Khovel hong kihei lamdang zel in i duh i deihte bangle hong kikhek zel hi. Hiai pen khovel pai ding dan a hi him hi. Kikhek ngeilou in om meimuih nilouh mawk le lungkham huai lo ding ahi mai mah chia. Duh kikhek, deih kikhek chihte a khovel in hong puaksuah ahih tak man in nu-le-pa te'n le hiai kikhekna pen theisiam kawm tak leh pilvang tak a i om uh poimoh mahmah ding hi.
Nidang a i khopi sung khong ua Meelmuh Tongsaan(TV) vengkhat a khat a om hunlai i peelta. Inn teng phial in muh theih ding i nei vekta ua, TV tan a hun lou in taithei tuamtuam ban ah mobile chihte'n i gam hong luahta hi.Hiaite a kikhekna pen a hoihlou i chi kei ua, a hoih lua. Khantouhna thupitak ahi. I khantouhnate a hoih mahmah lai in i ta i nau ten bangchi lam in a hamphat pih ua chih ngaihtuah tham ching hi.
TV inn teng phial in i nei uh chih i genta. I et ut ut meek khiat geihgeih a tut mun ah et ahita. Nuam mahmah. Khovel thuthangte a thu chauh hilou in mit mahmah a mu in i enta uh. Kithuzakna a kinsak mahmah. Huchih lai in a hoihlou lamle ana omlua. Numei-pasal kal a thanghuaitak a gamtatna te bangle muh ding a om gige. Sapte'n a mau society a chiinte uh bang, korea ten amau culture bang i lakuah naktak in hon zuak zou hithet uh hi. Mipilte suidan in mit a muh in 80% vel i lungsim ngaihtuahna a zou thei a chi uh.Gintak huai mahmah. I gam a hiamgamna chihte nu-le-pa kal a thangtatna chihte hiai i muh mun te un hong tut ahi chileng i khial lawmlawm kei ding. Mi'n mit a muh a kilawm dia a ngaihtuah uh, sum tampipi seng a a bawlte uh en chiindan a i hong neih sawm chiang un, hiaitak chiah ah ahi, a hoihlouhna hong kilat geih.
TV culture a pat mobile culture ah i lut tou ua. Kithuzakna hong kinsem a, nuam mahmah ta. Khovel bang hong neusot lua a bang pah hi. Mobile in i khovel a kheng lamdang hithet hi. Zogamthuthang, Lamka Times chihte bang a hoih in a saitute pahtak huai mahmah uh. Mimal phattuamna chauh hilou in i khotang, i nam a dia hoih nasem ahi uh chih bang manghilh a baihsam. Manghilh mailou in kithuahpih ni. Hilehle mobile culture pen in TV culture sangmah in siatna hong tun ai zaw de aw chih a ngaihtuah theih hi.A ziak bel naupang chikchik te'n nu-le-pa tampite' hih theihlouh message gelh chihte hong chiing pan ta. Tua message te ah nu-le-pate kiang ah a dot ngamlouh uh thu tampi hong ki kantuah mawk ta uh. Thu thanghuai pipi, chiamnuih thanghuai pipi te'n message inbox a luahdimta hi. Huai a thu gelte uh leh a thumuh uh thanghuai deuhdeuh ten a lungsim uh luah in khangthakte lak ah isatna lianpi tun thei mawk hi.
Damdawi i chih bangle a poimoh na muntak a zat kha ki dampih inchin, eilawi in bel damdawi dampih lou in sihpih kihi maimah. Nidang in No.4 chauh khamtheih ina sakha a, ana hilou in damdawi chikim khamtheih ana hi ahi chih theithak ni.RP dawdawi nesekte gintak khat "RP i neekleh i vun hong maam, i complexion hoih, i chi nou" chih hitel ahi. Hiai gindan a dikmah ahi. RP tang hong neek chiang un kham in bangmah a hih peih kei ua,a ihmut uh a suak a, huchi'n nisa bang mulou in RP kham in innsung ah hun a zangbei sek ua, huai in a chi uh nousak, a vun uh ngousak ahi chihte thei ni.
Khangthakte lak a siatna tunthei chi thum(3) i genta. Huaite a pat i khangthakte bang chi kepbit ding i hia? Nu-le-pate'n i tate'n TV a et chiang un banglamte a en ua? Banglam in a lungsim uh a zou a chihte i theihpih poimoh mahmah hi. I lup khit nung khong a i tate amau kia khong a TV a ut tantan uh ensak i hih khakleh ki en thak ni. A et te beek uh theihpihle a hinkhua uah na lianpi sem kihi ding ahi.I taten mobile a zat uh chiang in bangthu a gen ua, bangthu message in a gelh ua chihte leh bang hih a koimun a om ahia? Bangdia naupang thahat ding lai thazoitak a om mawk uh ahia? chihte a dawnna i muh kim chiang un i khangthakte siatna a pan i hon khe thei ding chih a gintak huai hi.
No comments:
Post a Comment