July 10, 2010 ni in ZMW leh Zogam.com teamte kipolh limna dan in football kimawlna om a, ka va tel tei a, gintak sang in ka hat kei khop mai. Minute 15 ka tai zou hamham de aw chih in pai leng paizou lou phial in ground ka pawtsan. Kiginni zaan ka golh petmah. Lawmte World Cup 3rd Place kituh en a a buai mahmah lai un, kei chu gimlua in ka ihmu hithit mai.
July 11, 2010 Pathianni zing hong suak a, ka gim a bei thei kei. Ka phei khong na deuhdeuh hileh kilawm. Zan a ka ball peekna boot khong mi' a ka khelh khop ahih ziak in, mi'n poimoh kha le uh chin peih lou sasa in a pe di'n kava diang khia a, huai kawmkawm in Zingchiang office kai ding peih huai kei na maizen e chihte kava ngaihtuah neuhneuh hi. Huchia boot pia a Lunte te' inn a ka omlai in ka Team Leader pa uh msg hong pai a, zingchiang server buaina a omlai ziak in suty ding chih msg ka mu a, kipaklua hizenpi ka gingta pah theikei. Ka message thakthak zozen hi.
World Cup Final leng enlou ding ka chih a hina a, en kha thei chia kipaktak a ka omlai in ka Nau Didim in hong phone a ka pik-up leh, "U Lam, I Pa Thang in tumah in honna beisan ta. Ka U Bert leng nang ana hilh mai in ka buailua", chi in fone a koih nawn hi. KA gen ding le ka theikei.
Ka Pathang (Ngulchinthang)kha Ka Nu' nuai a a nihna ka Nuniang' pasal a hi a, mi polhnuam, awl chikchik a pau khiankhian, phone hi in, taksa a kimuh hileh a hoih hon thuhilh mangngilh ngei lou mi khat ahi. Ka nuneute deihsakna ziak in a pasalte uh ka paneute' deihsakna leng ka tang bok ua, kou a ding ahih nakleh chiklai peuh in panpih din aman sa gige uh hi.
Zanlam February a innlam ka va pai un leng ka Pathang bel damlou gige sim himah leh ana hat mahmah ta hi. Amah a nasem zou hinai kei mahleh St. Paul school a nasep ding khenkhat aman a la a, mi kilohsak in a goih sawn hi. Nikum banghun hiam a pat hong damlou diak deuh ahi a, huchia nasem te enkawl khong a pawt zou gige ta chihte kava muh in kava kipak petmah hi.
Himahleh khalui kha lailak khong a pat hon buaise thak in Lamka Damdoi inn leh Shija, Imphal tanpha a puak in ana om a, hong hoih mai ding in ka gingta lotel hi. Himahleh lam et louh laitak in July 11 ni in hon omlouhsan chih kazak phut leh ka diip bang hawm in, a mel hiai leitung ah mukha ngei nawnlou ding ka hi chihte ka ngaihsut chiang in naa kasa petmah a, kei kia lah ka hi bok a, kup na ding neilou in Pathian kiang ah ka thum mai hi.
Tun innlam va pha leng ka Nuniang kiah bang ka genta dia? Ka Pathang, itna leh deihsakna toh hong thuhilh khiankhian sek pen ana om nawnlou dia, a aw za ngei nawnlou ding ka hi chihte ka ngaihtuah in ka lung a leng a thawmhau ka kisa hi. Himahleh amah zaw leitung haksatna te leh lunglen khongaihna te thuak nawnlou ding ahi chih ka theih in ka lung a nuam a, chiau i gal ah dawnbang kituak nawn ni mo Pathang, khenlouhna gam ah ka chithei lel hi.
Pathang, kong phawklua, kong ngai lua!
No comments:
Post a Comment