Khovel kihei zel bang in i hindan leng a ki hei gige a, na tampi i lam et louh tantan hamphatna te ina hamphatpih kha hi. Siamsinna lam ah leng kalsang zaw i suan ua kipah huai chih ding ahi. A nei aneilou chilou in school i kai sipsip phial ta ua, khantouhna lamdang! i chi ahi. Zoudawn lam a te'n leng amau ommun a pat a hih theih tantan uh sim in aban Lamka zang ah hong sunzom ua, siamsinna lou khosuah nang omlou chih i theichiat tak ziak un thu kipah huai ahi.
Huchi in kumteng in Pawl X leh XII exam i gam ah tampipi omsek a, tampi mahl;eng i lawhching zel uh hi. Hiai bang a exam te i panpih theihna tawp chi in veng tuamtuam in Thawmging ngaihluate bang, husa hoihloute bang exam sung a omlou ding in i kingen ua kipahpih huai lua. A maute'n leng a theihtawp suah ut in a phe tettet zozen ua nuam mahmah.
Huchih lai mah in ngaihtuah tham sak a om bel kumteng a Pawl X leh XII exam dek chiang a mei(electric) pai ginalou chih gige pen bang chihna hita ding?? Khang khat khit khangkhat in i thuak tou ua, thuak tou zel lai ding i bang uh, hiaipen bangchi hiam a panlak dan om theilou ding ai diam?? I theihlouh, chikmah a i pal ngeilouh palkha i hikei a, i thuak thuak sa, i theih sa sa thuak tou zel i hi ua, kuate' panlak na a koih ding ahia?? chih ngaihtuah tham ching kasa mahmah.
Hunpaisa a electric om hetlouh hunlai in bel meivak neu khong toh lai a na sim ua, bangmah lamet pi leng anei tuan kei ua, a hi theithei uh hi. Tu hun khang in a hihleh huai hunte i peelta huai sang a lam-et sangzaw nei in i khosa ta hi. Hun hoihlua hikei leh le a paidan khat theih theih a omsek pen hiaibang exam huin chiang a theihtheih louh a a om mawk ngaituah tham ching lua hilou hiam chih in om hi. Inverter i neivek ta ua hilele huai charging nang nasan mei pai zoulou mawk?? Lamdang!!
I gen ut tak bel khonung pil chih thupil neite i hi a...huai diksak sak lai ding i diam?? Khek hun sa nailou i diam chih ahizaw....Siamsinte khualna beek in hiai kuahiam in panlak dan i theithei ding ua'm??
No comments:
Post a Comment