Tulai i kim i pam ah kikhem na om vengveng hi. Namdang lak a kikhemna ban ah eilak mahmah a leng hun paisa in om zeuhzeuh ta hi.Mipi lamte a ding in banghiam pilvan na ding om mahmah leh kilawm sak in om hi.Zanzek in leng S. Shyam Kishore Singh @ Awangbi Singh (48) S/o S. Kaobi Singh of Wangjing Wangkhei (Thoubal district) in mi nasepna ding piak dia a chiam mi 8 toh mat in om hi.
Hiaithu bang pilvang tak a ngaihtuah thei te a ding in ngaihtuah tham ching hi. A ziak bel Tipaimukh a Dam nasepna hi tuma in leng bomb siat in na om ngei hi. Huailou in leng daltu om neuhneuh a, nasep lamzangtak in ana pai ngei nailou hi. Huchi hitaleh sepna hong pethei ding chia Tipaimukh Dam a sepna om chih pen muan huaimah ai diam?
Hiaibang deuh in tuma lam inle ei Zomite lak ah kikhemna ana omngeita hi. Khopi a sepna pe ding chi a mi zong, sum bangzah hiam ne, khopi tunchiah taisan maimah chihte ei lak ah leng hong ki za zeuhzeuh sek hi. Huaibangte a taihsan na nung uah a omna mun ua pawlpi/saptuam in nakpi in buaipih kha naksek uh hi.
I gen ut tak bel kikhemna i chih i tuak ta ua, i tuak zel lai ding ua, huaite lak ah pan bangchi pilvan theih ding? chih ahi. Huchibang a sepna pethei kuahiam in gen leh sak a neih chiang in a gen na mun lam ah meltheih muanhuai i nei hia? A mau a pat hiaibang thu aom a non kanchiak sak thei ding ua'm chihte kan masa leng paikhelh vang deuh di'n gintak huai sak in om hi. Huchia kuamah i theih a om tuan kei leh huai a gen na mun uah bang Pawlpi in a kivai puak ua? A maute kiang ah kan masa thei le hang hiai kikhemna khovel a pat i suakta zou ding un gintak huai hi.
Banah sum muhna chih man zen in naupang chikchik, kum chinglou phial te khong enkol ding hoihtak mundang, gamdang a nei i hih keileh nu-le-pate leng pilvcang ni. I ta i nau te sum deih man in khopi khong ah sawl mawk kei ni. A maute buaina i mipih omte buaina lianpi tuaksak ihi chih thei ni. Mundang a nasep chih man zen a a nuam dia ngaihtuah na nei khenkhat om i bang hial ua, huai ngaihdan bangle hoihtak a kan chet masak ding ahi. A diak in numei a ding in gamdang ah nasem dia hong paikhiat chiang un nasep hunte bang kikheng in numei a dia bit huailou pipi hithei hi. Huai ziak in kikhemna khovel ah i om a, a dik toh diklou tawh i za zel lai ding ua, huaite lak a pat pilvang ni. Sum lawh dia kuan a, mi' khem chavaih hikhak ding pilvang kawm in gamtang ni.
Pu Dam, hon gelh hoih zel mah mah chiah..
ReplyDelete