Saptuam’ Dan Siangthou chih teng lel i zak leh bangle i chimul thou thei di khop a ngaih kammal ahi. Saptuam dansiangthou a kitenna nei sahkhua ina hih khak sese hampha ka kisa. A thupi lua a, Pastor in lutung ah kitenni a khutnga zen a vualzawlna a ngetsak kha chu a lungkim huai peetmah ban ah, mavan huai, lohching huai kasa.
Ahihleh bangziak a khovel a kitenna tampi omte lak a Kristiante kitenna kha Kitenna Siangthou chi sese i ding ua? Bangziak a kitenna dangte siangthou chih a omlou? Vaite bangle a nu leh pa lemsak a thupi tak a kiteng zuazua sam ua, huaite lah kitenna siangthou/ dansiangthou a kitenna kichi lou zel, bangziak ahi di?
Tua Saptuam’ Dan Siangthou a Kitenna i zat lel pen bang pansan deuh a i neih uh ahia le? Bible a kiten didan kigelh bang pentak pansan i ding ua? Dotna tampi om kasa. Bible a kitenna khat ka theih khelh keileh a chiang penpen chu Isak zi neihna ahi. A zi ding a sila pa un a pute kholam a va pisak chihtan i mu. Thukhun thak a Cana khua a kitenna chih a om. Bangchi bang a kitenna sai chihte a om kei. Uain dawn uh chih bel a kimu.
Thukhun lui a Isak zi neihna toh nidang a i pu-le-pate ana kigawmdan kha kituak kasa mahmah non thepthup hi. Tua i zat lel Saptuam’ Dan Siangthou a kitenna bel tumlam gamte hihdan chiinna mai in ka koih a, a bang a thupi luat tuamna chi ut lampang ka hi. Saptuam’ Dansiangthou a kitenna muniam hihet lou in. Dan siangthou a kitenna ah bang value om a? Bang liansak i hi ua? Dan siangthou ahih ngalleh bangchi tuk in a siangthou a? Siangthou ahihna i zahtak zouna hiam chihte ngaihsut huaipi suak kasa mawkmawk hi.
Ahih leh tulai a i saptuam’ dan siangthou a kitenna te un a value tak a sem kha na hiam? I neih-le-lam lahna(show) maimai bang dek dek mawk hilou hiam chih in om zel. Bangziak in chihleh, hih ding tuamtuam tampi kibehlap mawk ta hi. Huaite tel lou a hithei lou chihna thu bel a om kei. A hithei lo tham. Himah leh mi’ hihdan lou lua ava hih ding zum huai hon bang thei mawk hi. Kitenna na a banner maimai ah leng nna tampi kinga mawk hi. A banner himhim uh le, thring lua. Mounu mou puan le, moupa coat le, a biak inn chei deuh di hi a, chihte a neuhneuh, houchik bang, lah i thupi ngaih mahmah te uh hinawn geet. Mou nei di lam te bang in a lopna a tuam in bawl zou kei leh, kipak lou uh hiale chih hipah mawk. Zi nei/pasal nei di bang loan la zenzen a kipat ngai ahi chih khong a gen uh ka zasek a ka gingta vanglak.
Lehlam daih a tua a tung a Kitenna i gen nuaisiahna hi hetlou in, hichi’n hileh bang a chi dia? I tawndan zui in, a mou nei dingte toh a kha khe ding lamte kihou tuak in, Biak inn a kitenna chih omse lou in inn sung khat a kigawmna leh kipiak khiatna nei uh henla, i saptuam enkoltu kiang ah ka tanu vualzawlna hon ngetsak in/kitenna vualzawlna hon ngetsak in chi bang hita leng i Pathianthu toh kikalh lua a hi diam? I saptuam in kitenna dan in hon pomsak diam? Hon nohkhia in danpua ah hon koih dua’m? A hih theih tuak i sa hia? Ahih ka leh tawndan i nei chiat. Huai a i tawndan bang chiat in kigawmna khat neisuk mail eng. Etsakna in Paite i hihleh PTC Court chihdante a kiteenna va nei hileng, huai pen i saptuam in a pom thei diam? PTC inlah kiteenna certificate bang hon issue thei zomah ding uh, India khua-le-tui ihihna ah leng dan toh kituak zomahmah lai di chih bang ngaihsutna ah om ve aw.
Hiaite i gen dendon na ziak a hih leh tulel a i paidan Saptuam’ Dan Siangthou a kiteenna ah seen-le-pai tam a bat luat ziak leng ahi. Minautang a kuamah peuh a dia affordable ding, puakgik kiguan lou ding chi ut dan ihi. Innkuan pan dia kisa in bat tampi toh kipat touhpah vengvong sang a chu nuamzo dia gingta ka hi. A nei, a hau ten bel i ut dandan poi sa kei unteh, a ut dandan mah un hihzou/lawmzou un teh. Minautangte a dia kouzang ding geelna hi. Hiai i gen chiang in khenkhat in Saptuam’ dan ah sen-le-pai tamlou, moupuan, leh a lopna chihte saptuam’ dan ahikei a chi uh. A dikmah ahi a thu in. Himah leh ava hih taktak chiang un tua i gen dan ningniang hong hih theihlouhna tam mahmah zel hi. Moupuan silh sese a kiten ding chih a hikei, himah leh sum tampi seng in khelh a ngai. Mi’ hihdan mah a hih ut zel i hihna ah. Ban ah tua dan a moupuan khel, lop zuazua chihte i paidan tangpi leh i zuihdan ahih ziak ahi. Houchik a khat in saptuam dan a zi neih sawm chini. Huai kha a thu inndongta lak a hon gen chiang ua, khat in huchi hial hilou hive aw, huchi tel a hihleh kei vok khat in kong pang di ahihkaleh ken moupuan khelhman ka pang di chih hong om. Huchia khat ama vailoupi a hong pan chiang a a innteek te a dia le om maimai theihna hong hilou zel. Huai ziak a tua sen-le-pai tam i chihte toh hong kizom kha teitei mah ahi.
Huchi ahihleh tua I Saptuam dan kitenna omsa bang a tunglam a I gen dan in bawlthak zek hile hang, kigu/kitaipih chia danpua a i koih ding a tawm deuh khamah na. Dan a kiten a Pastor khut ngak ding chu ut lua, neih-le-lam in daihlou a kigu mai chihte khong “Kingaihna Khelhna a Puuk” va chih khum hilhial a danpua a va koih mawk pen dik gige mah ding a diam ka chi. “Kingaihna Khelhna a Puuk” chih thummal pen beek om keileh a dan om lai kasa. Saptuam dan zuilou/palsat a ana kiten ziak un danpua a koih ahi chihtan theihsiam huai mahmah. Kingaihna Khelhna a Puuk chih mawk, kigu teng le huai ana hikhinpah lou maithei ahi. Hiai dan a kigu a I nohsuah tampi mah dan Saptuam’ dan a i gawm a etton taak i chihte’ sangmah a etton tak, siangthou tak a ana kingai a, ana ki it te le himai thei uh ahi thepthup in. A khen bel taklek ziak a huchia kigu chihte om mah leh.
Kuamah kawktuamna hihet lou in, etsakna in: Khopi lam ah tulai in kiteng a nupa lah hilou, nupa lou lah hilou, live in chih khong om lotham ahi. Huchibang a live in khawng innlam a pai vengveng in dan siangthou a va kiteng, Saptuam in pakta, nungak-tangval etton taak chi laidep, tuailaipawl bang in lapawl hi’n gift hita leh pezomah. Ban ah hiai bang a saptuam’ dan a kitenna a khen khat in khopi a a omdan khong uh kiseelna maimai a zang ta uh hilou hiam chih huai hi. A ziakbel huchia saptuam’ dan lung gulh a kiteng te kuamah in bangtan a siangthou chih I sui kei a, amau a kingam nak ua leh I chi sek. Hiai thu i gen chiang in amau leh Pathian’ kal eivele i chi sek. Huchia amau leh Pathian kaal di bang thouthou kigute le amau leh Pathian’ kal chisuk le himai eivoi maw le. Danpua/dan sung chihte om lou mai di eivoi.
A bangteng hileh ka gen ut tak ahih leh tua i Kristian kigawmna leng tumlamte a i lak ahi a, huai kha heilam dang deuh in, i tawndan toh kizui, Pathian thu toh kikalh hetlou, a zawng–ahau in zoh theih dia kitenna chikhat i ngaihsut ua, i puahphat hun uh hita lou hiam chi ut ka hi.
No comments:
Post a Comment