah lou in nengkha chik hong hap uh henla hileh I lampite a maam in a nuamtuam mahmah ding hi. Huchi hileh I pucca roadte tung ua antang buaksak ding a lauh huai kei dia, aak in I lampi a thaisiat ding a lau huai kei ding hi.

I Pathian thu awina ua’h le hithou, ei mimal hamphat pih ding dan a Pathian thu khong kaih zialzial sang mah in midangte’ a dia phatuam ding I hinkhua ah banghiam hap zek leng I biak innte a awng kei dia, kikhawm ding mi sapsap, zotzot ngailou in I tu dim phitphet ta ding hi.

I gam I chi a tenna taaklou gam I suah uh hi.  Gamnuam leh thoveng tak a hin hun ana om tham hi. Khohun nuam tak, neek limtak omna, zodawn tuisiang luang vot chenchen, dangtak laitak a I dawn leh thildang bangmah lunggulh hetlou a omtheihna khop a tuisiang dawn ding neite ihi. Huihdam vot hiauhiau in hong sem a, gim leh tawlte a dia tawldam zohna di khop a zo huihkhi siang neite ihi.

Tuni’n zodawn tuisiang, zo huihkhi siang I chihte om nawn kei. I gam I it louh ziak uh hiam ka chi? Gam maang chih ding a vang mahmah ta. Singkuang lian pipi chih muh ding a vangta khop mai I gam ah. Bangchik kum a diam ah ka thei nawn chet kei. Haiciin(Myanmar) khua ah kava zin a, lampi dung louzau a aneih kum uh ahi. Lou singphuk khit na nung ahi na a, etton taak uh kasak mahmah khat bel khualzin, gamvakte a khual mahmah uh chih a nasep ua pan a lang thei hi. Lampi dung ah khualzin, gamvakte a dia nuam ding chi in lamdung a singte a hawi sese uh hi. Huai ahi ken ki ittuah, ki khongaihtuah ka chih. Kei lou hiven chia singkung gamphuk mai lou in amau a di leh midang a dia nisa thuak nopnang in singliim belh ding lamdung teng ah a hawi suak uh hi. Chiindan hoih leh kilawm kasa.

Ka gam ka lei ka it I chihleh midang khut ngak lou in nuam hen I chihleh ei thu himai chih manghilh keini. I lampite eimah in I bawl a, I damdawi innte eimah bawl ahi a, a thunei pente eimah ihi. Huchia paina taaklou leh belh taaklou a I bawl teitei leh I pauthei lou namdang khat va ngawh nawn sese keini. Nidang in a hihleh huchi bang a zat di zen ina tamlouh man himaithei in I gam a nasep khat peuhpeuh eimi lou deuh te’n a sem sek uh hi. Tuchiang in kidaih lo mahmahta hang. Nna a lianpen a pan a neupen tan ah ei’ area sung zet ah chu ei ngen in vai I hawmta. Tua I lungtunna dan bangtak a nasem thei dia I omtak a I gam se deuhdeuh, chihmawk! Ngaihtuah tham ching kasa.

Diktat di khong zo ka gen ngam zozen kei. I Laisiangthou in leng diktat lozen ken chi ahi chih ka za sese kha dia. Dikta lo zen lou in tawmkha chik chik I mipite leh I gam I itna ziak in I sep I bawl ah hap zek le hang zo I gam nuamtuam mahmah dia gingta ka hi.

Manthianniang@tohnu

Ka Diary Zong Ka Shillong

(I Thulu hi a simsiam lou a om khak leh a Khasi pau deuh a kon teel ahi. Khasi te’n kha Bank of India chih khong ‘Ka United Bank Zong ka India’ chi unchin, huai ziak a ka Shillong Diary chihna dan a kon teel ahi)

Hun sawtpi a pat in eimi tampite’ a dia siamsinna munpi a I na zat gige uh Shillong khopi ahi. Hiai mun a pat mitam tak in lehkha I na zil ua, tampi mah hiai mun a pat in sepna/bawlna kong ah I na lohching ta ua, a hong om tou zel lai dia, tampi mah leng I na lohsap na mun uh ahi.

Shillong hi gam kitawi litlet, taksing tamna, vuah tamna, zu tamna, sepaih tamna, leh Kom Kuva tam mahmah na mun ahi a, a gam a vot a, a nuam. Amite ahihleh aneu ua, kuva a hai petmah uh. Piteekte nangawn in gotawng a kuva su keuhkeuh in a hai uh hi. A gam takbel gam hoihlua hi’n ka thei kei. Kense lak a bang. Himahleh huchi bang a kensia a hihlam thei hetlou a hin theihna mun a hi thethup.

2003 June kha in mitampite sulnung zui di’n ken leng Shillong ka zuan hi. Bus a tokham zen a tutnung khovak philhphelh chih di’n zata’ gen Shillong vangkhua ka tungtou hi. 1997-98 kikal a kava omkhak ngei zek ziak in ka tun in leng kuamah pi ngai hetlou in Happily (Happy Valley), Assam Regiment Centre (ARC), ah ka nuneu kiang ka tung thei hi. Huchi’n kei tun nung sawtlou in lawmpa Ginthianlal@Lalneu leng hong tungsuk in amah toh ka zawlpa Lambawi (Zangkholam) makaihna nuai ah Admission Form la, submit chihte in ka diang pah hehu uh hi. Eimi bang admission zong ngen khong a lang a lang ah kipelh tuah hehu in a om a, a college kai taktak sang mah in nuam zo hileh a kilawm zozen hi.

Shillong a laisim dia kuan peuhmah hih zel dan in College etmasak pen bel St.Edmund’s leh St.Anthony’s te hiphot hi. Huaite nih a muh keileh chu a dangte kin huai lou, awl a beih theih gige chi dan ahi. Huchia bangtan hiam ka ngak nung un huai ka apply te gel ua admission mu thei dite min takkhe ta uh chih thu hong om a, lawmpa toh zing ann bang ne manlou zen mah in College lam kava delhpah uh hi. St.Anthony’s a kava en masa ua, mi ana tam petmah hi. Kouleng kei min a om ke’h kua min a om dia chi hi awmtak in milak ka va phu trantran ua, a tawp in notice board bang kava phu kha khong ta uh hi. Huchi’n min kon ban etsuk ua, en suksuk, a tawpna a omlou di sak nung in ana om kei taktak hi.

Lungsim nuam chet lou ki lung nopsak teitei chu a haksa mahmah ve. Kou gel chauh ana hilou, eimi dang tampi mah leng ana om ua, ka tam tuk un bel a mu ka tawm mahmah uh hi. Chimoh lolam bang mi’n na mu uh hiale a chih chiang un “a theikei lua uh, denchia kisiik mahmah di uh eive, hong la kei na ua” peuh ka chi maimai uh hi. Lam-etna khat omlai, St.Edmund’s! Anthony’s a min omkha louteng in St. Edmund’s ka ki delh huan nawn ua, tunchu ka tam simta uh hi. Anthony’s a kava hohsang mah un mi ana tam zaw a, ngak zek a mi a thenzek chia et theih hizen pi, huchi di chihna lungsim leng kinei theilou in milak phut petmah in kava phu nawn uh hi. Huchia milak ka va phut lai un a nuam hetlou, lah phatuam mahmah khat kava tuak kha taget hi. Huchia milak phu a ka buai lai un mi kawm lak pi ah mikhat in “Sir, Sir,” chi’n hon na sam kaukau mawk hi. Huchia admission zong a ka min om hiam chia kiphu noinoi lak a khat in Sir, Sir hon chih khiat mawk leh ka mai lam ate le dak duamduam in a kihem sosouh ua, painang hon awn zozen uh hi. Pautam lou in lawmte toh kizui lutsuk in min kava ban et ua, lawmpa khat Mang (Thangzamang) min chauh ana tuang leuhlauh taget a, a dangte chu a omlou hizel mai,

Den a Sir a chihpa uh min omlou mai chu a zumhuai takzet ahi. Sir, hon na chihna ziak kon gen vanglak di. May, 2002 a pat March, 2003 tan Lunglei a Teacher toh Warden thuah in kava om ngei hi. Class sanglua vala kei mahleng ka omna skul uh Class X tan ahi a, huai a ka naupangte uh Higher Secondary sunzom dia Shillong a hong kuan, amah leng St. Edmunds a admission zong a om in hon na mukha, hong muhtak a hon na ngaina lua a hong na sam ek-ek chidan ahi. A zumhuai deuh a hive’n a phattuamna le a om aka. Haksa hetlou a min bang va ki enpah thei hiven ah.

College admission zonna lam in lawm bang tampi ka neih beh manta hi. Amasa in Lal toh chauh ka hi ua, tun chu Thamuan (Thangkhanmuan), Mamang (Khailienmang) leh Thathang (B.Paukhanthang) chihte toh ka kimai kha ta ua, amaute toh Shillong a ka hun zat sungteng ka ki pawl den ua, ka hinkhua a dia na tampi ka zilna leh thil kilawm leh hoih tampi hong sinsaktute a hong hi uh hi. Kuansan college te’ a lah kichinglou chi in Bissau College, Laitumkhrah ah admission ka bawl uh hi. Mi’n koi a kai hong chih chiang un Bissau College, opposite St. Edmunds ka chi thouthou sek uh hi. Edmund’s bang kha ki genkha ut teitei sese chidan ahi. Hiai a thil kikhel mahmah ka theisuah phing ahihleh Cl-XI leh XII simlai khong a lecturerte’n na college kaina di uh tua na Cl-XII percent un gen di ahi, lainak pi’n sim un hong chih lai ua, kipilsak a, ka thulaklouh laite kisik huai hina e ka chi vongvong a, lah a kikhel ahita si a…

Shillong khopi ah kum 3 sung ka hun zat hi huai a pat tuni tan a dia kalsuan dan bangkim ka zilna mun taktak ahi a, manpha kasa a, ka ngaihhtuah kiik khak chiang in Shillong lou mundang a pai hileng bang ka chi de aw ka chi vungvung sek. Student-Family Relationship hi Shillong tuk in mundang ah a hoih de aw? Ken ka theihlouh man eide aw ka chi. Family te’n studentte a deihsakna uh a thupilua. Nu Niang w/o Pa Khen (H.Chinkhenthang) in lampi a kituak phut hong chibai a, thumna I nei zual di chia lam nawl deuh a hong dinpih a, hon thumsakte ngaih huai hina e! Huaikia hilou, meh khatvei na leilouh uh leng phatuam di, student na hi ua, hiai khatvei na meh un chia a khutsuak ua piang ngei squash (biscuit) polythene a a tunsa a hong piak sekte bang manpha hina e! Kipahthu siamtak a genna chang lah kana thei kei ngal  a!

Motinagar a innluah a om, ka inn kiang ua Pa Muang (T.Khamthianmuang) te nupa hon deihsaknate uh thupi hina e! Manpha hina e! Nu Hau(Hauniang) w/o Pa Muang in a ofis ua pat a paper note gelh nang a lomlom(bundle) a hong puak sekte, hong puak a inn a om hongla un chimai lou a, amah mah in hong piak tenten dante khong thupi kasalua! Exam zou a innlam paidek chia kumkhat laizilna damtak a zouthei kipahthu genna ann I nekhawm di uh hon chihte uh..ka manghilh ngei kei, manghilh di’n le ka phal kei bok! Motinagar AG Quarter ah om Pa Muan (G.L.Romuan)te nupa felna leh kipiak zohnate, U Khum(H.Hauzakhum) mi ngaihnat siamdante, nou a bang koi a ana zil tuam na hi ua oi chihchih di’n hoih kasa.

ARC a om sepaih zite’n lehkha zil a omte a deihsak dan uh ka manghilh thei kei. A sepaih ration ua Chini ana la ua, dawr a Rs.18/kg ahih lai khong a amau Rs.11/kg a hong piak dante uh leh sepaih canteen a pat niteng vanzat ding sabon, surf chihte kiman tak a honna laksak gige dante uh, a hun tak in ka leimah hiven kana chi a, hamphat huai tuanlua ahihlam kana ngaihtuah ban kei. Kipahthu hunlem ka muh masakpen ah ka gen di. Toupa hunlem hon pia in chihkan ka hihtheih lah a om kei ngal a…

Ka lawmpa Davis Tonsing (Thangmawi) hon deihsakna te manghilh hak hina’n chia. Kong bangkim a kei a di’n a kiman sak gige. Phun hatpi leh hehbaihpi himahleng khatvei mahleng hon hehsan thuk kei, ka buaini in hon taisan kei a, khotang leh biakna ah hon makaih gige. A hon makaihnate thupi leh lamdang! Buaina a lianlua, aneulua omlou in U Mawi ka chihteng in ka gen tengteng ngaikhia in thupi kei chi hetlou in non suk vaiven pih gige a..Oh! bangchi’n kon thuk kiik nawn thei dia?

Shillong ka omlai a EBCC Pastor a om kha chet Rev.Pumkam, Pa Kam ka hinkhua a dia na lamdang pipi leh ka kalsuan dan ding bangkim ka zilna na hi. Pa in ta a kep bang in non kem a, non thuhilhna leh deihsak nate thupigen hina e! KHUBLEI SHIBUN mo Pa Kam. Nang toh I kituah ma himhim in Pastor kichite kiang a om ngam di’n le kana koih ngei. Ka pum zahtak a, a kiang ua om chia Pathian thu kia gen teitei di peuh kana sa mai a, Pastorte leng mihing mah, buai thei, nuithei, dahthei, hehthei leh kipak thei ahi chih chiantak in ka zilkhia. Thutak a kihou ut selua a I kimuh na mun mun a iki chiamnuih vak dante khong ka ngaih vungvung ni a tamsek.

2003 SSPP Founder Sports lastday Football Final kha zekai gawp. Khuamial, kimawlte lah a hun beinailou, I milian neihte gari light a side tuamtuam a pat kap a a kimawl sut zop chenchen mai khawng hun nuam hita ven. Eimite zaw ki hampha eive. St.Edmund’s ground bang kuamah khelh dia a phal hetlouh uh SSPP in ki zangkha thei mawk! Conference neih chiang a Pa Khen (H.Chinkhenthang) in siamsinte deihsakna lianpi toh a thu hilh na aw khum ngingeite kha zaknuam ata ve.

BYF kikhopna Bethany Hall a nei a U Muan (Thianlalmuan Ngaihte) in awm bang phousim eu-au a kihei deidei kawm a Lydia (Ching Lydia) toh la hon pi taktak uh bang zaw, nuam hiven. U Khup(Dr.N.Pauzakhup) in tomkim tak a sharing hon bawl a, Jeremya Tunglut aka OBAMALADEN in necktie ok zezat kawm a chitak deuh a hong tai gamgam bangzaw, kiliing mai sam eive.

BYF kikhop zou, mipi kikhop na dia KJP Biak inn 2pm-4pm kikal kikhel sek, huai dia ki hon zuihsuk zaizai bang, hun nuam ana hilua hi’n maw. Kikhop na a Pa Chin (V.Kaikhochin) kilawp tak a hong laam bang zaw ngaihtuahna ah Isai 40:31-32 “Tuailaite nangawn leng a bah un a gim ding ua, tangvalte leng a puk zou ding uh: Toupa ngakte’n zaw a hatna uh a thaksak nawn ding ua; muvanlaite bang in ka in a lengtou ding ua; bah lou in khe in a pai ding uhi”, chih lamlam bang a pawt khe thei mawk hi.

Kikhawm tawp to a khu pawt zen a taina di neinailou teng khemah a kiik nawn a Jacob’s ladder tou a pai kenken a, a sak deuh a New Land Restaurant a jadoh va nek geih bang zaw aw, I gimna teng reh vengveng zou hial eive.

Kum 3 hun ka zatna Kong leh Bahte’ lenna gam ah thilhoih, manpha ka damsung a ka kep ding ka zil a, a hoihlou leng tampi mah kamu. Shillong hohdia ka kisak lai a meltheih khenkhatte hong chihna “Shillong a pai di na hihle zaw zu-ngol veisa in non tung di mo, zu tam dan lah anak gen ua” chih kum 3 ka om sung a ka challenge lianpen ahi gige. Huaite hong gente bang ka pakta zozen. Aziak bel a thil gen uh diksaklouh teitei tum in kava pang a, ka hinkhua a ka paipih ding khat ka muh khiatlohna a hong hi zo hi. Huai bel, koimun, koimual ah om leng I hoih ding, I siatdan ei khut liuliau a kinga ahi chih ka musuah thakthak hi.